3rd Day- Misa Aguinaldo (B)

^3rd Day- Misa Aguinaldo- Year B (Dec. 18, 2014)

(Mt. 1: 18-24)

  Isa ka muslim nga ‘imam’ (pari sang mga muslim), kag isa ka Pari sang Katoliko, nagpabugalay sang ila nga relihiyon. Siling sang katoliko nga Pari: ‘Mas madamo ya ang amon mga Santos nga mga Katoliko sang sa inyo nga mga muslim!’ Indi man magpapierde ang muslim. Gani nagsiling sya: ‘Huh! Tan-awon ta e. Kon gusto mo pustaan ta? Mahambal kita sang ngalan sang santos, kag sa tagsa ka ngalan, isa man ka nahot nga buhok sa aton ulo ang bugnuton!’ Huo! Fight! Hambal sang pari nga katoliko. Ikaw danay ang una.

  Nagsugod ang muslim sa pagsiling: ‘San Mustapha,’ kag ginpili nya gid ang buhok nga mahaba kag madamol sa ulo sang pari nga pagabugnuton! Nakibot ang pari kay nasakitan sia. Gani nagsiling sia: ‘San Pedro kag San Pablo!”, kag nagbugnot man sia sing duha ka buhok sa muslim.

  Nagduhong ang muslim kag nagpanumdum, kag nagsiling: “Santo Alibaba kag ang kwarenta ka makawat (Alibaba and the 40 thieves!), Baw 41 gid ka buhok ang iya ginbugnot.

  Ginlantaw sang pari ang tanan nga buhok sang muslim, kag ginhawiran ini nga nagakulukadlaw kag nagsiling: ‘Todos los Santos’ (ang tanan nga mga santos), kag gin-ubos nya pang-gabut  ang buhok sang muslim tubtub sya makalbo!

  Ginapalibutan kita sang madamo nga mga Santos sa aton nga Simbahan kag sa aton mga debosyon bilang mga katoliko. Ini tungud ini nga mga tawo nga katulad man naton, nangin lutaw sa ila pagkabaganihan. Nangin ‘exemplary’ ang ila nga pagpangabuhi sa bagay nga matahum nga sila mangin sulundan man sang aton pag-ginawi. Agni la pangabuhi nangin aton ‘iwag’ sa aton pagpanglakaton sa ibabaw sini nga duta.

  Ang Santo nga aton ginahatagan sing igtalupangud subong amo si San Jose, isa ka tawo, nga suno sa aton Santos nga Ebanghelyo ‘nga nagahimo sing matarung’. Ang iya paghatag sang dignidad kay Maria nga nagabusong na sa ‘pagkadalaga’, kon sa aton tawohanon nga talaksan, isa ka disgrasyada, isa ka dalayawon nga buhat bisan pa ini daw halos indi mahangpan. Ang pagtindog ni San Jose bilang bana ni Maria, bisan pa sa iya nga sitwasyon, isa ka baganihan nga buhat agud nga malikaw si Maria sa mga kahuy-anan, pagpanglibak sang mga tawo sa palibut, kag bisan pa sa kamatayon! Kay sa sadto nga panahon, kon ang isa ka dalaga mahibal-an nga nagabusong nga wala sing bana, ginaganoy pakadto sa tunga sang ila nga banwa, kag ginapatay paagi sa paghaboy sang bato sa iya, tungud sia ginahusgahan na sang mga tawo nga isa ka mahigko nga babayi tungud sang iya pagpakasala!

  Wala ni isa ka ‘pulong’ nga ginhambal si Jose sa mga Ebanghelyo, apang ang iya nga PAGKABUHI isa ka daku nga pagpanaksi sang kaalwan, pagpatawad, kag paghigugma sang Dios nga iya ginabugay sa tagsa-tagsa ka tinuga. Amo ini ang maayong balita sang ginapaabut naton nga Pagkatawo sang aton Ginoo- nga ang Dios mapinatawaron, mahinangpanon, kag puno sang mapinadayunon nga gugma.

  Paagi sa pagbaton ni San Jose kay Maria, natigayon ang plano sang Dios nga Amay, agud maluwas ang bug-os nga katawhan… mabatak kag indi malugmok sa kasal-anan! Amo man ini ang dapat nga maghari sa tagipusuon sang tagsa-tagsa sa aton ilabi na gid sa sini nga panahon. Ang Christmas isa ka pagdihon sang aton kaugalingon nga  mangin mapinatawaron, mahinangpanon, mahigugmaon, kag may pagkablaka sa isa kag isa. Matabo gid ang matuod nga Paskwa sa aton tunga kon katulad ni San Jose kita nagahangup, nagapatawad, kag nagahigugma! Sa subong nga Christmas yari na bala ini sa aton tagipusuon? Handa na bala kita sa pagpatawad, paghangup, kag paghigugma sa aton isig-katawo nga aton gid ginabudlayan nga pakigbagayan?