8th Sunday in Ord. Time (C)

BULAG SA ATON KAUGALINGON NGA SALA

May lima ka bulag nga ginpakapkap sa elepante agud ila ma-“describe” ini suno sa ila  pangapkap. Ang isa nakakapkap sang tiil sang elepante, kag siya nagsiling: “Ang elepante gali daw haligi!” Ang isa naman nagkapkap, kag nakapkapan niya ang dalunggan sang elepante kag nagsiling: “Indi, ang elepante ya, daw paypay”, ang isa naman nakakapkap sang ikug, kag naghambal: “Ang elepante gali daw pisi” Samtang ang isa naman nakakapkap sang ilong, kag nagsiling nga ang elepante gali, daw man-og, kay nakakapkap siya sing malaba nga bagay. Ang isa naman, nakakapkap sang sungay sa ilong sang elepante, kag nagsiling siya nga ang elepante daw sa bangkaw gali nga mataliwis.

Tanan sila tama, apang wala nila nakuha ang pangkabug-osan nga imahen sang elepante tungud ang tagsa-tagsa nagapainu-ino nga tama ang iya nahibalu-an. Gali ka yang ila lang nabal-an amo ang isa ka bahin sang lawas sang sapat.

Indi pwede makatudlo ang bulag sa bulag, kay kon matabo ini, pareho sila nga mahulog sa kanal. Amo ini ang ginahambal subong sang aton Ginoo sa Ebanghelyo. Kinahanglan nga kita nga nagagiya sa aton utod sa tama nga dalan, nakahibalo man sang dapat naton nga paga-agyan. Dapat ang nagagiya nakahibalo sang tama nga dalan agud indi sila magtalang. Sa bagay nga kita gina-agda nga dapat gid maghibalo sang tama nga buluhaton agud indi kita makapatalang sa aton isigkatawo nga nagapangita sang tama nga dalan. Indi lamang nga isa ka kamatu-oran ang dapat naton mahibalu-an sa aton pagtuo kundi nga dapat kita magtu-on sa mga kamatu-oran nga ginatan-ay sang Mahal nga Diyos. Tanan kita wala naga-angkon sang kamatuoran, tanan kita nagapanglakaton nga nagatu-on nga malab-uy ang bug-os nga kamatuoran.

Amo gani nga indi kita makasiling nga kita lang ang tama, nga amo ang batasan sang mga hipokrito. Abi nila sila na gid ang nagahawid sang kamatu-oran sa bagay nga natal;upangdan nila bisan ang diutay nga sala sang iban. Amo gani nga ginatawag sila sang aton Ginoo nga mga bulag nga manugtuytoy kay wala sila makatalupangud nga ang ila gali nga kakulangan, mas daku pa. Mayad sila makatalupangud sang puling nga diutay sang iban, apang ang ila mga mata ginakapulan na sang daw tablon kadaku nga muta sa ila mga kalimutaw.

Ang aton Ginoo nagatudlo sa aton sang isa ka importante nga bagay sa aton kaangtanan sa isa kag isa. Nga dapat kita maghalung ilabi na gid sa pagtalupangud sang kasal-anan sang aton isigkatawo. Dapat naton danay, una sa tanan, nga talupangdon nga kita may kakulangan man kag dapat aton una sa tanan ang aton kaugalingon nga kapaltahan, antes kita magtalupangud sang sayup sang iban. Dapat naton danay tan-awon ang aton mga bunga sang sa maglantaw kita sang bunga sang iban. Dapat danay limpyohon naton ang aton mga ugsaran, antes kita maglab-ut sa ugsaran sang iban.

Ang aton nga kalhit indi naton mag-ipatungud sa iban nga nagahimud-os man nga magtinlo sang ila kaugalingon nga kalhit. Luyag naton madiparahan ang sayup sang iban agud sila lang ang pagabasulon, apang ang aton kaugalingon nga kasal-anan aton lang ginatabunan agud indi kita mamulalungan. Luyag naton nga makit-an ang kasaypanan sang iban agud matakpan ang aton kagarukan. Luyag naton nga magsala ang iban, agud ang aton sala matabunan.

Indi amo sini ang panimu-ot sang aton Ginoo. Luyag Niya nga kita mangin tampad sa pagtalupangud sang atyon kapaltahan agud kita makapamunga sing maayo nga binuhatan sa atubang sang Diyos kag sa aton isigkatawo.

7th sunday in ord. time (C)

ALAGYAN KA SANG DIYOS

“Himo-a ang maayo sa imo isigkatawo.” Amo ini ang mga panugyan sang aton Ginoo sa aton nga Santos nga Ebanghelyo subong. Ginatudlu-an kita nga indi kita mga tawo nga nagahulat lamang sang aton nga mangin sabat sa mga nagahimo sa aton sang mga bagay sa ila naluyagan, kundi nga kita gid ang mangin GINTUNA-AN sang kaangtanan nga maayo sa aton isigkatawo. Lain ini sang sa ginatudlo ni Confusius sa mga Intsik nga “indi naton pagbuhaton sa aton isigkatawo ang indi naton nga luyag nga buhaton sa aton.” Ang kinala-in sini tama ka klaro nga si Kristo nagasugo sa aton sa pagbuhat sang isa ka bagay nga dapat naton buhaton sa aton isigkatawo. Indi lamang nga magpa-iway kita sa pagbuhat sing malain sa aton isigkatawo, wala sapayan nga kita wala man sing ginabuhat tuhoy sa ila. Ang aton Ginoo nagatudlo sa aton nga dapat kita magbuhat sing mga butang tuhoy sa ika-ayo sing tagsa-tagsa. Gani nga indi kita sarang makapakamatarong sa aton kaugalingon nga wala man kita saing ginabuhat nga mala-in, kag gani  luwas na kita. Apang kon pamangkuton kita, “Ano ang ginbuhat naton nga maayo?” Basi wala man kita sing may masabat kay kita nagapalagyo lang sa pagbuhat sing mala-in sa aton isigkatawo.

May isa anay ka tawo nga kada halin niya sa iya opisina, pirme lang niya gina-agyan ang mga manugpakilimos, kag mga bata nga nagatalang-talang, subong man ang mga ginagutum kag ang mga imol. Nagsiling siya sa iya pagpangamuyo saang siya maghapit sa isa ka Simbahan, “Ginoo, sang nagapa-uli ako, nasumalang ko ang mga imol sa karsada, nga-a nga ginatugutan Nimo ini? Siguro wala Ka gid sing ginahimo para man sila makatibawas?” Amo ini ang iya nga pangamuyo sa tagsa ka adlaw nga maghalin siya sa iya opisina. Ginabasul niya ang Diyos nga naga buta-bungol lamang sa sitwasyon sang iya mga isigkatawo nga nagakinahanglan. Halos kada adlaw nga wala sing palta, amo ini ang iya pangamuyo. Isa ka adlaw sang siya nagapangayo, sa hinali lang nagsabat ang Ginoo, “Anak, ko, nabati-an ko ang imo pangamuyo.” Kag nagsabat siya: “ Hai ano ang ginbuhat Mo? Ngaman nga madamo sang mga imol?” Nagsabat ang Diyos: “May ara bala ako ginhimo anak.” Nagsabat siya: “Nano Ginoo?” kag ginsabat siya sang Diyos: “Ginbuhat ko IKAW!”

Huo mga utod, kita ginbuhat sang Diyos agud nga kita magbuhat sing kaayo sa aton isigkatawo. Paagi sa aton, aton nga ginapalapnag ang kahilwayan nga ginahatag sang Diyos sa aton, paagi sa aton ginahatag sang Diyos ang kasulhay sa pagpangabuhi paagi sa pagbulig sa mga nagakinahanglan, paagi sa aton, kita ginahangkat sa pagbuhat sang tulumanon nga dapat kag angay gid sa aton utod nga tatapon.

Amo ini ang kaundan sang aton Ebanghelyo subong. Si Jesus nagatulod sa aton sa pagkabuhi nga nagabuhat sang maayo nga mga butang sa aton mga utod, ilabi na gid ang paghigugma sa tanan bisan pa ang aton mga kaaway. Indi naton sarang mapasa lamang sa Ginoo ang basul, tungud nga Siya nagtuga sa aton kag aton nga obligasyon ang pagtamud sa mga wala-wala kag ginpatumbayaan nga aton kaingud.

Mapuslanon kita tanan kon kita nangin instrumento sang Diyos sa pagpahayag sang Iya nga pag-alay-ay sa aton sa aton mga kinahanglanon. Kita ang Iya pamaagi nga makalab-ut sa aton isigkatawo nga nagakinahanglan. Sa aton pagbuhat sini kita magabaton gid sing ginatus ka pilo, nasukob, nadasuk, nauyog, kag naga-awas nga mga grasya. Kita ang katuwang sang Diyos.

6th Sunday in Ord. Time (C)

IMOL, GUTUM, NAGAHIBI KAG GINAPIGOS

Suno sa aton Ebanghelyo ang mga imol, gutum, nagahibi, kag ginapigos, ginakabig sang aton Ginuo nga BULAHAN! Nagakahulugan bala ini nga luyag sang Diyos nga kita mawad-an kag magpangasubo?

Sa konteksto sang pagpanudlo sang aton Ginuo, ini nagatumud sa pagka-umalagi sang mga butang sa kalibutan! Nagsayup kita sa pagpanumdum kag pagpati nga ang mga butang sa kalibutan, madala naton sa pihak nga kinabuhi… nga ang mga pagkabutang naton wala “nagapan-os!”… nga ang mga pagkabutang naton wala pagkadula! Ginapahanumdum kita sang aton Ginuo nga ang kabuhi naton sa sining dutang luhaan may yara nga kasugpun sa langit, kag ang aton ginabuhat diri sa duta may katumbas nga “padya” sa Ginharian sang aton Amay. Kon sa aton pa, ang mga pagkabutang diri sa kalibutan UMALAGI lamang– manggad, kwarta, pagkabusug, pagpangalipay, pagdayaw, kag pagkamakagagahum. Sa masami ini nagabuyok sa tawo nga mangin “garuk” sa iya pagpangabuhi. Sa sobra nga paghigugma sa butang nga dutan-on, masami ang tawo nagagamit sang mga indi maayo nga mga pamaagi agud maangkon niya ang iya ginahandum. Ang tawo nangin “hakugan” sang mga oportunidad, bisan pa sa paglapak sang deretso sang iya isigkatawo, lamang maangkon niya ang iya luyag! Ini nagatulud sa tawo nga mangin-MAIYA-IYAHON!

Amo gani nga bulahan ang mga imol, gutum, nagahibi, kag ginapigos, tungud wala sila sing masaligan, kay wala man sila sang dutan-on nga gahum. Ang ila gid lang SALALIGAN amo ang Diyos. Utod, kay sin-o ka bala nagasalig? Sa umalagi nga mga butang ukon sa nagapadayon sa wala’y katubtuban… sa ginbuhat ukon sa Magbubuhat?

TUNGOD KAY KRISTO

May duha ako ka pamangkut sa inyo: Una, sin-o sa inyo ang gusto mangin imol, gutom, masinulob-on kag ginakaugtan sang tanan? Palihog alsa sang kamut! May ara gid man bala nga maalsa? Ikaduha, sin-o sa inyo ang gusto mangin manggaranon, busog pirme, palakadlaw kag ginatahod sang tanan? Segurado, ang tanan maalsa gid sing kamut bisan nga bag-o lang kamo gintawag ni Kristo nga mga “KAILO” o buangbuang.

Kon kaisa, si Kristo nagapalibog sang aton ulo. Kay hamakon mo, may ara bala nga ginikanan nga gusto nga ang ila mga bata mangin imol, gutom, masubo kag ginakaugtan? Apang si Kristo nagtawag pa sa ila nga mga “BULAHAN”. Di bala ang Dios ang pinakamayad sa tanan? Ngaman ginatawag niya nga ‘bulahan’ o ‘maayo’ ang sahi sang kabuhi nga kinaandan ta tawgon nga ‘daw ginsumpa’ o ‘kalainon’?

Ang buot silingon ni Kristo diri amo nga kon sin-o man ang makabaton sining sahi sang pag-antus o mga pagtamay bilang ‘presyo’ sang ila pagsunod o pagtuman sa iya, amo ang minatuod nga ‘bulahan’ o ‘dalayawon’. Ang kinaandan nga mga dalayawon sa mata sang kalibutan, talamayon gali sa mata sang Dios. Ang kaalam sang kalibutan, kabuangan gali para sa Dios.

Subong, wala na kita ginahingabot kag ginapatay bangud sang aton pagtuo kay Kristo. Apang usisaon ta kon ang tanan bala nga aton ginahimo sa aton kabuhi, ginahimo ta bala para o tungod kay Kristo? Kon kita papilion sa obra nga may damu sang kwarta tungod sa pagdinaya o ‘korupsyon’ kag sa obra nga may gamay lang nga kwarta tungod ‘honest’ kita, diin ang aton pilion?