4th Sunday of Lent (C)

ANG AMAY NGA NAGAHULAT

May isa ka amay nga may bata nga 4 ka tuig. Isa ka adlaw, nakita sang bata ang iya amay nga nagakaon sang tinapay samtang galantaw sang ‘tv’ sa sala. Dayon nagsiling sya  sa iya kaugalingon, “Gusto ni Tatay magkaon sang tinapay samtang nagainom sang gatas. Timplahan ko si Tatay sang gatas!” Gani dalidali sya nga nagkadto sa ila kalan-an kag nagbutong sang pulungkoan pakadto sa kusina. Ini nagkurit sa salog. Dayon nagtongtong sya sa pulungkoan kag todo nga ginbuksan ang ‘aparador’ gani naglitik ang kristal sang pihak nga cabinet sang maigo ini. Dayon sia nagkuha sang baso kag aksidente nga nasalapay ang duha pa gid ka baso nga nagkalabuka! Pero ang bata wala labot. Ang iya lang ginapanumdom, “Timplahan ko si Tatay sang gatas!”

Ang Amay sang bata nagapasalipod sa pwertahan kay nakakita sini ang tanan kag nagapanumdom kon akigan niya bala ang iya bata o indi. Nagdesisyon sia nga pabay-an lang danay ang bata. Dayon ang bata nagpanaug sa pungkuan kag nagkadto sa ‘refrigerator’. Ginbuksan niya ini kag ginkuha ang isa ka “gallon” sang gatas. Dayon ginbutang niya ang baso sa salog kag ginbuboan sang gatas. Syempre kay daw indi sia makadala sang ‘gallon’, diutay gid lang ang iya napasigo-sigo nga gatas sa baso. Ang kalabanan sang gatas naula sa salog. Matapos maggabang ang baso, lipaylipay nga ginbitbit ini pakadto sa ‘living room’ nga nagasinggit, “Tay, may ara ako nga inughatag sa imo!” Samtang nagahilapit na sia sa iya Amay, dimalas gid nga nasandad sia sa ila ‘floormat’ kag nabuy-an niya ang baso sang gatas.

Dayon nagtindog ang bata kag nagtulok sa iya palibot. Nakita niya ang mga buka nga baso, ang nag-anaw nga gatas, gaabri nga ‘cabinet’ kag ang iya Amay nga puno sang gatas sa guya. Dayon sia nagtangis. Samtang sya nagahibi, sya nagtulok sa iya Amay nga daw nagapamangkot, “Anhon mo ako, Tay?” Ang Amay nagyuhom lang. Wala niya nakita ang bata nga bag-o lang nagwasak kag naghigko sang iya balay. Ang iya nakita amo ang isa ka diutay nga bata nga ginapalangga gid niya sang tuman. Gani nagpalapit sia sa bata kag ginhakus ang iya bata nga nagasiling: “Anak ko ikaw!”

Kon maghala kita nahanungod sa Dios bilang aton Amay, nagahambal kita sa sahi sang Amay nga pareho sang amay sini nga bata. Ang Dios Amay nga nagapalangga sa aton sang minatuod kag sobra-sobra bisan kita masami nagakahulog sa sala.

Kon aton gid usisa-on sing maayo, sa tatlo ka mga personas sa palaanggiran sang “Prodigal Son”, daw ang MANGHUD gid amo ang pinakasikat sa aton panglantaw kag pamatyagan. Ayhan ini tungud, ang kalabanan sa aton daw may kaangid sa gin-agihan sang manghud nga bata, sa aton adlaw-adlaw nga pagkabuhi. Tanan kita masami may “tendency” nga mangin katulad sang manghud. Kon ara kita sa kahamungayaan kag kabugana-an sang kabuhi, madali kita “mag-usik” sang mga butang nga yara sa aton– waldas diri, waldas didto… halus amigo ta ang tanan kag halos ang tanan nagapangamigo man sa aton… halus kilala kita bisan diin kita magkadto tungud ang ginalantaw lang sang aton mga “barkada” amo ang aton kabuganaan. Apang kon mag-abut na gani ang kapi-ot sang kabuhi, aton matalupangdan nga nangin “ma-usikon” gali kita sa ginpaambit nga kabuganaan sang Diyos– kag diri kita makadumdum nga ang aton gali pagkabutang ginpahulam lang sang “Dios”, nga daw sa halos nalipatan ta na gani sang kita may ara pa! Kag makamuklat kita sa “mapa-it” nga kamatu-oran nga pila gid lang gali ang aton “matuod nga mga abyan”, kon may ara gid man nga mabilin sa ila! Ang Amay gid lang ang matuod nga “makabaton” sa aton. Siya ang MATUOD NGA ABYAN! Dali, MABALIK kita sa IYA!... NAGAHULAT SYA SA ATON.