Good Friday (A)

WALA’Y KATAPUSAN NGA PAGHIGUGMA

Asawa: “Ginahigugma mo bala ako?”

Bana: “Huo, ginahigugma ko ikaw sing tuman.”

Asawa: “Tuman gid nga handa ka manginmatay para sa akon?”

Bana: “Indi, palangga ko, ang akon paghigugma wala sing katapusan… wala sing kamatayon.”

Ikaw bala takus nga pangimatyan? May yara bala nga manginmatay para sa imo? Ang sabat sa sini nga mga pamangkut: HUO. Takus ka nga panginmatyan kag may YARA nga nagpanginmatay para imo!

Subong, hatagan naton sang tini-on ang PAGPASALAMAT sa kay Jesus nga nalansang sa Krus, nag-antus, kag namatay para sa aton. Indi naton pagpalipason ini nga adlaw nga indi kita makapabutyag sang aton personal nga pagpasalamat sa Ginoo. Ang nahauna nga Biernes Santo indi sang “Good Friday”… indi gid ato sing “Good”. MALAIN yadto… BAD… VERY BAD… tungud yadto nga adlaw, ang isa ka walay sala… isa ka INOSENTE nga tawo, ginpamatbatan sing tuman nga pagpasakit antes Sia ilansang sa Krus.

Kuntani, himuon naton ining Biernes Santo nga isa ka MAAYO NGA ADLAW paagi sa aton mga buhat sang KAAYO. Ang “Good Friday” indi lamang sang isa ka Biernes nga natabo na sang nagligad nga duha-ka-libo ka tuig. Ang “Good Friday”amo ang “SUBONG” nga adlaw kag ang tanan nga mga inadlaw nga aton ginadumdum nga may pagpasalamat ang personal nga paghigugma ni Jesus para sa aton kag kita makasabat gid lang sa sini nga paghigugma paagi sa pagkabuhi sang tadlong, sang tama, sang pagkamaayo, nga nagapa-ambit sini sa aton isigkatawo, ilabi na gid sa mga kubos.

Wala na sang madamo nga mga pulong nga sarang pa makapaathag sang natabo subong. Aton lamang pamati-an kag pamalandungan ang hitabo nga subong nga adlaw, may naghalad sang Iya nga kabuhi para sa imo kag para sa akon!