24th Sunday in Ordinary Time

 

24^th Sunday in Ordinary Time (Mk 8: 27-35)

SIN-O BALA SI KRISTO? 

Sa aton Santos nga Ebanghelyo subong nga Dominggo, ang aton Ginuo nagpamangkut sa Iya mga gintutun-an kon sin-o Siya para sa ila. Ini nga pamangkut indi lamang sang isa ka pamangkut nahanungud sa mga huring-huring sang mga tawo, ukon isa ka “background check” sang Iya nga pagkatawo, kundi isa ka pamangkutanon nga natuhoy sa ila “personal” nga pagkilala sa Iya.

Ayhan, malawig-lawig na ang ila nga pag-inupdanay, kag ayhan madamo naman sila sang nahibalu-an nahanungud sa Iya nga pagkatawo, kag gani, kon may makahambal nga may “otoridad” nahanungud sa “character” sang aton Ginuo, ini wala sang liwan kundi ang Iya mismo nga mga sumulunod.

Maayo ang sabat sang mga apostoles sang pamangkut sang aton Ginuo kon sin-o Siya suno sa mga tawo, apang sang ginpatuhoy na sa ila ang pamangkut kon sin-o Siya para sa ila, ayhan na-ukyan sila, kay ang pamangkut sang aton Ginuo wala nagakinahanglan sang sabat nga ginabase sa “tsimis” ukon “sugid-sugid” ukon sa “ideya”, kundi sa ila “personal experience” sang Iya nga presensya sa ila tunga. Si Pedro gid lang ang isganan nga nagtindog kag nagpahayag nga Siya amo ang Kristo! - sabat nga wala ginbase sa iya eksperyensya sa kay Jesus, kundi paagi sa pagtudlo sang Espiritu Santo nga amo ang nagtulod sa iya sa pagpahayag sini nga pagtuo.

Tubtub subong, padayon man kita nga ginapamangkut sang aton Ginuo kon sin-o Siya para sa aton. Indi suno sa aton mga nabasahan, ideya, ukon nabati-an sa mga sermon, kundi kon sin-o Siya sa aton adlaw-adlaw nga pagkabuhi! Ginasiling gani nga “mahapus mangin Kristiyano apang mabudlay ang magpaka-Kristiyano.” Sa bagay nga dapat naton makilala si Kristo sa aton pagkabuhi. Ang aton kabuhi mismo amo ang magapakita kon sin-o Siya. Kita ang nagakabuhi sang Iya nga kaugalingon nga yara sa aton.