HOLY THURSDAY (SPECIAL EDITION)

HOLY THURSDAY (LAST SUPPER)

Ginahanduraw naton subong ang katapusan nga panihapon sang Ginoo kaupod ang Iya mga apostoles. Siya nagbilin sa ila sang isa ka sulundan sang pag-alagad sang nagakabagay sa iya nga utod. Ini nagakahulugan sang paghatag sang serbisyo sang pinakakubos nga iya madulot sa iya isigkatawo. Wala na ini nagalantaw kon nan o ang iya nga estado sa pagpangabuhi kundi ang iya ginapasulabi amo ang makaalagad sa iya isigkatawo. Ini nga handumanan wala lamang ginpakita sang aton Ginoo paagi sa paghugas sang mga tiil sang mga gintutun-an kundi ang Iya pagbilin sang Iya nga presensya sa ila paagi sa pag-ambit sang isa ka tinapay. Ini nagakahulugan lamang sang Iya padayon nga pagpahanumdum sa aton nga sa gihapon yara Siya nga nagaalagad kag nagapatad sang Iya nga kabuhi para sa aton.

Daw ano katahum ini nga pamalandungan nga sa likud sang isa ka simple nga panihapon, ginbilinan kita sang aton Ginoo sang isa ka laragway nga dapat kita mag-inalagaray sa tanan  nga tion sang aton kabuhi kag ini dapat naton nga himuon sa tanan nga ti-on sang aton kabuhi. Sa aton tagsa ka saulog sang Santos nga Misa kita ginapahanumdum nga kita alagad sa isa kag isa kag wala kita sang dapat nga ipabugal sa kon ano man nga estado ang may yara kita sa aton kabuhi. Sa Simbahan, isa kita ka katilingban nga nagapa-ambit sang aton kaugalingon sa tagsa-tagsa. Amo gani nga sa aton nga ambahanon kita nagasiling: “Waay sang imol nga indi makahatag; wala’y manggaran nga wala ga kinahanglan.” Tanan kita may bahin sa pag-alagad sa aton isigkapareho tungud kita alalangay nga alagad sa tagsa-tagsa.

Ang Santos nga Eukaristiya o ang Santos nga Misa padayon nga magapahanumdum sa aton sang mga pulong sang aton Ginoo sa katapusan nga panihapon: “Kon ginabuhat ko ini isa inyo bilang inyo agalon, kamo man dapat maghinugasay sang inyo mga tiil… dapat mag-inalagaray sa isa kag isa.” Huo mga utod, daw ano ka klaro subong ang ginbilin nga kasugu-an sang aton Ginoo. Apang sa aton adlaw-adlaw nga pagkabuhi padayon sa gihapon ang nagakahanabo nga kabaliskaran, amo gani nga nagakabaliskad man ang aton nga pangabuhi. Ang kalabanan sa aton indi luyag mag-alagad kundi nga alagaran. Sang tyempo eleksyon ang kalabanan sang mga kandidato nagasiling sa ila kampanya nga nagadalagan sila kay luyag sila mag-alagad, kag pirmi bukas ang ila opisina para sa mga nagapangayo sing bulig. Apang kon magdaug na gani sila, sin-o ang nagaalagad? Sa diin sila. Sirado ang opisina kay may ginkadtu-an si Sir o si Ma’am. Sa gihapon ang mga tawo padayon nga nagakabuhi sang ila Biernes Santo tungud nagpabilin nga nalansang ang mga pangako sa ila, kag wala gid sing Pagkabanhaw, nga amo ang paglampuwas sang ila nga kalbaryo.

Sa mga posisyon man, luyag kita pirmi nga yara sa una agud madali kita matalupangdan kag dayaw-dayawon bisan bal-an naton nga kita gina-asut lamang tungud ini manami pamati-an sa dalunggan. Nagahabuk dayon kita kon ang aton ngalan lawag-lawagon kay kita ara naman  sa mga talahuron nga mga tawo. Apang ang aton Ginoo subong padayon nga nagatudlo sa aton nga kon luyag kita mangin daku sa mata sa Diyos dapat kita mangin diutay kag kon luyag kita nga mangin pangulo dapat kita mangin-sulugu-on sang tanan. Amo ini ang kaundan kon ngaa man nagduko ang aton Ginoo sa paghugas sang mga tiil sang Iya mga apostoles. Mga tiil nga mayab-ok… mga tiil nga mahigko… mga tiil nga kibulon. Apang ini tanan wala Niya pagbaleha tungud ginapakita Niya ang minatuod nga pagserbisyo sa Iya isig-katawo kag ini amo ang pamaagi sa pag-alagad sang isa ka kubos nga alagad.

Kada tuig ginapahanumdum kita sining ginbuhat sang Ginoo agud kita indi magkalipat sang aton pag-alagaray… nga kita indi magkalipat nga kita mas nangin dungganon sa mata sang Diyos kon kita naga-alagad sa isa kag isa… kon kita nagaduko sa pagpa-ubos sang aton kaugalinon lamang makahatag sang serbisyo sa tagsa-tagsa.

Mangin indi lamang kuntani ini nga isa ini ka palagwa-on o sarswela ang katapusan nga panihapon sang aton Ginoo kundi isa ka kamatuoran nga aton ginalaragway sa aton nga kabuhi paagi sa aton pag-alagaray sa isa kag isa kag kabay pa nga ang Santos nga Misa magpahanumdum sa aton nga kita mga bahin sang Lawas ni Kristo nga nagkari indi agud alagaran kundi agud mag-alagad.