HOLY THURSDAY- LAST SUPPER

SULUGU-ON NGA NAGAHUGAS

  Suno sa pagsulundan sang mga Judeo, kon may mag-abut gani nga bisita, ang tag-iya sang balay nagasugo sa iya mga sulugu-on sa paghatag sang labador kag tubig nga pagahugasan sang mga tiil sang ila mga bisita- tungud ini bahin sang ila nga kasugu-an sang 'pagpaninlo'. Ang suluguon magadala sang tubig kag labador, kag ibutang ina sa atubang  sang bisita nga magakuha sina kag magahugas sang iya mga tiil sa atubang sang tag-iya sang balay. amo lang ini ang buluhaton sang sulugu-on- ang magdala sing tubig kag labador nga pagahugasan, kag sang tuwalya nga palamahiran.

  Lain ang ginbuhat subong sang aton Ginoo sa sining hitabo sang Iya nga katapusan nga panihapon kaupod sa Iya mga gintutun-an. Sya nga amo ang 'tag-iya' wala magsugo sa Iya mga sulugu-on kundi Sya mismo amo ang nagdala sang hulugasan kag tubig sa atubang sang Iya mga gintutun-an, kag Sya mismo ang naghugas ang ila mga tiil! Indi sang 'normal' ang ginhimo sang aton Ginoo kon i-base ini sa pagsulundan sang mga Judeo. Sya nga amo ang agalon, nagbuhat sang butang nga sobra pa sang sa buluhaton sang isa ka sulugu-on! Ginhimo Niya ini nga nagasiling: "Subong nga ginbuhat Ko ini sa inyo, kamo man, dapat maghinugasay sang tiil sang isa kag isa!"

  Ginapakita lang sang aton Ginoo, nga may yara na nga lain nga kahulugan ang pag-alagad. Indi na ini katulad sang pag-alagad sa daan nga kasugu-an, sa diin 'nagalantaw' lamang ang tagbalay, kundi sya mismo amo ang magabuhat sang buluhaton  sang isa ka sulugu-on para sa nagadayon sa iya puluy-an. ang pag-alagad indi lamang pagtalupangud sang mga kinahanglanon nga ginapatuman sang kasugu-an, kundi ini PAGPAKIGBAHIN sa kabuhi  sang iya isigkatawo. Amo gani nga ang aton Ginoo nagsiling kay Pedro: "Kon indi mo pagpahugasan ang imo mga tiil, indi ka na mangin-kabahin nakon!"- "You are not a part of me!"

  Ang paghugas sang tiil isa ka patima-an nga ginapahayag sang aton Ginoo nga kita bilang Iya mga gintutun-an dapat magpakigbahin sa kabuhi sang tagsa-tagsa- "Be involved and be a part of his being!" Sa aton panahon nga nagaluntad ang tuman nga pagpaiya-iya, kita ginahangkat sining ginbuhat sang aton Ginoo sa Iya mga apostoles. Kon kita mga sumulunod sang aton Ginoo, ano ang aton ginbuhat nga masiling naton nakigbahin gid kita sa kabuhi sang aton isigkatawo, ilabi na gid ang mga nagakinahanglan, mga wala-wala, kag mga ginasika-sika? Sa sining semana Santa, aton pamalandungan sing mapinangamuyu-on ang aton mga buluhaton. May ginbuhat gid bala kita nga masiling naton nakigbahin kita sa kabuhi sang aton isigkatawo, ukon sa gihapon, naluoy matuod kita, pero asta lang tulok ukon asta lang sa baba? Tulukon naton ang aton Ginoo, Sya nga agalon, nagpaubos sang Iya kaugalingon kag nakigbahin sa kabuhi sang Iya mga gintutun-an sa pag-alagad sa ila tubtub sa Kamatayon!