24th Sunday in Ord. Time (B)

PARA SA IMO, SIN-O SI KRISTO?

Sa aton Santos nga Ebanghelyo subong nga Dominggo, ang aton Ginuo nagpamangkut sa Iya mga gintutun-an kon sin-o Siya para sa ila. Ini nga pamangkut indi lamang sang isa ka pamangkut nahanungud sa mga huring-huring sang mga tawo, ukon isa ka “background check” sang Iya nga pagkatawo, kundi isa ka pamangkutanon nga natuhoy sa ila “personal” nga pagkilala sa Iya.

Ayhan, malawig-lawig na ang ila nga pag-inupdanay, kag ayhan madamo naman sila sang nahibalu-an nahanungud sa Iya nga pagkatawo, kag gani, kon may makahambal nga may “otoridad” nahanungud sa “character” sang aton Ginuo, ini wala sang liwan kundi ang Iya mismo nga mga sumulunod.

Maayo ang sabat sang mga apostoles sang pamangkut sang aton Ginuo kon sin-o Siya suno sa mga tawo, apang sang ginpatuhoy na sa ila ang pamangkut kon sin-o Siya para sa ila, ayhan na-ukyan sila, kay ang pamangkut sang aton Ginuo wala nagakinahanglan sang sabat nga ginabase sa “tsimis” ukon “sugid-sugid” ukon sa “ideya”, kundi sa ila “personal experience” sang Iya nga presensya sa ila tunga. Si Pedro gid lang ang isganan nga nagtindog kag nagpahayag nga Siya amo ang Kristo! - sabat nga wala ginbase sa iya eksperyensya sa kay Jesus, kundi paagi sa pagtudlo sang Espiritu Santo nga amo ang nagtulod sa iya sa pagpahayag sini nga pagtuo.

Tubtub subong, padayon man kita nga ginapamangkut sang aton Ginuo kon sin-o Siya para sa aton. Indi suno sa aton mga nabasahan, ideya, ukon nabati-an sa mga sermon, kundi kon sin-o Siya sa aton adlaw-adlaw nga pagkabuhi! Ginasiling gani nga “mahapus mangin Kristiyano apang mabudlay ang magpaka-Kristiyano.” Sin-o kag ano si Kristo sa aton?

MAKAHULUGAN ANG NGALAN

Madamu nga mga Pilipino ang nagapangalan sang ila mga bata nga pareho sa ila ngalan. Kon may yara na sila nga “junior”, ginahingalanan pa gid nila ang iban nga anak nga “the third”, “the fourth”, hasta sa punta… Seguro ang rason sina amo nga kon patay na sila, ang ila ngalan nagakabuhi man gyapon sa kalibutan. Buot silingon, indi gid sila malipatan. Apang amo gid bala sina ang matuod nga kahulugan sang isa ka ngalan?

Masami, sa Biblia, kon ang Dios magpili sang isa ka tawo para sa isa ka misyon o bulohaton, iya ginahataganan ina nga tawo sang bag-o nga ngalan. Halimbawa, si Abram nahimo nga Abraham, si Jacob nangin Israel, si Levi nahimo nga Mateo, kag si Simon nangin Pedro. Ang Misyon ukon Bulohaton ara sa ngalan. Kon sa mga Romano pa, “Nomen est Omen!” (The destiny is in the name.)

Ang ngalan sang isa ka tawo nagapahayag sang iya personalidad kag pamatasan. Kay ang ngalan sang isa ka tawo isa ka “omen”, isa ka tanda o senyal, kag kon mabal-an mo ini, mabal-an mo man kon sin-o ka. Kay ang pagkahibalo sang imo ngalan nagaklaro mismo sang imo panumduman kon ano gid bala ang imo misyon sa kabuhi.

Si Jesus nakahibalo kon ano ang ginahambal sang mga tawo nahanungod sa iya. Apang nakahibalo man Sia kon sin-o gid Sia. Nagkari Sia sa pagtuman sang Misyon nga ginhatag sang Amay sa iya, nga amo ang pagluwas sa aton.

Ikaw utod, ano ang ngalan mo? Ano ang misyon mo sa kabuhi? Ngaman ari ka sa kalibutan?

COME TO THINK OF IT

“One who runs in front of car gets tired, one who runs behind car gets exhausted.”

-Zen Saying-

"Whoever said the pen is mightier than the sword obviously never encountered automatic weapons."

-General MacArthur -

FOOD FOR THOUGHT

“A friend is one who knows you and loves you just the same.” (Elbert Hubbard)