Easter Sunday (C)

DIOS SANG MGA BUHI

  HAPPY EASTER! Amo ini ang malipayon nga panamyaw nga aton gina-abi-abi sa tagsa-tagsa sa karon nga panahon sa Kalendaryo sang aton nga Simbahan. Nagakalipay kita tungud nga NABANHAW na ang aton nga Ginoo. Sa Iya nga pagkabanhaw, ginpahayag ang kamatuoran nga gintigana sa aton sang aton Amay sa langit– ang kamatuoran sang KABUHI nga wala sing katapusan.

  Sa pagkabanhaw sang aton nga Ginoo, Iya gindaug kag ginpu-as ang gahum sang kamatayon, agud kita magpanglakaton nga mga KAPAGSIK sa aton pagpa-ngatubang sang mga kamatuoran sang kabuhi. Sa Iya pagkabanhaw, kita nga mga tumuluo, nag-ambit man sang Iya nga kadalag-an sa kamatayon padulong sa isa ka BAG-O nga kabuhi.

  Ang “Easter-time” isa ka tini-on sa diin nagapamukad-kad naman ang mga kabulakan… nagapanalingsing ang mga kakahuyan nga gin-agihan sang panahon sang pagkalaya. Sa bagay nga ini nga tini-on isa ka daku nga pagpahayag nga sa tapos kita maka-agi sang mga kalisdan kag kapierdihan ukon kapaslawan, may yara nga nagahulat nga isa ka bag-o nga bwasdamlag tungud ang aton Ginoo nagahatag sa aton sang isa ka bag-o nga kabuhi paagi sa Iya nga pagkabanhaw.

  Ini nagbuyok sa aton nga ang tagsa-tagsa sa aton may kahigayunan sa pagbag-o… ang tagsa-tagsa sa aton, sa grasya sang aton Ginoo, may kapasidad sa pagtalikud sa kalainan agud magpamukadkad ang isa ka bag-o nga kabuhi… isa ka bag-o nga tinuga… isa ka bag-o nga pagsugud. Nagapahayag man ini nga indi pa ulihi ang tanan. Sa gihapon ang tagsa-tagsa sa aton makabug-os liwat sang aton kaugalingon tuhoy sa pag-agi sa dalan sang isa ka matuod nga pagtuo– ang pagtuo nga ginapahayag indi lamang sang aton mga bibig, kundi labi sa tanan, sang aton mga binuhatan.

  Nagdaug na ang aton Ginoo sa Iya pagpakigbato sa gahum sang kadulum kag kamatayon, kag aton na ini karon nga tion ang pagpangatubang sa pagdaug sang aton kakulangan kag kasal-anan paagi sa aton paghimud-os nga mangin saksi sa aton bag-o nga pag-ginawi sa nabilin nga tinion sang aton kabuhi!

 

PAMALANDONG SA EBANGHELYO

 ANG LULUBNGAN NGA BUKAS!

  “Ginkuha nila ang Ginoo!” Amo ini ang balita nga gindala ni Maria Magdalena sa mga Apostoles nga nagapanago tungud sang ila nga kahadluk nga mapatay katulad sa aton Ginoo. Ini nga balita amo ang nagtulod sa mga gintutun-an sa paglantaw kon bala matuod ini nga panaksihon nga gindala sa ila ni Maria Magdalena.

  Sa ila daku nga pagkatingala, ila nakita-an sang ila mga mata nga matuod, ang isa ka lulubngan nga ginsirahan sang isa ka daku nga bato, karon nagatiwang-wang na nga nabuksan, kag ang mga tela na lang nga ginsambod sa patay, amo ang nabilin sa amo nga duog.

  Ang sang una nga duog nga ginkabig nga madulum, mabaho, kag makahaladluk, isa na karon nga duog sa diin ginapahayg ang himaya, kahamut, kag pag-abi-abi. Ang lulubngan nga duog sang mga patay, nangin isa na karon ka duog sa diin ginapahayag ang matuod nga kabuhi!

  Amo ini ang Maayong Balita sang pagkabanhaw sang aton Ginoo– Sia naga-BUKAS liwat sang isa ka ganhaan sa aton sa pagsugud sang isa ka kabuhi sang pagtuo… sang paglaum… kag pagtikang liwat nga wala’y kahadluk bisan pa sa kamatayon tungud Sia nagdaug na sini paagi sa Iya pagkabanhaw.

  Ayhan ang lulubngan nagapahanumdum sa aton sang aton tawohanon nga kaluyahon, apang ang pagbukas sang aton Ginoo sa lulubngan, sa Iya nga pagkabanhaw nagahatag sa aton sang garantiya nga sarang naton malutos ang kadulum sang kalainan!

FOOD FOR THOUGHT

“Sacrificing your happiness for the happiness of the one you love, is by far, the truest type of love.” (Chief Edward F. Croker)