2nd Sunday of Easter (Divine Mercy Sunday)-A

ANG PILAS NGA NAG-AYO SA ATON

Ang Ebanghelyo subong nagahatag sing labi nga pagtamud sa pagkilita-ay ni Tomas kag sang nabanhaw nga Jesus, isa ka semana pagkaligad sang Domingo sang Pagkabanhaw. Ini ang balasahon sa bisan ano nga tuig sang liturhiya– tuig A, B, C.

Masami nga ginakabig naton si Tomas nga isa ka “nagaduha-duha.” apang labing maayo nga magpamalandong kita: ngaa bala wala gid magpati si Tomas sa pagpanaksi sang iban pa nga mga gintutun-an nahanungud sa nahauna nga pagpakita sa ila sang nabanhaw nga si Jesus? Madamu nga manugtu-on sang Biblia ang nagasiling nga  mahimo nga ang kabangdanan sini amo ang “may kaangtanan sa sikolohiya sang tawo.” Sa nahauna nga ginsaysay sa Ebanghelyo ni Juan, sang ang iban nga mga gintutun-an nagpamatok sa pagkadto ni Jesus sa Betania (tungud kay Lazaro) bangud sa katalagman, si Tomas nagpabutyag sing malig-on: “Dali, maupod kita tanan sa Manunudlo, agud MANGINMATAY kita upod sa Iya!” (Jn 11:16). Ang daku nga pagdayaw kag pagtuo ni Tomas kay Jesus nagatudlo sa iya nga si Jesus makahimo sing bisan ano nga buot Niya. Nakasaksi sia sang mga milagro ni Jesus! Sa iya tagipusu-on, nagpati sia nga si Jesus indi magtugut nga mahanabo ang bisan ano nga masubo nga hitabo. Subong man, kon mahanabo ang amo sina nga hitabo, ang daku nga paghigugma ni Tomas kay Jesus nangin kabangdanan nga maghuna-huna sia nga mas maayo pa nga mapatay upod kay Jesus– nga mangin sentro sang iya kabuhi– sang sa mabuhi nga wala sia sing kaangtanan sa Iya.

Nahanabo gid ang “di-maayo kag wala ginala-uman nga hitabo” - napatay ang Manunudlo. Indi Niya kaupod si Tomas tungud kay nagpalagyo ini.Nawasdak ang mga halandumun ni Tomas dayon wala mapati sa iya kaupdanan nga mga gintutun-an. Para kay Tomas, ang pagpati magakahulugan sang pagbayaw sang iya mga ginalauman kag mga ginakalipayan dira kay Jesus. Indi niya luyag nga marumpag liwat ang amo nga mga paglaum kag mangin kasubo liwat!

Nagpakita liwat si Jesus, kag malulo nga nagpangabay kay Tomas nga tandugon sang iya mga tudlo ang Iya mga pilas. Samtang ginasabdong ni Jesus ang di-pagtuo sang iban nga mga gintutun-an, matalupangdan nga malulo Sia kay Tomas. Nakahibalo Sia nga ang pangduha-duha ni Tomas indi tungud sang katig-a sang tagipusuon kundi tungud sang pagkapilas sang isa ka kahagugma, sang kapaslawan sang isa ka tumuluo.

Ang pagkakita sang mga pilas sang nabanhaw nga si Jesus sang una, naghatag sing bag-o nga paghidait sa mga gintutun-an (Jn 20:20). Karon, sa atubangan sang amo man nga mga pilas, si Tomas nagaangkon liwat sang pagtuo kag paglaum. Bisan pa sa aton mga inagihan sa ordinaryo nga pangabuhi, kon batunon naton  ang mga pilas sang nagligad nga panahon, makaangkon man kita sang pag-ayo kag kusog sa pagpadayon sa kabuhi!

Paagi sa sining mga pilas nga amo ang mga “marka” sang paghigugma sang aton Ginoo, Iya nga ginpahayag sa kay Tomas nga kon sa gihapon nga nagapabilin kita nga naangut sa Iya, wala kita sing dapat nga pagapangduha-duhaan!

LIGHTER SIDE:

REASON ENOUGH TO DOUBT

A popular airline recently introduced a special half rate fare for wives who accompanied their husbands on business trips. Expecting great feedback, the company sent out letters to all the wives of businessmen who had used the special rates, asking how they enjoyed their trip. Letters are still pouring in asking, "What trip?"

FOOD FOR THOUGHT

“A life of reaction is a life of slavery, intellectually and spiritually. One must fight for a life of action, not reaction.”(Rita Mae Brown)