17th Sun. in Ord. Time (A)

17^th Sunday in Ordinary Time- Year A

Mt. 13: 44-46

May isa ka tawo nga nakaagi sa isa ka balay nga may karatula: “Garage Sale”. Sa iya pagpanguryoso, nagsulod siya sa amo nga balay, kag iya nakita ang mga sari-sari nga mga pagkabutang nga ginabaligya sang tag-iya sang balay, tungud ini sila manughalin na sa amo nga balay. Ayhan kay masaylo na sila sing puluy-an. Sa iya nga paglantaw-lantaw, nakita niya ang isa ka gitara nga gina-lawaan na sa kilid sang amo nga balay. Para sa iya, siguro daan na gid ini kaayo, kag ayhan manami man ini nga himuon nga “collector’s item” kay siya mahilig sa pagkolekta sang mga daan na nga mga bagay. (Daw isa siya ka antique collector). Iya nga ginbakal ang amo nga gitara nga daw halos wala na ginasapak sang mga bumalakal, kag iya nga gindala sa iya nga balay. Gintinlu-an niya… ginpang-islan ang mga kwerdas, ginkuting-kuting, kag natingala siya nga kanami gid sang tunog sang amo nga gitara. Siling niya sa iya kaugalingon: “Kita mo gid lang, kanami sini nga gitara, pero, ginpabay-an lang kag wala pag-atipana sang maayo.” Daw indi gid siya maributay sang kanami sang tunog sang amo nga gitara, gani nagkadto siya sa isa ka daku nga “shop” nga nagabaligya sang mga “branded” nga mga gitara, kag nagpamangkut kon ano yadto nga klase sang gitara? Kag diri pa gid nag-abut ang pina-kadaku nga sorpresa sa iya nga kabuhi… yadto nga gitara isa ka “FENDER STRATOCASTER GUITAR”- ang PINAKAMAHAL nga gitara sa bug-os nga kalibutan. Ang gitara ni Eric Clapton nagabili sang $9,590.00 kon sa piso 479,500.00. Ang gitara ni Jimmy Hindricks $2,000.00 kon sa piso 100,000.00. Ang kay George Harrison $5,700.00 kon sa piso 280,500.00. Yadto gali nga gitara, isa ka manggad nga iya nadiskubrehan! Isa ka manggad nga halos wala ginasapak sang mga nakakita.

Lain ang natabo subong sa aton Ebanghelyo sa tawo nga nakakita sang manggad. Indi lamang nga “aksidente” nga nadiskubrehan sang tawo ang manggad sa duta, kundi iya gid GINPAINU-INOHAN kon paano ini maangkon, kag sa sini, iya nga ginbaligya ang TANAN niya nga pagkabutang, lamang nga maangkon yadtong isa ka puna nga duta, sa diin, nalubong ang amo nga manggad! Amo ini ang punto sang aton Ginuo sa aton Ebanghelyo subong. Sa aton nga pag-“diskubre” sa Diyos, dapat nga mangin handa kita sa PAGSAKRIPISYO SANG TANAN, agud kita makasunod sa Iya, nga amo ang aton MINATUOD nga manggad.

Indi sang pa-weder-weder ang kabuhi sang isa ka kristiyano. Amo gani nga asta subong, kon aton nga lantawon, daw indi pa gihapon kita makatikang bilang MATUOD NGA MGA KRISTIYANOS SA BUHAT, tungud ang kalabanan sa aton, nagapati nga pa-weder-weder lang ang kabuhi. Amo ina nga indi naton matapna ang paglapnag sang mga sugal sa aton palibut tungud nagapati kita nga basi “swertehon” kita kag insigida maga-manggaranon kita! Tan-awa bala ninyo (bato-bato sa langit, ang tatamaan wag magagalit) padayon ang pagtinaya sa lotto ilabi na gid sang mga wala-wala na gid, tungud nagapa-abenturar sila nga basi magdaug sila kag insigida, maga-milyonaryo sila! O? Indi bala, nakadiskubre sila sang manggad? (Ay ambut sa kanding nga may bangs!) Huo matuod, nagmanggaranon ang isa ka tawo nga nagdaug, hai paano ang minilyon nga kadamuan, nga ang kalabanan mga imol, nga wala makadaug? Kag dayon, masiling ang mga organizers nga ini isa ka “charity game”?-CHARITY para sa nagdaug pero CALAMITY sa mga nagkalapierde nga biktima sang ila nga NEGOSYO! Ang malain kay ang ginpangwartahan amo ang mga wala-wala man-ang mga kubos kag ginakulabos!

Nagasagad kita sing handum sa mga manggad sa sining kalibutan nga matuhaw subong, kag bwas madula man lang! Mga manggad nga indi naton madala sa pihak nga kinabuhi kon ang aton nga tion mag-abut na sa aton pagtaliwan. Diri luyag ipatuhoy sang aton Ginuo ang aton atensyon- nga ang minatuod nga manggad, amo ang aton sarang nga madala bisan pa nga kon kita mapanas na sa sining kalibutan, kag ang matuod nga manggad wala sang liwan kundi SIYA! Ang PAGSAKRIPISYO para sa pag-angkon sang aton matuod manggad nga amo ang GINUO, isa ka “long-term investment”. Ngaman? Tungud ang tagsa ka sakripisyo naton pagabalusan sang Dios sang “ginatus” ka pilu nga aton masalapu-an sa kalinung kag kalipay sa tagipusuon! (Peace of heart and inner happiness)! Kon isakripisyo naton ang tanan para sa Iya, Siya ang magabalus sa aton sa mga pamaagi nga indi naton matungkad, tungud Siya ang TAGHATAG SANG TANAN! Suno sa Libro sang Bugna 3:21 “Ang mga nagdaug papungkuon ko sa akon tupad sa trono, subong nga ako nagdaug, kag karon nagapungko sa tupad sang akon Amay sa Iya trono!” Amo ini ang padya sa mga nagsakripisyo sa matuod nga manggad nga amo ang aton Ginuo.

Ano ang aton nga manggad nga ginahuptan sa aton kabuhi? Ang minatuod bala ukon ang mga umalagi? Kon matuod ang aton pagka-kristiyano, wala na sing iban, kundi si KRISTO amo ang aton MANGGAD!