IKA-APAT NGA DOMINGO SANG PASKWA (C) – Domingo sang Maayo nga
Manugbantay
May isa ka pari nga ginpasidunggan sang iya nga mga Parokyano tungud nga
sa malawig nga tinuig, siya nangin “Parish Priest” sang ila banwa, kag madamo
siya nga mga ‘improvements’ nga nahatag sa Parokya. Ang tanan naghikut sang
programa para sa iya. Tungud ini isa ka sorpresa sa iya, siling sang emcee sa
programa, nga ginapangabay gid nila ang pari nga maghatag sang iya nga mga
panugda-on nahanungud sa Parokya. Daw napilitan ang par isa paghambal bisan
wala siya maka-preparar. Nagsugud siya sa pagsiling nga natandaan niya sang una
nga sang bag-o palang siya nga pungko bilang Kura Paroko, may nagpalapit sa iya
nga tawo agud sa pagkumpisar. Siling sang tawo nga isa siya ka makawat, sugarol,
babayidor, bastos, kon sin-o magkontra sa iya, ginapapatay niya, wala siya
garespeto sang kinamatarung sang iban, kon may okasyon lang siya gasimba, kag
madamo pa nga mga katuntuhan. Siling sang pari nga ginadayaw gid niya ang katampad
sang tawo sa pagbaton sang iya kasal-anan. Tama gid nga nag-abut ang mayor sa
amo nga banwa, kay siya na tani ang mahambal, ugaling kay na ‘late’ siya.
Nagpanagil-ut siya sa madamo nga mga tawo, kag iya ginkuha ang microphone kag
naghambal nga: “Ginapasalamatan gid niya ang Mahal nga Diyos nga nagpadala sa
ila sang Pari nga katulad sang ila ginapasidungan subong, isa ka mahugod kag
mabu-ot nga pari.” Pero siling niya sa mga tawo nga lipud sa ila ihibalo, sang
pag-abut gid ni Father, siya gid ang UNA nga tawo nga nagkumpisar sa iya! Ang
mga tawo nagkadlaw nalang kay nasugid na sang pari ang iya mga kasal-anan. Muna
kay nagpa-‘late-late’ siya, gani natukiban sang mga tawo ang iya mala-in nga
dagway kag kina-ugali! Hehehe...
Aton subong ginasa-ulog ang Domingo sang Maayo nga Manugbantay, kag
ginapatpat sa aton ang kalidad sang isa ka Maayo nga Manugbantay sa aton. Siya
wala nagapakuno-kuno nga naga-alagad kuno, kundi siya hantup sa iya pagdala sa
madabong nga halalban sang iya nga panong.
Sa bwas, eleksyon na, kag magapili naman kita sing mga Manugbantay nga
magadala sa aton sa halalban nga madabong. Sin-o bala ang aton pili-on? Aton
tulukon ang mga kalidad nga ginahatag subong ni San Juan sa aton Ebanghelyo.
Ang Maayo nga Manugbantay yara sa tanan nga oras… he is present ALL THE
TIME. Amo gani nga siya NAGATAWAG sa iya mga panong tungud yara siya sa tanan
nila nga mga kinahanglanon. Ang isa ka lider nga pirme lang nagapadala sang iya
nga ‘proxy’, indi sang takus nga paga-botohon kay wala ang iya presensya sa
ti-on nga kinahanglanon siya sang iya nga panong. Kon sa diin siya tsa nga
transaksyon kag ginapabay-an lang niya ang iya panong nga magtalang!
Ang Maayo nga Manugbantay NAKAKILALA sang iya mga panong. Indi siya sing
malayo sa ila. Indi nga kilala lang niya sila kon may bunyag, kasal, lubong,
kag mag-sponsor sila sa misa sa piesta kag sa iban nga okasyon. Amo lang ini
ang masami nga makita mo sila sa Simbahan! Kilala niya ang iya panong 24 oras
sa isa ka semana. Buot silingon wala siya mahamulag sa ila. Suno kay Papa
Francisco, ‘Ang isa ka Maayo nga Manugbantay, pareho sang BAHU sang iya man nga
panong.’ Sa sini ginahangkat kita nga dapat gid magkabuhi upod sa aton panong,
kag dapat mangin isa kita sa ila mga giho, agud makilala naton sila sing maayo
kag matul-id.
Ang Maayo nga Manugbantay NAGAPANGUNA SA IYA MGA PANONG. Wala niya
ginapabay-an ang iya panong! Wala siya nagahambal nga sa inyo lang ang
perwisyo, ang ginansya yari sa akon. Wala siya nagapabungol sa mga isyus nga
gina-atubang sang iya banwa, sa bagay nga siya gani ang nagapamuklat sa iya mga
kasimanwa nga ang isa ka isyu makahalit sa iya panong. Wala siya nagahipos kon
ang isyu para sa kaayuhan sang iya panong kag siya ang nagapanguna sa paghatag
sang maayo nga kinabuhi para sa iya banwa.
Ang Maayo nga Manugbantay NAGAHATAG BISAN PA SANG IYA NGA KABUHI. Wala
siya nagabale sang iya kamayaran kundi ang kamayaran sang iya nga panong. Wala
siya nagapanumdum sang iya kaugalinon nga bentaha, kundi ang ikaayo sang iya
nga panong, sa bagay nga handa siya sa ‘pag-ula’ sang iya nga dugo kon ini
ginakinahanglan lamang mahaw-as niya ang iya nga panong. Iya ginapasulabi ang
ikaayo sang iya nga panong sang sa iya kaugalingon sa bagay nga ginatulok lang
niya ang kaayohan sang tanan kag indi ang iya.
Ang Maayo nga Manugbantay NAGAPANGAPIN sa iya nga panong. Indi siya sang
‘Bantay Salakay’ nga nagadalagan na sa ti-on nga nabutang sa alang-alang ang
iya nga panong, sa bagay nga siya ang una nga nagapatad sang iya nga
kaugalingon sa ti-on sang mga makakululba nga sitwasyon. Mangangapin siya sang
iya nga panong, sa bagay nga iya ginadala ang iya nga panong sa kasigurahan nga
sitwasyon agud sila mapahamtang sa ila nga pagkabuhi.
Amo ini ang mga kalidad sang Maayo nga Manugbantay. Ang aton bala
pagapili-on bwas, matuod gid nga magabantay sa aton. Indi naton pagtugutan nga
tumbasan ang aton boto nga tama ka sagrado sang kwarta, kundi aton paluntaron
ang aton konsyensya. Isa lang ka MAAYO NGA BOTO ang kinahanglan naton agud
magmaayo ang aton Sistema. ONE GOOD VOTE is enough. Kuntani indi kita mahaylo
sang mga promisa sang aton mga politiko, kundi nga aton tukibon nga sila Maayo
gid nga Manugbantay para sa aton. Kon sin-o ang aton ginapili, amo man na nga
sahi sang pag-ginobyerno ang aton maangkon. We get the government that we
deserve.
No comments:
Post a Comment