SOLEMNITY OF MARY MOTHER OF GOD (B)

MARY MOTHER OF GOD- Year B (Jan. 1, 2015)

(Luke 2:16-21)

  Isa ka adlaw, nagsinggit ang isa ka nagahampang nga bata sa ibabaw sang bukid: “Sin-o ka?” Kag iya nabatian ang isa ka tingug nga nagasinggit man: “Sin-o ka?” Karon nagsinggit sia liwat: “Gago ka!” Kag ang tingug nagsabat man sa iya: “Gago ka!” Dayon nagpauli sia nga natingala, kag ginsaysay ang iya eksperyensya sa iya iloy. Ang iya nanay naglaygay sa iya nga maghambal sia sing maayo sa tingug: “Maghambal ka sing “I love you” sa tingug, kag lantawa kon ano ang iya ibalos!” Gani pagka-aga, ang bata nagsaka liwat sa bukid kag nagsinggit: “Palangga ta ka!” Kag ang tingug nagsabat: “Palangga ta ka!” Ang bata NALIPAY gid sa iya nabatian.

  Ang estorya sang nagalanog nga tingug, estorya man sang aton kabuhi. Ang kalibutan nagapabalik lamang sa aton kon ano ang aton ginahatag sa iya. Kon kita maayo, aton man ginapaabut nga ang kalibutan maayo. Kon kita malain, aton man ginapanumdom nga ang tanan sa kalibutan malain. Kon ano man ang aton ginahatag sa kalibutan, amo man ina ang nagabalik sa aton. Gani kon gusto naton ang maayo, dapat maghimo kita sing maayo kag mangin maayo.

  Luyag naton papason ang kalainan kag malas paagi sa mga panimad-on – BILOG nga mga butang sa sulod sang balay, POLKA DOTS sa aton mga bayu ukon paagi sa PALUPOK. Ngaman indi naton pag-ilugon ang estratehiya sang mga manugbantay sang mga karnero kag ni Santa Maria? Ang mga manugbantay sang mga karnero NAGPILI, kapin sa tanan,  sa pagpangita sa bata, ang Mesias nga ginapaabot sang tanan. Si Santa Maria nakadiskubre sang PAG-GIHO sang Dios sa iya kabuhi.

  Nagasugod ang bag-ong tuig sa aton pagpahayag nga si Maria amo ang ILOY SANG DIOS NGA NAGPAKATAWO kag aton man ILOY! Ang iloy nagadala kag nagasagud sang kabuhi sa iya tagu-angkan. Kon ang bata mabun-ag na, padayon pa niya ini nga ginasapupo kag ginabantayan.

  Sa Ebanghelyo makita naton si Maria nga “mahipos” nga nagabantay. Sang mabatian niya ang makatilingala nga mga hitabo nga ginapanugid sang mga manugbantay sang karnero “gintipigan niya ini nga mga butang kag ginpamalandungan sa iya kaugalingon” (Lk 2:19).Si Maria nagahatag sa aton sang pamalandungon nga lain sang sa magahod nga mga pagsinadya nga dala sang Bag-ong Tuig.

  Ang pagkatawo ukon ang bag-o nga kabuhi amo ang labing importante kag makatalanhaga nga bugay. Ini ang ganhaan pakadto sa pagpanglakaton agud pangitaon ang plano sang Diyos para sa aton. Ang pinakamaayo nga paagi sa pagselebrar sang kabuhi amo ang pagtipig sini sa aton tagipusuon. Nagakahulugan ini nga kinahanglan naton ang tion agud nga mag-isahanon, magbinag-binag, kag magpangamuyo!- Wala gid sang gindulot nga maayo ang “kinagamo” sa pagsug-alaw sang Bag-ong Tuig!

  Ang malinong kag simple nga pagginawi– suno sa pagginawi ni Maria– nagahatag sa aton sing kusog sa pag-atubang sa mga hangkat sang kabuhi– sa kasadya ukon sa kasakit! HAPPY NEW YEAR TO ALL!