4th Day- Misa Aguinaldo (B)

^4th Day- Misa Aguinaldo- Year B (Dec. 19, 2014)

(Luke 1: 5-25)

  Mga alas 11 na ang takna sa aga, kag may isa ka bata nga nagkadto sa Simbahan agud maghingabut sa ‘scheduled confession’, kay luyag sya magkumpisar sa pari. Ang pari nga iya ginkumpisaran daw may gamay nga ‘kabudlayan’ sa iya panghambal. Daw ginasulit-sulit nya iya ginahambal. Kon sa aton pa, daw may pagka-pitla maghambal ang pari.

  Sa pihak nga bahin, ang nanay sang bata, daw nagakabalaka na sing hulat sa ila balay sang iya nga bata, kay alas-tres na sing hapon, kag wala pa gihapon nakapauli ang iya nga bata. Gani nagkadto ang iya nanay sa Simbahan sa paglantaw kon nano na ang natabo sa iya nga bata. Sang magsulod na ang iya nga iloy sa Simbahan, nakita niya nga ang iya bata nagaluhod kag nagapangamuyo. Nagbalikid man ang iya nga bata, kag sang makita si nanay nya, nagsiling ang bata: “Nay, maluoy ka man sa akon. Buligi man ako. Naka 278 pa lang ako ka Our Father.” Baw siling ni nanay nya: “Grabe man si Father, sobra man maghatag sang penitensya sa akon bata.” Sa pagkamatuod, 4 lang ka Our Father ang penitensya nga ginhatag sang pari, ugaling wala maintindihan  sang bata, kay siling ni Father: “Bilang imo penitensya magpangamuyo ka sing a…pat…ap…at…apat ka Our Father.” Abi sang bata ang iya penitensya 444 ka Our Father nga pangagdion.

  Mabudlay kon may diperensya ang aton panghambal. Indi kita madali mahangpan. Mas mabudlay pa gid kon INDI na gid kita makahambal- Kon kita apa! Amo ini ang natabo kay Zacarias subong sa aton Ebanghelyo. Mabudlay ang iya gina-agihan nga sitwasyon indi kay tungud nga apa sya umpisa sang bata pa sya, kundi tungud nga sya nag-apa lang tungud sang iya pagkulang sa pagtuo- daw silot ini nga ginhatag sang Dios sa iya! Siguro ma-imagine lang naton kon nano nga ‘adjustment’ ang ginhimo ni Zacarias sa iya sitwasyon nga indi na sya makahambal pagkatapos sang pagtunda sa iya sang anghel nga ang iya nga asawa nga tigulang na kag baw-as pa, magabusong kag magaanak sang isa ka anak nga lalaki. Kag pagahingalanan sya kay Juan.

  Ayhan nagasamo ang balatyagon ni Zacarias tungud sa kalipay nga gindulot sang balita nga magabusong ang iya nga asawa, nga amo na ang nangin sabat sa ila pangamuyo, apang sa pihak nga bahin, isa man ka daku nga pagkahangawa tungud tigulang na sila kag nangin apa pa sia.

  Mga utod, indi bala nga ang eksperyensya ni Zacarias masami amo man ang aton gina-agihan sa aton kabuhi? Indi bala nga sa masami, kabudlay hangpon sang kabubut-on sang Dios kon aton masugata ang mga pagtilaw kag mga panghangkat sang kabuhi. Apang sa sini man nga mga tini-on, aton nga mabatyagan nga ang Dios padayon nga nagapanghikot sa aton kabuhi ilabi na gid sa mga remalasos nga aton ginasumalang. Matuod! Ang Dios nakahibalo kon nano ang maayo para sa aton. Nagapanghikot gid Sya, apang sa masami, nagapanghikot ang Mahal nga Dios sa MAKATALANHAGA nga paagi. Ayhan agud sa pagpahibalo sa aton nga indi gid kita makasalig sa aton tawohanon nga ikasarang kundi sa Iya gid lamang Diosnon nga pagtabang!

  Diri kita ginadala sa aton nga pagpamalandong subong nga adlaw, ang aton paghulat sa matawo nga Mesias, isa ka paghulat sang pagtuo… isa ka paghulat sa pagtukib sang kabubut-on sang Dios nga Iya ginatigana sa tagsa-tagsa sa aton, Nagakinahanglan lang nga kita mangin BUKAS sa Iya nga kabubut-on sa aton paagi sa PAGPAUBOS sang aton mga kaugalingon, kag PAGSALIG nga INDI KITA NIYA PAGPATALANGON.

  Si Zacarias nagsalig lang sa iya tawohanan nga ihibalo, ayhan kon sa siyensya (science), imposible na nga magbusong pa ang iya nga asawa. Kag ayhan, sa kalawigon sang panahon, ‘nalugaw-an’ na sila sang paghinulat sang isa ka bata nga  matawo sa ila nga mag-asawa. Apang ang aton Ebanghelyo subong nagapahanumdum sa aton sang isa ka salandigan: “ANG DIOS NAGAPAMATI SA ATON MGA PAHANUNGDAN”. May hulubaton nga nagasiling: “God’s delays are never God’s denials.” Amo ini ang natabo kay Zacarias, kag amo man ini ang dapat nga magluntad sa aton panimuot kag tagipusuon samtang nagahulat kita sa pagkatawo sang aton Ginoo.

  Sa sining mga inadlaw sang Misa Aguinaldo, aton ipahamtang ang aton kaugalingon sa PAGSALIG nga may MAGATUNGA NGA MAAYO sa mga nagakahanabo sa aton kabuhi, ilabi na gid sa mga pagtilaw kag mga kabudlayan nga aton ginasumalang. Sa likod sang kasakit, magsalig kita nga may ginatigana sa aton ang Mahal nga Dios nga kalipay kag himaya… sa likod sang kamatayon, yara nagahulat sa aton ang bag-o nga kabuhi s ang pagkabanhaw. Amo gani nga sa mga pagpangibulahan sang aton Ginoo, Sya nagsiling: “Bulahan ang mga imol, kay ila ang ginharian sang Dios.” Tungud sa likod sang aton kaimulon yara ang MATUOD NGA MANGGAD- Ang Ginoo nga magaabut kag magapuyo KAUPOD naton.