5th Sunday of Lent (C)

PAGBULIG NGA MAKABANGON

Mahapus sa aton ang magbasol sang iban nga tawo sa mga kalainan kag kakulangan nga aton makita kag nahibal-an sa ila. Kon kaisa, nalipay kag nakunyag pa gani kita sa pagsugilanon, dala tum-ok, nahanungod sa mga kasaypanan sang iban nga mga tawo. Apang ang Ebanghelyo subong nagaagda sa aton nga maghinayhinay kita sa pagpanghusga. Dapat kita mangin maluluy-on kag mapinasiensyahon tungod kay kita tanan may ‘baho’ kag kasaypanan, nga swerte ta lang, wala kita nadakpan sa akto. Tanan kita nagakinahanglan sang kapatawaran sang Ginuo.

“May isa ka babaye nga ginakabig nga ‘buang’ sang tanan, tungod kay naga-estorya sia sa iya kaugalingon sa ‘publiko’ kag nagapati nga sia nagapakighala kay Kristo mismo kag si Kristo nagasabat man kuno sa iya. Dayon may isa man ka pari nga nadestino sa sina nga parokya, nga sang pagkabati niya nahanungod sa babaye, nagpanumdom nga sarang niya sia maayo kag mabuligan nga magbalik sa kamatuoran.

Isa ka adlaw, nagsumalangay sila sa dalan. Ang pari nagmuno, “Tuod kuno nga nagaestorya ka kay Kristo?” “Yes, sir!”, siling sang babaye, “nagaestoryahanay kami ni Kristo sa adlaw kag gab-i!” Dayon ang pari naghambal, “Ti pwede ako kahinyo sing pabor sa imo? Pwede mo bala mapamangkut si Kristo kon ano ang katapusan nga sala nga akon ginkompesar sa iya?” Ang babaye nagsabat, “Syempre Sir, Ikaw pa! Para sa imo, pamangkuton ko sia!”

Sang masunod nga adlaw, nakita sang pari ang ‘buang’ sa plaza, gani ginpalapitan niya sia kag ginpamangkut, “Ti naestorya mo gid man si Kristo kagab-i?” “Yes, Sir!”, sabat sang babaye. “Ti ano kuno ang katapusan ko nga sala nga ginkompesar ko sa iya?”, pamangkut liwat sang pari. Ang babaye nagsabat: “NALIPAT NA KUNO SIA!”

Amo ina ang Pagpatawad sang Dios. Kon kita mag-hinulsol kag magpangayo sang patawad Niya, ang aton mga sala ginapanas o ginatinlu-an kag ginakalimtan niya.

Sa sining katapusan nga Dominggo sang kwaresma, ginapahayag sa aton kon ano gid ang kahulugan kon ngaman ang aton Ginuong Jesus, nagpakatawo kag nagpuyo upod sa aton– Siya nagkari agud mangin timaan nga ang aton Amay sa langit, wala NAGAKONDENAR sa Iya mga tinuga, kundi Siya padayon nga nagalab-ut sa aton paagi sa pagpatawad kag paghigugma. Nahangpan Niya ang aton kaluyahon, bisan ang aton masami nga pagpakasala.

Sa pihak nga bahin, wala man Siya “nagatolerar” sa aton sa pagpakasala, kundi Iya kita gina-agda sa paglakat sa isa ka “dalanon sang pagpanibag-o”. Amo gani nga sa aton Ebanghelyo subong sa pagsumalang sang aton Ginuo sa isa ka babayi nga nakasala sa pagpangin-lalaki, nga ginkondenar, kag ginpamatbatan sang kamatayon paagi sa pag-bato sa iya sa tunga sang ila “plaza”, ang aton Ginuo, “nag-apin” sa iya, ukon “naghangup” sa iya sitwasyon, apang ang panghangkat sa gihapon sang aton Ginuo nga “maglakat siya, kag dili na magpakasala liwat.”

May huyog kita sa masami, katulad sang mga nagkondenar sa babayi, nga mag-akusar kag magkondenar sa aton mga isigkapareho nga nakasala. Ayhan tungud ini siguro sa balatyagon nga mas maayo kita sang sa ila. Apang nausisa ta bala ang aton kaugalingon nga ayhan basi sobra pa kita sa aton ginakondenar, ugaling wala lang kita madakpan ukon matalupangdan? Basi nagakondenar lang kita agud “matakpan” ang aton kasal-anan?

Amo ini ang ginbuhat sang mga tawo sa babayi, apang sang ginpat-pat na sang aton Ginuo ang ila mga kasal-anan, amat-amat man sila nga nadula! INDI KITA MAGPANGKONDENAR sa baylo BULIGAN TA ANG NAKASALA NGA MAKABANGON!