May mata ka bala? May dalunggan ka bala? Huo gid lang Padre eh! Indi bala sang “obvious”? Matuod! Halos tanan kita kumpleto sa panan-aw kag sa pagpamati. Apang ang tema sang aton Ebanghelyo subong nagasiling nga ang mga GINAPANGINBULAHAN sang aton Ginoo amo ang may mata nga MAKAKITA sang mga butang nga Diosnon kag mga dalunggan nga NAKABATI sang Maayong Balita sang Dios.
Suno sa gintagna ni Isaias nga propeta, ang mata nga makakita kag ang dalunggan nga makabati, amo ang NAGALISO sa Dios, kag sa sini lamang nga pamaagi nga ang Dios MAGAAYO man sa ila, indi lamang sa ila mga kasablagan, kundi sa ila man mga PAG-GINAWI! Buot silingon nga ang pulong sang Dios, may gahum sa PAGBAG-O sang aton pagkatawo, kon kita nga tiglawas nagamuklat sang aton mata sa Iya mga ginapahayg kag nagabukas sang aton mga dalunggan sa mga pulong nga Iya ginahambal sa aton!
Apang kon aton usisaon, may yara nga kakulangan sa aton nga bahin. Ang kadamuan sa aton, suno sa kay Propeta Isaias, nagatakup sang aton mga dalunggan, kag nagapiyong sang aton mga mata! Nahadluk sila nga magbukas kag magmuglat sang mga sini, tungud magaliso sila sa Dios. Sa bagay, nga ginahalin nila ang ila panulok sa iban nga mga bagay kag ginapamatian nila ang sayup nga mga balita ukon didto sila nagapamati sa INDI MAAYO nga mga balita! Indi bala nga mas mayad ang iban sa aton MAGPINAMANTAY sang HULAG ukon SALA sang iban? Indi bala nga ang iban sa aton naluyag magpamati sang mga istorya nahanungud sa pangabuhi sang iban nga mga tawo, ilabi na gid ang mga ginalibak kag ginapato-patoan sang istorya? Indi sila luyag magtulok kag magpamati sang mga nahanungud sa Ginoo kag nahanungud sa kaayohan sang iban, tungud nga kon himuon nila ini, sila mismo magabag-o sang ila kaugalingon tungud matalupangdan nila ang ila mga sayup kag mga sala nga mga buluhaton, kag magabag-o sila!
“Kamo inyo, bulahan gid! Kay ang inyo mga mata makakita kag ang inyo mga dulonggan makabati.”
Ang palaangiran sang manugsab-og sang binhi nagapahayag nga kita makapamunga gid lang sang maayo kag madamo nga mga bunga sa aton kabuhi kon kita, bukas man sa mga bagay nga ginapahayag sang Mahal nga Dios paagi sa pagtulok kag pagpamati sing maayo sang Iya Maayong Balita, nga sa MASAMI Iya nga ginapahayag paagi sa maayo nga binuhatan sang aton mga isigkatawo! Apang ang iban sa aton baliskad! Imbes nga apresyaron nila ang maayo nga ginabuhat sang ila mga isigkatawo, ang ila lang ginalantaw amo ang paghatag sang malain nga kahulugan kag paghatag sing malisya sa mga nagabuhat sang maayo! Minatuod gid man ang hulubaton nga nagasiling: “Basta nagapamunga ka, may manug-balang o manughaboy gid sang imo mga bunga!”. Tan-awa bala ninyo, kon nagahining-hining na gani ang bunga, ay abaw, kadamo gid sang interesado sa pagpamupu sini!
Amo ini ang nagakahanabo subong sa aton nga Parokya! May yara sa aton nga indi luyag magbukas sang ila mga dalunggan kag magmuklat sang ila mga mata, sa bagay nga ang ila lang nga gina-obra, amo ang pagpinamantay sang kabuhi kag hulag sang iban. Buta kag bungol sila sa ila kaugalingon nga mga sala tungud indi sila luyag nga matalupangdan ang ila malain nga binuhatan. Wala sila sing kahigayunan sa pagbag-o sang ila nga mga kaugalingon tungud nawili sila sa pagpinang-mata sang hulag sang ila mga kasimanwa kag sang ila ginakabig nga mga “kaaway”. Suno sa kay Propeta Isaias, “Ini nga mga tawo mga matig-a sing ulo!” sa bagay nga wala ka sang mapaabut nga maayo nga mga bunga sa ila pagpangabuhi tungud ang ila mga bunga, mga higos kag mga garuk! Karon, sin-o ang matuod nga “corrupt”? Ining tinaga nga corrupt, naghalin sa duha ka tinaga nga ni-latin: “Cor” nga nagakahulugan “tagipusuon” kag “ruptire” nga buot silingon “naglupok ukon nabuka, ukon bu-ong”. Buot silingon, ang corrupt nagakahulugan sang “naglupok o nabuka ukon buong nga tagipusuon”. Karon sino ang matuod nga may “buka nga tagipusuon”? Indi bala ang nagapamunga sang malain nga mga bunga? Nano ang pagkakita nila sang maayo nga binuhatan sang ila isigkatawo, kay indi sang bug-os ang ila tagipusuon- ini buong! Ini buka! Ini naglupok na! Gani imbes nga maayo, malain ang ila panan-aw! Imbes puti, itom sa ila panan-awan! Imbes insakto, para sa ila sala!
“Kamo inyo, bulahan gid! Kay ang inyo mga mata makakita kag ang inyo mga dulonggan makabati.”
Gani mga utod, indi naton pagtugutan nga ining mga “matig-a sang ulo” nga ginahambal ni Propeta Isaias, magpatalang sang aton panulukan kag pamatin-an! Indi naton pagtugutan nga palibut-libuton kita nila sa ila mga palad kag buta- bungol nga mga pagpatalang. Magtindog kita para sa isa kag isa… mangin isa kita ka matuod nga katilingban sang mga mag-ululutod. Kon sin-o sa aton ang ginalibak nga nakilala naton nga nagabuhat sang maayo, APINAN naton siya, agud indi maglapta ang malain nga istorya. Kay sa aton PAGPAUKOY, ginakonsente naton ang naga-tsimis o nagakata-kata nga insakto ang ila ginahambal! IPAHAYAG NATON ANG ATON NGA “UNITY” ukon paghiusa bilang isa ka Simbahan paagi sa pagbinuligay nga mahatagan sang maayo nga dungug ang aton nga utod nga ginasamad tungud sang mga tsimoso kag mga tsimosa nga wala sing maobra kundi ang magsabwag sang malain nga balita tungud bulag ang ila mga mata kag bungol ang ila mga dalunggan!
“Kamo inyo, bulahan gid! Kay ang inyo mga mata makakita kag ang inyo mga dulonggan makabati.” Kabay nga ang tagsa-tagsa sa aton mag-alay-ay kag maghatag sang maayo nga ngalan kag dungug sa aton isigkatawo kay sa pagkamatuod, sa isa ka lawas sang Simbahan, mag-ululutod kita sa pagtuo sa isa lamang ka Amay naton sa langit!
No comments:
Post a Comment