9th Day- Misa Aguinaldo (B)

^9th Day- Misa Aguinaldo- Year B (Dec. 24, 2014)

(Luke 1: 67-79)

“Pabutlakon Niya ang adlaw sang kaluwasan sa aton, kag pasilakon Niya ini…sa pagtuytoy sa aton mga tikang sa dalanon sang paghidait.”

  May isa ka pamilya nga ang ila pangitan-an amo ang ‘pagkolekta’  sang mga basura sa ila banwa. Nagapuyo sila sa uma, kay mahapos didto magtipon sang basura sa ila ‘junk shop’. Sang isa ka kahaponanon, ginsugo sang tatay ang iya nga bata nga kuha-on na ang ila karito, kay manghimos na sila kay sa dili madugay, magagab-i na. Pagkaligad sang malawig nga mga mininutos, ang bata wala pa makabalik, kag nagpalibog ang amay kon nano na ang natabo sa iya bata. Apang sang dili madugay napantawan sya sang iya amay nga ‘ginahakwat’ ang karito. Ka ginsinggitan sya sang iya tatay: ‘Anak sa masunod, indi mo ina paghakwaton. TULOD ya ang kinahanglan sina!

  Sang daw nagahana na nga magdulum, ang amay nagsiling sa iya bata: ‘Anak kwa-a na didto ang karabaw nga nalambo sa puno sang kahoy, kag pasudla na diri sa aton ugsaran, kay dugay-dugay, gab-i na.’ Naglakat man ang bata suno sa ginsugo sang iya nga amay. Apang sang pagkaligad sang isa ka oras nga hinulat, wala pa makaabot ang iya nga bata. Napantawan sya sang iya nga amay nga GINATULOD sang iya bata ang karabaw. Nagsinggit naman si tatay niya: “BUTUNGA ya anak, indi pag-itulod!” Ahay, tig-a man ni ulo ang anak ko a! Pagkatapos mo sina anak, kwaa to ang kaldero likod sang balay ta kay maluto na kita sang aton nga panihapon ha! Pagkaligad sang pila nga mga mininutos, nabatian sang amay nga nagalinagubo na sa likod sang ila balay, lamang nga makita ang iya nga anak nga NAGABUTONG sang kaldero! Anak! Singgit sang amay: “Indi pagbutonga! Hawiri sa dalunggan ang kaldero agud mahapos bitbiton! Ahay! Kadtu-i na to ang imo manghod, kag dal-a diri kay makaon na kita dayon. Sang dili madugay ara na ang iya nga bata kaupod ang iya manghod nga nagatinangis sing todo-todo gid! Bal-an ta na siguro ang natabo. Ginbitbit nya ang iya manghod sa dalunggan!

  Amo ini ang sitwasyon sang tawo sang wala pa magtuhaw si Juan Bautista, kag sang ulihi sang mag-abot ang aton Ginoo sa Iya nga pagkatawo. Daw nagapangapkap sa kadudulman  ang bug-os nga katawhan. Nagabalalan-suli ang dalagan sang ila nga pagkabuhi, ini tungud ang tagsa ka tawo, nagasunod lang sa luyag nila nga buhaton, bisan pa ini yara sa idalum sang kadudulman sang sala. Amo ini karon ang ‘papel’ ni Juan Bautista nga ginpahayag sang iya amay nga si Zacarias. Bilang Propeta, si Juan Bautista magabantala nga nagapakari na ang kaluwasan, kag ang kapawa sang Mahal nga Dios amo ang mangin iwag sa tanan nga mga tawo, agud sila magpanglakaton sa dalan sang paghidait.

  Masami kon nagasalungkaki kita sa aton mga painu-ino, pagpati, ukon mga pagpangabuhi, madali man nga magluntad ang pag-ilinaway kag di-paghangpanay sa aton nga tunga. Kon naga buta-bungol man lang kita sa sarang naton mahimo nga maayo nga mga buhat, ang aton katilingban nangin katilingban sang pagpaiya-iya, kag dili pagpasilabot sa isa kag isa.

  Amo gani nga sa sining ika-siyam nga adlaw sang aton nga nobenaryo, ginatawag ang aton igtalupangud nga dapat mangin ‘bukas’ ang aton kaugalingon sa pagbaton sang kapawa sang paghidait, agud kita mangin instrumento sa pagbalay sang isa ka matuod nga katilingban sang Dios- ang katilingban nga nagahigugma,  may igtalupangud kag pagkabalaka sa isa kag isa, katilingban nga nagapakigbahin sa kabuhi sang tagsa-tagsa tungud kita isa lamang ka panimalay sang aton Amay sa langit.

  Ayhan, madamo kita sang mga pagsalungkaki sa isa kag isa, kag ayhan indi lang sa aton isigkatawo, kundi bisan sa aton Amay sa langit. Ayhan, nangin balingag ang aton nga pagkabuhi tungud wala kita magpamati maayo sang Iya Maayong Balita kag sa gihapon nagpadayon kita sa pagkabuhi sa aton ‘kasal-anan’. Apang ang maayong balita sa subong nga tion amo ini: “Pabutlakon Niya ang adlaw sang kaluwasan sa aton, kag pasilakon Niya ini…sa pagtuytoy sa aton mga tikang sa dalanon sang paghidait.” Kabay unta nga aton dakpon ini nga kahigayunan sa pagpakig-uli sa isa kag isa kag sa aton amay nga langitnon agud kita magkabuhi nga may paghidait!