2nd Sunday of Easter (B)

ANO ANG NABAG-O SA ATON

Ang isa sa mga “titulo” sang aton Ginuong Jesus nga makita sa dinalan sang Biblia nga Siya amo ang “Prinsipe sang Paghida-it”. Maathag ini nga makita sang Siya matawo bilang isa ka lapsag sa aton tunga! Ining pagkaprinsipe sang Paghida-it indi lamang sang isa ka titulo para sa aton Ginuo kundi isa ka MISYON… ISA KA PANGAKO nga sa diin Iya ginpakita ang katumanan bisan pa sa likud sang kamatayon! Padayon Siya nga nagahangkat sa aton nga magdala sining paghida-it bilang MAAYONG BALITA sa tanan nga mga kapungsoran.

Ang pagkabanhaw sang aton Ginuo nagatulud sa aton sa isa ka tikang sang pagtuo nga  ang paghida-it indi lamang sang isa ka handum kundi isa ka BULUHATON nga aton sarang malab-ut kon kita nagakabuhi sang pagkabanhaw nga may bug-os nga determinasyon sa pagbuhat sang ginbilin sang aton Ginuo nga amo nga kita ang magadala kag magapadayon nga mga INSTRUMENTO sang paghidait!

Masalimu-ot kaayo ang kalibutan tungud sang mga kinagamo nga kalabanan gintuna-an lamang sang bugal kag paindis-indis. Wala ini untat nga nagaluntad sa aton tunga tungud ang kalabanan sa aton wala nagalantaw sang pagkabanhaw nga isa ka buluhaton, kundi isa lamang ka talan-awon nga daw sa “nag-magic” lang ang aton Ginuo. Gani, ang pagkabanhaw nangin isa lamang ka “makatalanhaga” nga hitabo kag wala gid maka-salupsup sa aton kaugalingon.

Ang pagkabanhaw nagatulud sa aton sa paglakat sa dalan sang pagpanibag-o! Ano ang nabag-o sa aton?

  Sa sini nga panahon nga damu sang wakalan, tsismoso kag nagapakunokuno, maayo gid nga maghalong sa mga ginahambal sang iban. “To see is to believe”. Maayo gid nga makita naton ang mga pamatuod sang ginahambal sang tawo.

Ang Pagkabanhaw sang Ginuo ginpamatud-an sang mga nakakita sa iya. Ini indi sang imbento o himohimo lang nila. Ang mga gintutun-an nagtuo sa iya sanglit kay nakita gid sia sang ila kaugalingon nga mga mata.

Kapaslawan ang nabatyagan sang mga gintutun-an sang gindakop si Jesus kag sila nagpalalagyo dayon. Gani si Tomas wala magpati sang ginsugid sang iya mga kaupod nga nabanhaw ang ila Manunudlo. Basi ini sila nalatnan lang sang ginatawag nga ‘mass illusion’ bangud sang kahadlok kag pagkadesperado. Apang nagpakita liwat si Jesus sa ila kag ginsabat niya ang hangkat ni Tomas.

Ining natabo kay Tomas nagapakilala nga ang Pagkabanhaw ni Jesus indi isa ka palanan-awon lamang: nakita sia sang mga Apostoles, nabatian nila sia, kag ayhan ginhakos kag gin-uyatan pa nila sia. Buot silingon, ginpakit-an sila sang pamatuod. Gani garantiya ini sa madason nga mga kaliwatan nga ang pagtuluohan sa Pagkabanhaw indi himohimo lamang.

Ang pagpangduhaduha kag pagtuo wala pirme nagakontrahanay. Mahimo nga ang pagtuo nagasugod sa pagpangduhaduha. Kay sa pagsugod, kinahanglan ang mga pamatuod. Apang sa pagtuluohan, indi pirme kinahanglan nga makita ang tanan. May mga butang nga matuod apang indi matalupangdan sang aton mga mata.

Pagkatapos sang iya pangduhaduha, si Tomas nagtuo. Wala na ginsiling kon gingulo pa niya ang iya tudlo sa agi sang mga lansang. Tuman o bastante na nga nasayran ni Jesus ang pangduhaduha ni Tomas sa wala pa sila magkit-anay. Si Tomas nga nagsimba kay Jesus bilang Ginoo kag Dios nakalab-ot sa India sa pagpalapnag kag pagpanginmatay sa sining iya Ginoo kag Dios.

ANECDOTE

WHAT MOTHERS CAN DO!

Jesus walks up to a crowd of people getting ready to stone a lady to death for committing adultery and says, "Whoever is without sin may cast the first stone."

So this little lady walks up with a big rock and smashes it down on the poor woman and splits her head wide open.

Then the little lady dusts off her hands and starts walking away. Jesus shakes his head and says, "Mom, sometimes you really get on my nerves."

   FOOD FOR THOUGHT

A man who was completely innocent, offered himself as a sacrifice for the good of others, including his enemies, and became the ransom of the world. It was a perfect act.

(Mahatma Gandhi)