5th Day- Misa Aguinaldo (B)

^5th Day- Misa Aguinaldo- Year B (Dec. 20, 2014)

(Luke 1: 26-38)

  “Alagad ako sang Ginoo. Kabay nga matuman ini sa akon suno sa imo ginsiling.”

  May isa ka ilaga sa isa ka balay sa uma nga nagapaniid sa isa ka buho sang ginabuksan sang mag-asawa nga tag-iya sang balay kon ano ang “package” nga ila ginabuksan sa ila nga lamesa. “Ano naman bala ini nga pagkaon?” Amo ini ang iya ginapanumdum. Apang daku gid ang iya katingala sang makita niya ang sulod sang package isa ka “mousetrap” (lagpit). Sang pagkakita niya dumalagan sya pagwa sang balay kag nagkadto sa iban nga mga sapat sa gwa sang balay sa pagpangayo sing bulig. Nagkadto sya sa manok kag nagsiling: “May lagpit sa balay! May lagpit sa balay! Halung kamo!” Apang ang manok nagsabat sa iya: “Pasensya lang ilaga, indi man ina iya makaano sa akon. Wala man ina ya sang kaso sa akon kay indi man ko ya apektado sina!” Nagkadto ang ilaga sa baboy sa tangkal kag naghambal nga may lagpit sa balay. Apang ang baboy makahambal gid lang: “Ahay. Kaluluoy ka man Mr. Rat, pero wala gid ako sang mahimo para sa imo. Pangamuyo-an ko na lg ikaw.” Nagdalagan naman ang ilaga sa baka, kag naghambal sang amo man nga paandam. Apang ang baka nagsabat sa iya: “Nano man ya labut ko sa lagpit, ilaga? Indi man ina ya makadakup sa akon. Medyosi na lang nga makalikaw ka agud indi ka maipit!”. Gani ang ilaga nagbalik sa balay nga masinulub-on kag maga-isahanon nga magapangatubang sa lagpit nga ginbutang sang mag-asawa.

  Sadto gid nga gab-I, may naglagapak sa ginbutangan sang lagpit! Tak! Sigurado gid nga may nadakup ang lagpit! Ang asawa sang mangunguma nagdalagan sa paglantaw kon nano ang nadakpan, apang tungud kay madulum, wala niya makita nga ang naipit gali amo ang ikog sang isa ka dalitan nga man-og, kag sang nagapalapit sya, ginkagat sang man-og ang iya nga tiil. Ang bana nagbulig sa iya kag gindala sya sa ospital, kag sang pagpauli nila, may mataas nga lagnat ang iya nga asawa.

  Tanan kita nakahibalo nga manami gid sa lagnat amo ang mainit nga sabaw sang manok. Gani gin-ihaw sang mangunguma ang iya manok kag ginsabawan ini agud mahigop sang iya nga asawa. Apang nagpadayon pa gid ang lagnat sang iya nga asawa, kag kinahanglan nga bantayan sya sa sulod sang 24 oras sang iya mga abyan kag mga kaingud. Agud mapakaon sila, ang mangunguma nagkatay sang iya baboy para sa sud-an sang mga manugbantay. Apang wala gid matabangan ang iya asawa, kag sang ulihi, napatay gid. Tungud madamo ang nagkompanyar, ang mangunguma nag-ihaw sang iya nga baka para may kaonon ang tanan.

  Ang ilaga nagasid-ing sid-ing lang sa buho sang balay sang mangunguma nga may daku nga kasubo.

  Sa mga tinion nga may mabatian kita nga ang aton isig-ka-tawo yara sa katalagman, apang wala kita sang labut sa sitwasyon, panumdumon ta ini nga istorya. Kon ang isa sa aton yara sa katagman, kita tanan may kaangtanan sini. Tanan kita bahin sa pagti-ug sang aton kabuhi. Dapat kita magbinuligay sa isa kag isa.

  Amo ini ang ginbuhat ni Maria Santisima sa aton Ebanghelyo subong. Sa iya pagsiling nga “Alagad ako sang Ginoo, Kabay nga matuman ini sa akon suno sa imo ginsiling.” Sya NAGPAKIGBAHIN sa plano sang Dios nga kaluwasan para sa tanan nga katawhan. Pwede makasiling si Maria sa anghel: “nano ang labut ko? Ngaman nga pasilabtan ninyo ako. Pwede man maluwas sang Dios ang tawo sa isa lang ka pitik sang Iya mga tudlo! Ngaman pa gid nga gamohon ninyo ako?” Apang tungud sang duna sa tagipusuon ni Maria nga MABINULIGON, wala gid sya magpamalabag sa plano sang Dios, bisan pa para sa iya, indi niya ini mahangpan. Nagbaton sya sa kabubut-on sang Dios nga may pagpa-ubos kag pagsalig, nga paagi sa pagtuman sini, indi gid sya pagpatalangon  sang Dios.

  Sa sining ika-lima nga adlaw sang Misa Aguinaldo, tularan naton ang pagpakigbahin sa plano sang Dios paagi sa aton pagpadayon sa pagbuhat sang maayo, kag tulukon naton ang pagkamabinuligon ni Maria Santisima. Isa ka matahum nga paghanda sa pagkatawo sang aton Manluluwas amo ang pagtalupangud sa aton mga kautoran nga nagakinahanglan sang bulig. Balikdon naton sila kag itan-ay ang aton ikasarang sa pagbatak sa ila. Panumdumon naton nga kita naangut sa isa kag isa. Sa sini aton gid makabuhi ang kamatuoran nga ang tagsa-tagsa, ilabi na gid ang mga kubos, aton man mga utod. Ano ang aton mabulig sa aton mga kautoran subong nga paskwa?