3rd Sunday of Advent (B)

3rd Sunday of Advent- Year B (Dec. 14, 2014)

(John 1:6-8, 19-28)

  May isa ka maisug kag isganan nga soldado, nga nakapakig-away na sang madamo nga mga patag-awayan para sa iya pinalangga nga pungsod. Nangin isa siya ka heneral sang ila nga guban, kag sang ulihi nangin isa ka Emperador sang ila nga Emperyo.

  Isa ka adlaw, may isa katigulang nga soldado nga nagkadto sa iya sa pagpangabay sa iya nga nagasiling: “Mahal nga Emperador, luyag ko kuntani nga magkadto ka sa akon kaadlawan. Tigulang na ako kag basi amo na ini ang akon katapusan nga birthday. Mangin malipayon gid ako kon makakadto ka sa sini nga adlaw. Bisan nga mapatay naman lang ako dayon.”

  Nagbalibad ang Emperador nga nagsiling: “Pakat ako sa akon mga schedules. Indi gid ako makakadto. Pero magapadala ako sing tiglawas kag madamo nga mga regalo para sa imo.”

  Gin-uba sang tigulang nga soldado ang iya nga bayu, kag iya gintudlo ang “daku” nga pinali-an sa iya dughan nga nagasiling: “Mahal nga Emperador, sang nagapakig-away kita, sang ikaw soldado pa, ang aton kaaway maga-labu kuntani sa imo agud patyon ka. Wala ako magpadala sang tiglawas agud sa pagsagang para sa imo. Gintaya ko ang akon nga dughan, agud ako na lang ang masawo sang iya nga labu, kag amo ini ang pinali-an sadtong madinalag-on nga adlaw, indi lamang tungud nangin madinalag-on kita sa sadto nga inaway, kundi tungud kay ikaw NABUHI tungud kay ginhalad ko ang akon kaugalingon sa imo!

  Nadumduman sang Emperador yadto nga hitabo… kag nagtangu sya sang iya nga ulo kag nagpamukpok sa iya dughan…

  Ang Christmas indi lamang sang  matahum nga handurawan nga aton ginadumdum kada petsa 25 sa bulan sang Disyembre. Sa baylo, isa ini ka pagpahanumdum sa aton sang TUMAN KA DAKU nga PAGHIGUGMA sang Dios sa aton, nga ang dapat mangin buhi sa aton tagipusuon kag kabuhi. Amo ini ang magadala sa aton sa pag-eksperyensya sang aton nga PAGTUO kag PAGSALIG sa Mahal nga Dios sa Manluluwas nga Iya ginapdala agud mangin kaupod naton, mangin kabahin sang aton kabuhi, kag mangin Dios nga YARI sa aton.

  Amo ini ang kalangkag ni Juan Bautista sa atonEbanghelyo. Maathag nga sya alagad sang Dios, apang, may kakunyag nga nagahari sa iya nga tagipusuon sa paghanduraw sa Manluluwas nga iya ginapaabut, sa bagay nga indi gid sya malugpayan sa paghawat-hawat sang iya mabalitaan ang nahanungud sa aton Ginoo. Bisan pa nga ginakabig sya nga amo ang pinakadaku sa mga propeta, nagpaubos sya sang iya nga kaugalingon nga nagasiling: “Bisan pa ang higot sang Iya mag sandalyas, indi ako sing takus sa paghubad!” Gin-atubang ni Juan nga may pagpaubos kag pagsalig ang KALUOY sang Dios, nga  ginadala sang Manluluwas sang kalibutan.

  Diri nagalibut ang aton paghanda sa pag-abut sang aton Manluluwas… nga aton tagipusuon magbaton sa iya nga may mapainubuson nga kahimtangan… ang paghatag sang aton kaugalingon bilang kubos nga regalo para sa aton Manluluwas paagi sa aton pagpanumbalik sa Iya kon kita nagtalang, kag pagpanibag-o sang aton kaugalingon kon kita may mga kapaltahan.

  Mangin balingag ang aton paghanda sa sining Christmas kon ang aton lang ginatulok amo ang “kadakuon” ukon “kanamion” sang mga pagkabutang nga aton mahatag kag aton mabaton, apang bulag kita sa pagtalupangud sang aton “kagamayon” sa atubang sang Hari nga magaabut. Wala Sya nagakinahanglan sang aton mga pagkabutang ukon sang aton “mapasikat” sa iya ukon sa aton isigkatawo… ang Iya ginakinahanglan amo ang aton MAPAINUBUSON nga KAUGALINGON nga nagapahanugut nga Sya amo ang mangin UNA sa aton pagkabuhi! Sa sini ang MERRY CHRISTMAS indi lang para sa aton, kundi mas labi na gid sa Iya nga amo ang kahulugan sang aton pagsaulog sang Paskwa, tungud ginhatag naton ang aton kaugalingon sa Iya.

  Indi lang sang “Christmas presents” ang aton ipaambit, kundi aton nga ipaambit ang aton “Christmas presence” nga may pagpaubos sa atubang sang aton magaabut nga Manluluwas!