5th Sunday of Lent (C)

PAPA FRANCISCO I

  Pagkatapos sang lima ka beses nga pagpili (5ht ballot of the Secret Conclave), ang hubon sang 115 ka mga Kardinales sa bug-os nga kalibutan, nagpili sang Kardinal sang Argentina Jorge Mario Bergoglio nga mangin aton nga Santo Papa sa idalum sang ngalan nga Pope Francis I ukon Papa Francisco I.
  Wala gid ginadahum-dahuma nga magtunga ukon mapilian ini si Kardinal Bergoglio nga mangin Santo Papa tungud nga sa tanan nga mga “kandidato” ukon “Papabili” (ang ginapangaluyagan nga mangin Santo Papa), sia ang malayo sa ginapa-abut.
  Si Kardinal Bergoglio amo ang pinakatigulang nga mangin possible nga Santo Papa tungud sia naga-edad na sing 76, salungkaki sa ginapaabut sang kalabanan nga ang bag-o nga Santo Papa mangin isa ka huben nga Kardinal. Magluwas sini, madamo nga mga “lutaw” nga mga Kardinales ang nagtunga nga may kapasidad man nga magpamuno sa aton nga Simbahan.
  Matuod nga indi gid naton mapaktan ang binubuot sang Espiritu Santo, tungud Sia lang ang nakahibalo sang pinakamaayo para sa Simbahan. Kon ang tawo nagatulok sa pang-gwa nga kalidad kag masarangan sang isa ka tawo, ang Dios nagatulok sang kapasidad sang aton TAGIPUSON.
  Si Papa Francisco I, amo ang Nahauna nga Heswita nga pari, kag ang ika -266 nga Santo Papa nga napilian sang aton nga Simbahan sa sulod sang sobra 2000 na katuig sang maragtas sang tawo, kag sa iya nga Sagrado nga Palangakuan, ang aton bag-o nga Santo Papa nagsiling: “This journey of the Church of Rome which presides in charity over all the Churches. A journey of fraternity, of love, of trust among us. Let us pray for one another. Let us pray for the whole world, that there may be a great spirit of fraternity…”
  Antes sia maghatag sang iya nga bendisyon, nagpangayo anay sia sang pangamuyo sang mga tawo nga sia bendisyonan sang Mahal nga Dios bilang aton Santo Papa. Updan naton ang aton bag-o nga Santo Papa Francisco I sa dalan sang PAG-ULULUTOD KAG PAGHIGUGMA.

PAMALANDONG SA EBANGHELYO

 HILWAY KA BALA O BINILANGGO?

  Maathag sa mga pagpanudlo sang aton Ginoo nga yara nagapanghikot ang gahum sang aton Amay sa langit… maathag nga ang Iya mga pulong nagabuyok sa mga tawo sa paghinulsol kag pagpanumbalik sa aton Amay, sa diin ang tagsa-tagsa may yara nga kakulangan kag kapaltahan. Indi ini matago nga kamatuoran sa mga tawo nga nakasumalang sa aton Ginoo, sa bagay nga bisan ang mga “gwardya” nga ginsugo sa pagdakup sa aton Ginoo, wala sing may mahimo, sila na-”paralyze” sa otoridad sang aton Ginoo. Para sa ila, matuod gid nga Sia amo ang Kristo nga ginapahayag sang mga tawo.
  Sa pihak nga bahin, ang mga Fariseo, nga nagakabig sang ila mga kaugalingon nga amo ang “otoridad” sa pag-interpretar sang mga kasulatan kag mga “master” sang espiritwalidad, indi makabaton sini! Nagu-ot sila sa ila painu-ino nga sila lang pirmi ang tama… ang insakto… ang mayad! Sa bagay nga nagnin “sirado” na ang ila mga panghuna-huna kag nangin matig-a na ang ila tagipusuon sa pagtalupangud nga sa mga ginabuhat sang aton Ginuo, maathag nga ginatandog sang Mahal nga Dios ang Iya mga katawohan.
  Ayhan ang mga Fariseo mayad mag-interpretar sang mga kasulatan, apang nagkulang sila sa otoridad tungud malayo sa ila buhat ang pulong sang Dios nga ila nasiyasat. Ang otoridad sang aton Ginoo yara sa Iya BINUHATAN. Tungud sang pagpakamatarong sang mga Fariseo, sila nag-obra sang ila kaugalingon nga bilangguan!

FOOD FOR THOUGHT

“A position of authority is neither necessary nor sufficient for the exercise of leadership.” (EricWerkowitz)