21st Sunday in OrdinaryTime (B)

TAMPAD VS PAKUNO-KUNO

“Paano naton mahibalu-an ang minatuod sa butig? Paano naton makilala ang “tunay” sa “peke”? Ang pang-”gwa” nga pagkatawo sarang makabulag sa aton sa minatu-od nga tinutuyo nga yara nagaluntad sa tagipusu-on sang tawo. Si Propeta Isaias nagpanagna sini sa iya nga libro: “nga ang Ginuo indi maghukum paagi sa Iya makita, ukon paagi sa sugid-sugid lang; Pagahukman Niya ang mga imol sing nagaka-igo kag apinan Niya ang kinamatarong sang mga mapa-inubuson.” Buot silingon nga ang Diyos indi malimbungan tungud sa aton ginapakita nga pamatasan, tungud Siya nagalantaw sa SULUD sang aton nga kasing-kasing! Amo gani nga mabaskug gid nga ginsulit sang aton Ginuo ang mga pulong ni Isaias nga Propeta ang nahanugud sa mga tawo nga ang ila pagkabuhi, indi sang tampad, kundi PAKITA-KITA lamang: “Ang Diyos nagsiling, ginapadunggan ako sining mga tawo sang ila mga BIBIG, pero ang ila tagipusu-on MALAYO gid sa Akon. Wala sing pulos ang ila pagsimba sa akon, kay ginapatuman nila ang mga kasugu-an sang tawo subong mga kasugu-an sang Diyos!” Ini sila gintawag sang aton Ginuo sa mga pulong nga SALIMPAPAW, tungud gani MANABAW ang ila pagkabuhi nga wala mapasad sa kamatuoran kundi sa KABUTIGAN!

Pila ayhan sa aton ang nagapati sa sini nga hulubaton: “Follow what I say, but don’t follow what I do”? Amo ini ang sayup sang mga manunudlo sang kasugu-an kag sang mga Pariseo sang panahon sang aton Ginuo! Kon amo sini ang aton pagkabuhi, masiling naton nga ang aton pagkabuhi isa ka BUTIG! Tampad gid bala kita sa aton pulong paagi sa paghatag katumanan sini sa aton buhat?

20th Sunday in Ordinary Time (B)

A FRIEND AT ALL TIMES

Ang isa sa mga pinakamatahum nga mapromisa sang isa ka abyan amo nga siya indi gid magbiya sa iya abyan bisan ano pa man ang matabo… Isa ka pagpakig-upod nga sa bisan ano pa man nga sitwasyon sang kabuhi, ara man siya gihapon– being ALWAYS THERE through THICK & THIN.

Ayhan, amo man ini ang ginahandum sang tagsa-tagsa sa aton- nga makakita kita sang abyan nga MATUOD-TUOD nga mangin kaupod naton sa aton pagpanglakaton… abyan nga makahangup kag makabaton sang aton “kaluya kag kahuyang” kag indi sa gihapon magbaylo sang iya nga paglantaw sa aton. Sa gihapon yara siya nga nagapalangga kag padayon nga nagatulod sa aton sa pagpadayon sang aton pagtikang sa kabuhi. Ginahandum naton ini nga klase sang abyan, tungud ini nga abyan mabudlay kaayo nga makit-an, kag kon aton makit-an ini, daw nakakita man kita sang malahalon nga manggad! Ini nga abyan nagabaton sa aton nga wala sang mga kondisyon, kag siya nangin “ka-bahin” man sang aton kabuhi tungud ang iya pagpakig-upod sa aton wala ginalaktan sang pagka-isip ukon pagpa-iya-iya, kundi nga lamang YARA LANG SIYA para sa aton.

Amo ini ang klase sang pagpakig-abyan ang ginatan-ay sang aton Ginuong Jesukristo sa tagsa naton ka pagsa-ulog sang Santos nga Misa– ang Iyang pagpakig-angut sa aton kabuhi paagi sa aton pag-ambit sang Iyang kabuhi nga Iya ginahatag sa bayhon sang tinapay kag bino nga amo ang Iya BUHI NGA LAWAS KAG DUGO. Sa sini nga paagi kita nagapakig-ambit sang kabuhi nga WALA SING KATAPUSAN tungud Siya NAGAKABUHI SA ATON kag KITA SA IYA!

19th Sunday in Ordinary Time (B)

TINAPAY SANG KABUHI

Padayon ang diskurso sang aton Ginuo nahanungud sa “tinapay sang kabuhi”, kag ini nga tinapay Iya karon ginpahayag nga wala sang lipud-lipud. Ini nga tinapay amo ang Iya nga UNOD, sa bagay nga ang mga Hudiyo nagkulumoron sa sini nga pahayag sang aton Ginuo. Para sa ila, imposible nga mabuhat ini sang Ginuo tungud nahibalu-an nila ang Iya “tawohanon” nga ginhalinan, kag indi pwede nga  Siya maghalin sa “langit”. Apang maathag nga ginpahayag sang aton Ginuo ang Iya nga “kaangtanan” sa Iyang Amay sa langit. Siya makapanaksi sini nga kaangta-nan tungud Siya wala magkari sa Iya kaugalingon lamang, kundi tungud kay ang Iyang Amay amo ang nagpadala sa Iya, kag tungud kay Siya ginpadala sang Amay, Siya man “nakakita” sa Amay.

Ang aton Ginuo ginpadala sang Amay indi lamang bilang tawo nga nagakabuhi sa aton tunga, kundi bilang pagkaon sa bayhon sang “tinapay” nga nagasagud sa aton agud kita may kabuhi nga WALA SING KATAPUSAN. Siya amo ang “BUHI” nga tinapay, kag ini wala sang liwan kundi ang Iya nga UNOD nga ginahatag sa aton, sa tagsa naton ka pagselebrar sang handumanan nga Iya ginbilin sang katapusan nga panihapon, sa diin Iya gintukod ang Sakramento sang Santos nga Misa. Diri Siya nahiusa sa aton sa himpit nga pamaagi tungud diri ginhalad Niya ang Iya nga kaugalingon bilang aton “tinapay sang kabuhi”- ginabaton naton ang Iya buhi nga unod nga amo ang nagahatag sa aton sang kahigayunan sa pag-ambit sang kabuhi nga wala sing katapusan. Sa sini nga kaangtanan, tungud kita nagaambit sang tinapay sang kabuhi, kita man naga-ambit sang kabuhi sang Diyos nga wala’y katapusan.