26th Sunday in Ord. Time (B)

MAGKALIPAY SA KADALAG-AN

    Ang mga gintutun-an may pagpati nga sila lang ang makabuhat sang gamhanan nga mga buhat nga ginhimo sang aton Ginuo tungud sila lamang ang mga tawo nga yara sa “circle of friends” sang aton Ginuo. Gani, isa ka daku nga “upset” sa ila sang ila makita nga may isa ka tawo nga nagapang-ayo kag nagabuhat sang mga kaayohan sa ngalan sang aton Ginuo. Naalarma sila kay ang tawo indi kabahin sang ila nga grupo.

  Kon aton gid nga usisa-on sing maayo ining reaksyon sang mga apostoles, ayhan masiling naton nga ini, bunga sang ila nga “kahikaw” ukon “kahisa” sa sining tawo nga nagabuhat man sang ila buluhaton. Sa pagkamatu-od nahadluk sila nga basi labawan sila sang isa ka tawo nga “estranghero” sa ila nga grupo. Nahadluk sila labawan kay nagapati sila nga sila lang ang makabuhat sang ginbuhat sang aton nga Ginuo nga pagpang-ayo!

  Amat-amat man sila nga na-inpluwensya sang painu-ino sang mga Pariseo nga nagapati nga sila lang ang may “kapas” nga maluwas tungud sila ang “nakahangup” sang kasugu-an sang Diyos.

  Natalupangdan ini sang aton nga Ginuo nga painu-ino sang mga apostoles sa bagay nga Iya nga gintawag ang ila nga atensyon nga: “Pabay-i lang ninyo sia kay wala sing may nagahimo sang milagro paagi sa akon ngalan kag makahambal dayon sang malain batok sa akon…!” Buot silingon nga dapat sila MAGKALIPAY tungud nangin madinalag-on ang isa ka tawo sa pagbuhat sang maayo kag ini indi dapat pagkahikawan, kay ang Diyos padayon nga nagabuhat sang kaayohan sang tanan. “We should rejoice with those who rejoice and praise God for the success of others.” Amo kuntani sini ang aton pamatasan. Kon nakita naton nga nangin madinalag-on ang iban, dapat kita MAGMAPINASALAMATON sa Diyos kay Siya maalwan!                                                     

PAGPANRABAHO PARA SA DIOS

Sadto anay, pirme mabatian ang hulobaton nga “Outside of the Church, there is no salvation”. Apang mas bagay kuno kon hambalon nga “If there is no Church, there is no salvation”. Sa minatuod lang, si Jesus ang ginagikanan sang kaluwasan. Apang gintukod kag ginbilin niya ang Simbahan agud mangin “sakramento sang kaluwasan”. Buot silingon, ini amo ang tanda kag instrumento sang paghiliusa sang Dios kag tawo, gani wala sang kaluwasan kon wala ang Simbahan.

Apang sa panahon subong sang Konsilyo Vaticano II, ang Simbahan wala nagasiling nga ang tawo indi makapalapit sa Dios kon indi mag-agi sa iya ukon kay Kristo. May relihiyon nga, katulad sang Kristianismo, ginasunod man sang kadam-an: Hinduismo, Buddhismo, Muslim, Judaismo. Ang iban sa ila, nauna pa gani sa Kristianismo. Tuhoy sa ila, ang Konsilyo Vaticano II nagdeklarar: “Ang Simbahan nga Katoliko wala nagasikway sang ano man nga matuod kag balaan sa sining mga relihiyon. Ginapadunggan niya ang pinasahi nga kabuhi kag pagbinatasan, ang mga kasugoan kag pagtulun-an nga, bisan lain sa iya mga ginatudlo, masunson nga nagadala sang silak sinang kamatuoran nga nagaiwag sa tanan nga katawhan.” (Nostra Aetate, n.2)

Ining pagrespeto kag pagtahod sa iban nga mga tawo amo ang ginatumod sang Pulong sang Dios sa sining Domingo. Gani indi kita maghisa sa iban nga ginhatagan man sang Dios sang kahigayunan nga makaalagad sa iya kag sa isigkatawo. Indi naton hawid kag kontrolado ang Dios. Ang iya kaluwasan para sa tanan. Kon kita mga instrumento sang kaluwasan sang Dios, ang iban mga instrumento man. Indi naton pag-ikahikaw ang aton pagtuo sa iban nga nagpangita man sang kahulugan sang ila kaangtanan sa Dios.

JUST A MINUTE

The man: "God, how long is a million years?"
God: "To me, it's about a minute."
The man: "God, how much is a million dollars?"
God: "To me it's a penny."
The man: "God, may I have a penny?"
God: "Wait a minute."

FOOD FOR THOUGHT

“The hardest arithmetic to master is that which enables us to count our blessings.” (Eric Hoffer)