Holy Family (C)

SAKDAGON TA ANG ATON PAMILYA!

  Ginasaulog naton subong nga Dominggo ang Kapiestahan sang Sagrada Pamilya ni Jesus, Maria kag Jose, ang aton nga “ban-awan” sang sahi sang pamilya nga aton ginahandum.

  Matahum nga aton tulukon ang Pamilya sang aton Ginoong Jesus. Siya nagapakita sa aton sang kaangtanan sini sa aton Amay sa langit. Ang ila nangin giya sa ila pagkabuhi amo ang pagtuman sang kabubut-on sang Dios… sila nagapanglakaton nga may pagsalig nga ang aton Amay sa langit indi gid magpabaya sa ila.

  Masubo nga sa aton nga panahon subong, ang aton mga pamilya amo ang masami nga ginasumpiya kag ginahingabut sang kalautan nga marumpag. Ang isa sini ka klaro nga paghingabut amo ang pag-apruba sang “RH-BILL” sang aton mga Kongresista kag mga Senador.

  Si Cardinal Luis “Chito” Tagle nagpanugda kag nagpamangkut kon bala ang ila ginahandum nga “kabuganaan” maangkon gid sang minatuod paagi sa pag-apruba sang RH Bill, ukon makadala pa gani ini sang mas daku pa gid nga halit sa aton mga pumuluyo? Sa handum naton nga mag-umwad sa “materyal” nga kabuganaan, basi ini pa gani ang mangin kabangdanan sang pagkaguba sang aton mga pamilya kag magatudlo sa aton sa pagpakanubo sang balor sang kabuhi!

  Sagrado kaayo ang kabuhi sang panimalay sa bagay nga mabaskug gid nga nagapamatuk ang aton nga Simbahan sa pag-apruba sang RH Bill, tungud iya nakita nga ang UNA gid nga apektado sini amo ang paghiusa sang pamilya.

  Bisan pa nga naaprubahan na ang RH Bill, kabay unta nga indi gid kita magkalipat sa paglantaw sang pagkasagrado sang aton mga pamilya sa idalum sang pagtuytoy sang Sagrada Pamilya ni Jesus, Maria, kag Jose.

                                                                                                                                                                                                                                              

PAMALANDONG SA EBANGHELYO

 PAGHIUSA SANG PAMILYA

  Sa kapiestahan sang Sagrada Pamilya ni Jesus, Maria kag Jose, ginabalikan naton ang hitabo sang ila nga pagpamiesta sa Paskwa sa Jerusalem. Ini nga piesta amo ang pagsaulog sang ila nga kahilwayan nga naagum sa pag-gwa halin sa Ehipto pakadto sa Ginpangako nga Duta sang Mahal nga Dios sa mga Israelinhon. Isa ini ka daku nga kapiestahan para sa mga Judeo, sa bagay nga bisan magpanglakaton pa sila sang malayo, ila ini ginbatas agud nga “makahiusa” sila sa ila mga kautoran sa pagpasalamat sa  Mahal nga Dios.

  Ang sagrada pamilya nagapakita sa aton sang ila nga PAGHIUSA sa kabuhi sa bagay nga sang “madula” ang aton Ginoo, naghatag gid ini sang daku nga “kalisud” sa Iya mga ginikanan, nga “wala gid mag-untat” sa pagpangita sa Iya tubutb nga ila Siya makita sa templo kaupod sang mga katigulangan nga mga Judeo kag mga Manunudlo sang Kasuguan.

   Ini nagapahanumdum sa aton sang paghiliusa nga nagaluntad sa kabuhi sang isa ka pamilya, kag ini man nagatawag liwat sang aton nga atensyon sa pagbalikid sang sahi sang mga pamilya nga nagakabuhi sa aton mga katilingban.

  Sa sining panahon sang Paskwa sang Pagkatawo sang aton Ginoo, ang aton man mga pamilya nagapanglakaton sa dalan padulong sa pagpasalamat sa Mahal nga Dios tungud sang Iya nga “regalo” sa aton sang Iya nga “Anak” sa pagkatawo sang aton Ginoo. Ayhan may mga “nadula” pa nga katapo sang aton panimalay. Kuntani ini mangin tion sang aton matuod-tuod nga paghiusa bilang isa ka PAMILYA.

                                                               

FOOD FOR THOUGHT

“There is no doubt that it is around the family and the home that all the greatest virtues, the most dominating virtues of human society, are created, strengthened and maintained”  (Winston Churchill).