HOLY FAMILY (B)

HOLY FAMILY- Year B (Dec. 28, 2014)

(Luke 2:22-40)

“Gani, gindala nila ang bata sa Jerusalem agud ihalad sa Ginoo. ”

  Ginatulok naton subong ang panimalay ni Jesus, Mari, kag Jose, sa aton nga pagsaulog sining kapiestahan sang Sagrada Familia- isa ka matinuohon kag matinumanon nga panimalay, nga katulad man sa aton, nagahimakas sa mga pagtilaw nga gina-atubang sa pangabuhi. Ginsaysay ni San Lukas nga tungud indi sila makasarang sang dulot sang mga manggaranon nga baka ukon karnero, ang ila gid lang mahalad amo ang duha ka bilog nga kuyabog nga salampati. Ayhan imol si Jose kag si Maria sa material nga bagay, apang “manggaranon” sa pagpabilin nga matutum sa kasugoan sang Mahal nga Dios, kag amo ini kon ngaman nga sila ginhatagan sing kadungganan nga Sagrada Familia.

  May ginbalita nahanungud sa mag-asawa sa Europa, nga adlaw-adlaw, nga wala sing palta, nagataya sa ila mga kumbinasyon nga numero sa lotto. Adlaw-adlaw nagakadto ang bana sa lottohan agud magtaya, kag kon maglain ang iya pamatyag, naga-relyibo ang iya nga asawa sa pagpabilin nga matutum sa ila ginatay-an nga mga numero. Gani, wala gid sing adlaw nga indi sila makataya! Isa ka adlaw, naglakat ang bana sa malayo nga lugar sa pagpasakup sa isa ka ‘conference’, kag sa kina-andan, ang asawa amo ang ‘in-charge’ sa pagtaya sang ila numero. Nagligad ang isa ka adlaw, kag sa hinali may nabaton ang asawa nga tawag sa ila telepono nga nagasiling: “Nagdaug ang inyo numero sa lotto! Manggaranon na kamo!” Nakibut gid ang asawa, apang imbes nga magkasadya sya, nagkasubo sya sing tuman nga nagapamukpok sang iya nga dughan!...  NALIPATAN nya ang pagtaya sang ila nga numero. Sigurado gid nga kastiguhon sya sang iya nga bana pagbalik sa ila. Sa sobra nga kahadluk… agud wala na lang sing gamo… NAGPANGINMATAY na lang siya! Ang mas makahalanusbo amo nga ang tawag gali “kutaw-kutaw” lang (lango-lango lang). sa pagkamatuod, wala ya magdaug ang ila numero. Ang ila ya handum nga mapuno sang madamo nga kwarta amo ang nagrumpag sang ila nga pagpangabuhi, nga nagtapos sa kamatayon sang asawa!

  Ang aton ginasulog subong nga Kapiestahan amo ang Kapiestahan sang “Sagrada Familia”- indi sang “Manggaran nga Pamilya”. Kon aton nga tulukon, diri sa masami nagakarumpag ang aton mga panimalay tungud ang aton nga ginahandum, amo ang pagpamanggad sang aton pamilya sa material nga bagay, apang nalipatan naton nga ang labing importante amo ang pagpakabalaan sini. Ang masami nga aton ginapangita nga “kumbinasyon” amo nga kon paano kita makakita sang daku nga kwarta sa aton nga pagpangabuhi, imbes nga magpangita kita sang kumbinasyon kon paano kita mapalapit sa Mahal nga Dios!

  Ang misyon sang tagsa ka panimalay wala nagapadulong sa pagtipon sang manggad nga material nga amo sa masami ang nagasamad sang aton nga kaangtanan sa isa kag isa, kundi ang tagsa ka panimalay dapat magbuhat sang isa ka duog sa diin magatubo ang paghigugma kag magpabilin sa tunga sang tagsa-tagsa nga katapo. Si San Juan Pablo (John Paul II) nagsiling: “Ang tagsa ka panimalay nagaluntad agud sa pagdihon sang paghiusa sang mga tawo nga nagahigugma-anay". Amo ini ang dapat nga dagway sang tagsa naton ka panimalay. Ang paghiusa kag paghigugma wala nasandig sa aton pagkamanggaran sa material nga bagay. Kon amo man lang sini, tani wala magpakatawo ang aton Ginoo sa pasungan… tani sa palasyo ya! Apang ginapahanumdum sa aton subong, sa sini nga Kapiestahan sang Sagrada Familia nga ang minatuod nga manggad- ang minatuod nga nagapahiusa sa aton- amo ang aton man pagpakig-angut kag paghi-usa sa Mahal nga Dios, kay sa pagkamatuod, SYA AMO ANG ATON MATUOD NGA MANGGAD.

  Tularan naton ang pamilya ni Jesus, Maria, kag Jose. Magmatutum kita sa aton obligasyon sa Mahal nga Dios. Sa sini ginapaluntad naton ang matuod nga sadsaran sang PAGHIUSA KAG PAGHIGUGMA sa tunga sang aton panimalay- INI AMO ANG ATON MATUOD NGA MANGGAD!