PALM SUNDAY (C)

PAGDAYAW SANG MGA SALIMPAPAW!

Semana Santa na naman. Tanan kita nanamian gid kon mag-abot ini nga semana. Ngaman? Tungod sa madamu nga rason. Para sa iban, ini panahon sang bakasyon sa eskwela ukon obra. Ini tion sa pag-upod sa barkada para mag-”hiking” ukon maglinibod. Tsansa man ini sang iban agud makapauli sa probinsya agud makita ang mga daan nga mga abyan kag kadugo. Sa mga may ara, tion ini agud magrelax upod sa pamilya sa mga ‘beaches’ ukon ‘resorts’. Sa mga nagapakuribong sa balay, ini semana sang wala puway nga nilantaw sang ‘tv’, telebabad, ukon ininom upod sa mga amigo kag amiga.

Nanamian kita sa Semana Santa sa madamu nga rason magluwas sa rason nga ginhatag sang Dios para dire. Ini nga semana wala naton ginatawag nga “vacation week’, ukon “friendship or acquaintance week”, ukon “rest week”. Halin pa sang una, ang mga Kristiano nagatawag sini nga “HOLY WEEK” – Balaan, Sagrado o Santo nga Semana. Ngaman gintawag nila ini nga “Balaan, Santo kag Sagrado”? Kag santo, balaan kag sagrado pa gid man bala ini nga semana para sa akon kag sa imo karon?

Aton ginasugdan ang Semana Santa paagi sa pagbasa sang malawig nga Pasyon o Kasakit ni Kristo. Aton ginapamatian ang iya mga inagyan nga pag-antus, kasakit kag kamatayon sa Kalbaryo. Kag ini nga Pasyon sang Ginuo amo gid mismo ang nagahimo sa sining semana nga balaan, santo kag sagrado. Paagi sa iya Pasyon, ang aton Dios naghatag sa aton sang pamatuod kon ano Niya kita ka palangga – ginpanginmatyan Niya kita! Ginpakita sang Dios nga bisan ano pa ang matabo, upod Sia naton sa aton mga pag-antus kag handa magbayad sang iya kabuhi para sa aton mga sala.

Ginasaulog naton ang Semana Santa paagi sa paghanduraw sang mga hitabo sa diin nagsulud ang aton Ginuong Jesus sa Jerusalem sa tunga sang mga pagdayaw sang mga tawo: “Hosana sa anak ni David!” Si Haring David nga “lolo” sang aton Ginuo, nagpakigbato sa makusog nga si “Goliath” agud sa paghatag sang dungug sa Israelinhon, nga gindaug-daug kag ginalikupan sang mga kaaway. Paagi kay David, nakita ang “kusog” kag “gahum” sang Diyos sa bagay nga ang mga Israelinhon nagakabig sa ila kaugalingon nga “pinili” nga rasa sang Diyos tungud sila mga kaliwat ni Abraham!

Ini nga laragway sang pagkahari ni David, naga-panalaytay sa ginapa-abut sang mga Israelinhon nga Manluluwas gikan sa mga nagapigos sa ila, kag ang mga buhat nga ginpahayag sang aton Ginuo amo gid ang ila ginala-uman nga ayhan sila mahilway na sa gahum sang mga Romano.

Amo gani nga sa sini nga Dominggo, ginsug-alaw nila ang aton Ginuo sang mga “ramos” bilang pagpahayag sang pagdayaw sa Diyos tungud yari na Siya, nagapasulud sa Jerusalem agud sa paglansar sang isa ka lihuk nga ayhan mangin ila kahilwayan sa pagka-ulipon sang mga Romanhon.

Apang sa wala nila ginadahum-dahum, ang aton Ginuo gali nagsulud sa Jerusalem agud maghalad sang Iya nga kabuhi, indi para mahilway sila sa gahum sang mga Romanhon, kundi agud mahilway ang tanan nga mga tawo sa kasal-anan! Daw ano ang ila PAGKAPASLAW sa kay Kristo!

Kita man gina-agda sang aton Ginuo sa dalan sang Krus, indi sa dalan sang kadayawan! – amo ini ang Iya dalan– ang dalan sang MATUOD NGA KAHILWAYAN!