Palm Sunday (B)

ANG KRUS : TANDA SANG PAGHIGUGMA

Ang ginasaulog naton subong nga Domingo amo ang pagsugud sang aton ginahanduraw nga Semana Santa– ang Semana nga sa diin ang aton Ginuong Jesukristo nag-antus, namatay kag nabanhaw. Ini nagapatpat naman sa aton sang mga kasakit nga gin-agihan sang aton Ginuo agud maagum naton ang kaluwasan tungud sang aton pagkamalalison sa kasuguan sang paghigugma sang Diyos.

Aton makita karon nga Dominggo ang “mahimayaon” ukon ang kadayawan nga ginhatag sang mga Hudiyo sa aton Ginuo nga ila ginakabig nga amo ang magahilway sa ila sa pagkaulipon sang Emperyo Romano. Ginasinggitan nila nga si Kristo amo ang ila nga “Hari”, sa bagay nga nagapa-abut sila sang isa ka kahilwayan politikal.

Apang sa pihak nga bahin, lain sang sa ginapa-abut sang mga Hudiyo, ang aton Ginuo wala magdala sang pagbag-o sang politikal nga estado sang mga tawo, kundi ang Iya nga ginbag-o amo ang ila “tagipusuon”- ang ila nga nabugto nga kaangtanan sa Diyos. Si Jesus wala magdala sang kahilwayan politikal, kundi sang kahilwayan sang kalag nga naga-id sa gapos sang sala!

Sa pasyon ni Jesus suno kay San Mateo ginapakita si Jesus nga ginlansang sa krus sa bukid sang Kalbaryo samtang ginayaguta Sia sang pangulo nga mga pari kag sang mga manunudlo sang Kasuguan: kon Sia matuod nga Anak sang Dios, magpana-ug Sia sa krus kag luwason ang Iya kaugalingon. Oara sa ila, katapusan na yadto ni Jesus-kon indi Sia magpana-ug sa krus.

Nagpabilin si Jesus sa krus– apang indi tungud kay wala Sia sing mahimo. Madali Sia makapanawag sa Amay agud ipadala ang mga anghel sa pagluwas sa Iya. Apang ginpili Niya nga- “pabayaan” Sia sang Dios.

Ang krus mahangpan lamang paagi sa PAGHIGUGMA nga amo ang katumanan sang mga kasulatan. Wala ini makita sang mga nagayaguta kay Jesus; ang ila nakaita amo lamang nga wala na si Jesus sing mahimo. Amo man ini ang panan-awan sang mga tawo subong nga nagatamud sa krus bilang tanda sang Dios nga nasadyahan sa pag-antus kag sa kasakit sang “makasasala nga mga tawo.” Kag ini sila  naga-antus nga may kaakig. Ang krus para sa ila isa ka eskandalo sanglit wala sing ginahimo ang Dios sa pagbalhin sang kahimtangan sang kalibutan.

Indi matuod nga wala sing mahimo ang Dios. Ang krus nagapakilala nga kon gusto nga sundon sang mga tawo si Jesus, kinahanglan nga maglakat sila sa dalan sang pagtuo, kag batunon man ang sakripisyo nga ginhakus ni Jesus. May katapusan ang kasakit, kag maaguman ini sa paagi ni Jesus– indi sa pagpalagyo diri. Nagpabilin si Jesus sa krus tungud paagi lamang diri masanagan ang mga tawo. Ang dalan pakadto sa pagkabanhaw amo man ang dalan sang kasakit. Malain ang kasakit, apang mahimo ini nga isa ka “sakripisyo”- isa ka balaan nga hilikuton.

Ang pagkahari sang aton Ginuo wala masandig sa trono nga malahalon, kundi sa trono sang tagipusuon sang tagsa-tagsa.

Sa aton pag-abi-abi sa Iya sa sini nga Domingo kabay nga Siya MAGHARI sa aton kabuhi!