4th Sunday in Ordinary Time (B)

 

4^th Sunday in Ordinary Time (Mk 1: 21-28)

GINAGIKANAN SANG OTORIDAD

Ang otoridad sang aton Ginuo nga ginakahangaw-an sang mga Pariseo amo nga ini wala Niya ginakuha sa iban, ukon indi ini pareho sang mga manunudlo sang kasugu-an nga nagagamit sang pormula nga: “Suno sa kasulatan”, ukon “Suno sa kay Propeta…”, ukon, “ Suno sa kasugu-an…” kundi Siya nagamando suno sa IYA KAUGALINGON nga otoridad! Ini agud sa paghibalo sa ila nga sarang Niya mabuhat ini tungud Siya amo ang Anak sang Diyos… Siya amo ang Pulong nga nangin tawo nga paagi sining Pulong ang tanan natuga kag nag-ambit sang kabuhi sang Diyos. Sa pagkatawo sang aton Ginuo ang tanan may bag-o nga kabuhi!

Ang otoridad sang aton Ginuo wala nagagikan sa kon ano nga ginhatag sa Iya nga “katungdanan”, apang ini nagagikan mismo sa Iya kaugalingon nga “gahum” nga ginkuha Niya bilang isa ka Anak sang Diyos… bilang isa ka “Pulong” sa diin ang tanan nahimo. Kay sa ginsuguran, yara na ang Pulong… kag ang PULONG DIYOS. Buot silingon nga ang otoridad sang aton Ginuo nagikan sa Iya pagka-Diyos nga amo ang nagapanag-iya sang tanan, sa bagay nga may gahum Siya sa mga malain nga espiritu tungud sila indi makada-ug sa Iya.

Ang otoridad sang aton Ginuo wala Niya ginpakita paagi sa pagpabugal kundi sa PAG-ALAGAD bilang isa ka ulipon. Ginpaubos Niya ang Iya kaugalingon agud makabulig sa Iya mga isigkatawo… mangin tuburan Siya sang kaalwan sang Mahal nga Diyos sa Iya mga katawhan

Sa pihak nga bahin, ang mga  Pariseo  bilib sila sa ila kaugalingon. Nagadumdum sila nga sila lang ang maalam kag may ikasarang! Apang ang ila kaalam tubtub lang sa ila panghuna-huna apang wala ini gina-updan sang ila buhat. Ang aton Ginuo may otoridad tungud ang Iya ginatudlo gina-updan sang Iya BUHAT nga wala sing bugal kundi isa ka pagpaubos nga makaalagad! Wala gid “maghabok” ang Iya ulo bisan pa nga gusto sang mga tawo nga himu-on Siya nga “hari”. Nagpabilin Siya nga isa ka mapa-inubuson nga sulugu-on para sa tanan.

Kita man ginhatagan sang mga “otoridad”, apang sa diin naton gingamit ini? Sa pag-alagad bala ukon kita alagaran? Sa pag-ayo bala ukon sa paghalit?