Mary Mother of God (Jan.1,2018)- special issue

MARY MOTHER OF GOD- Year B (Jan. 1, 2018)

(Luke 2:16-21)

Isa ka adlaw, nagsinggit ang isa ka nagahampang nga bata sa ibabaw sang bukid: "Sin-o ka?" kag iya nabatian ang isa ka tingug nga nagsinggit man sa iya: "Sino ka?" Kag nagsinggit sya liwat: "Gago ka!" Kag ang tingug nagsabat man sa iya:"Gago ka!" Dayon nagpauli siya nga natingala, kag ginsaysay ang iya eksperyensya sa iya iloy. Ang iya nanay naglaygay sa iya nga maghambal siya sing maayo sa tingug: "Maghambal ka sing I Love you sa tingug,kag lantawa kon ano ang iya balus!" Gani pagka-aga, ang bata nagsaka liwat sa bukid kag nagsinggit:"Palangga ta ka!" kag ang tingug nagsabat: "Palangga ta ka!" NALIPAY gid sa iya nabati-an.

Ini isa ka estorya man sang aton kabuhi. Ang kalibutan nagapabalik lamang sa aton kon ano ang aton ginahatag sa iya. Kon kita maayo, aton man ginapaabut nga ang kalibutan maayo. Kon kita malain, aton man ginapanumdom nga ang tanan sa kalibutan malain. Kon ano man ang aton ginahatag sa kalibutan, amo man ina ang nagabalik sa aton. Gani kon gusto naton ang maayo, dapat maghimo kita sing maayo kag mangin maayo.

  Luyag naton papason ang kalainan kag malas paagi sa mga panimad-on – BILOG nga mga butang sa sulod sang balay, POLKA DOTS sa aton mga bayu ukon paagi sa PALUPOK. Ngaman indi naton pag-ilugon ang estratehiya sang mga manugbantay sang mga karnero kag ni Santa Maria? Ang mga manugbantay sang mga karnero NAGPILI, kapin sa tanan,  sa pagpangita sa bata, ang Mesias nga ginapaabot sang tanan. Si Santa Maria nakadiskubre sang PAG-GIHO sang Dios sa iya kabuhi.

  Nagasugod ang bag-ong tuig sa aton pagpahayag nga si Maria amo ang ILOY SANG DIOS NGA NAGPAKATAWO kag aton man ILOY! Ang iloy nagadala kag nagasagud sang kabuhi sa iya tagu-angkan. Kon ang bata mabun-ag na, padayon pa niya ini nga ginasapupo kag ginabantayan.

  Ang pagkatawo ukon ang bag-o nga kabuhi amo ang labing importante kag makatalanhaga nga bugay. Ini ang ganhaan pakadto sa pagpanglakaton agud pangitaon ang plano sang Diyos para sa aton. Ang pinakamaayo nga paagi sa pagselebrar sang kabuhi amo ang pagtipig sini sa aton tagipusuon. Nagakahulugan ini nga kinahanglan naton ang tion agud nga mag-isahanon, magbinag-binag, kag magpangamuyo!- Wala gid sang gindulot nga maayo ang “kinagamo” sa pagsug-alaw sang Bag-ong Tuig!

  Ang malinong kag simple nga pagginawi– suno sa pagginawi ni Maria– nagahatag sa aton sing kusog sa pag-atubang sa mga hangkat sang kabuhi– sa kasadya ukon sa kasakit! HAPPY NEW YEAR TO ALL!

Epiphany (B)

ANG ATON NGA BITU-ON…

Sa aton pagsaulog sining DOMINGO SANG EPIPANIYA, aton ginalagbong ang kurtina sang PASKWA SANG PAGKATAWO. Sang una, ini ginatawag nga Domingo sang Tatlo ka Hari. Ngaman yanda ini nangin Domingo na sang Epipaniya? Ini tungod sa simple nga rason nga WALA NAMITLANG SA BIBLIA NGA MGA “HARI” GID SILA KAG KON “TATLO” GID MAN SILA! Ang nasulat lamang amo nga sila mga MAGOI(Original Greek), MAGI(English), MAGO(Tagalog o Ilonggo) o MANGIN-ALAMON nga nagatuon sang mga bituon kag naghalad sang tatlo ka regalo (Bulawan, Insyenso ag Mira) sa BATA nga natawo sa pasungan.

Didto sa Bethlehem, kon magsulod ka didto sa simbahan nga ginatawag nga “The CHURCH OF THE NATIVITY”- ang simbahan nga ginpatindog sa ibabaw gid mismo sang lugar kon sa diin natawo ang Mesias. Ini ginahambal nga amo lamang ang naga-isahanon nga Simbahan sa bug-os nga Israel nga wala ginguba o ginkawatan sang mga Muslim sang ila ini sakupon sadtong 6th Century. Hasta subong, ara makita ang mga orihinal nga mga haligi, malahalon nga bulawan kag bato kag disenyo sang salog sang ginpaobra ini ni Reyna Elena, iloy ni Emperor Constantino, sang 329 AD. Ginasaysay nga sang ara na ang mga Muslim sa ganhaan sang simbahan kag handa na magsulod sa pagkawat kag pagsunog sang simbahan, ila namulalungan ang painting nga nagadecorar sang façade sang simbahan. Ini pigura sang tatlo ka mga tawo nga nagaatubang sa Sagrada Familia. Kag dayon ang ila pinuno nagmando: “Indi naton pagtandugon ini nga lugar. Nagkadto na diri ang aton mga katigulangan. Lantawa! Pareho kita sang bayu!” Gani upod sa simbolismo sang tatlo ka mga regalo, ini nga estorya nagsugod sang pagkabig nga TATLO GID ang mga hari nga nagduaw sa lapsag.

Ang mensahi sang estorya nahanungod sa mga Dumuloaw halin sa Sidlangan nagatudlo sa aton nga ANG KALUWASAN NGA GINDALA SANG PAGKATAWO SANG MESIAS GINAHATAG SA TANAN Gani tungod sini, ang aton Simbahan nagatawag sini nga FIESTA SANG “EPIPANIYA” (nagikan sa tinaga nga Griego nga ‘epiphanein’) nga ang buot silingon, “Pagpahayag” “Pagpakilala” “Pagpasanag” – ANG PAGPAHAYAG SANG MESIAS SA TANAN NGA MGA KAPUNGSORAN.

Ginasiling sa hulubaton “ Every child that is born, a STAR is born also.” Suno sa mga katigulangan, sa tagsa ka bata nga matawo, nagatuhaw man ang isa ka bituon sa kalangitan. Ayhan naangut ini sa promisa sang Diyos sa kay Abraham, nga mangin subong kadamo sang kabitu-onan sa langit ang iya mangin kaliwat sa bug-os nga kalibutan! Ini tungud nga si Abraham nangin MASINULUNDON sa kabubut-on sang Diyos.

Karon nga Dominggo may isa man ka bituon nga nagsubang ukon nagtuhaw sa kahawaan, kag isa ini ka ESPESYAL nga bituon tungud ini nagapahayag sang Manluluwas nga natawo kag  magapuyo sa aton tunga. Ini nga Manluluwas nagdaku nga nagmangin matinumanon sa binubu-ot sang Iyang Amay.

Ang kapiestahan sang Pagpahayag sang aton Ginuong Jesus nagaganyat sa aton sa pag-usisa sang aton kaugalingon kon bala kita matuod nga nangin masinulundon sa binubuot sang aton Amay sa langit.

Matutum bala kita sa pagtuman sang aton mga katungdanan sa Mahal nga Diyos, sa aton panimalay, kag sa aton mga isigkatawo? Sa aton pagkatutum, aton ginapahayag ang KAPAWA nga nagagikan sa pagkatawo sang aton Ginuo. Nagasanag bala kita ukon nangin INSPIRASYON sa aton mga kautoran nga yara pa sa “kadulum”?

Nagpahayag na ang aton Ginuo. Kita? Ginapahayag bala naton siya sa aton mga kautoran?

 ANECDOTE

FATHER JOHN AND HIS YOUNG PARISHIONER

It was the Sunday after Christmas at St Peter and Saint Paul's Church in Borden, Kent, England.  Father John was looking at the nativity scene prior to packing away the figures when he noticed the baby Jesus was missing from the scene.

Immediately, Father John turned towards the vicarage in order to call the police. But as he was about to do so, he saw little Harry with a red wagon, and in the wagon was the figure of the little infant, Jesus.

Father John walked up to Harry and said, 'Well, Harry, where did you get the little infant?'

Harry replied honestly, 'I took him from the church, Father John.'

'And why did you take him?'

With a sheepish smile, Harry said, 'Well, about a week before Christmas I prayed to little Lord Jesus. I told him if he would bring me a red wagon for Christmas, I would give him a ride around the block in it.'

FOOD FOR THOUGHT

“I always liked those moments of epiphany, when you have the next destination.”

(Brad Pitt)

Holy Family (B)

IHATAG ANG PINKA-MAAYO!

Sa isa ka Kristiano nga panimalay, madamo nga butang ang dalayawon. Dalayawon ang aton paghimakas sa pagkilala sang bug-os sang aton pagkatawo. Dala-yawon ang aton paghangup sang kahilwayan sang isa ka tawo sa pagpili sang iya mangin bana o asawa. Dalayawon ang paghigugma kag pagtatap nga ginapatungod sang mga ginikanan sa ila mga kabataan. Dalayawon ang paghiliusa kag pagkabalaka nga ginapaluntad naton sa aton tagsa ka pamilya.

Apang sa mga nagakatabo sa sulod sang aton pa-nimalay subong nga panahon, madamo man nga butang ang indi dalayawon. Indi dalayawon nga, bangud sa aton paglagas nga magdamo ang aton kwarta, ang mga mag-asawa magabaton sing trabaho nga malayo sa ila pamilya. Indi dalayawon nga, bangud sang inggat sang kwarta, igabaligya sang aton mga pamatan-on ang ila kaugalingon nga dungog. Indi dalayawon nga ang aton mga dalaga kag mga asawa makabatas maghulog sang mga bata nga ila ginadala sa ila taguangkan bangud indi sila luyag sang gina-siling nila nga “kahuy-anan sa mata sang publiko”. Indi dalayawon nga ang aton mga pamantalaan, komiks, radio, sine kag VCD/DVD magabandilyo sang mga pakusog, pag-ilinaway kag imoralidad. Indi dalayawon ang mga balay-kalingawan nga nagahimaya sang makahulubog nga ilimnon kag sex nga wala sing   responsibilidad. Indi dalayawon ang mga bana nga may mga querida. Indi dalayawon ang mga nagagamit sang pills, condoms, IUD’s kag ang mga nagapakapon. Indi dalayawon nga ang mga opisyal sang aton gobyerno magdikta sa mga ginikanan kon pila ang ila bata-on. Indi dalayawon nga ang mga mag-asawa magbulagay. Indi dalayawon ang mga ginikanan nga wala pirme sa ila mga balay kay ato sila sa ila mga abyan kag masako sa pagtsinismis kag pagnagasugal. Indi dalayawon ang mga kabataan nga wala na ga respeto sa ila ginikanan kag wala na ga-besa sa ila kon mag-orasyon.

Gani mamangkot kita: ano bala ang aton pamilya, DALAYAWON BALA UKON INDI DALAYAWON?

Sugud pa sang panahon ni Cain kag ni Abel, ang tawo nagahimo sang iya nga dulut sang PAGPASALAMAT sa Diyos nga iya Tagtuga. Ini nga dulut sang pagpasalamat masami nga ginatawag sa aton pulong nga HALAD.

Ini nga buluhaton sang paghalad nagapatimaan sang pagtalupangud sang isa ka tawo sa kaayuhan nga ginbuhat sa iya, ayhan sang iya isigkapareho ukon sang Ginuo. Sa paghalad, ang taghalad amo ang NAGAHATAG. Wala siya ginahatagan!

Ang minatuod nga halad, nagahalin sa KABUGANA-AN sang aton tagipusu-on! Wala siya ginapilit! Wala siya gina-obligar! Suno sa Santos nga Ebanghelyo, ang minatuod nga paghalad, nagakahanabo lamang, kon bisan aton na gid nga kinahanglanon, aton pa ginasakripisyo, para sa tawo ukon sa Mahal nga Diyos Ini nagapakita lamang nga ang minatu-od nga paghalad indi lamang sang paghatag sang “sobra” ukon “surplus” lang sang aton ginakita ukon kinahanglanon, kundi bisan pa gani ang aton na gid “ginagawi”, dapat naton ipa-ambit kag “ibalik” sa aton Ginuo.

Sagrada Familia ang panimalay ni Maria kag ni Jose, tungud ginhalad nila sa aton Amay sa langit bisan pa ang ila “bugtong” nga Anak... Ang pinakanami nga bugay sang Diyos sa ila. Kita? Ano ang aton ginahalad sa Diyos? Ang PINAKANAMI man bala? Tani minatu-od na ang aton NEW YEAR. Ang paghatag sang “THE BEST” kag indi sang ’THE LEAST”. Aton tulukon ang Sagrada Familia nga naghatag sang ila pinakamaayo!

ANECDOTE

HOW DO WE ACCEPT THE HOLY FAMILY?

A Jesuit, a Dominican, and a Franciscan were walking along an old road, debating the greatness of their orders. Suddenly, an apparition of the Holy Family appeared in front of them, with Jesus in a manger and Mary and Joseph praying over him. The Franciscan fell on his face, overcome with awe at the sight of God born in such poverty. The Dominican fell to his knees, adoring the beautiful reflection of the Trinity and the Holy Family. The Jesuit walked up to Joseph, put his arm around his shoulder, and said, “So, have you thought about where to send him to school?”

FOOD FOR THOUGHT

Let us meditate on the mystery of this unique family: we can find in it values and teachings which today are more indispensable than ever to give human society sound and stable foundations.

(St. JohnPaul II)

4th sunday of Advent (B)

ALAGAD AKO SANG GINOO…

“May ara nga pari nga nagpamangkot sa isa ka bata nga parokyana, “Ne, indi mo bala ako malipatan pagkatapos sang 10 anyos?” “Indi gid Father!” sabat sang bata. “Hay pagkatapos sang 20 anyos?” pamangkot liwat sang pari. Ang bata nagsabat man liwat eh, “Father, bisan pagkatapos sang 10, 20 anyos, kag hasta mapatay ka, errrr, hasta mapatay ako, indi ta gid ikaw malipatan!” Kag nagpamangkut liwat ang pari, “Knock! Knock!” Ang puya nagsabat, “Who’s there?” Dayon nakibot ang bata sa ginhambal sang pari: “Ne, butigon kaw! Paano mo nahambal nga indi mo ako malipatan, kay wala ka na gani gali kakilala sa akon?”

Kita makasiling nga corny ini nga estorya, apang kon aton himutaran sang maayo ang eksena sang Pagtunda sang anghel Gabriel kay Maria (Annunciation), amo ini ang ginhimo sang Dios kay Santa Maria. Ang Dios nagapanuktok sa taguangkan ni Maria: “Knock! Knock! May I come in?” Kag paagi sa “FIAT” (HUO or Please come in!) niya, ang Pulong nahimo nga tawo.

Duha ka butang ang buot silingon sini nga “TAO PO!” Una, ini nagakahulugan nga ang ara sa guwa nga nagapanuktok TAWO GID kag indi sapat, aswang o insekto. Kag ikaduha, ang tawo nga nagadeklarar nga sya ‘tawo gid’ nagapangita sang tawo: “Tao po! MAY TAWO DA?” Kag indi lang sya nagapangita sang tawo, kundi nagalaum gid nga ang tawo sa sulod mag-abri sa iya, agud sila nga duha magkit-anay,magtamyawanay kag mag-estoryahanay. Kag kon matabu ini, ti ang tawo nakasalapo sang iya kapwa tawo.

Sa CHRISTMAS, ang Dios nahimo nga tawo agud ang tawo magpakigbuylog, magpakig-upod kag magpakig-angot sa iya isiskatawo. Sa tagsa naton nga pagpasakup sang kabuhi sang aton isigkatawo, nagakatabo ang ‘Pagpakig-isigkatawo’ sang Dios sa aton nga tawo.

Gani kay amo ini ang ‘PASKWA’, tani sa tagsa naton nga pagpakigbahin sa aton isigkatawo adlaw-adlaw, halinan gid unta sang aton KALUWASAN, kag indi mangin kahigayunan sang pagtsinismis o pagguba o KALAGLAGAN naton nga mga tawo!

“Alagad ako sang Ginuo. Kabay nga matuman sa akon suno sa imo ginsiling.” Ini amo ang famoso nga mga tinaga ni Maria Santisima sang iya ginbaton ang papel nga mangin “Iloy sang Bugtong nga Anak sang Diyos”. Amo ini ang kahulugan sang “Fiat mihi” nga latin nga mga pulong. Bisan pa nga indi ni Maria mahangpan ang buot silingon sang Anghel, ginbaton niya ini nga wala sing pangduha-duha bilang kabubut-on sang Diyos nga Amay.

Madamo sang mga bagay nga mabudlay hangpon sa sining kalibutan. Bisan ang akto sang pagluwas sang aton Ginuong Jesukristo sa aton, isa ka pala-isipan para sa aton. Ngaaman nga ihalad gid Niya ang Iya nga kabuhi sa aton nga sa ginsuguran, kita mga MAKASASALA? Ngaman nga mapatay ang isa ka MAAYO nga tawo para sa mga tampalasan? Ngaman nga kon sin-o pa ang maayo nga mga tawo, sila pa ang masami nga gina-una kuha sa sining kalibutan? Kon aton lang tawohanon nga painu-inu ang magtungkad sini, ang isa ka pamangkut, magatuga lamang sang madamo pa nga pasunud nga mga pamangkut. Ini mangin wala’y katapusan nga “cycle” sang sabat-pamangkut… daw naganilibut-libot lang kita.

Husto ang ginpamulong ni Maria! Wala na siya nagpamangkut sa pagbulut-an sang Diyos.

“Man proposes, but God disposes.” Sa aton paghanda sa Paskwa sang Pagkatawo, ginamulalungan kag ginbuhat bala naton ang plano sang Diyos sa aton kaangtanan sa isa kag isa? Makahulugan kuntani ang pagkatawo sang  aton Ginuo sa aton tunga!.

ANECDOTE

STARFISH

A man was walking along a beach upon which thousands of starfish had been washed up. Left on the sand by the receding tide the starfish were certain to die as the sun dried them out. The man also saw a boy picking up starfish and flinging them back into the sea. Planning to teach the boy a little lesson in common sense, the man walked up to the boy and said, “I have been watching what you are doing, son. You have a good heart, and I know you mean well, but do you realize how many beaches there are around here and how many starfish are dying on every beach every day? Surely such an industrious and kind hearted boy such as yourself could find something better to do with your time. Do you really think that what you are doing is going to make a difference?” The boy looked up at the man, and then he looked down at a starfish by his feet. He picked up the starfish, and as he gently tossed it back into the ocean, he said, “It makes a difference to that one.”

FOOD FOR THOUGHT

“Serving your enemies is the fastest way to learn to love them.”

(Will Davis Jr., )

3rd Sunday of Advent (B)

ANG ATON TINGUG...REGALO SANG DIOS

  “Ang “GAUDETE” naghalin sa tinaga nga Latin nga “gaudium”, buot silingon, “Kalipay o Kasadya”. Ang ikatatlo nga Domingo sang Adbiento ginatawag nga “Gaudete Sunday”. Gani ini Domingo sang Kasadya o Kalipay.

Kag ngaman kita dapat magkinasadya? Tungod sa simple nga rason nga ANG DIOS MAAYO GID SA ATON. Ini nga sabat aton masat-um sa ngalan sang ‘TINGUG’ nga nagasinggit sa desierto: “Amana ninyo ang alagyan sang Ginoo. Maghimo kamo sang tadlong nga dalan nga Iya pagaagyan” – si SAN JUAN BAUTISTA. Ang ngalan nga JUAN naghalin sa tinaga nga Hebreo nga ‘YOHANAN’, nga ang buot silingon, “ANG DIOS MAAYO O MALULUY-ON”. Kag ang tinaga nga ‘MAAYO O MALULUY-ON’ nagakahulugan sang pila ka butang: ‘matuod’ o ‘maalwan’ o ‘mabu-ot’ o ‘wala gapato-pato’.

Si San Juan Bautista ‘kaayo o kaluoy sang Dios’ sa iya mga ginikanan. Si Zacharias kag Elizabeth nagasalig gid sa Dios pero sila wala bata. Dugangan pa nga sila tigulang na kag si Elizabeth mamala na kag baw-as pa. Apang ang Kaayo sang Dios nagbukas sang taguangkan ni Elizabeth kag naghatag sa ila sang pinakabilidhon nga regalo – ang bata nga si Juan.

Si San Juan Bautista ‘kaayo o kaluoy sang Dios’ sa Iya katawhan. Sa iya nakit-an sang mga tawo ang ‘kaayo sang Dios’ nga nagaagda sa ila sa pagliso kag pagtadlong sang ila kabuhi bangod malapit na ang katumanan sang ila handum nga pag-abot sang ila Manluluwas.

Kaangay kay San Juan Bautista, kita man ginaagda nga mangin “kaayo o kaluoy sang Dios” sa aton komunidad. Kita ginaagda paagi sa pagpanaksi kay Kristo. Ayhan indi kaangay kay San Juan nga ginpa-utdan sang ulo, kita ginaagda nga ‘mamatay sa aton kaugalingon’ paagi sa aton pagkamaayo, pagkamapainubuson, pagkamaluluy-on o pagkamaalwan sa aton mga isigkatawo.

Isa sang mga pinakamanami nga regalo sang Diyos nga ginhatag sa aton kaupod sa bugay sang kabuhi amo ang aton “TINGUG”. Sa aton tingug, kita nababati-an… kita nahahangpan… kita makahimo sang pagdayaw ukon makapahayag sang aton nabatyagan sa sulud sang aton nga kasing-kasing.

Importante ang aton tingug tungud diri naton ginapasad ang mga relasyon sa diin  kita nagakabuhi nga may paghangpanay. Ini kon ang aton tingug ginagamit suno sa plano kag ginbuko sang Diyos. Apang kon ang aton tingug gamiton sa tiko kag mala-in nga katuyu-an, ini makadala sang halit nga mas kapin pa sang sa halit sang pisikal nga kasakitan nga aton gina-angkon. Ginasiling gani nga “maayo na lang nga kita masamaran sa aton panit, kay ini nagapali; apang kon kita masamaran tungud sa aton mga pulong nga ginpakawas sang aton tingug, ini indi mahapus malipatan… ini padayon nga nagatapik sa aton pagkatawo, kag wala naga-ayo bisan pa sa mahaba nga tini-on.

Sa Biblia ginasiling nga “ang aton dila katulad sang isa ka espada nga duha ang sulab! Sarang ini makahalit sa sulud kag sa gwa sang tawo!”, kag si Santiago nagpahayag nga “ang dila katulad sang isa ka “timon”, kagamay nga bahin sang barko, apang sarang ini makahatag sang direksyon sa amo nga sakayan (Jas 3:4)”. Ini nagahulugan lamang nga dapat kita magma-inandamon sa tagsa ka hala nga aton ginapakawas paagi sa aton tingug kay ini sarang makabulig ukon makahalit!

Sa diin bala naton ginagamit ang aton tingug? Sa pagdala kaayohan o sa paghalit?

ANECDOTE

GOD’S NOT DEAF

Two young boys were spending the night at their grandparents' house the week before Christmas. At bedtime, the two boys knelt beside their beds to say their prayers. The younger one began praying at the top of his lungs:

"I PRAY FOR A NEW BICYCLE..."
"I PRAY FOR A NEW NINTENDO..."

His older brother leaned over, nudged him and said, "Why are you shouting? God isn't deaf." to which the little brother replied, "No, but Grandma is!"

FOOD FOR THOUGHT

Christmas is not a time nor a season, but a state of mind. To cherish peace and goodwill, to be plenteous in mercy, is to have the real spirit of Christmas.

(Calvin Coolidge)

2nd Sunday of Advent (B)

ANG NAGAPAUBOS… PAGAPATAASON!

  “Ang isa ka maestra naghatag sang quiz sa iya grade six nga mga estudyante. Siling niya, “Class ang quiz ninyo amo ini. Hatagan ko kamo isa-isa sang jigsaw puzzle sang bug-os nga kalibutan. Dapat solvaron ninyo ini sa sulod sang trienta minutos. Kon sin-o ang una nga makasolvar sini nga jigsaw puzzle, exempted sa aton final exam.” Sa tapos nya hatag sang jigsaw puzzle sa isa-isa sa ila, sya nagsignal, ‘Your time starts now!’

Pagkatapos sang lima ka minutos, ang isa sang iya mga estudyante nag-alsa sang kamot kag naghambal nga tapos na niya solve ang jigsaw puzzle. “Paano mo nasolvar ang puzzle sa madasig kag malip-ot nga tion?” pamangkot sang maestra. Dayon ang estudyante, nga indi gid man maalam, nagyuhom kag nagsabat, “Bal-an mo Maam, sang akon baliskaron ang jigsaw puzzle, akon nadiskubrihan ang nawong sang isa ka tawo didto. Sang nasolvar ko na ang tawo, nasolved ko man dayon ang jigsaw puzzle sang kalibutan.”

Ang mga problema sang bug-os nga kalibutan sarang lamang maresolva paagi sa pagsolvar sang tawo. Ang solusyon sa madamu nga sala kag tiko sa kalibutan amo ang pagtadlong sa kabuhi sang tawo. Amo ini ang buot silingon sang pagsininggit ni San Juan Bautista: ‘Amana ninyo ang dalan sang Ginoo. Maghimo kamo sang tadlong nga dalan nga Iya pagaagyan’.

Subong nga kita bahin sang mga problema sa kalibutan, kita parte man sang iya sini nga solusyon. Kon gusto sang tawo bag-uhon ang bilog nga kalibutan, dapat ini anay mag-umpisa sa iya nga kaugalingon.

Ang aton tigulo sini nga mensahe karon, ginkuha sa ni-Latin nga pulong nga kon aton lubaron sa aton linggwahe nagakahulugan… “Kon ara ang mas mataas, dapat magsunud ang manubo…” Ukon “ Kon ara ang manunudlo, dapat magsunod ang bumulutho!” Madamo ini sang kahulugan nga nagapatuhoy sa isa ka kamatu-oran nga nagasiling nga kon ara ang “agalon” ang “sulugu-on dapat magpa-ubos!

Ayhan amo man ini ang nabatyagan ni Juan Bautista sa aton pagpamalandong sa ika-duha nga Dominggo sang Adbiento! Nahangpan niya sang maayo ang iya nga hilikuton kag papel sa pag-abut sang Mesias, nga siya indi ang ginapa-abut sang mga tawo nga Manluluwas, kundi siya isa lamang ka tiglawas nga ginpadala sang Diyos nga maghanda sa pag-abut sang Manluluwas sang kalibutan.

Madamo kaayo ang mga tawo nga nagsunud sa iya kag nagbaton sang iyang pangagda sa paghinulusol. Kon sa aton pa, si Juan Bautista madamo na sang mga “fans” tungud sang iya pagpangwali nga wala sing ginapasuna-id, kundi ini tampad sa pag-confrontar sang kamatu-oran sang kabuhi sang tagsa-tagsa. Apang bisan pa nga siya “sikat” sa panulok sang mga tawo, wala “maghabok” ang iya nga ulo sa bugal sa pag-angkon sang kadungganan nga siya amo ang ginapa-abut nga Mesias. Sa baylo, siya nagsiling nga “Ang magakari nga ulihi lang sa akon mas gamhanan pa sa akon…”

Ini nga PAGPA-UBOS ni Juan Bautista naga-agda man sa aton nga mangin mapa-inubuson. Usisa-on kag tan-awon naton ang aton kaugalingon kon bala kita matu-od nga mapa-inubuson ukon nagahari sa gihapon ang bugal sa aton kabuhi?

Ang pagtadlong sang aton kabuhi amo ang pinakamanami nga paghanda sang aton kaugalingon!

ANECDOTE

LESSON IN LYING

A priest told his congregation, "Next week I plan to preach about the sin of lying. To help you understand my sermon, I want you all to read Mark 17."

The following Sunday, as he prepared to deliver his sermon, the priest asked for a show of hands. He wanted to know how many had read Mark 17. Every hand went up. The priest smiled and said, "Mark has only sixteen chapters. I will now proceed with my sermon on the sin of lying."

FOOD FOR THOUGHT

'Thank you' is the best prayer that anyone could say. I say that one a lot. Thank you expresses extreme gratitude, humility, understanding.

(Alice Walker)