Epiphany (B)

EPIPHANY- Year B (Jan. 4, 2015)

(Mt. 2: 1-12)

Ang buot silingon sang Epipaniya, ang aton ginasulog nga kapiestahan subong nga Dominggo, amo ang “pagpakilala” ukon “pagpakita” sang Ginuo. Si Jesus, ang Ginuo kag Mesiyas, ginpakilala indi lamang sa mga Judio kundi sa bug-os nga katawohan nga gin- tiglawas sang mga Mago.

  Ang sugilanon sang mga dumuluong may mensahe nga ginapahayag: Si Jesus mabaton lamang sang mga tawo nga bukas sa pagtuytoy sang Dios. Madali kita magliso pakadto kay Kristo kon bukas ang aton tagipusuon; mabudlay matabo ini kon ginasirahan ini sang kasal-anan.

  Ang ginsuguran sang pagpanglakaton sang mga MAGO amo ang tion nga sila nakakita  sang tanda sa langit – isa ka BITUON nga may makatilingala nga sidlak. Kag ini, sa pagligad sang mga tinuig, pagatawgon naton nga PAROL. Ang parol naghalin sa Espanyol nga pulong “FAROL”, nga ang buot silingon, “Suga nga ginasab-it”. Ini nga bituon ang ila ginpatihan nga magatuytoy sa ila pakadto sa Manunubos sang kalibutan.

.

  Tungod ang ila pagpanglakaton isa ka lihuk nga daw wala sing kaseguradohan, kinahanglan nila ang MAPAG-ON nga pagtuo kag pagsalig sa ila pagpanglakaton agud sundon ang bituon sa kon diin man sila igadul-ong sini. Gani pila ayhan ka adlaw, bulan ukon tuig nga nagpanglakaton sila? Piho nga ginbatas man nila ang init, yab-ok, gutom, uhaw kag mga katalagman sa dalanon. Kag piho man nga sa pagpanglakaton sang mga mago, yara pirmi ang bituon nga nagatuy-toy sa ila. Amo gani nga sang pag-abot nila sa Jerusalem, nagpamangkot sila sa palasyo ni Herodes. Apang paagi sa panagna sang mga propeta kag sa grasya sang Dios, nagpakita liwat sa ila ang bituon. Kag gani nakalambot sila sa Bethlehem sa diin nakita nila ang bata nga si Jesus.

  Ang aton kabuhi isa man ka pagpanglakaton pakadto sa Dios. Kag ang Dios mismo naghatag sa aton sang mga DIREKSYON agud mahapos ang aton pagbalik sa Iya.  Ginhatagan kita Niya sing “Bituon” agud amo ang mag-giya kag magsanag sang aton mga dalanon, kag ini amo Iya Anak, ang aton Ginuong Jesukristo, nga nagpakatawo kag nagpuyo upod sa aton. Apang tungud sang aton pagkamalalison, masami, nagapalayo kita sa sini nga Bituon. Himulatan naton ang pagdiskubre sang presensya sang Ginoo sa aton kabuhi, sa tanan nga tion. Sa sini magasubang gid sa aton ang matuod nga kapawa, kag kita magakalipay sa pagpahayag sang Dios sang Iya kaugalingon sa bug-os naton nga pagkabuhi. HAPPY THREE KINGS SA INYO TANAN!

SOLEMNITY OF MARY MOTHER OF GOD (B)

MARY MOTHER OF GOD- Year B (Jan. 1, 2015)

(Luke 2:16-21)

  Isa ka adlaw, nagsinggit ang isa ka nagahampang nga bata sa ibabaw sang bukid: “Sin-o ka?” Kag iya nabatian ang isa ka tingug nga nagasinggit man: “Sin-o ka?” Karon nagsinggit sia liwat: “Gago ka!” Kag ang tingug nagsabat man sa iya: “Gago ka!” Dayon nagpauli sia nga natingala, kag ginsaysay ang iya eksperyensya sa iya iloy. Ang iya nanay naglaygay sa iya nga maghambal sia sing maayo sa tingug: “Maghambal ka sing “I love you” sa tingug, kag lantawa kon ano ang iya ibalos!” Gani pagka-aga, ang bata nagsaka liwat sa bukid kag nagsinggit: “Palangga ta ka!” Kag ang tingug nagsabat: “Palangga ta ka!” Ang bata NALIPAY gid sa iya nabatian.

  Ang estorya sang nagalanog nga tingug, estorya man sang aton kabuhi. Ang kalibutan nagapabalik lamang sa aton kon ano ang aton ginahatag sa iya. Kon kita maayo, aton man ginapaabut nga ang kalibutan maayo. Kon kita malain, aton man ginapanumdom nga ang tanan sa kalibutan malain. Kon ano man ang aton ginahatag sa kalibutan, amo man ina ang nagabalik sa aton. Gani kon gusto naton ang maayo, dapat maghimo kita sing maayo kag mangin maayo.

  Luyag naton papason ang kalainan kag malas paagi sa mga panimad-on – BILOG nga mga butang sa sulod sang balay, POLKA DOTS sa aton mga bayu ukon paagi sa PALUPOK. Ngaman indi naton pag-ilugon ang estratehiya sang mga manugbantay sang mga karnero kag ni Santa Maria? Ang mga manugbantay sang mga karnero NAGPILI, kapin sa tanan,  sa pagpangita sa bata, ang Mesias nga ginapaabot sang tanan. Si Santa Maria nakadiskubre sang PAG-GIHO sang Dios sa iya kabuhi.

  Nagasugod ang bag-ong tuig sa aton pagpahayag nga si Maria amo ang ILOY SANG DIOS NGA NAGPAKATAWO kag aton man ILOY! Ang iloy nagadala kag nagasagud sang kabuhi sa iya tagu-angkan. Kon ang bata mabun-ag na, padayon pa niya ini nga ginasapupo kag ginabantayan.

  Sa Ebanghelyo makita naton si Maria nga “mahipos” nga nagabantay. Sang mabatian niya ang makatilingala nga mga hitabo nga ginapanugid sang mga manugbantay sang karnero “gintipigan niya ini nga mga butang kag ginpamalandungan sa iya kaugalingon” (Lk 2:19).Si Maria nagahatag sa aton sang pamalandungon nga lain sang sa magahod nga mga pagsinadya nga dala sang Bag-ong Tuig.

  Ang pagkatawo ukon ang bag-o nga kabuhi amo ang labing importante kag makatalanhaga nga bugay. Ini ang ganhaan pakadto sa pagpanglakaton agud pangitaon ang plano sang Diyos para sa aton. Ang pinakamaayo nga paagi sa pagselebrar sang kabuhi amo ang pagtipig sini sa aton tagipusuon. Nagakahulugan ini nga kinahanglan naton ang tion agud nga mag-isahanon, magbinag-binag, kag magpangamuyo!- Wala gid sang gindulot nga maayo ang “kinagamo” sa pagsug-alaw sang Bag-ong Tuig!

  Ang malinong kag simple nga pagginawi– suno sa pagginawi ni Maria– nagahatag sa aton sing kusog sa pag-atubang sa mga hangkat sang kabuhi– sa kasadya ukon sa kasakit! HAPPY NEW YEAR TO ALL!

HOLY FAMILY (B)

HOLY FAMILY- Year B (Dec. 28, 2014)

(Luke 2:22-40)

“Gani, gindala nila ang bata sa Jerusalem agud ihalad sa Ginoo. ”

  Ginatulok naton subong ang panimalay ni Jesus, Mari, kag Jose, sa aton nga pagsaulog sining kapiestahan sang Sagrada Familia- isa ka matinuohon kag matinumanon nga panimalay, nga katulad man sa aton, nagahimakas sa mga pagtilaw nga gina-atubang sa pangabuhi. Ginsaysay ni San Lukas nga tungud indi sila makasarang sang dulot sang mga manggaranon nga baka ukon karnero, ang ila gid lang mahalad amo ang duha ka bilog nga kuyabog nga salampati. Ayhan imol si Jose kag si Maria sa material nga bagay, apang “manggaranon” sa pagpabilin nga matutum sa kasugoan sang Mahal nga Dios, kag amo ini kon ngaman nga sila ginhatagan sing kadungganan nga Sagrada Familia.

  May ginbalita nahanungud sa mag-asawa sa Europa, nga adlaw-adlaw, nga wala sing palta, nagataya sa ila mga kumbinasyon nga numero sa lotto. Adlaw-adlaw nagakadto ang bana sa lottohan agud magtaya, kag kon maglain ang iya pamatyag, naga-relyibo ang iya nga asawa sa pagpabilin nga matutum sa ila ginatay-an nga mga numero. Gani, wala gid sing adlaw nga indi sila makataya! Isa ka adlaw, naglakat ang bana sa malayo nga lugar sa pagpasakup sa isa ka ‘conference’, kag sa kina-andan, ang asawa amo ang ‘in-charge’ sa pagtaya sang ila numero. Nagligad ang isa ka adlaw, kag sa hinali may nabaton ang asawa nga tawag sa ila telepono nga nagasiling: “Nagdaug ang inyo numero sa lotto! Manggaranon na kamo!” Nakibut gid ang asawa, apang imbes nga magkasadya sya, nagkasubo sya sing tuman nga nagapamukpok sang iya nga dughan!...  NALIPATAN nya ang pagtaya sang ila nga numero. Sigurado gid nga kastiguhon sya sang iya nga bana pagbalik sa ila. Sa sobra nga kahadluk… agud wala na lang sing gamo… NAGPANGINMATAY na lang siya! Ang mas makahalanusbo amo nga ang tawag gali “kutaw-kutaw” lang (lango-lango lang). sa pagkamatuod, wala ya magdaug ang ila numero. Ang ila ya handum nga mapuno sang madamo nga kwarta amo ang nagrumpag sang ila nga pagpangabuhi, nga nagtapos sa kamatayon sang asawa!

  Ang aton ginasulog subong nga Kapiestahan amo ang Kapiestahan sang “Sagrada Familia”- indi sang “Manggaran nga Pamilya”. Kon aton nga tulukon, diri sa masami nagakarumpag ang aton mga panimalay tungud ang aton nga ginahandum, amo ang pagpamanggad sang aton pamilya sa material nga bagay, apang nalipatan naton nga ang labing importante amo ang pagpakabalaan sini. Ang masami nga aton ginapangita nga “kumbinasyon” amo nga kon paano kita makakita sang daku nga kwarta sa aton nga pagpangabuhi, imbes nga magpangita kita sang kumbinasyon kon paano kita mapalapit sa Mahal nga Dios!

  Ang misyon sang tagsa ka panimalay wala nagapadulong sa pagtipon sang manggad nga material nga amo sa masami ang nagasamad sang aton nga kaangtanan sa isa kag isa, kundi ang tagsa ka panimalay dapat magbuhat sang isa ka duog sa diin magatubo ang paghigugma kag magpabilin sa tunga sang tagsa-tagsa nga katapo. Si San Juan Pablo (John Paul II) nagsiling: “Ang tagsa ka panimalay nagaluntad agud sa pagdihon sang paghiusa sang mga tawo nga nagahigugma-anay". Amo ini ang dapat nga dagway sang tagsa naton ka panimalay. Ang paghiusa kag paghigugma wala nasandig sa aton pagkamanggaran sa material nga bagay. Kon amo man lang sini, tani wala magpakatawo ang aton Ginoo sa pasungan… tani sa palasyo ya! Apang ginapahanumdum sa aton subong, sa sini nga Kapiestahan sang Sagrada Familia nga ang minatuod nga manggad- ang minatuod nga nagapahiusa sa aton- amo ang aton man pagpakig-angut kag paghi-usa sa Mahal nga Dios, kay sa pagkamatuod, SYA AMO ANG ATON MATUOD NGA MANGGAD.

  Tularan naton ang pamilya ni Jesus, Maria, kag Jose. Magmatutum kita sa aton obligasyon sa Mahal nga Dios. Sa sini ginapaluntad naton ang matuod nga sadsaran sang PAGHIUSA KAG PAGHIGUGMA sa tunga sang aton panimalay- INI AMO ANG ATON MATUOD NGA MANGGAD!

CHRISTMAS (B)

CHRISTMAS DAY- Year B (Dec. 25, 2014)

(Luke 2:1-14-Midnight (24) & Luke 2: 15-20 -Day)

“Himaya sa Dios sa Kahitaasan! Kag paghidait sa duta sa mga tawo nga Iya nahamut-an!”

  Adlaw gid ato sang Paskwa sang Pagkatawo sang aton Ginoo, kag nadumduman sang isa ka tatay nga nagpangako sya sa iya nga pamilya nga sya ang ‘maluto’ sang tanan nila nga pagkaon- pamahaw, panyaga, kag panyapon. Sang gintan-aw nya sa ila kusina, nalipat gali sya sa pagpamakal sang ila mga kinahanglanon. Dali-dali sya nga nag-ilis kag nagkadto sa merkado nga nagasakay sa iya bisikleta, sa paghingabut sang iya mga kinahanglanon sa pagluto. Daw ‘nag-cramming’ na sya sa iya mga buluhaton. Salamat na lang kay nakahingabut sya kag wala gid niya pagpaslawa ang iya pamilya. Espesyal gid ang iya nga luto kag nag-enjoy gid ang iya pamilya sa iya mga ginpanghanda. Gani nagkaon sila sang iya mga ginluto asta gid mag-gab-i. Sang nagtakup na ang adlaw… sang manugtulog na sila… sang yara na sya sa iya higdaan… nagbalik ang iya painu-ino sa bisikleta nga iya ginsakyan. Abaw! Wala gali niya masakyan ini pauli! Sus! Nabilin nya gali sa merkado! Sa sobra nya kasako, nalipatan niya sa pagsakay sa iya bisikleta sa pagpauli. Tungud hanagub na ang gab-i kag kapoy na sya, nagpinangamuyo na gid lang sya nga kuntani, indi man ‘pagkawaton’ ang iya bisikleta.

  Aga pa sang masunod nga adlaw kag nagkadto sya sa merkado. Kag sa daku nga kalipay, nakita nya ang iya bisikleta nga na-parking sa amo man gihapon nga lugar nga iya ginbilinan. Lipay-lipay gid sya kay wala ini makawat. Gani ginsakyan nya ini, kag sang nagapauli na sya, nag-agi sya sa Simbahan, kag ginbilin ang iya bisikleta sa gwa sang Simbahan, kag nagsulod sya sa pagpangamuyo. Siling nya sa iya pangamuyo: “Lord, salamat gid! Bilib gid ko sa Imo! Ginbantayan mo gid nga indi madula ang akon bisikleta. Hamakon Mo, sa bug-os nga gab-i, ginbantayan mo gid ang akon bisikleta agud indi makawat. Salamat gid Ginoo sa imo kaayo… Amen… kag nagpangurus sya sa pagtapos sang iya pangamuyo. Pag-gwa nya sa Simbahan… WALA NA ANG IYA BISIKLETA!...KINAWAT NA!

  Manami na kuntani, apang may ligwat gid sa aton nga pagpangabuhi. Amo man ini sa aton espiritwal nga pagpanglakaton. Karon nga adlaw nagahimaya ang tawo sa Mahal nga Dios tungud natawo na sa aton nga tunga ang madugay na nga ginapaabut nga Manluluwas. NADULA sang tawo ang Iya kaangtanan sa Mahal nga Dios tungud sang pagpakasala sang aton nahauna nga ginikanan, apang sa karon nga adlaw NAKITA niya ang kaluwasan, pagpatawad, kag paghigugma nga ginpangako sang Mahal nga Dios paagi sa pagkatawo sang Iya nga Anak, kag Sya subong, nangin Dios nga indi na sang malayo sa aton, kundi DIOS NGA KAUPOD naton- ang Emmmanuel- ang Dios nga nagpuyo kag nakigbahin sa aton pangabuhi.

  Huo, karon nga adlaw nakita na naton ang aton nadula nga Dios, apang asta san-o ini nga pagkitaay? Suno sa aton nga eksperyensya, ang Paskwa daw asta lang sa Desyembre 25, kag pagkaligad sini, masami nga nagabalik naman kita sa aton kina-andan nga pagkabuhi, nga daw halos, kalayo na sa aton ang aton Dios. Nakita ta Sya subong, pero sa dili madugay, daw ‘madula’ naman Sya sa aton pag-ginawi.

  Mga utod, ang Paskwa sang Pagkatawo indi lang sa sini nga adlaw, kundi dapat nga magpadayon ini sa aton adlaw-adlaw nga pag-ginawi sa bug-os nga tuig- 24 oras kada adlaw… 7 ka adlaw sa isa ka semana… 31 dias kada bulan… kag 367 day kada tuig! Nakita ta na Sya subong, tani indi na naton Sya pagdulaon liwat paagi sa kabuhi sang pagpakasala, kag pagbalik sa kadudulman. Siling ni Mr. President  kay Momcy sang makita niya si Angel (nga nobya nya sang una) sa teleserye nga “Dream Dad”: “I lost Angel once. Now that I’ve found her, I will never lose her again!”

  Sa sining adlaw sang Paskwa, kuntani amo man ini ang mabungat sang tagsa ka tagipusuon naton: “I’ve lost my God once… I will never lose Him again!” Ang Paskwa isa ka pagsiling sa aton Mahal nga Dios: “Ginoo, indi ka na namon pag-ipamilin-bilin… bisan diin kami magkadto, bisan nano man ang amon nga buhaton… upod ka namon… kay indi ka na namon pagbuy-an!” Agdahon naton ang aton Ginoo: KARI KA KAG MAGPUYO UPOD SA AMON! Amo ini ang matuod nga MERRY CHRISTMAS!

9th Day- Misa Aguinaldo (B)

^9th Day- Misa Aguinaldo- Year B (Dec. 24, 2014)

(Luke 1: 67-79)

“Pabutlakon Niya ang adlaw sang kaluwasan sa aton, kag pasilakon Niya ini…sa pagtuytoy sa aton mga tikang sa dalanon sang paghidait.”

  May isa ka pamilya nga ang ila pangitan-an amo ang ‘pagkolekta’  sang mga basura sa ila banwa. Nagapuyo sila sa uma, kay mahapos didto magtipon sang basura sa ila ‘junk shop’. Sang isa ka kahaponanon, ginsugo sang tatay ang iya nga bata nga kuha-on na ang ila karito, kay manghimos na sila kay sa dili madugay, magagab-i na. Pagkaligad sang malawig nga mga mininutos, ang bata wala pa makabalik, kag nagpalibog ang amay kon nano na ang natabo sa iya bata. Apang sang dili madugay napantawan sya sang iya amay nga ‘ginahakwat’ ang karito. Ka ginsinggitan sya sang iya tatay: ‘Anak sa masunod, indi mo ina paghakwaton. TULOD ya ang kinahanglan sina!

  Sang daw nagahana na nga magdulum, ang amay nagsiling sa iya bata: ‘Anak kwa-a na didto ang karabaw nga nalambo sa puno sang kahoy, kag pasudla na diri sa aton ugsaran, kay dugay-dugay, gab-i na.’ Naglakat man ang bata suno sa ginsugo sang iya nga amay. Apang sang pagkaligad sang isa ka oras nga hinulat, wala pa makaabot ang iya nga bata. Napantawan sya sang iya nga amay nga GINATULOD sang iya bata ang karabaw. Nagsinggit naman si tatay niya: “BUTUNGA ya anak, indi pag-itulod!” Ahay, tig-a man ni ulo ang anak ko a! Pagkatapos mo sina anak, kwaa to ang kaldero likod sang balay ta kay maluto na kita sang aton nga panihapon ha! Pagkaligad sang pila nga mga mininutos, nabatian sang amay nga nagalinagubo na sa likod sang ila balay, lamang nga makita ang iya nga anak nga NAGABUTONG sang kaldero! Anak! Singgit sang amay: “Indi pagbutonga! Hawiri sa dalunggan ang kaldero agud mahapos bitbiton! Ahay! Kadtu-i na to ang imo manghod, kag dal-a diri kay makaon na kita dayon. Sang dili madugay ara na ang iya nga bata kaupod ang iya manghod nga nagatinangis sing todo-todo gid! Bal-an ta na siguro ang natabo. Ginbitbit nya ang iya manghod sa dalunggan!

  Amo ini ang sitwasyon sang tawo sang wala pa magtuhaw si Juan Bautista, kag sang ulihi sang mag-abot ang aton Ginoo sa Iya nga pagkatawo. Daw nagapangapkap sa kadudulman  ang bug-os nga katawhan. Nagabalalan-suli ang dalagan sang ila nga pagkabuhi, ini tungud ang tagsa ka tawo, nagasunod lang sa luyag nila nga buhaton, bisan pa ini yara sa idalum sang kadudulman sang sala. Amo ini karon ang ‘papel’ ni Juan Bautista nga ginpahayag sang iya amay nga si Zacarias. Bilang Propeta, si Juan Bautista magabantala nga nagapakari na ang kaluwasan, kag ang kapawa sang Mahal nga Dios amo ang mangin iwag sa tanan nga mga tawo, agud sila magpanglakaton sa dalan sang paghidait.

  Masami kon nagasalungkaki kita sa aton mga painu-ino, pagpati, ukon mga pagpangabuhi, madali man nga magluntad ang pag-ilinaway kag di-paghangpanay sa aton nga tunga. Kon naga buta-bungol man lang kita sa sarang naton mahimo nga maayo nga mga buhat, ang aton katilingban nangin katilingban sang pagpaiya-iya, kag dili pagpasilabot sa isa kag isa.

  Amo gani nga sa sining ika-siyam nga adlaw sang aton nga nobenaryo, ginatawag ang aton igtalupangud nga dapat mangin ‘bukas’ ang aton kaugalingon sa pagbaton sang kapawa sang paghidait, agud kita mangin instrumento sa pagbalay sang isa ka matuod nga katilingban sang Dios- ang katilingban nga nagahigugma,  may igtalupangud kag pagkabalaka sa isa kag isa, katilingban nga nagapakigbahin sa kabuhi sang tagsa-tagsa tungud kita isa lamang ka panimalay sang aton Amay sa langit.

  Ayhan, madamo kita sang mga pagsalungkaki sa isa kag isa, kag ayhan indi lang sa aton isigkatawo, kundi bisan sa aton Amay sa langit. Ayhan, nangin balingag ang aton nga pagkabuhi tungud wala kita magpamati maayo sang Iya Maayong Balita kag sa gihapon nagpadayon kita sa pagkabuhi sa aton ‘kasal-anan’. Apang ang maayong balita sa subong nga tion amo ini: “Pabutlakon Niya ang adlaw sang kaluwasan sa aton, kag pasilakon Niya ini…sa pagtuytoy sa aton mga tikang sa dalanon sang paghidait.” Kabay unta nga aton dakpon ini nga kahigayunan sa pagpakig-uli sa isa kag isa kag sa aton amay nga langitnon agud kita magkabuhi nga may paghidait!

8th Day- Misa Aguinaldo (B)

^8th Day- Misa Aguinaldo- Year B (Dec. 23, 2014)

(Luke 1: 57-66)

“Daw ano kadaku ang kaluoy sang Dios... maathag nga ang gahum sang Ginoo yara sa iya”

  Makatalanhaga kaayo ang natabo subong sa aton Ebanghelyo. Ang gintagna sang angel nga si Gabriel kay Zacarias, nga ang iya asawa nga si Elisabet, nga tigulang na kag baw-as, karon nangin indi na lamang panagna, kundi isa na ka KAMATUORAN. Sa bagay nga ang mga tawo- ang mga kaingod kag ang mga himata nila, makasiliing gid lang nga maathag gid nga ang Ginoo yara sa iya- yara nga nagpanghikot sa tagsa ka tinion sa kabuhi sang tawo. Nagapanghikot Sya bisan pa sa mga tinion nga nagadumdum kita nga daw sa wala na sinig paglaum ang aton kahimtangan.

  Amo ini kon ngaman nga ginabalikdan naton subong ang natabo sa kay Zacarias kag kay Elisabet. Sa pagkatawo sang ila nga bata nga ginhingalanan nila kay Juan- ang ngalan nga ginhatag sang anghel sa ila- ginapakita sa aton nga sa gihapon wala nagapalya ang PAGKAMALULUY-ON sang Dios. Ang Juan ukon Yohanan, sa tinaga nga Hebreo, nagakahulugan “Ang Dios Maluloy-on”, kag amo gid ini ang ginpahayag sang Dios paagi sa kabuhi ni Juan Bautista. Si San Juan Bautista nagbantala sini nga kaluoy paagi sa pagpakig-uli sang buong nga kaangtanan sang Dios kag sang tawo. Paagi sa pagtuman ni San Juan sang iya nga misyon bilang “tingug sa desierto”, sya nagdala sang maayong balita nga ang Dios ‘bukas’ sa pagbaton kag sa pagpatawad sa tawo nga mahinulsulon. Ginatan-ay na sang Dios ang Iya kamut agud sa pagdawhat sa tawo nga nalugmok sa sala. Paagi sa pagpatawad sang katawohan nga nakasala, ginabalik sang aton nga Amay ang aton nga dignidad bilang Iya mga anak.

  Nagpakumpisar ako sang mga kabataan nga magabaton sang ila ‘First Communion’. Ang isa ka bata nga nagpalapit sa akon daw halos indi pa makahibalo magkumpisar. Siguro ginakulbaan ukon daw nahuya pa sya sa akon. Gani, agud nga matuytoyan ko sya, ginhambalan ko ang bata, ‘Anak indi ka pa ka lagpat sang imo inughambal?’ Nagsabat man ang bata ‘Huo, Fr. Nalipat na ko.’ Gani ginsingganan ko sya. Sige anak, sunod ka sa akon ha. ‘Sa ngalan sang Amay….” Kag ang bata nagsiling man: “sa ngalan sang Amay…” Dayon nagsiling ako ‘Bendisyoni ako padre kay nakasala ako. Amo ini ang akon mga sala…’, kag ang bata nagsunod man sa akon ‘Bendisyoni ako padre kay nakasala ako. Amo ini ang akon mga sala…’ Naghulat-hulat na ako nga mahambal na sya sang iya mga sala, apang nagpabilin nga mahipos ang bata. Gani ginhambalan ko sya, ‘Karon, anak ano ang imo mga sala?’ kag nagsabat ang bata, ‘Karon, anak ano ang imo mga sala?’ Sus nalipat gali ako nga ginhambalan ko sya nga “magsunod” sa akon. Baw, daw ako pa ya karon ang makumpisar sa bata!

  Mga utod, amo ini ang aton ginasumalang sa pagkatawo sang aton Ginoo. Ginasumalang naton ang kaluoy sang  Mahal nga Dios. Sya bukas sa pagpatawad, apang ginakinahanglan man Niya ang aton PAGBUKAS sang aton kaugalingon, sa pagbaton sang aton kapaltahan kag mga kakulangan. Bukas kita sa posibilidad nga mahanabo ang pagbag-o sa aton daan nga kabuhi nga sala padulong sa kabuhi sang pagkamatarong kag pagkabalaan. Ang panahon sang Christmas amo ang pagtalupangud nga kita NAGAKINAHANGLAN sang patawad sang Dios, tungud sa pagkamatuod, kita, MGA MAHUYANG.

  Sug-alawon naton ang pagkatawo sang aton Ginoo nga may handum sa pagpanibag-o. Suguran naton ini paagi sa pagpaubos kag pagpangayo sang kapatawaran sang aton mga sala kag kapaltahan. Sa sini nga paaig ang aton Christmas mangin isa ka masinadyahon nga okasyon sang langit kag sang duta!

7th Day- Misa Aguinaldo (B)

^7th Day- Misa Aguinaldo- Year B (Dec. 22, 2014)

(Luke 1: 46-56)

“Ginbayaw Niya ang mga kubos…Ginbusog Niya sing maayo nga mga butang ang mga ginagutum...”

  Ang ‘pagdayaw ni Maria’ sa aton Ebanghelyo, isa ka pagpahayag sang pagpasalamat sa Dios tungud sang mga dalagku nga mga butang nga Iya ginhimo sa mga tawo. Pagpahayag ini nga ang Dios naga-upod sa iya mga katawohan, ilabi na gid ang mga ginapigos, mga kubos, kag mga ginagutum. Sa pagkamatuod, ang Ginoo mismo ang nagsiling nga kon ginabuhat naton ang isa ka bagay sa pinakalabing kubos sang Iya mga utod, ginabuhat man naton ini sa Iya. Ang aton ginoo mismo ang nagsiling nga sa katapusan sang panahon, kita paga-hukman suno sa aton binuhatan sa pinaka-kubos sang Iya nga utod.

  May isa ka tigulang nga monghe nga nagapangamuyo sa iya nga ‘selda’ sa malawig na nga mga tinuig. Nagapangayo sya nga pabukuron sang Mahal nga Dios ang iya nga pagtuo kay sa iya pamatyag, nagahuyang na ini. Daw ma-surrender na gid sya, apang sang isa ka adlaw, ginsabat gid man ang iya nga pangamuyo. Sa iya mismo nga selda, nagpakita ang aton Ginoong Jesus sa isa ka palanan-awon. Abaw! Lipay-lipay gid sya! Apang samtang nga nagapakighala sya sa Ginoo, sa hinali nagbagting ang ila lingganay- bagting ini sa pagpatimaan nga oras na nga mapakaon na sila sa mga imol nga nagakadto sa ila monasteryo.

  Nano bala ini? Siling niya. Mapabilin bala sya sa iya kahala nga Ginoo, ukon makadto sya sa mga imol nga nagahulat sing pagkaon nga ila igahatag? Kon indi sya maggwa, magutuman ang mga makaluluoy nga wala sing makaon sa sina nga adlaw. Gani, ginabutong-butong ang iya nga desisyon kon sa diin bala niya ibutang ang iya kaugalingon. Antes matapos ang bagting, nagdesisyon sya, bisan nga mabug-at sa iya tagipusuon, sa paggwa kag sa pagkadto sa mga imol. Gintalikdan niya ang iya nga “vision” kag nagkadto sa pagpakaon sa mga imol.

  Pagkaligad sang halos isa ka oras, nagbalik sya sa iya nga selda, kag daw halos indi sya makapati sa iya nakita. Ang iya nga selda nagsanag sang langitnon nga kapawa katulad sang kasanag sang adlaw, kag nakita niya ang aton Ginoo nga nagayuhum sa iya nga may daku nga pagpalangga.

  Nagluhod ang monghe sa pagdayaw kag pagpasalamat sa aton ginoo, kag sa iya palanan-awon ang aton ginoo nagsiling: “Anak, naglakat ka sa pagpakaon sa mga imol. Kon wala mo paghimoa ini, wala man kuntani ako magpabilin diri sa paghulat sa imo.”

  Mga utod, karon nga tuig, ginapatuhoy sang aton Simbahan diri sa Pilipinas ang “Tuig sang mga Kubos”. Ini sa pagpukaw sang aton mga tagipusuon nga ang mga kubos kag ang mga imol, bahin sang aton kabuhi. Ini nga mga kubos indi lamang ang mga nakulangan sang mga kinahanglanon nga material sa kabuhi, kundi ang mga may kakulangan man sa ila espiritwal, moral, pangkatilingban kag mga nagapangatubang sang mga nanari-sari nga mga kinahanglan. Ang mga kubos indi lamang ang mga imol sa kwarta, kundi ang mga nagakinahanglan sang paghangup, pagkaluoy, paghiguma, pagkabalaka, mga ginasika-sika kag mga ginadaug-daug, mga ginpatumbayaan kag wala ginasapak, tungud sila mga maluya. Diri kita gina-ganoy nga painu-ino kag espiritwalidad sang aton nga simbahan- ang pagkilala sa presensya sang aton ginoo sa aton tunga paagi sa aton pagtalupangud sa Iya sa mga kubos naton nga mga kautoran.

  Nagkalipay ang tagipusuon ni Maria, tungud sa pagtunda sa iya sang anghel nga si Gabriel nga sya mangin iloy sang Emmanuel, sya mangin bahin sang plano sang kaluwasan nga ginahatag sang Dios sa Iya mga tinuga, paagi sa pagkatawo sang Manluluwas sang kalibutan. Paagi sa Emmanuel, nangin matuod nga nangin bahin ang Dios sa kabuhi sang mga tawo nga madugay na nga nangin ulipon sang sala kag mga estruktura nga mapigoson. Sa sini, ginapahayag sang Dios ang kahilwayan sa tagsa-tagsa nga gina-ulipon sang sayup nga sistema kag sayup nga pagkabuhi.

  Ang pagdayaw ni Maria isa man ka panghangkat sa tagsa-tagsa sa aton samtang kita nagahanda sa pagkatawo sang aton Ginoo. Kita gina-agda sa paglakat sa sini nga dalan sa pagkilala sang presensya sang aton Ginoo ilabi na gid sa mga kubos naton nga mga kautoran. Sa sini nga panahon, ilabi na gid sa malapit na lang nga pagkatawo sang aton Ginoo, sin-o ang aton talupangdon nga kubos? Sin-o ang aton alagaran nga laragway sang aton Ginoo? Ang tagsa ka kubos nga aton ginalab-ot sa pagbulig amo ang presensya sang aton Ginoo. Amo ini ang paskwa nga matuod nga nagakahanabo sa aton tunga!

6th Day- Misa Aguinaldo (B)

PLEASE REFER TO THE HOMILY OF THE 4TH SUNDAY OF ADVENT. THANK YOU AND GOD BLESS US.

5th Day- Misa Aguinaldo (B)

^5th Day- Misa Aguinaldo- Year B (Dec. 20, 2014)

(Luke 1: 26-38)

  “Alagad ako sang Ginoo. Kabay nga matuman ini sa akon suno sa imo ginsiling.”

  May isa ka ilaga sa isa ka balay sa uma nga nagapaniid sa isa ka buho sang ginabuksan sang mag-asawa nga tag-iya sang balay kon ano ang “package” nga ila ginabuksan sa ila nga lamesa. “Ano naman bala ini nga pagkaon?” Amo ini ang iya ginapanumdum. Apang daku gid ang iya katingala sang makita niya ang sulod sang package isa ka “mousetrap” (lagpit). Sang pagkakita niya dumalagan sya pagwa sang balay kag nagkadto sa iban nga mga sapat sa gwa sang balay sa pagpangayo sing bulig. Nagkadto sya sa manok kag nagsiling: “May lagpit sa balay! May lagpit sa balay! Halung kamo!” Apang ang manok nagsabat sa iya: “Pasensya lang ilaga, indi man ina iya makaano sa akon. Wala man ina ya sang kaso sa akon kay indi man ko ya apektado sina!” Nagkadto ang ilaga sa baboy sa tangkal kag naghambal nga may lagpit sa balay. Apang ang baboy makahambal gid lang: “Ahay. Kaluluoy ka man Mr. Rat, pero wala gid ako sang mahimo para sa imo. Pangamuyo-an ko na lg ikaw.” Nagdalagan naman ang ilaga sa baka, kag naghambal sang amo man nga paandam. Apang ang baka nagsabat sa iya: “Nano man ya labut ko sa lagpit, ilaga? Indi man ina ya makadakup sa akon. Medyosi na lang nga makalikaw ka agud indi ka maipit!”. Gani ang ilaga nagbalik sa balay nga masinulub-on kag maga-isahanon nga magapangatubang sa lagpit nga ginbutang sang mag-asawa.

  Sadto gid nga gab-I, may naglagapak sa ginbutangan sang lagpit! Tak! Sigurado gid nga may nadakup ang lagpit! Ang asawa sang mangunguma nagdalagan sa paglantaw kon nano ang nadakpan, apang tungud kay madulum, wala niya makita nga ang naipit gali amo ang ikog sang isa ka dalitan nga man-og, kag sang nagapalapit sya, ginkagat sang man-og ang iya nga tiil. Ang bana nagbulig sa iya kag gindala sya sa ospital, kag sang pagpauli nila, may mataas nga lagnat ang iya nga asawa.

  Tanan kita nakahibalo nga manami gid sa lagnat amo ang mainit nga sabaw sang manok. Gani gin-ihaw sang mangunguma ang iya manok kag ginsabawan ini agud mahigop sang iya nga asawa. Apang nagpadayon pa gid ang lagnat sang iya nga asawa, kag kinahanglan nga bantayan sya sa sulod sang 24 oras sang iya mga abyan kag mga kaingud. Agud mapakaon sila, ang mangunguma nagkatay sang iya baboy para sa sud-an sang mga manugbantay. Apang wala gid matabangan ang iya asawa, kag sang ulihi, napatay gid. Tungud madamo ang nagkompanyar, ang mangunguma nag-ihaw sang iya nga baka para may kaonon ang tanan.

  Ang ilaga nagasid-ing sid-ing lang sa buho sang balay sang mangunguma nga may daku nga kasubo.

  Sa mga tinion nga may mabatian kita nga ang aton isig-ka-tawo yara sa katalagman, apang wala kita sang labut sa sitwasyon, panumdumon ta ini nga istorya. Kon ang isa sa aton yara sa katagman, kita tanan may kaangtanan sini. Tanan kita bahin sa pagti-ug sang aton kabuhi. Dapat kita magbinuligay sa isa kag isa.

  Amo ini ang ginbuhat ni Maria Santisima sa aton Ebanghelyo subong. Sa iya pagsiling nga “Alagad ako sang Ginoo, Kabay nga matuman ini sa akon suno sa imo ginsiling.” Sya NAGPAKIGBAHIN sa plano sang Dios nga kaluwasan para sa tanan nga katawhan. Pwede makasiling si Maria sa anghel: “nano ang labut ko? Ngaman nga pasilabtan ninyo ako. Pwede man maluwas sang Dios ang tawo sa isa lang ka pitik sang Iya mga tudlo! Ngaman pa gid nga gamohon ninyo ako?” Apang tungud sang duna sa tagipusuon ni Maria nga MABINULIGON, wala gid sya magpamalabag sa plano sang Dios, bisan pa para sa iya, indi niya ini mahangpan. Nagbaton sya sa kabubut-on sang Dios nga may pagpa-ubos kag pagsalig, nga paagi sa pagtuman sini, indi gid sya pagpatalangon  sang Dios.

  Sa sining ika-lima nga adlaw sang Misa Aguinaldo, tularan naton ang pagpakigbahin sa plano sang Dios paagi sa aton pagpadayon sa pagbuhat sang maayo, kag tulukon naton ang pagkamabinuligon ni Maria Santisima. Isa ka matahum nga paghanda sa pagkatawo sang aton Manluluwas amo ang pagtalupangud sa aton mga kautoran nga nagakinahanglan sang bulig. Balikdon naton sila kag itan-ay ang aton ikasarang sa pagbatak sa ila. Panumdumon naton nga kita naangut sa isa kag isa. Sa sini aton gid makabuhi ang kamatuoran nga ang tagsa-tagsa, ilabi na gid ang mga kubos, aton man mga utod. Ano ang aton mabulig sa aton mga kautoran subong nga paskwa?

4th Day- Misa Aguinaldo (B)

^4th Day- Misa Aguinaldo- Year B (Dec. 19, 2014)

(Luke 1: 5-25)

  Mga alas 11 na ang takna sa aga, kag may isa ka bata nga nagkadto sa Simbahan agud maghingabut sa ‘scheduled confession’, kay luyag sya magkumpisar sa pari. Ang pari nga iya ginkumpisaran daw may gamay nga ‘kabudlayan’ sa iya panghambal. Daw ginasulit-sulit nya iya ginahambal. Kon sa aton pa, daw may pagka-pitla maghambal ang pari.

  Sa pihak nga bahin, ang nanay sang bata, daw nagakabalaka na sing hulat sa ila balay sang iya nga bata, kay alas-tres na sing hapon, kag wala pa gihapon nakapauli ang iya nga bata. Gani nagkadto ang iya nanay sa Simbahan sa paglantaw kon nano na ang natabo sa iya nga bata. Sang magsulod na ang iya nga iloy sa Simbahan, nakita niya nga ang iya bata nagaluhod kag nagapangamuyo. Nagbalikid man ang iya nga bata, kag sang makita si nanay nya, nagsiling ang bata: “Nay, maluoy ka man sa akon. Buligi man ako. Naka 278 pa lang ako ka Our Father.” Baw siling ni nanay nya: “Grabe man si Father, sobra man maghatag sang penitensya sa akon bata.” Sa pagkamatuod, 4 lang ka Our Father ang penitensya nga ginhatag sang pari, ugaling wala maintindihan  sang bata, kay siling ni Father: “Bilang imo penitensya magpangamuyo ka sing a…pat…ap…at…apat ka Our Father.” Abi sang bata ang iya penitensya 444 ka Our Father nga pangagdion.

  Mabudlay kon may diperensya ang aton panghambal. Indi kita madali mahangpan. Mas mabudlay pa gid kon INDI na gid kita makahambal- Kon kita apa! Amo ini ang natabo kay Zacarias subong sa aton Ebanghelyo. Mabudlay ang iya gina-agihan nga sitwasyon indi kay tungud nga apa sya umpisa sang bata pa sya, kundi tungud nga sya nag-apa lang tungud sang iya pagkulang sa pagtuo- daw silot ini nga ginhatag sang Dios sa iya! Siguro ma-imagine lang naton kon nano nga ‘adjustment’ ang ginhimo ni Zacarias sa iya sitwasyon nga indi na sya makahambal pagkatapos sang pagtunda sa iya sang anghel nga ang iya nga asawa nga tigulang na kag baw-as pa, magabusong kag magaanak sang isa ka anak nga lalaki. Kag pagahingalanan sya kay Juan.

  Ayhan nagasamo ang balatyagon ni Zacarias tungud sa kalipay nga gindulot sang balita nga magabusong ang iya nga asawa, nga amo na ang nangin sabat sa ila pangamuyo, apang sa pihak nga bahin, isa man ka daku nga pagkahangawa tungud tigulang na sila kag nangin apa pa sia.

  Mga utod, indi bala nga ang eksperyensya ni Zacarias masami amo man ang aton gina-agihan sa aton kabuhi? Indi bala nga sa masami, kabudlay hangpon sang kabubut-on sang Dios kon aton masugata ang mga pagtilaw kag mga panghangkat sang kabuhi. Apang sa sini man nga mga tini-on, aton nga mabatyagan nga ang Dios padayon nga nagapanghikot sa aton kabuhi ilabi na gid sa mga remalasos nga aton ginasumalang. Matuod! Ang Dios nakahibalo kon nano ang maayo para sa aton. Nagapanghikot gid Sya, apang sa masami, nagapanghikot ang Mahal nga Dios sa MAKATALANHAGA nga paagi. Ayhan agud sa pagpahibalo sa aton nga indi gid kita makasalig sa aton tawohanon nga ikasarang kundi sa Iya gid lamang Diosnon nga pagtabang!

  Diri kita ginadala sa aton nga pagpamalandong subong nga adlaw, ang aton paghulat sa matawo nga Mesias, isa ka paghulat sang pagtuo… isa ka paghulat sa pagtukib sang kabubut-on sang Dios nga Iya ginatigana sa tagsa-tagsa sa aton, Nagakinahanglan lang nga kita mangin BUKAS sa Iya nga kabubut-on sa aton paagi sa PAGPAUBOS sang aton mga kaugalingon, kag PAGSALIG nga INDI KITA NIYA PAGPATALANGON.

  Si Zacarias nagsalig lang sa iya tawohanan nga ihibalo, ayhan kon sa siyensya (science), imposible na nga magbusong pa ang iya nga asawa. Kag ayhan, sa kalawigon sang panahon, ‘nalugaw-an’ na sila sang paghinulat sang isa ka bata nga  matawo sa ila nga mag-asawa. Apang ang aton Ebanghelyo subong nagapahanumdum sa aton sang isa ka salandigan: “ANG DIOS NAGAPAMATI SA ATON MGA PAHANUNGDAN”. May hulubaton nga nagasiling: “God’s delays are never God’s denials.” Amo ini ang natabo kay Zacarias, kag amo man ini ang dapat nga magluntad sa aton panimuot kag tagipusuon samtang nagahulat kita sa pagkatawo sang aton Ginoo.

  Sa sining mga inadlaw sang Misa Aguinaldo, aton ipahamtang ang aton kaugalingon sa PAGSALIG nga may MAGATUNGA NGA MAAYO sa mga nagakahanabo sa aton kabuhi, ilabi na gid sa mga pagtilaw kag mga kabudlayan nga aton ginasumalang. Sa likod sang kasakit, magsalig kita nga may ginatigana sa aton ang Mahal nga Dios nga kalipay kag himaya… sa likod sang kamatayon, yara nagahulat sa aton ang bag-o nga kabuhi s ang pagkabanhaw. Amo gani nga sa mga pagpangibulahan sang aton Ginoo, Sya nagsiling: “Bulahan ang mga imol, kay ila ang ginharian sang Dios.” Tungud sa likod sang aton kaimulon yara ang MATUOD NGA MANGGAD- Ang Ginoo nga magaabut kag magapuyo KAUPOD naton.

3rd Day- Misa Aguinaldo (B)

^3rd Day- Misa Aguinaldo- Year B (Dec. 18, 2014)

(Mt. 1: 18-24)

  Isa ka muslim nga ‘imam’ (pari sang mga muslim), kag isa ka Pari sang Katoliko, nagpabugalay sang ila nga relihiyon. Siling sang katoliko nga Pari: ‘Mas madamo ya ang amon mga Santos nga mga Katoliko sang sa inyo nga mga muslim!’ Indi man magpapierde ang muslim. Gani nagsiling sya: ‘Huh! Tan-awon ta e. Kon gusto mo pustaan ta? Mahambal kita sang ngalan sang santos, kag sa tagsa ka ngalan, isa man ka nahot nga buhok sa aton ulo ang bugnuton!’ Huo! Fight! Hambal sang pari nga katoliko. Ikaw danay ang una.

  Nagsugod ang muslim sa pagsiling: ‘San Mustapha,’ kag ginpili nya gid ang buhok nga mahaba kag madamol sa ulo sang pari nga pagabugnuton! Nakibot ang pari kay nasakitan sia. Gani nagsiling sia: ‘San Pedro kag San Pablo!”, kag nagbugnot man sia sing duha ka buhok sa muslim.

  Nagduhong ang muslim kag nagpanumdum, kag nagsiling: “Santo Alibaba kag ang kwarenta ka makawat (Alibaba and the 40 thieves!), Baw 41 gid ka buhok ang iya ginbugnot.

  Ginlantaw sang pari ang tanan nga buhok sang muslim, kag ginhawiran ini nga nagakulukadlaw kag nagsiling: ‘Todos los Santos’ (ang tanan nga mga santos), kag gin-ubos nya pang-gabut  ang buhok sang muslim tubtub sya makalbo!

  Ginapalibutan kita sang madamo nga mga Santos sa aton nga Simbahan kag sa aton mga debosyon bilang mga katoliko. Ini tungud ini nga mga tawo nga katulad man naton, nangin lutaw sa ila pagkabaganihan. Nangin ‘exemplary’ ang ila nga pagpangabuhi sa bagay nga matahum nga sila mangin sulundan man sang aton pag-ginawi. Agni la pangabuhi nangin aton ‘iwag’ sa aton pagpanglakaton sa ibabaw sini nga duta.

  Ang Santo nga aton ginahatagan sing igtalupangud subong amo si San Jose, isa ka tawo, nga suno sa aton Santos nga Ebanghelyo ‘nga nagahimo sing matarung’. Ang iya paghatag sang dignidad kay Maria nga nagabusong na sa ‘pagkadalaga’, kon sa aton tawohanon nga talaksan, isa ka disgrasyada, isa ka dalayawon nga buhat bisan pa ini daw halos indi mahangpan. Ang pagtindog ni San Jose bilang bana ni Maria, bisan pa sa iya nga sitwasyon, isa ka baganihan nga buhat agud nga malikaw si Maria sa mga kahuy-anan, pagpanglibak sang mga tawo sa palibut, kag bisan pa sa kamatayon! Kay sa sadto nga panahon, kon ang isa ka dalaga mahibal-an nga nagabusong nga wala sing bana, ginaganoy pakadto sa tunga sang ila nga banwa, kag ginapatay paagi sa paghaboy sang bato sa iya, tungud sia ginahusgahan na sang mga tawo nga isa ka mahigko nga babayi tungud sang iya pagpakasala!

  Wala ni isa ka ‘pulong’ nga ginhambal si Jose sa mga Ebanghelyo, apang ang iya nga PAGKABUHI isa ka daku nga pagpanaksi sang kaalwan, pagpatawad, kag paghigugma sang Dios nga iya ginabugay sa tagsa-tagsa ka tinuga. Amo ini ang maayong balita sang ginapaabut naton nga Pagkatawo sang aton Ginoo- nga ang Dios mapinatawaron, mahinangpanon, kag puno sang mapinadayunon nga gugma.

  Paagi sa pagbaton ni San Jose kay Maria, natigayon ang plano sang Dios nga Amay, agud maluwas ang bug-os nga katawhan… mabatak kag indi malugmok sa kasal-anan! Amo man ini ang dapat nga maghari sa tagipusuon sang tagsa-tagsa sa aton ilabi na gid sa sini nga panahon. Ang Christmas isa ka pagdihon sang aton kaugalingon nga  mangin mapinatawaron, mahinangpanon, mahigugmaon, kag may pagkablaka sa isa kag isa. Matabo gid ang matuod nga Paskwa sa aton tunga kon katulad ni San Jose kita nagahangup, nagapatawad, kag nagahigugma! Sa subong nga Christmas yari na bala ini sa aton tagipusuon? Handa na bala kita sa pagpatawad, paghangup, kag paghigugma sa aton isig-katawo nga aton gid ginabudlayan nga pakigbagayan?

2nd Day- Misa Aguinaldo (B)

^2nd Day- Misa Aguinaldo- Year B (Dec. 17, 2014)

(Mt. 1: 1-17)

  Duha ka mag-amigo ang nagkit-anay pagkaligad sang  malawig nga tinion. Madamo na sila sang ginkadtuan nga mga lugar agud sa pagpangit a sing maayo nga pangabuy-anan. Sang ila pagkit-anay, daw indi gid maka-igo ang isa ka adlaw sang ila pagpaambitanay sang ila mga inagyan. Naka-abut sila sa punto nga ang isa nagpamangkot sa iya amigo kon bala may asawa na sya? Nagsabat ang iya amigo nga ‘WALA’ pa gid. Ginpamangkot sya sang sang iya amigo kon ngaman, kay naka-pundar naman sya sing mabakud sa iya pangabuhi. Ginsaysay sang iya amigo ang mga rasones. Siling niya, sang nagkadto sya sa America, may nakita sya nga isa ka babayi… matahum, mabuot, kag maalam. Para sa iya amo na kuntani ato ang iya nga ‘ideal’ woman nga kuntani iya nga pangasaw-on. Ugaling sang nagkilalahay sila sing lubos, iysa natalupangdan nga ang ‘kana’ gali, indi man sang ‘perpekto’. Madamo man sya sing kakulangan, gani, wala niya pagpangasaw-a ang amo nga babayi.

  Sang iya pagbalik diri sa Pilipinas, nakakilala naman sya sang isa ka babayi nga para sa iya amo na ang iya nga ‘ideal woman’. Mabuot, maalam, matinatapon, kag gwapa. Ugaling sang nagkilalahay sila sing lubos, iya natalupangdan nga may mga kakulangan gihapon ang amo nga babayi, indi gali sya ‘perpekto’! kag gani, wala naman niya pagpadayuna ang pagpangaluyag sa amo nga dalaga.

  Apang sang ulihi, nakakilala naman sya sang isa ka babayi nga para sa iya amo na gid ang pinaka-ideal nga babayi nga iya ginapangita- ang iya na gid pakasalan! Daw amo na gid ini ang iya ginadamgo nga babayi sa iya kabuhi- gwapa, maalam, maalwan, may ‘sense of humor’, kag matinatapon. Sa malip-ot nga pulong: PERFECT gid ini nga babayi. Ginpamangkot sya sang iya amigo: “Hai, ngaman nga wala mo pagpangasaw-a ato nga babayi?” Sabat niya: “Sang nagkilalahay kami sing lubos, natalupangdan ko nga nagapangita sya sang ‘PERPEKTO NGA LALAKI’, kag wala ako makapsar sa iya ginapangita, gani, wala nya ako pagsabta… ako na iya ang na-busted!

  Kon ngaman nga ginsaysay subong sa aton ang lista sang mga katigulangan sang aton Ginoo, ini tungud nga ginapakita sa aton nga Sya naghalin man sa isa ka panimalay nga tawohanon- panimalay nga indi sing perpekto- panimalay nga katulad man sang aton mga panimalay, nagatimakas agud nga malampuwasan ang aton kaluyahon.

  Amo ini ang maayong balita sa pagkatawo sang aton Ginoo. Sia nga Dios, ang putuk-putukan sang perpeksyon, nangin tawo, sa tanan niya nga mga kapaltahan, agud ang tawo nga makasasala, MABATAK sa pagkabalaan sang Dios. Amo gani nga ang aton Ginoo amo ang ginatawag ni San Pablo nga bag-o nga Adan, tungud ang aton Ginoo amo ang nag-tama sang dapat nga laragway sang tawo suno sa plano sang Dios. Ang pagpakasala indi sang tanda ukon patimaan sang aton pagkatawo, tungud amo ini ang ginbuhat ni Adan kaupod ni Eva didto sa Paraiso. Sa baylo, ginbalik sang aton Ginoo ang tama nga laragway sang tawo suno sa plano sang Iya nga Amay paagi sa pagkabuhi sa pagtuman sang kabubut-on sang Amay sa TANAN nga tion sang Iya pagkabuhi diri sa duta. Ang marka sang matuod nga pagkatawo amo ang pagtimakas sa pagbuhat sang maayo, nga makapahamuot sa Amay, nga sia mangin balaan katulad sang aton Ginoo.

1st Day- Misa Aguinaldo (B)

1^st Day- Misa Aguinaldo- Year B (Dec. 16, 2014)

(Jn. 5: 33-36)

  May mag-asawa nga may diutay nga away-away, apang sa dalayon sang mga iniadlaw, nagdaku ini kag nagdulot ini sang ila “wala-pagbugnuhanay”. Gani wala sila ‘naghinala… wala sing isa sa ila nga luyag mag-una hambal!”. Nadumduman sang bana nga manuglakat gali sya pa-Manila sa masunod nga adlaw, kag tungud aga pa ang iya nga flight, kag nahadluk sya nga basi magbulaw sya, antes sya magtulog sa gab-i, nagsulat sya sang ‘note’ para sa iya asawa” :Lihug pukawa ako alas 5 sang aga bwas.” Ginbutang niya ini sa ila nga kama agud makita sang iya nga asawa. Pagka-aga, daku ang iya nga kakibut nga nakabugtaw na sya kag wala sya pagpkuwa sang iya nga asawa. Alas 9 na sang aga! Nakalupad na ang eroplano nga iya pagasakyan! Akig-akig gid sya sa iya nga asawa nga gusto nya gid mulayon ang iya asawa sang makit-an niya ang isa ka papel sa iya uluhan nayon. Ginkuha niya kag ginbasa ang nasulat sa papel: “Alas 5 na! Bugtaw na!”

  Madali kita magtalang kon wala sing pagpakig-uli (reconciliation) nga mahanabo sa aton tunga. Daw sa nagapanglakaton kita sa tunga sang kadulum sang kagab-ihon. Madali lang kita nga malugaw-an tungud indi naton makita sing klaro ang aton padulungan!

  Amo ini subong ang ginasiling sang aton Ginoo sa aton Santos nga Ebanghelyo. Ang mga tawo nagkalipay tungud sa panaksi nga ginhatag ni Juan, katulad sang isa ka “suga” nga nagsanag sa ila, sa ila pagpanglakaton padulong sa dalan sang pagpakig-uli sa   Mahal ng Dios. Ini tungud si Juan “nagbantala” sang mensahi nahanugud sa paghanda sang ‘tadlong’ nga dalan para sa Manluluwas nga maga-abut. Apang, gindugangan pa gid sang aton Ginoo subong sa aton Ebanghelyo. Indi lamang nga ang ginbantala ni Juan amo ang nagahatag sang kapawa sa ila, kundi Sya mismo, nga ginhandaan sini nga alagyan amo na karon ang nagapanaksi sini nga kapawa, paagi sa Iya mga ‘BUHAT’ nga ginhatag sang amay nga pagahimuon Niya.

  Sa aton pagsugud sang Misa Aguinaldo, kita nagahanda man sining dalan nga pagaagyan sang aton nga manluluwas nga matawo sa aton tunga- ang paghanda nga ginalikupan indi sing kadulum, kundi sang KAPAWA. Ini nga kapawa aton lamang madala paagi sa aton maayo nga binuhatan, kay samtang ang tawo nagakabuhi sa kalainan, sa gihapon yara sia sa duog sang kadulum!

  Ini nga panahon, amo ang tion nga aton mapabutyag ini nga kapawa paagi sa pagtadlong sang aton tiko nga pagkabuhi, sa pagtapan sang aton bugal, sa pagtalupangud sang aton mga kautoran, ilabi na gid ang mga imol kag mga kubos. Indi naton pag-‘taguon’ ining bukal nga kaalwan nga yara lang sa aton tagipusuon. Aton ipabutyag ini paagi sa aton maayo nga binuhatan nga sarang naton masuguran karon, sa aton pagsugud sang aton Misa Aguinaldo.

  Ang kahulugan sang ‘aguinaldo’=regalo, halad, pag-dahu! Aton i-dahu sa isa kag isa ang maayo nga buhat! Sa sini, indi gid kita magtalang sa aton paghanda sang dalan nga paga-agihan sang aton Manluluwas. Ihanda naton ang masanag nga dalan sa aton pagpanaksi kag pagpa-ambit sang kaayo sang Dios sa aton isigkatawo!

4th Sunday of Advent (B)

4th Sunday of Advent- Year B (Dec. 21, 2014)

(Luke 1:26-38)

  “Ang Espiritu Santo magakunsad sa imo, kag ang gahom sang Dios magalikop sa imo…” Amo na ini ang katumanan sang pangako sang Dios sa Iya mga tinuga. Amo ini ang tema sang aton ika-apat nga Domingo sang paghulat sa sining Panahon sang Adbiento, kag aton subong ginatulok kag ginapamalandungan, ang pagtunda sang Anghel kay Maria Santisima, kag ang ‘pagbaton’ niya sang iya nga papel bilang isa ka ‘kubos nga alagad’ sang Dios.

  Si Maria indi lamang sang isa ka tinuga sang Dios; kundi sia amo ang “Obra Maestra’ sang Dios. Paagi sa aton paghatag sang kadungganan kay Maria, aton man ginapadunggan ang Mahal nga Dios sa Iya pagpanghikot agud matigayon ang kaluwasan nga Iya ginatan-ay sa mga tawo nga mga makasasala. Ang kabug-osan sang pagtuga sang Diios makita sa tagsa hitabo, mga butang, mga katawohan nga Iya gintuga, kag sa tanan nga Iya gintuga, si Maria Santisima, amo ang putok-putokan sang pagkahimpit sang Dios (Perfection of God).

  Ang pagtunda kay Maria Santisima, dapat hangpon nga wala lamang na-sentro kay Maria, kundi ini nagapatuhoy sa makaluluwas nga plano sang Dios, natuman sa pag-abut sang aton Ginoong Jesus, nga ginhatagan sang ‘pagpakig-bahin’ ni Maria. Ang aton pagtulok kay Maria Santisima isa ka man ka pagtulok sa aton kaangtanan sa aton ginoong Jesus. Kon ginahatagan naton si Maria sang naga-kaigo nga pagtahud subong, ini tungud sang iya nga kaangtanan sa iya nga ‘papel’ bilang bahin sang kaluwasan- bilang Iloy sang Manluluwas. Amo nga ginasiling naton nga si maria amo ang putok-putokan sang mga tinuga sang Dios tungud si Maria amo ang iloy sang Dios.

  Paagi kay Maria, ginhatagan sang pinakamataas nga dignidad ang aton tawohanon nga mga panimalay, kay si Maria naghalin man sa isa ka tawohanon nga pamilya. Si Maria bunga sang nagkalain-lain nga kaliwatan… sang mga hari, mga propeta kag sang bug-os nga kaliwatan sang katawhan nga naghandum sang bugay sang Dios sang KALUWASAN. Sa bagay nga paagi sini, kita makasiling nga ang tagsa-tagsa sa aton bahin man sang nanuhay-tuhay nga mga ginhalinan kag naangut kita tanan sa isa ka rasa nga nagahulat sini ng kaluwasan.

  Nagakadapat gid nga pagapadunggan kag tahuron si Maria, tungud paagi sa iya, natigayon ang kaluwasan nga gintigana sang Dios sugud pa sang pagpakasala sang aton nahauna nga ginikanan nga si Adan kag si Eba. Sa bagay nga subong nga si Eba amo ang nangin gikanan sa kasal-anan sang katawohan, si San Pablo nagsiling nga si Maria amo ang bag-o nga Eba nga paga-agyan sang kaluwasan. Amo gani nga sa sini nga kahigayunan si maria makasiling gid lang : “My soul proclaims the greatness of the Lord, and my spirit exults in god my Savior because He has looked upon His lowly handmaid.”

  May isa ka “waiter” sa isa ka kalan-an sa Roma nga ginahingalan nga si Jose Rivella. Ginkumpilan sya sang mga tawo nga “Waiter sang aton Iloy”, tungud ang tanan nga iya ginkita sa iya trabaho, iya ginpanghatag sa mga imol. Isa sya ka daku nga deboto sang aton Mahal nga Birhen, apang tungud kay kakat sya sa iya trabaho, halos indi na sya makahimo sang iya “regular” nga pagpangagdi sang Santo Rosaryo. Apang kay tungud sya gid debotado sa Mahal nga Birhen, nagpangita sya sing pahito kon paano makapangamuyo sang Rosaryo samtang nagasirbe sya sa iya nga trabaho. Sa wala mahibalo-an sang mga nagakalaon sa kalan-an nga iya gina-obrahan, gina-isip niya ang mga ulo sa tagsa ka nagasulod, kag sa tagsa ka napulo ka “customer”, isa man in aka dekada sang Santo Rosaryo. Sang sya mapatay ginbantala sang Radio Vaticano ang balita nga nagasiling: “Ang isa ka Santo, nagtaliwan na sa Roma!” Ini tungud sang iya daku nga debosyon kay Maria Santisima, kag tungud sang iya nga pagtalupangud sang mga imol. Bisan matuod nga imol man sya, wala sya magkahadluk nga mawad-an, sa iya nga pag-ambit sang iya kinitaan sa iya isig-ka-imol. Amo ini ang deklarasyon subong sang aton Simbahan sa Pilipinas. Tuig subong sang mga “kubos” kag aton nga ginapahayag nga kita “simbahan sang kubos ukon sang mga imol”. Ang simbahan sang mga kubos indi sang simbahan sang mga sakun ukon maiya-iyahon. Ang simbahan sang mga kubos amo ang simbahan nga “nagapaambit nga may kaalwan… may paghigugma para sa tanan!”.

  Amo ini si Maria Santisima- isa ka kubos nga alagad, apang maalwan nga nagpaambit sang iya nga anak agud nga aton maagum ang kaluwasan. Insakto gid ang ginasiling: “Nobody is so poor that he has nothing to give; nobody is so rich that he has nothing to receive!”.

  Sa aton paghanda sa malapit na gid lang nga pagkatawo sang aton Ginoo, ginalantaw ta man bala ang ka-importansya sang aton Mahal nga Iloy Birhen Maria? Ang aton pagka-kubos sa atubangan sang Dios amo ang matahum nga lugar sa diin Sya matawo sa aton tagipusuon. Ang mga bagay nga aton ginabakal agud aton ipang-regalo, ipanghatag, ipamaskwa, ukon sa pagpuno sang aton mga lamesa, mga simbolo lamang sang matuod nga paghanda sang aton tagipusuon. Kon bugalon man kita gihapon, indi maka-patawad, ukon sakon sang mga bagay nga pangkalibutanon, ang aton paghanda isa ka “palso” nga paghanda, kay sa pagkamatuod, ang paskwa wala nagakahanbo sa isa ka lugar, kundi sa tagsa naton ka TAGIPUSON- diri naton Sya gina-abi-abi- WELCOME JESUS!

3rd Sunday of Advent (B)

3rd Sunday of Advent- Year B (Dec. 14, 2014)

(John 1:6-8, 19-28)

  May isa ka maisug kag isganan nga soldado, nga nakapakig-away na sang madamo nga mga patag-awayan para sa iya pinalangga nga pungsod. Nangin isa siya ka heneral sang ila nga guban, kag sang ulihi nangin isa ka Emperador sang ila nga Emperyo.

  Isa ka adlaw, may isa katigulang nga soldado nga nagkadto sa iya sa pagpangabay sa iya nga nagasiling: “Mahal nga Emperador, luyag ko kuntani nga magkadto ka sa akon kaadlawan. Tigulang na ako kag basi amo na ini ang akon katapusan nga birthday. Mangin malipayon gid ako kon makakadto ka sa sini nga adlaw. Bisan nga mapatay naman lang ako dayon.”

  Nagbalibad ang Emperador nga nagsiling: “Pakat ako sa akon mga schedules. Indi gid ako makakadto. Pero magapadala ako sing tiglawas kag madamo nga mga regalo para sa imo.”

  Gin-uba sang tigulang nga soldado ang iya nga bayu, kag iya gintudlo ang “daku” nga pinali-an sa iya dughan nga nagasiling: “Mahal nga Emperador, sang nagapakig-away kita, sang ikaw soldado pa, ang aton kaaway maga-labu kuntani sa imo agud patyon ka. Wala ako magpadala sang tiglawas agud sa pagsagang para sa imo. Gintaya ko ang akon nga dughan, agud ako na lang ang masawo sang iya nga labu, kag amo ini ang pinali-an sadtong madinalag-on nga adlaw, indi lamang tungud nangin madinalag-on kita sa sadto nga inaway, kundi tungud kay ikaw NABUHI tungud kay ginhalad ko ang akon kaugalingon sa imo!

  Nadumduman sang Emperador yadto nga hitabo… kag nagtangu sya sang iya nga ulo kag nagpamukpok sa iya dughan…

  Ang Christmas indi lamang sang  matahum nga handurawan nga aton ginadumdum kada petsa 25 sa bulan sang Disyembre. Sa baylo, isa ini ka pagpahanumdum sa aton sang TUMAN KA DAKU nga PAGHIGUGMA sang Dios sa aton, nga ang dapat mangin buhi sa aton tagipusuon kag kabuhi. Amo ini ang magadala sa aton sa pag-eksperyensya sang aton nga PAGTUO kag PAGSALIG sa Mahal nga Dios sa Manluluwas nga Iya ginapdala agud mangin kaupod naton, mangin kabahin sang aton kabuhi, kag mangin Dios nga YARI sa aton.

  Amo ini ang kalangkag ni Juan Bautista sa atonEbanghelyo. Maathag nga sya alagad sang Dios, apang, may kakunyag nga nagahari sa iya nga tagipusuon sa paghanduraw sa Manluluwas nga iya ginapaabut, sa bagay nga indi gid sya malugpayan sa paghawat-hawat sang iya mabalitaan ang nahanungud sa aton Ginoo. Bisan pa nga ginakabig sya nga amo ang pinakadaku sa mga propeta, nagpaubos sya sang iya nga kaugalingon nga nagasiling: “Bisan pa ang higot sang Iya mag sandalyas, indi ako sing takus sa paghubad!” Gin-atubang ni Juan nga may pagpaubos kag pagsalig ang KALUOY sang Dios, nga  ginadala sang Manluluwas sang kalibutan.

  Diri nagalibut ang aton paghanda sa pag-abut sang aton Manluluwas… nga aton tagipusuon magbaton sa iya nga may mapainubuson nga kahimtangan… ang paghatag sang aton kaugalingon bilang kubos nga regalo para sa aton Manluluwas paagi sa aton pagpanumbalik sa Iya kon kita nagtalang, kag pagpanibag-o sang aton kaugalingon kon kita may mga kapaltahan.

  Mangin balingag ang aton paghanda sa sining Christmas kon ang aton lang ginatulok amo ang “kadakuon” ukon “kanamion” sang mga pagkabutang nga aton mahatag kag aton mabaton, apang bulag kita sa pagtalupangud sang aton “kagamayon” sa atubang sang Hari nga magaabut. Wala Sya nagakinahanglan sang aton mga pagkabutang ukon sang aton “mapasikat” sa iya ukon sa aton isigkatawo… ang Iya ginakinahanglan amo ang aton MAPAINUBUSON nga KAUGALINGON nga nagapahanugut nga Sya amo ang mangin UNA sa aton pagkabuhi! Sa sini ang MERRY CHRISTMAS indi lang para sa aton, kundi mas labi na gid sa Iya nga amo ang kahulugan sang aton pagsaulog sang Paskwa, tungud ginhatag naton ang aton kaugalingon sa Iya.

  Indi lang sang “Christmas presents” ang aton ipaambit, kundi aton nga ipaambit ang aton “Christmas presence” nga may pagpaubos sa atubang sang aton magaabut nga Manluluwas!