Epiphany (B)

EPIPHANY- Year B (Jan. 4, 2015)

(Mt. 2: 1-12)

Ang buot silingon sang Epipaniya, ang aton ginasulog nga kapiestahan subong nga Dominggo, amo ang “pagpakilala” ukon “pagpakita” sang Ginuo. Si Jesus, ang Ginuo kag Mesiyas, ginpakilala indi lamang sa mga Judio kundi sa bug-os nga katawohan nga gin- tiglawas sang mga Mago.

  Ang sugilanon sang mga dumuluong may mensahe nga ginapahayag: Si Jesus mabaton lamang sang mga tawo nga bukas sa pagtuytoy sang Dios. Madali kita magliso pakadto kay Kristo kon bukas ang aton tagipusuon; mabudlay matabo ini kon ginasirahan ini sang kasal-anan.

  Ang ginsuguran sang pagpanglakaton sang mga MAGO amo ang tion nga sila nakakita  sang tanda sa langit – isa ka BITUON nga may makatilingala nga sidlak. Kag ini, sa pagligad sang mga tinuig, pagatawgon naton nga PAROL. Ang parol naghalin sa Espanyol nga pulong “FAROL”, nga ang buot silingon, “Suga nga ginasab-it”. Ini nga bituon ang ila ginpatihan nga magatuytoy sa ila pakadto sa Manunubos sang kalibutan.

.

  Tungod ang ila pagpanglakaton isa ka lihuk nga daw wala sing kaseguradohan, kinahanglan nila ang MAPAG-ON nga pagtuo kag pagsalig sa ila pagpanglakaton agud sundon ang bituon sa kon diin man sila igadul-ong sini. Gani pila ayhan ka adlaw, bulan ukon tuig nga nagpanglakaton sila? Piho nga ginbatas man nila ang init, yab-ok, gutom, uhaw kag mga katalagman sa dalanon. Kag piho man nga sa pagpanglakaton sang mga mago, yara pirmi ang bituon nga nagatuy-toy sa ila. Amo gani nga sang pag-abot nila sa Jerusalem, nagpamangkot sila sa palasyo ni Herodes. Apang paagi sa panagna sang mga propeta kag sa grasya sang Dios, nagpakita liwat sa ila ang bituon. Kag gani nakalambot sila sa Bethlehem sa diin nakita nila ang bata nga si Jesus.

  Ang aton kabuhi isa man ka pagpanglakaton pakadto sa Dios. Kag ang Dios mismo naghatag sa aton sang mga DIREKSYON agud mahapos ang aton pagbalik sa Iya.  Ginhatagan kita Niya sing “Bituon” agud amo ang mag-giya kag magsanag sang aton mga dalanon, kag ini amo Iya Anak, ang aton Ginuong Jesukristo, nga nagpakatawo kag nagpuyo upod sa aton. Apang tungud sang aton pagkamalalison, masami, nagapalayo kita sa sini nga Bituon. Himulatan naton ang pagdiskubre sang presensya sang Ginoo sa aton kabuhi, sa tanan nga tion. Sa sini magasubang gid sa aton ang matuod nga kapawa, kag kita magakalipay sa pagpahayag sang Dios sang Iya kaugalingon sa bug-os naton nga pagkabuhi. HAPPY THREE KINGS SA INYO TANAN!