7th Day- Misa Aguinaldo (B)

^7th Day- Misa Aguinaldo- Year B (Dec. 22, 2014)

(Luke 1: 46-56)

“Ginbayaw Niya ang mga kubos…Ginbusog Niya sing maayo nga mga butang ang mga ginagutum...”

  Ang ‘pagdayaw ni Maria’ sa aton Ebanghelyo, isa ka pagpahayag sang pagpasalamat sa Dios tungud sang mga dalagku nga mga butang nga Iya ginhimo sa mga tawo. Pagpahayag ini nga ang Dios naga-upod sa iya mga katawohan, ilabi na gid ang mga ginapigos, mga kubos, kag mga ginagutum. Sa pagkamatuod, ang Ginoo mismo ang nagsiling nga kon ginabuhat naton ang isa ka bagay sa pinakalabing kubos sang Iya mga utod, ginabuhat man naton ini sa Iya. Ang aton ginoo mismo ang nagsiling nga sa katapusan sang panahon, kita paga-hukman suno sa aton binuhatan sa pinaka-kubos sang Iya nga utod.

  May isa ka tigulang nga monghe nga nagapangamuyo sa iya nga ‘selda’ sa malawig na nga mga tinuig. Nagapangayo sya nga pabukuron sang Mahal nga Dios ang iya nga pagtuo kay sa iya pamatyag, nagahuyang na ini. Daw ma-surrender na gid sya, apang sang isa ka adlaw, ginsabat gid man ang iya nga pangamuyo. Sa iya mismo nga selda, nagpakita ang aton Ginoong Jesus sa isa ka palanan-awon. Abaw! Lipay-lipay gid sya! Apang samtang nga nagapakighala sya sa Ginoo, sa hinali nagbagting ang ila lingganay- bagting ini sa pagpatimaan nga oras na nga mapakaon na sila sa mga imol nga nagakadto sa ila monasteryo.

  Nano bala ini? Siling niya. Mapabilin bala sya sa iya kahala nga Ginoo, ukon makadto sya sa mga imol nga nagahulat sing pagkaon nga ila igahatag? Kon indi sya maggwa, magutuman ang mga makaluluoy nga wala sing makaon sa sina nga adlaw. Gani, ginabutong-butong ang iya nga desisyon kon sa diin bala niya ibutang ang iya kaugalingon. Antes matapos ang bagting, nagdesisyon sya, bisan nga mabug-at sa iya tagipusuon, sa paggwa kag sa pagkadto sa mga imol. Gintalikdan niya ang iya nga “vision” kag nagkadto sa pagpakaon sa mga imol.

  Pagkaligad sang halos isa ka oras, nagbalik sya sa iya nga selda, kag daw halos indi sya makapati sa iya nakita. Ang iya nga selda nagsanag sang langitnon nga kapawa katulad sang kasanag sang adlaw, kag nakita niya ang aton Ginoo nga nagayuhum sa iya nga may daku nga pagpalangga.

  Nagluhod ang monghe sa pagdayaw kag pagpasalamat sa aton ginoo, kag sa iya palanan-awon ang aton ginoo nagsiling: “Anak, naglakat ka sa pagpakaon sa mga imol. Kon wala mo paghimoa ini, wala man kuntani ako magpabilin diri sa paghulat sa imo.”

  Mga utod, karon nga tuig, ginapatuhoy sang aton Simbahan diri sa Pilipinas ang “Tuig sang mga Kubos”. Ini sa pagpukaw sang aton mga tagipusuon nga ang mga kubos kag ang mga imol, bahin sang aton kabuhi. Ini nga mga kubos indi lamang ang mga nakulangan sang mga kinahanglanon nga material sa kabuhi, kundi ang mga may kakulangan man sa ila espiritwal, moral, pangkatilingban kag mga nagapangatubang sang mga nanari-sari nga mga kinahanglan. Ang mga kubos indi lamang ang mga imol sa kwarta, kundi ang mga nagakinahanglan sang paghangup, pagkaluoy, paghiguma, pagkabalaka, mga ginasika-sika kag mga ginadaug-daug, mga ginpatumbayaan kag wala ginasapak, tungud sila mga maluya. Diri kita gina-ganoy nga painu-ino kag espiritwalidad sang aton nga simbahan- ang pagkilala sa presensya sang aton ginoo sa aton tunga paagi sa aton pagtalupangud sa Iya sa mga kubos naton nga mga kautoran.

  Nagkalipay ang tagipusuon ni Maria, tungud sa pagtunda sa iya sang anghel nga si Gabriel nga sya mangin iloy sang Emmanuel, sya mangin bahin sang plano sang kaluwasan nga ginahatag sang Dios sa Iya mga tinuga, paagi sa pagkatawo sang Manluluwas sang kalibutan. Paagi sa Emmanuel, nangin matuod nga nangin bahin ang Dios sa kabuhi sang mga tawo nga madugay na nga nangin ulipon sang sala kag mga estruktura nga mapigoson. Sa sini, ginapahayag sang Dios ang kahilwayan sa tagsa-tagsa nga gina-ulipon sang sayup nga sistema kag sayup nga pagkabuhi.

  Ang pagdayaw ni Maria isa man ka panghangkat sa tagsa-tagsa sa aton samtang kita nagahanda sa pagkatawo sang aton Ginoo. Kita gina-agda sa paglakat sa sini nga dalan sa pagkilala sang presensya sang aton Ginoo ilabi na gid sa mga kubos naton nga mga kautoran. Sa sini nga panahon, ilabi na gid sa malapit na lang nga pagkatawo sang aton Ginoo, sin-o ang aton talupangdon nga kubos? Sin-o ang aton alagaran nga laragway sang aton Ginoo? Ang tagsa ka kubos nga aton ginalab-ot sa pagbulig amo ang presensya sang aton Ginoo. Amo ini ang paskwa nga matuod nga nagakahanabo sa aton tunga!