CHRIST THE KING

 

CHRIST THE KING (Jn 18: 33-37) 

TRUTH HURTS

Ginapakita subong nga Domingo nga si Kristo hari sang “KAMATUORAN”… THE KING OF TRUTH. “…Tungod sini, nagpakatawo ako kag nagkari sa kalibutan sa pagsaksi sa KAMATUORAN. Ang yara sa kamatuoran nagapamati sa akon.”

Aton nahibalu-an nga mabudlay ang paghambal sang kamatuoran kag ang magkabuhi para sa kamatuoran. Ngaman? Nahauna, Ini tungod kon magproklamar ikaw para sa kamatuoran, ikaw daw nagaisahanon gid lang. Amo gid ini ang natabu kay Kristo. Isahanon lang sia sa atubangan ni Pilato. Ang iya pamilya, paryente, mga pinalangga kag bisan ang iya mga gintutun-an wala sa tupad niya tungod sila nakulbaan nga mapatay upod niya.

Ikaduha, ini tungod ang kamatuoran mabudlay himuon kag indi tanan nga tawo gusto magkabuhi nga honest. Sa sining panahon, kalabanan nga mga madaya amo ang naga-manggaranon. Bisan nagakabuhi sila sa butig basta lang maka-kwarta! Amo gani nga kinahanglanon gid nga kita TAMPAD tungud amo ini ang nahamut-an sang Diyos. “He who walks honestly, walks securely” (Prov. 10-9).

 Ikatatlo, ini tungod masakit ang kamatuoran kag tungud sini, indi ang tanan luyag magbaton. mag-antus o mapatay para sa paghambal sang insakto kag matuod.

Apang si Kristo Hari tungod siya nagkari sa pagpanaksi (paghambal kag pagsugid) sa kamatuoran. San-o ang katapusan nga tion nga ikaw nag-antus sa imo pagsugid sang kamatuoran? Kon wala ikaw nakaantus tungod sa paghambal sang matuod, ini bala tungod kay nagamon ka na sa pagbinutig o sa pagtabon sang kamatu-oran?

“May isa ka bata nga gusto makapangwarta. Isa ka adlaw, sang makita niya si tatay niya, siling niya kay tatay niya: “Tay, bal-an ko na ang kamatuoran… I know the truth.” Si tatay niya nagsabat: “Hsss…hipos. Ari lima ka gatus (500.00) hu… hipos lang! Nakita sang bata nga manami gali maghambal sang “I know the truth”. Gani, sang makita niya si nanay niya, siling niya kay nanay niya: “Nay, bal-an ko na ang kamatuoran… I know the truth.” Kag nagsabat si nanay niya: “Hsss…hipos! Ari isa ka libo (1,000.00) hu… hipos lang! Baw, Nanami-an gid ang bata sang iya eksperimento nga epektibo! Gani sang makita niya ang ila nga “maid”, siling niya: “Yaya, bal-an ko na ang kamatuoran… I know the truth.” Siling sang maid: “Tuod? Ay salamat… Dali di ANAK, haksa si nanay mo!”. Daw tinaplakan sang langit ang bata. Abi niya nga lahug lang, matuod gali! Masakit nga iya nabal-an ang kamatuoran nga siya anak sang ila kabulig kag indi ni nanay niya!

Sa kapiestahan ni Kristo nga Hari, kita gina-agda man, nga ang aton pagkabuhi, mangin isa man ka magatuy-toy sa mga tawo sa pagdiskubre sang kamatuoran paagi sa pagkabuhi sa kapawa ni Kristo nga amo ang kamatuoran. Kon kita man gapanago sa “kadulum sang kabutigan” ang aton pagdayaw kay Kristo nga Hari isa lamang ka pagpakita-kita o hinipokrito, kay una sa tanan , wala kita sa kamatuoran, kundi ara sa aton ang kabutigan! Siling ni Kristo “Ako amo ang kamatuoran” kag “Ang kamatuoran amo ang MAGAHILWAY sa aton” (Jn. 8:32). Gani kon wala kita nagkabuhi sa Iya kamatuoran, ang aton pagsaulog sang Christo Rey, BINUTIG… WALA SING PULOS! Kon si Kristo amo ang Hari sang aton kabuhi dapat kita magkabuhi sa KAMATUORAN… amo ini ang aton KAHILWAYAN.

 

33rd Sunday in Ordinary Time (Mk 13: 24-32)

 

33^rd Sunday in Ordinary Time (Mk 13: 24-32)

ENDING  AND BEGINNING... 

Makakulugmat pamati-an ang Ebanghelyo subong nga Dominggo tungud ini nagapakita sa aton sang imahen sang pagkagunaw sang kalibutan… “ang adlaw magadulum kag ang bulan indi na magsanag, ang mga bituon magakalahulog gikan sa langit; kag ang gahum sa kahawaan pagapatalangon sa ila kinaandan nga alagyan…”

Siling sang mga “doomsday prophets”, sang mga “astrologers”, kag iban pa nga mga “scientists”, ini nga mga hitabo amat-amat na nga nagakahanabo sa aton nga panahon subong. Ang nagahanabo subong nga panahon, ang mga linug, baha, kalamidad, mga patimaan sa kahawaan sa diin “nagatalang” ang mga planeta kag iban pa nga mga”heavenly bodies”, ang pagkasamad sang aton “ozone layer” kag pagkasamad sang aton palibut, daw sa nagapakita ini sa aton nga madali na gid lang maguba ang kalibutan.

Kon sa Biblia naton basehon ang kahulugan sang “katapusan”, ini naangut sa ideya sang “fulfillment” ukon KATUMANAN… Kon ginasiling naton nga natapus na ang tanan, buot silingon nga ang tanan nga plano, misyon kag mga buluhaton, natuman na. Kon bala sa pelikula, ang pag-obra sang “script” sang istorya, matahum, tungud sa katapusan, makita naton ang dinalan nga “THE END”. Pero kon ang pelikula gani magsiling sa katapusan “To be continued…”, daw bitin. Mahulat ka naman sang sugpon.

Kon manami gid gani ang sine, nagapamalakpak pa kita pagkatapos! Ngaman? tungud ang tanan nga gintahi-tahi nga mga insidente sang pelikula naintindihan naton sa katapusan. Sa sini MAKASUGUD naman sang bag-o nga istorya ang “script-writer”.

WALA sang gintagna nga adlaw ang aton Ginuo… wala kita makahibalo kon san-o “maguba” ang kalibutan. Apang dapat kita magmangin-handa kag mangin malipayon sa “pagka-guba” sang daan nga kalibutan, agud may “pagbag-o” kita nga padulungan… Bag-o naman nga kapitulo sang aton kabuhi… “A new heaven and a new earth…”

Sa pagkamatuod, ang “THE END” indi sang katapusan, kundi isa ka bag-o nga pagsugud...a NEW BEGINNING!

 

32nd Sunday in Ordinary Time (Mk 12: 38-44)

 

32^nd Sunday in Ordinary Time (Mk 12: 38-44)

                                       NAGHATAG SANG PANGABUHI-AN

Madamo sang mga hitabo sa kabuhi sang aton Ginuong Jesus nga nagapakita sang Iya paghatag sang importansya sa PAGKA-ALWAN. Siya gani nagpanudlo nga “Kon magpahulam kamo, indi kamo magpaabut sang bayad… Kon maghiwat ikaw sang punsyon, indi pag-agdaha ang imo mga abyan nga sarang maka-agda man sa imo, kundi, agdaha ang mga piang, mga bulag, mga bungol kag  mga imol– kay ini sila indi sarang makabalus sa imo, kundi ang imo Amay sa langit amo ang magabalus sa imo!

Sa aton Ebanghelyo subong ginapakita man ang pagdayaw sang aton Ginuo sa isa ka balo nga naghatag bisan pa sang iya nga kinahanglanon. Ang mga balo sa panahon sang aton Ginuo, mga makalulu-oy, tungud sila nagakabuhi lamang sa “rasyon” sang gobyerno kag sila ginakabig nga mga “maluya” sang sosyedad. Apang sa likud sini nga sitwasyon, sa gihapon ang balo naghatag sang iya halad sa Mahal nga Diyos, bisan pa sang iya nga PANGABUHI-AN!

Isa ini ka “insulto” sa mga manggaranon nga naghatag man, apang naghatag lang sila suno sa “sobra” sang ila nga manggad!- nga indi man gani ila! Sila naghatag suno sa kabuganaan sang ila dutan-on nga manggad, apang ang balo naghatag gikan sa KABUGANAAN SANG IYA NGA TAGIPUSU-ON! Masami, “We are only doing-away of the things we don’t need anymore… we don’t give but we only throw away our trash”… Ang indi ta na kinahanglanon kag ang sobra lang sa aton. Ang “giving” amo ang pagpaambit bisan pa ang aton kinahanglanon. Amo gani nga ginasiling ni Santa Teresa sang Calcutta: “Give UNTIL IT HURTS”. Kay ang paghatag indi sang paghatag kon wala ikaw ginasakitan, kay ang imo ginapaambit bahin sang imo kaugalingon.

Tubtub subong, padayon kita nga nagahalad sa Diyos sa Iya nga Templo ukon sa Simbahan, kag sa gihapon padayon man nga nagaluntad ang mentalidad sa paghatag suno sa kabuganaan nga ayhan “sobra” lang, ukon sa kabuganaan nga naghalin sa tagipusu-on– bisan pa ang kinahanglanon. Kon kaisa, sa sobra KAISIP, ginapangayu-an pa gani sang “proper accounting” (bisan indi nagakabagay, kay suno sa layi sang Simbahan, ang Obispo lang,  ukon ang iya Finance Committee, sa iya nga teritoryo, ang sarang makahimo sini) ang kura paroko sang Parokya! Apang, ANO ANG NAHATAG MO? Sobra?, ukon halin sa imo pangabuhian? Ukon WALA gid gani? INDI KA MAGMA-ISIP!

 

31st Sunday in Ordinary Time

31^st Sunday in Ordinary Time

(Mk. 12: 28-42)

ANG DIREKSYON SANG KRISTYANO NGA PAGHIGUGMA

May isa ka monghe sa monasteryo nga nagpakita si Kristo sa iya sa iya kwarto. Daku gid ang kalipay sang monghe kay gintagaan siya sini nga grasya. Apang nagbagting ang ila lingganay nga patimaan na nga iya nga turno ang paghatag sang pagkaon sa mga ginagutum nga mga tawo sa gwa sang ila kumbento. Nabutang siya sa sitwsyon kon bala bayaan niya si Kristo kag magkadto sa mga tawo nga ginagutum o magpabilin lang sa atubangan ni Kristo nga iya ka-istorya kag nagahatag sa iya sang daku nga kalipay. Apang nagpangibabaw ang desisyon nga dapat niya kadtu-an ang mga tawo nga ginagutum. Gani ginbayaan niya si Kristo kag nagkadto sa mga tawo. Pagkaligad sang isa ka oras, masinulub-on siya nga nagbalik sa iya kwarto kay kanugon sang iya grasya kay ginbayaan niya si Kristo. Apang daku ang iya kakibut nga sang iya pagbalik, may daku nga kasanag ang iya kwarto, kag si Kristo, ARA man gihapon, nagapungko. Siling niya: “Ginoo, nagpabilin ka?” Nagsabat ang Ginoo: “Anak, kon wala ka mag-gwa kag nagpakaon sa mga ginagutum, NAGLAKAT NA KUNTANI AKO. Sa imo pagtalupangud sa ila, gintalupangud mo man Ako.”

Amo ini ang ginapuntariya subong sang aton Ginuo sa Ebanghelyo. Sang Siya ginpamangkut sang isa ka manunudlo sang kasugu-an kon ano ang labing daku nga kasuguan, ang sabat sang aton Ginuo nga ang kasugu-an may duha ka bahin ukon laragway. Matuod nga isa lang ang labing importante sa tanan, nga amo ang PAGHIGUGMA, apang ini, may duha ka pagpahayag- paghigugma sa Diyos kag paghigugma sa isigkatawo. Indi kita sang minatuod nga makahigugma sa Diyos, kon indi kita makahigugma sa aton isigkatawo. Si San Juan, maathag nga naghanbal parti diri. Siling niya, butigon ang isa ka tawo nga magsiling nga ginahigugma niya ang Diyos apang wala niya ginahigugma ang iya isigkatawo. Kay paano niya mahigugma ang Diyos nga indi niya makita, kon indi niya mahigugma ang iya isigkatawo, nga iya makita.

Ang sabat sang aton Ginuo nagapakita sang duha ka direksyon sang paghigugma nga Kristohanon- ang PAIBABAW- padulong sa Diyos, kag ang BALABAG- padulong sa aton isigkatawo. Kon sayuron, nga kumpleto gid lang ang paghigugma, kon aton ginahuptan ang duha ka direksyon sa aton kabuhi- PAIBABAW KAG PABALABAG. Ini maathag nga ginapahayag sang Krus. Amo gani nga si Hesus ginlansang sa Krus. Buot silingon, nga amo ang paghigugma ni Hesus sa aton kag sa Iya nga Amay. Pabalabag tungud gusto nga Niya hakson kita sang Iya nga paghigugma, kag pa-ibabaw, tungud Siya nagtuman sa kabubut-on sang Amay.

Gani kon aton gid pamalandungan, ang kamatayon ni Kristo sa krus INDI SANG BINUANG kundi nagapahayag sang Iya kaalam- kaalam sa pagtudlo sa aton nga kon kita matuod nga nagahigugma, dapat naton ipatuhoy ini sa Diyos kag sa tawo. Gani sa kabuhi sang tawo, indi siya dapat magpalagyo sa krus, kay ini lang nagapahayag sang iya pagpakig-upod kay Hesus sa pagpahayag sang matuod nga paghigugma.

 

Madamo subong ang nagahigugma nga padulong lamang sa ibabaw ang ila direksyon, pero pag-abut sa balabag- tuhoy sa ila isigkatawo, daku gid ang ila kakulangan. Amo gani nga ang ila gwa, daw pareho lang sila sa mga Pariseo nga puro lang BIBIG ang ila pagdayaw, apang malayὀkaayo ang ila buhat tuhoy sa ila isigkatawo.

 

Kumpleto lang ang krus, kon kita nagahigugma sa Diyos kag sa aton isigkatawo. Indi naton pag-isikway ini kay ini amo ang tanda sang aton matuod nga paghigugma.

 

 

29th Sunday in Ordinary Time (Mk 10: 35-45)

 

29^th Sunday in Ordinary Time (Mk 10: 35-45)

 

GAHUM PAAGI SA PAG-ALAGAD... 

Sang nagligad nga Dominggo ginhangkat kita sang aton Ginuo nga kon luyag kita magsunod sa Iya, dapat naton ibaligya kag ipanghatag ang tanan, agud mangin hilway kita nga makaalagad sa Iya kag sa isa kag isa. Subong nga Dominggo, Iya man ginapahayag kon ano nga SAHI ini nga pag-alagad ang kinahanglanon agud mangin DAKU kita sa atubangan sang Diyos. Ini amo ang pag-alagad nga kita dapat mangin SULUGU-ON sang tanan! “The greatest among you should be the SERVANT of all!”

Kabudlay man sini nga mga panudlo! Ayhan amo ini ang reaksyon sang mga gintutun-an sang pagkabati nila sini nga mga pulong sang aton Ginuo. Kay sa pagkamatu-od, duna na sa aton pagkatawo nga mas naluyagan naton nga ALAGARAN sang sa MAG-ALAGAD! Luyag kita nga dayaw-dayawon sang mga tawo tungud kita manggaranon, inpluwensyado, lutaw, kag mas may ikasarang sang sa iban. Amo gani nga balingag gid nga lantawon ang mga tawo nga nangako sang SERBISYO PUBLIKO apang kon bayawon ang kwenta, kon ara na sila sa palangaku-an, SILA ANG GINA-ALAGARAN. Kon ingkaso nga sila “mag-alagad” gid man, ini dapat may PORSYENTO gikan sa “proyekto”!

Tani makamuklat man sila nga ining ila mga proyekto kag ang kwarta nga ginagasto sa amo nga mga proyekto, indi sang ila, kundi IYA SANG MGA PUMULUYO! Mu gani nga nagapalangligbos ang akon balahibo kon makakita ako sang karatula nga nagasiling: “This is the project of president…congressman… governor or mayor…”

Makalulu-oy man si Juan de la Cruz nga nagabinayad sang buwis agud tani mag-umwad ang iya pangabuhi, apang ginpanghimuslan lang sang pila naton nga mga “alagad” sa pagkib-kib sang iya ginpaninguhaan!

Ang minatuod nga pag-alagad wala naga-isip kag wala nagapamintaha! Sa baylo, ini nagapakita sang pagkasulugu-on paagi sa pag-alagad bisan pa sa labing kubos naton nga mga kautoran. Ini nga pag-alagad nagalab-ut sa tatlo ka “L” sa aton katilingban–  the LEAST, the LAST, and the LOST! Diri nasanding ang “PAGKAGAMHANAN”!

 

28th Sunday in Ordinary Time (Mk 10: 17-30)

 

28^th Sunday in Ordinary Time (Mk 10: 17-30)

INDI KAHAKUG KUNDI KAALWAN

Ang kahakug isa ka “bisyo” nga nagaluntad sa tagipusu-on sang tawo kag amo ang masami nga nagadala sang nanari-sari nga mga kala-inan sa aton kaugalingon kag sa aton isigkatawo. Para sa aton Ginuo, ini isa lamang ka upang sa aton pagsunod sa Iya kag upang man sa pagbantala sang Maayong Balita. Kon ang isa ka tawo MAHAKUG, indi siya makapanumdum para sa kaayohan sang iya isigkatawo tungud ang iya lamang ginalantaw amo pirmi ang iya nga BENTAHA. Wala siya nagalantaw kon paano siya MAKAALAGAD kundi kon paano siya MAKA-GANANSYA! Ini nga tawo wala sang lugar para mangin sumulunod sang aton Ginuo, tungud siya isa ka ULIPON sa iya kaugalingon nga mga luyag kag kagustuhan.

Tion naman sang eleksyon. Madamo ang nagakandidato agud sila pil-on, kag nagapromisa sila nga mag-alagad sa mga tawo, apang kon ara na sila sa pwesto, imbes nga ihatag nila ang maayo sa mga tawo, ang ila danay kaugalingon nga “ganansya” ang ila gina-una. Nalipatan na ang mga tawo nga ila ginsumpaan nga alagaran, kundi sila na nangin makawat sa kaban sang banwa, tungud ang ila lang ginalataw kon paano sila makaganansya. Kilala nyo ini nga mga kandidato. Indi kita masilaw sa kwarta nga ila ginasangal sa aton sa tion sang eleksyon, kay sigurado nga ila ina bawi-on kon sila na magdaug! Bawi-on ina nila sa aton paagi sa pagpangawat sang pondo sang gobyerno. Ina sila mga mahakug kag makawat nga wala nagapanumdum sang maayo nga buhat para sa ila isigkatawo. Ayhan wala sila gapang-away… wala sila gahambal sang malain… galikaw sila nga indi magtamay sa iban… pero kon magpangawat sila PWERTE! Aton tani panumdumun nga ang mga kandidato “aplikante” lang sa bakante nga posisyon sa aton korporasyon. Gani ang ila sweldo nagahalin sa ginabayad naton nga buhis. Dapat sala-on, kay kon sila mangawat sa aton kaban, maputo kita. Kita ang makalulu-oy. Kita ya ang naga-empleyo sa ila! Kita ang nagasweldo sa ila! Aton sila mga sulugu-on (amo gani ginatawag sila PUBLIC SERVANTS), kag dapat ihatag ang pinakamaayo sa aton agud mag-umwad ang aton korporasyon. Kon mapierde ang aton korporasyon kita ang dapat basulon kay ginpili naton ang indi kwalipikado sa ila posisyon. Amo na nga trilyon ang utang sang Pilipinas subong tungod ang aton ginpili sang nagligad nga eleksyon, ang kalabanan, indi sing kwalipikado… mga mahakug kag wala napanumdum sang ikaayo sang tanan.

Amo gani nga sang nagpamangkut ang pamatan-on sa aton Ebanghelyo subong kon ano ang iya buhaton sa pag-angkon sang Ginharian sang Diyos, sa sulud sini nga pamangkut siya nagapahayag kon ano bala ang kinahanglanon nga mangin matuod-tuod nga MALIPAYON sa kabuhi.

Ginsalâ sya sang aton Ginuo. Ayhan ginasiling sang aton Ginuo: “Wala ka matuod sang mala-in nga ginbuhat sa imo isigkatawo, apang ANO ANG MAAYO nga imo ginbuhat sa ila. Ayhan wala ka sing sala sa imo kaugalingon tungud nagalikaw ikaw nga makasala, apang ano ang imo GINBUHAT sa pag-alagad sa imo isigkatawo?” KON IKAW MAHAKUG WALA KA SING LUGAR SA GINHARIAN SANG DIYOS… BASI AGAWAN MO PA SIYA!

27th Sunday in Ordinary Time

 

27^th Sunday in Ordinary Time (Mk 10: 2-16)

 

IKAW GID LANG ANG AKON PILI-ON

Ang masami nga kabangdanan kon ngaman naga-asawahay ang lalaki kag babayi, ini tungud kay sila nagahigugma-anay. Sa tagsa ka kalasalon nga akon na-interview, ginasiguro ko gid nga ang elemento sang paghigugma nagaluntad sa tunga sang kabuhi sang nobyo kag nobya. Apang isa ka daku nga pagkanugon ang akon mabatyagan, kon pagkaligad sang pila ka bulan ukon pila ka tuig, masapwan nga ang amo nga mga nagbaton sang sakramento sang kasal, nagabulagay suno sa ila mga personal nga mga kabangdanan. Indi madula sa akon painu-ino nga magpamalandong nga ayhan sa pagkamatuod, sang sila gina-interview, wala gid nila mahangpan sing maayo ang kahulugan sang paghigugma. Ayhan masiling naton nga sadto nga tion “love is blind as lovers cannot see”. Ayhan sa sadto nga tion, INDI sang gugma ang nagluntad, kundi lain nga “attraction” ang nagpatunga sa nobyo kag nobya… ayhan ang ila maayong lawas ukon katahum ang nagbuyok sa ila nga “magluyagay” sa isa kag isa.

Sa aton Ebanghelyo subong, ginapakita sang aton Ginuo nga paghigugma indi lamang sang “luyag” ukon “pagkagusto” sa isa ka tawo kundi ini isa ka SINUMPAAN NGA SAGRADO tungud ini nagapahayag sang plano sang Diyos sa PAGHIUSA sang lalaki kag babayi, sugud pa sang Iya pagtuga sa ila.

Ang paghigugma isa ka DESISYON sa pagbiya sang ginikanan agud maghi-usa sa pinalangga tubtub gid sa kamatayon. Ini nagakahulugan nga ini nga desisiyon napasad sa PAGKAMATUTUM. Isa ini ka daku nga panghangkat sa aton nga panahon karon, ilabi na gid sa mga mag-asawa.

Ang aton paghigugma indi  lamang sang isa ka BALATYAGON kay ang balatyagon, MAGAAGI lamang. Isa ini ka DESISYON nga bisan ano pa ang matabo, sin-o man ang magaabut, diin man nga lugar, magapabilin ako nga MATUTUM  sa imo tubtub sa katapusan. Para sa nagahigugma, YOU ARE MY ENOUGH! Ikaw gid lang ang akon pili-on!

 

26th Sunday in Ordinary Time

 

26th Sunday in Ordinary Time ( Mk 9: 38-43. 45. 47-48)

 

WALA SANG PINASULABI… TANAN ESPESYAL 

Sang nagligad nga Domingo, ginkugos sang aton Ginuo ang isa ka bata, kag ginpakita sa Iya mga gintutun-an, nga nagasiling: “Kon sin-o ang nagabaton sini nga bata, nagabaton sa Akon…” Sa kultura nga ang mga bata ginakabig nga “second class citizens”, tungud indi sila mapuslan, kundi palakan-on lamang, ginhatag ni Ginuong Jesus, ang daku nga pagtalupangud sa ila, sa bagay, nga sila pa gani ginhimo nga sulundan sang aton Ginuo kon paano mangin “daku” sa ginhari-an sang langit. Gintagaan sang aton Ginuo sang impotansya ang mga bata, tungud sila nagapakita kon ano ang aton kahimtangan sa atubang sang Diyos- nga kita Iya mga anak. Sa bagay nga WALA Niya PAGSIKWAYA ang mga bata, kundi Iya pa gani sila ginbaton nga MAS KAPIN pa sang sa aton, nga ayhan nagbugalon na tungud sang aton mga kina-adman. Sa panahon sa diin mabaskug ang “discrimination” o ang pagsikway sang mga ginasika-sika sa katilingban, ang aton Ginuo NAGBATON NGA BUKAS sang ginharian sang Amay para sa tanan. Wala Siya magsikway sa ila nga daw wala sing pulos sa katilingban, sa baylo Siya nagbaton sa ila bilang mga anak man sang Diyos.

Subong nga Domingo, amo ang kasugpon sang aton Ebanghelyo. Padayon gihapon ang aton Ginuo nga nagapahayag nga ang ginhari-an sang Diyos para sa TANAN. Wala sang “gina-discriminate”… ang tanan nga nagabuhat sang maayo, GINABATON. Amo gani nga wala Niya pagdumili-i ang tawo nga nagapangbulong man, bisan indi siya bahin sang ila grupo. Bisan ayhan siya la-in sang ginapatihan, apang siya nagabuhat sang maayo nga butang, sa pag-ayo man sa mga nagamasakit. Para sa aton Ginuo siya hilway sa pagpangbulong kay siya nagabuhat man sang kaayuhan. Ginbaton siya sang aton Ginuo bilang isa ka abyan o isa ka anak sang Diyos, kay siya man nagabuhat sang buluhaton sang aton Diyos. Wala siya ginsikway o “gin-discriminate” sang aton Ginuo tungud kay siya pinasahi. Sa baylo siya ginbaton sang aton Ginuo bilang pamaagi man sang Mahal nga Diyos sang pagdala sang Iya kaayo.

Sa aton panahon maathag kaayo ang “discrimination” o ang “pagsikway” sang iban, tungud indi siya aton kabahin. Kita mangin bukas para sa tanan, kay ang tagsa-tagsa nagabuhat man sang kaayohan o paghalung agud ang aton katilingban mangin hilway sa tanan nga ikala-in sang aton lawas.

Ang simbahan nga “nagasikway” o “naga-discriminate” sang iban, indi sang simbahan nga gintukod ni Jesukristo. Ang simbahan nga gintukod ni Kristo amo ang Simbahan nga BUKAS para sa tanan kag nagahatag kahilwayan sa tanan. Indi ini sang simbahan para sa mga pinasulabi lamang, kundi simbahan para sa tanan nga nagahimud-os nga magbuhat sang maayo. Kay ang tanan nga nagabuhat sang maayo, Iya sang Diyos… wala sang pinasulabi… ang tanan espesyal.

 

25th Sunday in Ordinary Time

 

25th Sunday in Ordinary Time (Mk 9: 30-37)

SMALL BUT TERRIBLE!

Ang mga apostoles nagabina-is kon sin-o gid ang labing “importante” ukon ang “sikat” sa ila tanan. Sin-o gid bala sa ila ang may pinakamataas nga “pwesto” sa ila pag-inupdanay bilang mga sumulunod sang aton Ginuo. Wala nila mahangpan ang mga pulong sang aton Ginuo sang sila nagalakat kag nagpanagna  nahanungud sang Iya nga kamatayon. Siya bilang ila pangulo, maga-antus kag mapatay kag sa ikatlo ka adlaw, mabanhaw! Ang Iya nga pag-antus kag kamatayon amo ang pagpahayag sang Iya nga PAGPA-UBOS sa pagtuman sang kabubut-on sang Iyang Amay sa langit!

Nagkuha ang aton Ginuo sang isa ka bata nga ayhan makalaragway sang Iya buot silingon, kon ano ang kahulugan sang “GREATNESS” ukon “PAGKA-DAKU” sa atubang sang Iya Amay sa langit. Ini nasandig sa sadsaran sang pagpa-ubos katulad sang isa ka bata, ukon isa ka ulipon nga naga-alagad sa tanan, katulad sang aton Ginuo nga wala magkari agud alagaran, kundi agud mag-alagad!

Kon sayuron, ang dalan sang pagka-daku sa atubangan sang Diyos, makita indi sa kadungganan nga ginahatag sang tawo, kundi sa kalidad sang aton pag-inalagaray sa isa kag isa! Indi ini sang paindis-indis nga maagum naton paagi sa palapit-lapit sa luwag ukon sa mga pinasulabi nga mga pwesto, kundi kita ginatakus sang aton Ginuo kon bala kita nag-alagad suno sa aton masarangan nga wala nagapanumdum sang aton personal nga bentaha katulad sang isa ka bata!

Pila ayhan sa aton ang nagasakit ang buot kon indi ma-”RECOGNIZE” ang aton binuhatan ukon nabulig, ukon nahatag? Dapat kuntani malipay kita, kay ang nakatalupangud kag magabalus sini amo ang aton Amay sa langit! Ulihi ka, pero, UNA sa listahan sang Diyos!

24th Sunday in Ordinary Time

 

24^th Sunday in Ordinary Time (Mk 8: 27-35)

SIN-O BALA SI KRISTO? 

Sa aton Santos nga Ebanghelyo subong nga Dominggo, ang aton Ginuo nagpamangkut sa Iya mga gintutun-an kon sin-o Siya para sa ila. Ini nga pamangkut indi lamang sang isa ka pamangkut nahanungud sa mga huring-huring sang mga tawo, ukon isa ka “background check” sang Iya nga pagkatawo, kundi isa ka pamangkutanon nga natuhoy sa ila “personal” nga pagkilala sa Iya.

Ayhan, malawig-lawig na ang ila nga pag-inupdanay, kag ayhan madamo naman sila sang nahibalu-an nahanungud sa Iya nga pagkatawo, kag gani, kon may makahambal nga may “otoridad” nahanungud sa “character” sang aton Ginuo, ini wala sang liwan kundi ang Iya mismo nga mga sumulunod.

Maayo ang sabat sang mga apostoles sang pamangkut sang aton Ginuo kon sin-o Siya suno sa mga tawo, apang sang ginpatuhoy na sa ila ang pamangkut kon sin-o Siya para sa ila, ayhan na-ukyan sila, kay ang pamangkut sang aton Ginuo wala nagakinahanglan sang sabat nga ginabase sa “tsimis” ukon “sugid-sugid” ukon sa “ideya”, kundi sa ila “personal experience” sang Iya nga presensya sa ila tunga. Si Pedro gid lang ang isganan nga nagtindog kag nagpahayag nga Siya amo ang Kristo! - sabat nga wala ginbase sa iya eksperyensya sa kay Jesus, kundi paagi sa pagtudlo sang Espiritu Santo nga amo ang nagtulod sa iya sa pagpahayag sini nga pagtuo.

Tubtub subong, padayon man kita nga ginapamangkut sang aton Ginuo kon sin-o Siya para sa aton. Indi suno sa aton mga nabasahan, ideya, ukon nabati-an sa mga sermon, kundi kon sin-o Siya sa aton adlaw-adlaw nga pagkabuhi! Ginasiling gani nga “mahapus mangin Kristiyano apang mabudlay ang magpaka-Kristiyano.” Sa bagay nga dapat naton makilala si Kristo sa aton pagkabuhi. Ang aton kabuhi mismo amo ang magapakita kon sin-o Siya. Kita ang nagakabuhi sang Iya nga kaugalingon nga yara sa aton.

 

23rd Sunday in Ordinary Time

 

23^rd Sunday in Ordinary Time (Mk 7: 31-37)

 

DAW ANO KAAYO ANG IYA PAGHIMO

SANG TANAN…

Sa aton nga Ebanghelyo karon nga Dominggo, ginsaysay ni San Markos ang hitabo sang pag-ayo sang aton Ginuo sa isa ka tawo nga bungol kag halos makahambal. Pagkatapos nga ang tawo nag-ayo, kag naglapnag ang maayong balita nahanungud sini, ang tanan nga nakabati natingala gid kag naghambal: “ Daw ano kaayo ang Iya paghimo sang tanan nga mga butang!” Ini nga mga pulong, indi lamang sang pagpahayag sang kahangawa ukon katingala, kundi isa ka “expression” sang mga Israelinhon sang PAGKAGAMHANAN sang Diyos.

Ini nga ekspresyon, ginbase sa dinalan sang Santos nga Kasulatan sa Libro sang Genesis sang pagtuga sang Diyos sang tawo kag sang tanan nga mga butang sa sining kalibutan: “Ginlantaw sang Diyos ang tanan Niya nga ginhimo kag nanami-an gid Siya!” Buot silingon nga “MAAYO gid ang paghimo Niya sang tanan nga mga butang!”

Sa pag-”quote” sang mga tawo sini nga dinalan sang Pagtuga sang Diyos, ila man ginasiling kag ginapahayag nga ang ginbuhat sang aton Ginuong Jesus, isa ka buluhaton sang Diyos, kag ini nagapatima-an nga sila nagatuo nga ang aton Ginuo nagikan sa Diyos. Ang Iyang mga buhat nagapahayag kag nagapanaksi sang Iya pagka-Diyos, tungud ini nagahalin sa Iya matuod nga Kinatuhay. “Jesus’ actions give witness to the words and Good News He proclaimed!”

Kita, bilang mga sumulunod sang aton Ginuo dapat man magpanaksi sang buluhaton sang Diyos tungud kita mga “anak” Niya. Ang aton mga buhat nagaka-igo gid nga nagapahayag man sang Maayong Balita sang Ginuo. Kita magapanaksi sa aton kabuhi sang Iya kaayo.

 

22nd Sunday in Ordinary Time

 

22nd Sunday in Ordinary Time (Mk 7: 1-8, 14-15, 21-23)

 

MALAYO ANG TAGIPUSU-ON... 

Paano naton mahibalu-an ang minatuod sa butig? Paano naton makilala ang “tunay” sa “peke”? Ang pang-”gwa” nga pagkatawo sarang makabulag sa aton sa minatu-od nga tinutuyo nga yara nagaluntad sa tagipusu-on sang tawo.

Si Propeta Isaias nagpanagna sini sa iya nga libro: “nga ang Ginuo indi maghukum paagi sa Iya makita, ukon paagi sa sugid-sugid lang; Pagahukman Niya ang mga imol sing nagaka-igo kag apinan Niya ang kinamatarong sang mga mapa-inubuson.” Buot silingon nga ang Diyos indi malimbungan tungud sa aton ginapakita nga pamatasan, tungud Siya nagalantaw sa SULUD sang aton nga kasing-kasing!

Amo gani nga mabaskug gid nga ginsulit sang aton Ginuo ang mga pulong ni Isaias nga Propeta ang nahanugud sa mga tawo nga ang ila pagkabuhi, indi sang tampad, kundi PAKITA-KITA lamang: “Ang Diyos nagsiling, ginapadunggan ako sining mga tawo sang ila mga BIBIG, pero ang ila tagipusu-on MALAYO gid sa Akon. Wala sing pulos ang ila pagsimba sa akon, kay ginapatuman nila ang mga kasugu-an sang tawo subong mga kasugu-an sang Diyos!” Ini sila gintawag sang aton Ginuo sa mga pulong nga SALIMPAPAW, tungud gani MANABAW ang ila pagkabuhi nga wala mapasad sa kamatuoran kundi sa KABUTIGAN!

Pila ayhan sa aton ang nagapati sa sini nga hulubaton: “Follow what I say, but don’t follow what I do”? Amo ini ang sayup sang mga manunudlo sang kasugu-an kag sang mga Pariseo sang panahon sang aton Ginuo! Kon amo sini ang aton pagkabuhi, masiling naton nga ang aton pagkabuhi isa ka BUTIG!

Mahibalu-an mo ang tunay sa peke, sa ila BUNGA. Kon nagapamunga ini sang maayo, TUNAY ini. Kon higos o kurukutoy ang bunga, PEKE ini! Sa subong nga panahon, ano nga mga bunga ang aton makita sa aton palibut? Kahilwayan o pilitay? Kahilwayan o pagpamigos? Kon nagadala ini sa aton sang kahilwayan, ini TUNAY. Pero ko nagadala ini sang PAGPIGOS O PAGPILIT sa aton, ini KABUTIGAN. Kay sa Diyos, kita tanan may KAHILWAYAW bilang Iya mga anak! 

 

21st Sunday in Ordinary Time

21st Sunday in Ordinary Time (Jn 6: 60-69)

 

PULONG-ESPIRITU-KABUHI

“Ang mga pulong nga ginahambal ko sa inyo amo ang Espiritu kag ang Kabuhi!” Amo ini ang ginahatagan subong sang aton Ginuo sang igtalupangud– ang kaangtanan sang Pulong, sang Espiritu, kag sang kabuhi. Ang kalabanan sang mga gintutun-an indi makabatas sang ginhambal sang aton Ginuo ang nahanungud sang “pagka-on” sang Iyang unod, apang wala Siya magbaylo sang Iyang pagpanudlo, sa bagay nga Iya pa gid ginpadaluman ang kamatuoran nahanungud sini. Ginapahangup sang aton Ginuo sa mga gintutun-an nga ini nga “unod” wala sing pulos kon wala ang “Pulong” nga amo ang nagahatag sang matuod nga “Espiritu kag Kabuhi”.

Sa pagpanudlo sang aton Ginuo, Iya ginapahibalo nga may kaangtanan ang Pulong, ang Unod, ang Espiritu, kag ang Kabuhi. Ini sa pagpamatuod man nga ang aton Ginuo amo ang Pulong nga nangin Unod, kag ini nga Pulong amo ang nagahatag sang Espiritu kag sang Kabuhi. Buot silingon nga indi sang bastante nga ginabaton lang naton ang unod sang aton Ginuo, kon una sa tanan, indi man kita bukas magbaton sang Iyang Pulong, kay paagi lamang sini nga aton mabaton ang KABUG-OSAN sang Kabuhi kag Espiritu.

Para sa aton Ginuo, ang Pulong-Unod-Kabuhi-Espiritu isa ka naangut nga kamatuoran, kag indi pwede nga ihamulag ang isa sa isa. Sa amo nga bagay, kita Iya ginaagda sa pagkabuhi sini nga kamatuoran.

Ang aton pulong sarang man makahatag sang kabuhi sa aton isigkatawo o sarang man ini makahalit sa pag-guba sa ila. “For God, the Word is CONSTRUCTIVE!”- nagahatag sang kabuhi– may Unod. Kita paano ang aton pag-gamit sang aton Pulong. Nagabulig bala ini o nagahalit? Kalabanan sa aton subong, ginagamit ang pulong sa PAGPAMAHUG. Kon ini Pulong Iya sang Diyos, ini dapat maghatag KAHILWAYAN indi sang PAGPAMIGOS. Tan-awon ta ang nagakahanabo sa aton palibut. Indi kita magpabulag-bulag! Ano nga pulong ang nagalagaw subong? Nagadala sang pagpamahug o kahilwayan? Ang aton bala tinaga may “unod” o puro lang “hangin” kag “habok”? Tani indi lang kita puro hala kundi “GAWA”!

 

ANG PAGDALA SA LANGIT SANG BIRHEN MARIA

 

ANG PAGDALA SA LANGIT SANG BIRHEN MARIA (Lk. 1: 39-56)

 

“May bata nga nagtipon sang iya balon sa eskwelahan agud ibakal nya sang regalo sa birthday nio Nanay niya. Nakatipon sya sang 500 ka pesos. Naka-agi sya sa nagabaligya sing bulak. Kag namangkut sya sa iya gid natahuman nga gin-arewglo nga bulak. Tama gid sa iya nasupot nga 500 pesos. Kag iya adto ginbakal nga bulak. Nagpauli sya nga dala yadtong bulak nga may ‘dedication’ pa. Pag-abut nya sa ila balay, iya ginhatag ang bulak kay nanay niya nga nagasiling: Nay pasensya ka na sa akon regalo. Amo gid lang na ang akon masarangan sa ginsupot-supot ko nga balon… kanami bala nay sang “dedication”. Ginbaton ni nanay nya nga may kalipay ang bulak. Kag ang nakasulat sa “dedication”… ‘REST IN PEACE’ Bulak gali para sa patay. Ayhan indi amo ini ang intensyon sang bata. Naluoy sya kay nanay niya, nga wala gid pahuway ang pagtrabaho agud mahatagan siya sang mayo nga bwasdamlag. Sa bagay nga ang iya ginpili nga ‘dedication’, REST IN PEACE.”

 

Aton subong ginasaulog ang Pagdala sa langit sang Mahal nga Birhen Maria. Ini gindeklarar ni anay Papa Pio XII sang 1950. Sya nagdeklarar sini bilang isa ka “dogma” sang aton pagtuo ukon isa ka “obligasyon” nga dapat tuohan naton nga mga katoliko. Ini ginbase sa kamatuoran nga tungud sya wala mahilabti sang sala nga palanubli-on, sya “nahilway” sa pagkadunot kag ginhatagan sang grasya sang Mahal nga Diyos nga dal-on sa langit “lawas kag kalag”. Indi ini isa ka bag-o nga pagtulun-an kundi isa lamang ka pagpahayag nga sa pagkamatuod, espesyal sa mata sang Mahal nga Diyos, tungud kay sya nahilway sa sala. Sya nag-ambit sang kabug-osan sang Diyosnon nga kabuhi kag nagakabagay lang nga sya mag-upod sa Diyos lawas kag kalag.

 

Amo ini ang estado ni Adan kag ni Eba sang wala pa sila makasala. Sila “nagalakat” upod sa Diyos sa Paraiso kay isa lang ang ila ginapatuhuyan sang ila igtalupangud. Wala sila nagatulok sa iban nga kabilinggan kundi ANG DIYOS LAMANG. Apang sang sila na makasala, nadula na ang ila “panulok” sa Diyos kag nagsugud sila sa pagtulok sa ila kauhalingon kag sa iban nga mga tinuga.

 

Ayhan ang aton mga iloy ginakapoy na sa ila pagpaninguha, apang si Mama Mary wala gid nagakapoy agud kita buligan kag mahaw-as sa lunang san g aton kasal-anan.

 

Si Maria wala gid magdula sang iya “panulok” sa Diyos, sa bagay nga ang iya kabuhi isa ka pag-alagad para sa Diyos. Ang aton Santos nga Ebanghelyo karon nagasugid sa aton nga si Maria, nagduaw sa iya pakaisa nga si Isabel, agud makaalagad sa iya. Siya nag-alagad kay Isabel tungud nakita niya ang “dagway” sang Diyos sa iya pakaisa nga labi nga nagakinahanglan.

 

Ang Diyos yara sa aton mga utod ilabi na gid sa mga nagakinahanglan kag ang eksena sang aton Ebanghelyo subong nagapakita lamang sang isa ka laragway sa diin si Maria wala gid mag-untat sang iya pagtulok sa Diyos paagi sa pag-alagad sa iya isigkatawo nga nagakinahanglan.

 

Ang ginbuhat ni Maria nga “pagduaw” kay Elisabet nga nagakinahanglan, nagapakita lamang sa aton, nga indi kita magdula sang aton panan-aw sa Diyos paagi sa pagtalupangud sa Iya sa mga tawo nga nagakinahanglan.

 

Sa sini kita man makaambit sang kabuhi nga Diyosnon didto sa ginharian sang langit. Ang himaya ni Maria sarang man naton maambit kon kita mag-alagad sa isa kag isa nga nagatulok sa laragway sang Diyos sa aton isigkatawo.

19th Sunday in Ordinary Time

 

19^th Sunday in Ordinary Time (Jn 6: 24-35)

PAGKAON SANG KALUWASAN 

“May ara nga isa ka tigulang nga mangunguma nga nagdala sang iya baligya sa siudad. Tungod kay udto na kag sobra kainit sang panahon, sia ginutom kag nagsulod sa isa ka restaurant para magpanyaga. Sia nagpungko sa kilid sang lamesa sang mga ‘social’ nga mga estudyante nga nagadinaskal sa mga waitress nga nagasirbe sa mga costumers. Pag-abot sang order sang tigulang, sia nagpanguros kag nagpangamuyo kag dayon nagkaon. Sa pagkakita sang iya ginhimo, ang isa sa mga soltero nga buot magdinaskal kag magpakahuya sa tigulang, nagpamangkot sa iya nga nagasinggit, agud mabatian sang tanan ang iya tingog: “Lo, ginahimo gid man bala ina sang iban sa imo ginhalinan, ang ginhimo mo?” Nagsabat ang imol nga mangunguma: “Indi tanan to! Sa uma, ang mga BABOY wala sina nagahimo!”

Kon maglantaw ka sang “TV”, imo makita ang damu nga mga “commercials” nga nagaganyat sa pagbakal o pagkaon sa mga butang nga ila ginabaligya sa mga tawo, nga daw amo na ini ang sabat sa ila ginapangita, o ang makapaumpaw sa ila kauhaw o ang makahatag sang matuod nga ‘satisfaction’. Apang sa ulihi, masapwan naton gihapon ang tawo nga gutom, disgustado kag nagapangita sang bag-o. Ini tungod ang gina-offer sang “advertising world” hapaw lamang kag nagalipas.

Sa pihak nga bahin, si Kristo gid lamang ang makahatag sang ginapangita sang tawo. Sya lamang ang makahatag sang matuod nga “satisfaction”. Ini tungod  ang ginatanyag ni Kristo wala lamang nagabusog sang aton tiyan kag buy-on, kundi nagapuno sang aton taguipusuon kag nagagarantiya sang kaluwasan sa aton mga kalag. JESUS IS OUR SATISFACTION, STRENGTH, PROTECTION , CURE AND HEALING!

Ang aton Ginuo ginpadala sang Amay indi lamang bilang tawo nga nagakabuhi sa aton tunga, kundi bilang pagkaon sa bayhon sang “tinapay” nga nagasagud sa aton agud kita may kabuhi nga WALA SING KATAPUSAN. Siya amo ang “BUHI” nga tinapay, kag ini wala sang liwan kundi ang Iya nga UNOD nga ginahatag sa aton, sa tagsa naton ka pagselebrar sang handumanan nga Iya ginbilin sang katapusan nga panihapon, sa diin Iya gintukod ang Sakramento sang Santos nga Misa. Diri Siya nahiusa sa aton sa himpit nga pama-agi tungud diri ginhalad Niya ang Iya nga kaugalingon bilang aton “tinapay sang kabuhi”- ginabaton naton ang Iya buhi nga unod nga amo ang nagahatag sa aton sang kahigayunan sa pag-ambit sang kabuhi nga wala sing katapusan. Sa sini nga kaangtanan, tungud kita nagaambit sang tinapay sang kabuhi, kita man naga-ambit sang kabuhi sang Diyos nga wala’y katapusan.

Gani dali na! Magsimba ka na kag magpangalawat ka kay Kristo! SA SIMBAHAN KITA MAKADTO… ARA DIRA ANG SABAT SA ATON TANAN PALALIGBAN!

18th Sunday in Ordinary Time (Jn 6: 24-35)

 

18^th Sunday in Ordinary Time (Jn 6: 24-35)

 

WE ARE WHAT WE EAT!

 

Suno sa mga “dietician” kon ano ang aton ginaka-on, amo man ina kita. May kaangtanan ini nga mga pulong sa aton Ebanghelyo subong nga Dominggo. Ang aton Ginuo nagasiling nga: “Indi kamo magpangabudlay tungud sa kalan-on nga nagakapan-os, kundi magpangabudlay kamo tungud sa kalan-on nga nagatener kag nagahatag sang kabuhi nga wala sing katapusan.”

 

Matuod nga nagakinahanglan ang aton “lawas” sang kalan-on agud ini mabuhi, apang ang lawasnon nga kalan-on nga iya ginakinahanglan sini amo ang kalan-on nga “nagakapan-os”… nagalipas lamang ini, kag wala sang kapahuwayan ang aton nga kagutum. Ang aton Ginuo nagahambal subong sang isa ka klase sang kalan-on nga sa diin ang mga tawo nagpangayo sini sa Iya agud ihatag sa ila. Amo ini ang kalan-on nga Iya ginahatag: “Ako amo ang tinapay sang kabuhi. Ang nagakari sa akon indi na gid paggutumon, kag ang nagatuo sa akon indi na gid pag-uhawon.” Buot silingon nga ang matuod-tuod nga kalan-on nga ginhatag sang aton Ginuo amo ang Iya KAUGALINGON nga lawas.

 

Amo gani nga ginbilin Niya sa aton ang isa ka SAKRAMENTO, nga nagahatag indi lamang sang isa ka handumanan kundi sang Iya PADAYON nga presensya, nga sa tagsa naton ka pagsaulog sini, kita NAHIUSA sa Iya! Sa Santos nga Misa, ang aton Ginuo nagahatag sang Iya kaugalingon sa mga pulong: “Ini amo ang akon LAWAS… Ini amo ang akon DUGO!”

 

Sa sini kita naga-ambit sang kabuhi nga wala sing katapusan nga Iya gintagna nga aton paga-ambitan. Kon kita nahiusa kay Kristo sa Santos nga Misa, kita man nangin KATULAD Niya… kita may kahigayunan sa pagbag-o sang aton kaugalingon. Nagapangabudlay bala kita para sa sini nga pagkaon? Ginapangita ta bala ang Ginharian sang Diyos, una  sa tanan? “Come and taste the goodness of the Lord!” Kon wala kita naga-upod sa Ginuo, paano naton matilawan ang Iya katam-is?

 

Sa aton nga panahon, madamo sa aton ang ginakulang, ginagutum, kag nawawad-an. Ini tungud kay ang kalabanan gihapon sa aton nagapangita sang kalan-on nga makabusog lang sa aton nga lawas, apang sa pihak nga bahin, may kakulangan sa aton kalag. Si Kristo lang ang makapuno sa aton. Sa Iya ara ang bugana nga grasya. Indi kita magduha-duha sa pagpalapit sa Iya… sa Iya WALA SANG GUTUM kay ara sa Iya ang aton KABUGANAAN.

 

16th Sunday in Ordinary Time Mt 6: 30-34)

 

MAKALULU-OY NGA PANONG

 

Ang mga karnero ginakabig sa isa sa mga pinakamabu-ot sa mga kasapatan. Ini tungud ang kinatuhay sang mga karnero nagapakita nga wala gid sila sang inugsagang o inugbato sa ila kaugalingon– wala sila sang matalum nga mga kuko, wala sang bangkil kag sungay, kag iban pa nga masiling naton nga ila nga taming kon sila gus-abon sang iban nga mabangis nga mga kasapatan. Amo gani nga ang mga karnero nagakinahanglan gid sang “manugbantay” agud nga sila mapangapinan sa tion sang mga kapipit-an. Kon wala sila sang manugbantay, ukon kon uyaya ang manugbantay, ang mga karnero magatalalang kag madali sila mangin biktima sang mga luyag mamintaha sa ila.

 

Amo ini ang sitwasyon sang mga tawo sang panahon sang aton Ginuo, kag bisan pa gani siguro sa aton man nga panahon. May yara matu-od nga mga “manugbantay” nga natalana sa ila, apang imbes nga sila bantayan pakadto sa maayo nga halalban, ukon ihatag kuntani ang maayo sa ila, sila ginapangunyadi-an lamang sang mga yara sa otoridad. Madamo nga mga ginakabig nga mga “manunudlo” sang kasugu-an apang imbes nga sila magpamag-an sang palas-anon sang mga tawo, ginapabug-at pa gani nila ini!

 

Masakit ini nga palanan-awon sa aton Ginuo tungud Siya isa man ka Manugbantay kag sinsero sa Iya nga misyon, sa bagay nga Siya “ginsubu-an” gid sang Iya makita ang “panong” nga nagapangita sang kasanag kag pagtuy-toy sang isa ka Maayo nga Manugbantay.

 

Kalabanan sa aton mga manugbantay- sa aton panimalay, sa aton eskwelahan, sa aton katilingban, sa aton pungsod, ukon sa aton Simbahan… apang makabig bala naton nga kita MAAYO NGA MGA MANUGBANTAY? Ginahatag ta bala ang kaayohan para sa tanan? Basi ang aton lang ginatulok, ang aton bentaha apang pabaya kita sa aton panong? Kon amo sini nga sahi ang aton pagka-manugbantay, wala kita sang kinalis sa mga lidres sang panahon sang aton Ginuo.

 

12th Sunday in Ordinary Time (B)

 

12^th Sunday in Ordinary Time (Mk 4: 35-41)- FATHER’S DAY:

 

NGAA BALA NAHADLUK GID KAMO?

 

Isa tatay ang ginhambalan sang iya anak: “Tay, soltero na ako, Siguro pwede na ako ka pangasawa.” Ang iya tatay nagsabat: “Tagaan ko ikaw anak sang isa ka buluhaton. Kon mahimo mo ini pwede na, kay ‘MATURED’ ka na.” Siling sang tatay: “Ihalin inang daku-daku nga bato sa kilid sang dalan, sa pihak sang dalan.” Ang iya bata naghimo sang medyos… may hakson niya ang bato kag itulod nya ini… may kiwalan niya ini… pero ang bato wala gid maghulag bisan diutay lang kay kadaku-daku gid man kaayo. Ginhawa niya ka tulod sang tudo-pwersa, pero wala gid maghulag ang bato. Siling niya sa tatay niya: “Tay, indi ko gid mapahulag ang bato.” Ang tatay nagsiling: “Kaina pa AKO diri nagalantaw anak. Kon nangayo ka siguro bulig sa akon, NAHULAG NATON ina nga bato.” Didto kag natalupangdan sang bata nga ang pagkahamtong gali, o ang pagka-mature amo ang PAGSALIG GIHAPON sa iya Amay. Indi sa pagbale-wala sa iya.

Amo ini nabatyagan sang mga gintutun-an sang ginasumpiya sang mabaskug nga balud ang ila nga sakayan. Matuod nga madamo sila, apang NAGPA-IYA-IYA na sila sang panumdum sa ila kaugalingon nga kaluwasan. Nalipatan na nila ang ila kaupdanan, kag ang naghari amo ang painu-ino kon “paano AKO maluwas?!” Daw sa NAG-ISAHANON na ang tagsa-tagsa kag amo ini ang nagdulot sang tuman nga kahadluk sa ila.  NALIPATAN NILA NGA KAUPOD NILA ANG ILA AMAY.

 Sang ginpamangkut nila ang Ginuo kon bala “wala Siya nagakabalaka” sa sitwasyon nga daw sa “malumos” na sila, ang sabat sang aton Ginuo: “Ngaa nahadluk gid kamo?”. Ayhan ang sugpon sini “KAY YARI MAN AKO!”. Huo, wala kita sang dapat kahadlukan sa kabuhi tungud kaupod naton ang Ginuo! Sa likud sang mga pagtilaw kag problema, yara Siya. Madamo ang mga kahadluk nga nagalibot sa aton sa sining tion sang “pandemya” kag ang mga pulong sang aton Ginoo naga-paisug gid sa aton: “NGAA NAHADLUK GID KAMO.” Imbes sa kaalam sang tawo kita magdangup, magdangup kita sa kaluoy kag grasya sang Diyos. Siya INDI GID MAGPABAYA SA ATON.

 

 

11th Sunday in Ordinary Time (Mark 4:26-34)

 

11^th Sunday in Ordinary Time (Mark 4:26-34)

 

ANG PAGTUBO SANG BINHI INDI NATON MAPILIT:

 

May mag-asawa na naga-edad 60 anyos, kag nagpakita sa ila ang isa ka diwata. Siling nya: “Pangayo kamo sang bisan ano, kag inyo ina maangkun.” Tungud may edad na sila, siling sang babayi, “Gusto ko mag-tour around the world sa isa ka malahalon nga barko.” Kag insigida. Poof. Ara na sila sa atubang sang barko nga malahalon kag gahawid na sang ticket. Turno naman sang lalaki ang magpangayo. Siling niya: “Gusto ko ang babayi nga huben sang sa akon sang 30 ka tuig. Kag poof. Nahimo siya nga 90 anyos kag ang babayi 60 man gihapon. Tama! 30 anyos nga huben sang sa iya!

 

Indi naton madiktahan ang aton kapalaran, kapin pa nga indi naton madiktahan ang Diyos. Ang palaangiran sang manugsab-og nagapahanumdum sa aton nga ang ginharian sang Diyos nagatubo sa aton indi suno sa aton kagustuhan kundi suno sa binubu-ot sang Diyos. “Things happen not in our own time but in God’s perfect timing!”

 

Ginapakita lang sa aton nga indi naton pagsaku-sakuon ang isa ka bagay, kay ang tanan magatubo suno sa kabubut-on sang Diyos. Ang isa ka bagay nga sa Diyos naghalin, magatubo lamang sa aton paagi sa Iya pagpanghikut.

Bisan ang aton pagtuo. Indi naton pag-ikumparar ini sa iban nga nakita naton nga ayhan daw mas abanse sa aton. Ini tanan bugay sang Mahal nga Diyos. Ayhan kita mahinay sa pagtubo, apang ang labing importante nga kita nagahamtong sa aton pagsalig kag pagpahamtang sa Diyos.

Ayhan masiling ang kalabanan sa aton, nga san-o pa bala matapos ining peste sa aton palibut? Wala kita makahibalo. Wala sa aton ang pagtagna sang katapusan sini. Sa baylo ibutang naton ang aton pagsalig sa Ginuo nga Siya lang ang nakahibalo kon ano gid ang maayo sa aton. Obrahon ta lang ang maayo, katulad sang pagpanglimpyo, pabakud sang aton immune system, himuon ang “necessary protocols”, paiway danay sa mga “social gatherings’ kag iban pa nga sahi sang paghalong. Aton gid malampuwasan ini sa tion nga luyag sang Diyos. Panumdumun ta nga Siya padayon nga magapatubo sang binhi sang pagtuo sa tagsa-tagsa sa aton.

5th Sunday of Lent

 

5^th Sunday of Lent (Jn 12: 20-33)

 

NAG-ABUT NA ANG TION!

Malapit na gid lang maga-abut ang katumanan sang Misyon sang aton Ginuo– ang pag-usik sang Iya kaugalingon nga kabuhi bilang kabayaran sa kasal-anan nga ginbuhat sang katawhan nga nag-abusar sa paghigugma nga ginpa-ambit sang Iyang Amay.

Sa Ebanghelyo karon nga Dominggo maathag nga ginsiling sang aton Ginuo nga: “Ang isa ka binhi sang humay indi magdamo kon indi ini pag-ipanggas sa duta kag mapatay.” Ginapahayag sang aton Ginuo nga KINAHANGLANON gid nga “madula” Niya ang Iyang kabuhi agud kita MAKAANGKON sang isa ka BAG-O nga kina-ugali sa atubangan sang aton Amay sa langit.

Makatalanghaga… Makatilingala...kag ayhan masiling naton nga “UNFAIR” man para sa isa ka tawo nga magpakamatay agud maluwas ang iban. Kon aton lantawon sa dapat nga nagaka-igό nga katarungan, daw indi gid sang makatarungan nga ang aton Ginuo maghalad sang Iyang kabuhi tungud lamang sa aton mga sala. Apang ang pama-agi sang Diyos indi katulad sang pama-agi sang tawo.

Ang hustisya sang Diyos malayo sang sa hustisya sang tawo, tungud ang hustisya sang Diyos wala ginabase sa talaksan tungud INDI ini MATAKUS! Ang minatuod nga hustisya indi kon ano ang imo makuha, kundi kon ano ang imo MAHATAG.- “Justice is GIVING WHAT IS DUE to others.” Indi sa kon ano ang imo mabaton, kundi kon ano ang imo MAHATAG!- Sa bagay nga ang hustisya sang Diyos ginbayaw sa Iya nga LAYI SANG PAGHIGUGMA–“Justice of God is the MERCY of God!.” Paghigugma nga wala sang talaksan… wala sang tupong… wala sang katapusan… tungud ang aton Diyos, Diyos sang PAGHIGUGMA!

Ang paghigugma ni Jesus wala nagapa-abut sang balos Amo man ini nga paghigugma ang Iya ginapabuhat sa aton! Naga-upod bala kita sa aton Ginuo sa Iya dalan?

 

 

4th Sunday of Lent (Laetare Sunday)

 

4^th Sunday of Lent (Jn 3: 14-21)

KAHULUGAN SANG PAGHIGUGMA

 

“Kay ginhigugma gid sang Diyos ang kalibutan, sa bagay nga Iya ginhatag ang Iya Bugtong nga Anak…” Ining mga dinalan gikan sa Ebanghelyo ni San Juan, nagapahayag sa aton sang kahulugan sang matuod-tuod nga paghigugma. Ang gugma nga ginapatuhoy para sa kaayohan sang iban kag indi sang makinaugalingon. “It is a SELFLESS kind of love… NOT SELFISH”.

Ini nga paghigugma sang Amay maathag nga ginpamatud-an sang Anak, sang aton Ginuong Jesukristo paagi sa Iya paghalad sang Iya kabuhi sa Krus bilang kabayaran sang aton mga sala. Sa kamatayon sang aton Ginuo, Iya gintubos ang kalibutan… Iya ginbayaw liwat ang napukan nga imahen sang tawo, agud nga siya makapakig-angut liwat sa iya Manunuga, nga nahilway sa silot sang sala nga iya ginbuhat!

Indi naton matungkad sang aton painu-inu ang ginbuhat sang aton Ginuo nga paghalad sang kabuhi, kay “ano gid ang ahaw nga tawo” nga Iya gid panginmatyan? Apang ang sabat sini tanan makita lamang sa kamatuoran nga ang “Diyos gugma!”

Si San Juan maathag nga nagasiling nga: “Ang Diyos gugma, kag ang nagakabuhi sa gugma, nagakabuhi sa Diyos, kag ang Diyos nagakabuhi sa iya!” Amo ini ang gugma– Ang paghalad sang bug-os naton nga kaugalingon! Ang simbolo sang paghigugma amo ang Krus! Ang paghigugma nga nahadlluk mag-antus kag mapatay, indi sang minatuod nga gugma. Isa lamang ini ka balatyagon! Ang balatyagon naga-abut kag nagalipas, apang ang matuod nga paghigugma isa ka DESISYON!- Desisyon nga bisan ano pa man ang matabo, magapabilin ka nga matutum sa imo sinumpaan!

 

Ano ang aton mga DESISYON SA PAGHIGUGMA?

 

3rd Sunday of Lent (Jn 2: 13-25)

 

3^rd Sunday of Lent (Jn 2: 13-25)

 

 

TEMPLO VS MERKADO

“Indi ninyo paghimu-a nga balaligyaan ang balay sang akon Amay!” Amo ini ang mga pulong sang aton Ginuo sang Iya ginpamaliskad ang baligyaan sang mga manugbaligya sa sulud sang templo. Tuman gid kataas ang pagtahud nga ginhatag sang aton Ginuo sa Templo tungud ini amo ang puluy-an sang Iya nga Amay. Ang Templo ukon ang Simbahan, sa aton karon naandan nga pagtawag sa sini, isa ka du-og sa diin nagasumalang ang katawhan sa paghiusa sa Diyos nga iya Tagtuga. Diri sa sulud sang Simbahan, ginahimo naton ang pagpakig-angut sa Diyos nga labing Balaan sa tanan… ini nga pagpakig-angut indi matumbasan sang kwarta ukon sang ano man nga material nga mga bagay.

 Ang Simbahan indi sang merkado! Sa merkado, ang tanan sarang mo maangkon kon ikaw may kwarta, kay ang tanan nga ginabaligya, ginapresyohan! Sa merkado, may katumbas ang ginabaligya! Ang merkado madamo sang higko tungud ang manugbakal kag manugbaligya nagakalhit lang bisan diin, bisan pa may ara na gid nga basurahan! Ang importante sa merkado nga may nagakahanabo nga transaksyon nga ginatumbasan sang bayad!

Sa panahon sang aton Ginuo, kina-andan sa mga komersyante ang magbaligya sa templo tungud ini ginagamit nila sa ila paghalad sa Diyos, ang diperensya lang nga sa ila nga pagbaligya sang halad, nalipatan na nila ang GINAHALADAN NGA DIYOS kag gani, nadula man ang pagrespeto kag pagtahud sa Balaan nga Duog!

May pagrespeto man bala kita sa Balay sang Diyos?

 

2nd Sunday of Lent

 

2^nd Sunday of Lent (Mk 9: 2-10)

 

PAGPAMUKADKAD

Ang kwaresma nga tinaga nga isa ka paglubad sa aton nga pulong naghalin sa tinaga nga “LENTE”, amo gani nga ang translation sang mga Amerikano sa sini nga tinaga amon ang LENT. Ang “lent” isa ka panahon nga nagakahulugan “SPRINGTIME”, buot silingon nga sa sini nga panahon sang kwaresma NAGAPAMUKADKAD ang pagtubo liwat sang mga kabulakan pagkatapos sang malawig nga tigtulug-naw... Nagapamukadkad liwat ang isa ka bag-o nga kabuhi nga aton gina-ambit sa kabuhi sang aton Ginuo.

Sa aton nga Ebanghelyo, ang aton Ginuo nagpahayag sang Iya “nagapamukadkad” nga himaya paagi sa pagbaylo sang Iya nga dagway sa diin Siya nagmasilaw sa panan-awan sang Iya mga Apostoles.

Antes mahanabo ini, ginpanagna sang aton Ginuo ang Iya nagahilapit nga Kamatayon kag ayhan, nadula-an sang pagla-um ang Iya mga Apostoles, tungud sila nagakabig sa aton Ginuo nga isa ka manluluwas sa ila pagkapigos sa gahum sang mga Romanhon. Ila ginapanumdum ang lawasnon nga kahilwayan! Apang sa hitabo subong, ginatudlu-an sila sang aton Ginuo nga may ara pa nga mas labaw nga kahilwayan sang sa lawasnon, kag ini amo ang kahilwayan sang aton BUG-OS nga pagkatawo– lawas kag kalag!

Ayhan katulad man kita sang mga Apostoles, nagakinahanglan man kita sang kahilwayan sa aton kabuhi...pinansyal, gutum, puluy-an, kaangtanan, kag iban pa. Ang Ginuo lang ang may sabat sini. Sa Iya kita makapamukadkad sa bag-o nga kabuhi kag paglaum!

 

4th Sunday in Ordinary Time (B)

 

4^th Sunday in Ordinary Time (Mk 1: 21-28)

GINAGIKANAN SANG OTORIDAD

Ang otoridad sang aton Ginuo nga ginakahangaw-an sang mga Pariseo amo nga ini wala Niya ginakuha sa iban, ukon indi ini pareho sang mga manunudlo sang kasugu-an nga nagagamit sang pormula nga: “Suno sa kasulatan”, ukon “Suno sa kay Propeta…”, ukon, “ Suno sa kasugu-an…” kundi Siya nagamando suno sa IYA KAUGALINGON nga otoridad! Ini agud sa paghibalo sa ila nga sarang Niya mabuhat ini tungud Siya amo ang Anak sang Diyos… Siya amo ang Pulong nga nangin tawo nga paagi sining Pulong ang tanan natuga kag nag-ambit sang kabuhi sang Diyos. Sa pagkatawo sang aton Ginuo ang tanan may bag-o nga kabuhi!

Ang otoridad sang aton Ginuo wala nagagikan sa kon ano nga ginhatag sa Iya nga “katungdanan”, apang ini nagagikan mismo sa Iya kaugalingon nga “gahum” nga ginkuha Niya bilang isa ka Anak sang Diyos… bilang isa ka “Pulong” sa diin ang tanan nahimo. Kay sa ginsuguran, yara na ang Pulong… kag ang PULONG DIYOS. Buot silingon nga ang otoridad sang aton Ginuo nagikan sa Iya pagka-Diyos nga amo ang nagapanag-iya sang tanan, sa bagay nga may gahum Siya sa mga malain nga espiritu tungud sila indi makada-ug sa Iya.

Ang otoridad sang aton Ginuo wala Niya ginpakita paagi sa pagpabugal kundi sa PAG-ALAGAD bilang isa ka ulipon. Ginpaubos Niya ang Iya kaugalingon agud makabulig sa Iya mga isigkatawo… mangin tuburan Siya sang kaalwan sang Mahal nga Diyos sa Iya mga katawhan

Sa pihak nga bahin, ang mga  Pariseo  bilib sila sa ila kaugalingon. Nagadumdum sila nga sila lang ang maalam kag may ikasarang! Apang ang ila kaalam tubtub lang sa ila panghuna-huna apang wala ini gina-updan sang ila buhat. Ang aton Ginuo may otoridad tungud ang Iya ginatudlo gina-updan sang Iya BUHAT nga wala sing bugal kundi isa ka pagpaubos nga makaalagad! Wala gid “maghabok” ang Iya ulo bisan pa nga gusto sang mga tawo nga himu-on Siya nga “hari”. Nagpabilin Siya nga isa ka mapa-inubuson nga sulugu-on para sa tanan.

Kita man ginhatagan sang mga “otoridad”, apang sa diin naton gingamit ini? Sa pag-alagad bala ukon kita alagaran? Sa pag-ayo bala ukon sa paghalit?

 

3rd sunday Ord. Time (B)

 

3^rd Sunday in Ordinary Time: (Mk. 1:14-20)

 

ANG PAGTAWAG

Sang pagsugud sang ministeryo publiko (public ministry) sang aton Ginuong Jesukristo, Siya nagtawag sang pila ka mga tawo nga mangin Iya mga gintutun-an. Ini nga mga tawo nahamtang sa sitwasyon nga yara sila sa ila naandan nga pagpangabuhi, nga ayhan sa sadto nga tini-on, katulad man sa kadamu-an sa aton, masako nga nagahiwat para sa ila adlaw-adlaw nga pangabuhi-anan. Apang bisan pa nga sila yara sa tunga-tunga sang ila mga buluhaton, ginbayaan nila sang “HINALI” ang ila mga sahid kag panimalay, kag nagsunud sa aton Ginuong Jesukristo! Wala na sang “question”… wala sang pamalibad… wala sang rason-rason, sila nag-upod nga ayhan “pagtuo” gid lang ang balon, nga ang nagapangagda sa ila indi gid magdala sa ila sa kalainan ukon magbutig sa ila sang Siya maghambal nga:”Sugud karon, tudlu-an ko kamo sa pagpanahid sang mga tawo!”

Ginpili sang Ginuo ang mga “simple” nga mga tawo… halos wala gani sila sang tinapusan nga kurso, ang ila gid lang nahibalu-an amo ang pagpangisda… mga “malangsa” nga klase sang mga tawo… mga ordinaryo kag indi maalam nga mga tawo! Sila amo ang ginpili sang aton Ginuo indi tungud kay mahapos sila tontohon kundi nga tungud sang ila pagka-ordinaryo kag pagkasimple, sila mangin alagyan sa diin mapahayag sang Diyos ang Iya kaalam kag pagkagamhanan.

Sa aton panahon ayhan masiling naton nga ordinaryo lang kita nga mga tawo, apang padayon sa gihapon ang pagpanawag sang aton Ginuo. Ayhan “masako” man kita! Sa tunga sini tanan, ginasabat ta bala ang pangagda sang Ginuo?

 

Sto. Niño

 

STO. NIÑO (Mk 10: 13-16)

 

SANTO NIÑO?

 

Sa titulo sang aton Ginuo bilang Santo Niño, aton matalupangdan, nga kon aton lantawon sa “grammar”, ini nagapahayag sang isa ka pagsalungkaki sang ideya. Ang “Santo” nga termino ginagamit lamang para sa mga “hamtong” nga mga tawo. Para sa isa ka “niño”, ang dapat nga termino nga gingamit “Santito”, tungud siya, gamay. Ang titulo nga “grammatically right” dapat “Niño Santito”!

Apang ngaman nga wala gid magbaylo sang painu-ino ang aton nga Simbahan sa paghatag sang titulo nga “Santo Niño” sa aton Ginuo sang Siya bata pa? Ini tungud, ini nga titulo indi sang suheto sang grammar, kundi sang aton pagtuo! Bisan ang aton Ginuo gamay, o indi pa hamtong, apang ang Iya pagkabuhi ‘daku” sa panulukan sang Iyang Amay sa langit… Ang Iya pagkamasinulundon sa binubuot sang Amay amo ang naghimo sa Iya nga “labing daku” sa tanan nga mga tawo kag mga hari nga nagtuhaw sa sining kalibutan.

Ang aton Ginuong Jesus “Santo” bisan pa sa dagway sang isa ka bata, tungud Siya nagpabilin nga mapainubuson sa pagbaton sang Iya nga misyon, bisan pa ini nagakahulugan sang paghalad sang Iyang kabuhi didto sa kahoy sang Krus. Indi bala nga ang aton Ginuo ang nagsiling nga: “Ang nagapa-ubos sang Iya kaugalingon, pagapataason”?- Ang PINAKAKUBOS amo ang PINAKADAKU sa atubangan sang aton Amay sa langit!

Naghamtong na bala kita sa aton pagtuo?