18th Sunay Year B

IKAW ANG IMO GINAKAON!

Suno sa mga “dietician” kon ano ang aton ginaka-on, amo man ina kita. May kaangtanan ini nga mga pulong sa aton Ebanghelyo subong nga Dominggo. Ang aton Ginuo nagasiling nga: “Indi kamo magpangabudlay tungud sa kalan-on nga nagakapan-os, kundi magpangabudlay kamo tungud sa kalan-on nga nagatener kag nagahatag sang kabuhi nga wala sing katapusan.”

Matuod nga nagakinahanglan ang aton “lawas” sang kalan-on agud ini mabuhi, apang ang lawasnon nga kalan-on nga iya ginakinahanglan sini amo ang kalan-on nga “nagakapan-os”… nagalipas lamang ini, kag wala sang kapahuwayan ang aton nga kagutum. Ang aton Ginuo nagahambal subong sang isa ka klase sang kalan-on nga sa diin ang mga tawo nagpangayo sini sa Iya agud ihatag sa ila. Amo ini ang kalan-on nga Iya ginahatag: “Ako amo ang tinapay sang kabuhi. Ang nagakari sa akon indi na gid paggutumon, kag ang nagatuo sa akon indi na gid pag-uhawon.” Buot silingon nga ang matuod-tuod nga kalan-on nga ginhatag sang aton Ginuo amo ang Iya KAUGALINGON nga lawas. Amo gani nga ginbilin Niya sa aton ang isa ka SAKRAMENTO, nga nagahatag indi lamang sang isa ka handumanan kundi sang Iya PADAYON nga presensya, nga sa tagsa naton ka pagsaulog sini, kita NAHIUSA sa Iya! Sa Santos nga Misa, ang aton Ginuo nagahatag sang Iya kaugalingon sa mga pulong: “Ini amo ang akon LAWAS… Ini amo ang akon DUGO!” Sa sini kita naga-ambit sang kabuhi nga wala sing katapusan nga Iya gintagna nga aton paga-ambitan. Kon kita nahiusa kay Kristo sa Santos nga Misa, kita man nangin KATULAD Niya… kita may kahigayunan sa pagbag-o sang aton kaugalingon. Nagapangabudlay bala kita para sa sini nga pagkaon? Ginapangita ta bala ang Ginharian sang Diyos, una  sa tanan? “Come and taste the goodness of the Lord!” Kon wala kita naga-upod sa Ginuo, paano naton matilawan ang Iya katam-is?

    BEYTHLECHEM (BETHLEHEM)

Sang una, akon ginalubad ang tinaga nga “Bethlehem” bilang “Balay sang Tinapay”. Apang sang ‘reviewhon’ ko ang akon ‘Hebrew’, akon nadiparahan nga ang akon ‘translation’ daw indi tama ukon sala ya gali.

Ang pulong nga “Bethlehem” naghalin sa duha ka tinaga nga Hebreo: “Be(y)th” kag “Lechem”. Ang “Be(y)th” “genitive form” sang Hebreo nga tinaga nga “Bayit” nga ang buot silingon “balay”. Gani ang kahulogan sang “Be(y)th”- “sang balay” kag indi “balay sang”. Ang “Lechem” nagakahulogan sang tinapay. Gani ang matuod nga buot silingon sang “Be(y)thlechem” amo ang “TINAPAY SANG BALAY”.

Kita tanan nakahibalo nga ang Bethlehem amo ang lugar kon sa diin natawo si Jesukristo, ang ‘Tinapay sang Kabuhi’, ang ‘Buhi nga Tinapay’ nga naghalin sa langit kag mas labaw pa sang sa ‘manna’ nga ginkaon sang mga Judeo sa desierto. Ang Bethlehem indi amo ang balay sang sini nga Tinapay. Si Jesus amo ang Tinapay sang sini nga balay.

Buot silingon, kon sin-o man ang katapu sang pamilya sang sini nga balay, indi gid paggutumon kag pag-uhawon, tungod ang Tinapay nga ginakaon sang sini nga panimalay amo si Jesus, nga ang iya lawas kag dugo, amo ang kabuhi sang kalibutan. Kabay nga kita tanan sa katubtuban mangin katapu sang sini nga Balay ni Kristo.

Si Kristo ang matuod nga Bethlehem. Indi sang lugar lamang ang Bethlehem, kundi isa ka kahigayunan para sa aton nga makabaton sang aton matuod nga kalan-on. Si Jesukristo amo ang tinapay sang tagsa ka panimalay!

YOU SHOULD LEARN TO BE MORE POLITE

One day, Bill and Tom went to a restaurant for dinner. As soon as the waiter took out two steaks, Bill quickly picked out the bigger steak for himself.
Tom wasn't happy about that: "When are you going to learn to be polite?"
Bill: "If you had the chance to pick first, which one would you pick?"
Tom: "The smaller piece, of course."
Bill: "What are you whining about then? The smaller piece is what you want, right?"

FOOD FOR THOUGHT

Bad men live that they may eat and drink, whereas good men eat and drink that they may live. (Socrates -c.470-399 BC) How a Young Man Ought to Hear Poems by Plutarch (AD c.46-c.119)