8th Day- Misa Aguinaldo (B)

^8th Day- Misa Aguinaldo- Year B (Dec. 23, 2014)

(Luke 1: 57-66)

“Daw ano kadaku ang kaluoy sang Dios... maathag nga ang gahum sang Ginoo yara sa iya”

  Makatalanhaga kaayo ang natabo subong sa aton Ebanghelyo. Ang gintagna sang angel nga si Gabriel kay Zacarias, nga ang iya asawa nga si Elisabet, nga tigulang na kag baw-as, karon nangin indi na lamang panagna, kundi isa na ka KAMATUORAN. Sa bagay nga ang mga tawo- ang mga kaingod kag ang mga himata nila, makasiliing gid lang nga maathag gid nga ang Ginoo yara sa iya- yara nga nagpanghikot sa tagsa ka tinion sa kabuhi sang tawo. Nagapanghikot Sya bisan pa sa mga tinion nga nagadumdum kita nga daw sa wala na sinig paglaum ang aton kahimtangan.

  Amo ini kon ngaman nga ginabalikdan naton subong ang natabo sa kay Zacarias kag kay Elisabet. Sa pagkatawo sang ila nga bata nga ginhingalanan nila kay Juan- ang ngalan nga ginhatag sang anghel sa ila- ginapakita sa aton nga sa gihapon wala nagapalya ang PAGKAMALULUY-ON sang Dios. Ang Juan ukon Yohanan, sa tinaga nga Hebreo, nagakahulugan “Ang Dios Maluloy-on”, kag amo gid ini ang ginpahayag sang Dios paagi sa kabuhi ni Juan Bautista. Si San Juan Bautista nagbantala sini nga kaluoy paagi sa pagpakig-uli sang buong nga kaangtanan sang Dios kag sang tawo. Paagi sa pagtuman ni San Juan sang iya nga misyon bilang “tingug sa desierto”, sya nagdala sang maayong balita nga ang Dios ‘bukas’ sa pagbaton kag sa pagpatawad sa tawo nga mahinulsulon. Ginatan-ay na sang Dios ang Iya kamut agud sa pagdawhat sa tawo nga nalugmok sa sala. Paagi sa pagpatawad sang katawohan nga nakasala, ginabalik sang aton nga Amay ang aton nga dignidad bilang Iya mga anak.

  Nagpakumpisar ako sang mga kabataan nga magabaton sang ila ‘First Communion’. Ang isa ka bata nga nagpalapit sa akon daw halos indi pa makahibalo magkumpisar. Siguro ginakulbaan ukon daw nahuya pa sya sa akon. Gani, agud nga matuytoyan ko sya, ginhambalan ko ang bata, ‘Anak indi ka pa ka lagpat sang imo inughambal?’ Nagsabat man ang bata ‘Huo, Fr. Nalipat na ko.’ Gani ginsingganan ko sya. Sige anak, sunod ka sa akon ha. ‘Sa ngalan sang Amay….” Kag ang bata nagsiling man: “sa ngalan sang Amay…” Dayon nagsiling ako ‘Bendisyoni ako padre kay nakasala ako. Amo ini ang akon mga sala…’, kag ang bata nagsunod man sa akon ‘Bendisyoni ako padre kay nakasala ako. Amo ini ang akon mga sala…’ Naghulat-hulat na ako nga mahambal na sya sang iya mga sala, apang nagpabilin nga mahipos ang bata. Gani ginhambalan ko sya, ‘Karon, anak ano ang imo mga sala?’ kag nagsabat ang bata, ‘Karon, anak ano ang imo mga sala?’ Sus nalipat gali ako nga ginhambalan ko sya nga “magsunod” sa akon. Baw, daw ako pa ya karon ang makumpisar sa bata!

  Mga utod, amo ini ang aton ginasumalang sa pagkatawo sang aton Ginoo. Ginasumalang naton ang kaluoy sang  Mahal nga Dios. Sya bukas sa pagpatawad, apang ginakinahanglan man Niya ang aton PAGBUKAS sang aton kaugalingon, sa pagbaton sang aton kapaltahan kag mga kakulangan. Bukas kita sa posibilidad nga mahanabo ang pagbag-o sa aton daan nga kabuhi nga sala padulong sa kabuhi sang pagkamatarong kag pagkabalaan. Ang panahon sang Christmas amo ang pagtalupangud nga kita NAGAKINAHANGLAN sang patawad sang Dios, tungud sa pagkamatuod, kita, MGA MAHUYANG.

  Sug-alawon naton ang pagkatawo sang aton Ginoo nga may handum sa pagpanibag-o. Suguran naton ini paagi sa pagpaubos kag pagpangayo sang kapatawaran sang aton mga sala kag kapaltahan. Sa sini nga paaig ang aton Christmas mangin isa ka masinadyahon nga okasyon sang langit kag sang duta!