Palm Sunday (C)

SEMANA SANTA

  Ginasuguran naton karon nga Domingo ang aton pagsaulog sang Semana Santa, sa kita nagapamalandong sing maayo sa mga gin-agihan nga kasakit, kamatayon, kag pagkabanhaw sang aton nga Ginoo.

  Karon nga Domingo aton masaksihan ang Iya mahimayaon nga pagsulud sa Jerusalem, sa diin Sia luyag nga himuon sang mga tawo nga ila nga “hari”. Ginasakay nila Sia sa asno, kag ginhumlaran sang ila mga kunop ang Iya nga gina-agyan, kag nagkuha sila sang mga “ramos” nga amo ang ila ginwagayway sa pagdayaw sa Iya.

  Amo ini ang tawohanon nga “reaksyon” nga ginpakita sang mga Judeo sa aton Ginoo tungud sa kabantugan nga naglapnag sa Iya mga ginuhatan sang mga milagro kag mga katingalahan nga ila na-eksperyensyahan sa Iya. Para sa mga tawo, ang aton Ginoo may yara nga ginahuptan nga mga sabat sang ila tawohanon nga mga kinahanglanon, sa bagay nga Sia isa gid ka maayo nga “potensyal” para nga malambut nila ang “kahilwayan” sa ila politikal nga pagkabuhi!

Mabaskug sila nga nagsinggit sang: “Hosana, sa Anak ni David!”, kay katulad sa kay Haring David, luyag nila nga aton Ginoo “magpakig-away” para sa ila sa pagsumpo sang pag-gahum sang mga Romanhon sa ila.

  Mga utod, diri nagasugud ang hitabo sang Semana Santa kag sa aton pagpadayon sini, aton matalupangdan nga ining mga tawo nga “nagdayaw” sa aton Ginoo, amo man sa ulihi ang magapangayo sang Iya kamatayon paagi sa pagsiniggit nga: “Ilansang Sia sa Krus, ilansang Sia sa Krus!”.

  Ang selebrasyon sang Semana Santa tuman gid kalapit sa aton tagipusuon, ayhan, kay ang gin-agihan sang aton Ginoo indi man maglayo sa aton.

  Sa aton nga pagkabuhi, may mga hitabo man nga sang daw bugana kita madamo ang mga “nagapakig-abyan” sa aton, apang kon mag-abut na gani ang remalasos kag mga pagtilaw, masapwan ta na lang, nga kita NAGA-ISAHANON, kag wala na ang aton mga “abyan” sa aton palibut. Daw katulad sang aton Ginoo sa Krus nga nagpanawag: “Amay ko, ngaa nga ginpatumbayaan Mo ako?”.

  Mangin isa kita sa aton Ginoo sa sini nga tinion.

PAMALANDONG SA EBANGHELYO

 ANG HARI NGA ANG IYA TRONO KRUS!

  Sa aton Ebanghelyo subong nga Domingo, ginasaysay sa aton ang inagihan nga kasakit kag kamatayon sang aton nga Ginoo suno kay San Lukas, kag sa sini nga panaysayon, aton makita ang pamatbat sang kamatayon nga ginpatuhoy sa aton Ginoo, kag indi lamang kamatayon, kundi, ang isa ka MAKAHULUYA nga kamatayon tungud ang iya kamatayon sa Krus, ginapamatbat lamang para sa mga makawat, sa bagay nga Sia ginpatunga sa duha ka mga makawat.

  Inadlaw lang ang nagligad sang gindeklarar sang mga Judeo nga luyag nila nga himuon nga “hari” ang aton Ginoo kay nagalaum sila nga Sia amo na ang makahilway sa ila gikan sa pagkaulipon sang mga Romanhon, kag karon, sila na ang nagpangayo sang Iya nga kamatayon didto sa Krus.

  Ang Jesus nga kuntani himuon nila nga hari nga magpungko sa trono nga harianon, isa nalang karon nga hari nga ang iya korona mga tunok, kag ang iya trono amo ang krus. Para sa ila isa ini ka kabuangan kag pagyaguta sa tawo nga nagpaka-dios. Sa ila mga mata, ginhimo nila nga “palataw-an” ang aton Ginoo tungud para sa ila isa Sia ka impostor nga nagpakuno-kuno nga Sia amo ang Anak sang Dios.

  Apang sa pagpadayon sang mga hitabo, ginpamatud-an sang aton Ginoo ang Iya  mga ginpanagna, kag ini nagpahayag lamang sang isa ka kamatuoran– nga Sia amo ang matuod nga Hari… ang matuod nga anak sang tawo… ang matuod nga “matarong nga tawo” suno sa ginpamulong sang kapitan sa katapusan sang Ebanghelyo, nga nagdayaw sa Dios!

FOOD FOR THOUGHT

“Sacrificing your happiness for the happiness of the one you love, is by far, the truest type of love.” (Chief Edward F. Croker)