ANG DIYOS AMO ANG ATON TATAY
Ang pinakamanami nga imahen sang Diyos nga ginpahayag sang aton Ginuong Jesus, amo nga Siya amo ang aton AMAY. Ini nga tinaga mahapos naton mahangpan tungud ang tagsa-tagsa sa aton may ara gid nga ginakabig nga amay sa sining kalibutan, tungud ang kada isa sa aton may ara gid nga gingikanan. Ang amay ginakabig nga “haligi” sang panimalay. Siya amo ang kabakud sang iya nga pamilya, amo gani nga ang amay ginasiling nga amo ang “bread-winner” ukon “manugpaka-on” sang iya pamilya– siya ang nagahatag sang para sa “ikaayong” lawas sa mga katapo sang iya nga panimalay. Amo gani nga sa palaang-giran sang aton Ginuo, Siya nagsiling nga: “May ara bala nga amay nga magahatag sang iwi-iwi kon ang iya bata nagapangayo sang itlog? Ukon sang man-og kon ang ginapangyo isda?” tungud nahibalu-an sang aton Ginuo nga amay sang panimalay nagahimud-os gid sa paghatag sang maayo nga mga butang para sa iya pamilya bisan pa nga ini nga “tawohanon” nga amay mismo may iya man kaugalingon nga mga “kapaltahan” kag “kakulangan”.
Apang ang aton Ginuo sa aton Ebanghelyo subong nagapakilala sang isa ka Amay nga “himpit”- wala sang kakulangan kag kapaltahan, tungud ini nga Amay amo man ang Iya nga Amay nga langitnon– ang Amay nga Manunuga, kag Amay nga nakahibalo kon ano ang maayo para sa aton. Siya isa ka Amay nga nagahatag sing maalwan sa isa ka anak nga “nagapangayo, nagapangita, kag nagapanuktok!”.
Bilang mga Kristianos nga nagatuo kag nagasunod kay Kristo, klaro nga ginatudlo sa aton sang Ebanghelyo nga, una sa tanan, kinahanglan naton ang pangamuyo o ‘obligasyon’ naton ang magpangadi. Kay sa pagkabuhi ni Kristo diri sa duta, Siya naghatag gid mismo sing malawig nga mga tinion sa pagpangamuyo o pagpakig-sugilanon sa Diyos. Gani sa subong nga Domingo, Siya nagahatag sa aton sang SULONDAN O PAMAAGI kon paano kita magpangagdi sa amo man nga Dios.
Kag ini amo ang PAGPANGAMUYO BILANG MGA BATA O ISA KA ANAK SA ATUBANGAN SANG DIOS BILANG ATON TATAY! Ang pagpangamuyo sang isa ka Kristiano dapat isa ka personal kag pinamilya nga buluhaton. Buot silingon, siya nagapakighala sa Diyos pareho nga siya isa ka anak nga nagapakigsugilanon sa iya amay. Lantawa naton ang mga kabataan kon paano sila wala naga-huya-huya sa pagpalapit kag sa pagpangayo sing bisan ano nga mga butang sa ila mga tatay. Kon indi gani sila pagpromisahan sa kagab-ihon sang ila ginapangayo, lantawa bala pagka-aga, ara naman sila sa kilid sang ila tatay nga naga-ikug-ikog tubtub ihatag gid ang ila ginapangayo!
Si Kristo nagatudlo nga magpangamuyo kita sa Diyos bilang aton Amay agud sa pagtadlong sang sayup nga paghangop nga ang aton Dios pareho sang “Big Boss” nga dapat kurogan o isa ka “Hari” nga dapat kahadlukan. Sa baylo, ang dapat naton panumdomon amo ini: “Ang Diyos mapinasensyahon, makuli sa pagpangakig kag puno sing mapinadayunon nga gugma” bangud anak Niya kita kag Tatay naton Siya!
Kita nakahibalo nga ang mga kabataan nagasalig sa ila mga ginikanan nga ang ginahimo sang ila mga ginikanan para gid sa ila kaayohan. Gani, sa amo man nga bagay, kon kita magpangamuyo, dapat kabigon ta ang aton mga kaugalingon nga anak sa atubangan sang Diyos kag saligan naton Siya nga Iya gid igahatag kon ano ang pinakamaayo sa aton tungod kay Tatay naton Siya!
LIGHTER SIDE:
THE NEXT ONE
After they had brought their first baby home from hospital, a young wife suggested to her husband that he try his hand at changing diapers. “I’m busy” he said “I’ll do the next one..”
The next time the baby was wet, she asked if he was now ready to learn how to change diapers. He looked puzzled. .Oh,. he replied finally. .”I didn’t mean the next diaper. I meant the next baby!”
FOOD FOR THOUGHT
“It is a wise father that knows his own child.” (William Shakespeare)
No comments:
Post a Comment