12th Sunday in Ordinary Time (C)

IKAW ANG KRISTO SANG  DIYOS

Ang “titulo” nga “Kristo” sa mga Judeo nagakahulugan sang “Pinili” ukon “Ginhibo” sang Diyos! Gani ang ngalan nga Jesu-Kristo, nagakahulugan nga si Jesus, ginhibo ukon ginpili sang Diyos! Ginpili nga mangin ano? Amo  ini ang ginasabat subong sang aton nga Ebanghelyo.

Para sa mga Judeo, ang Kristo, ukon ang Ginpili sang Diyos, amo ang magaluwas sa ila gikan sa pagka-ulipon sa gahum sang mga Romanhon. Para sa ila, ang Kristo amo ang Manluluwas nga magadala sa ila sang kahilwayan katulad sang mga propeta sa daan nga kasugtanan, ukon katulad sang mga “dalagku” nga mga personalidad sa daan nga kasugtanan, katulad abi nanday Moises ukon kay Elias ukon iban pa gid nga mga sikat mga tawo katulad ni Juan Bautista nga wala lang madugay nga ginpapatay ni Herodes!

Amo gani nga sang pagpahayag ni Pedro nga si Jesus amo ang “Kristo sang Diyos”, ang aton Ginuo maabtik nga nagpaathag kon ano gid ang kahulugan sang isa ka GINPILI sang Diyos– Ang Kristo kinahanglan nga mag-antus...pagasikwayon… pagapatyon… kag pagabanhawon sa ikatlo nga adlaw! Buot silingon nga sayup ang ginahuna-huna sang mga Judeo nga ang Kristo isa ka “Makusog” nga hari nga magagahum paagi sa pakusug, kundi Siya isa ka MAGAHALAD sang Iya nga kabuhi bilang “SAKRIPISYO” agud mahatag ang matuod nga KAHILWAYAN sa tanan nga katawohan! Paagi lamang sini nga magatuhaw ang matuod-tuod nga PAGDAUG kay ini nga pagdaug nagadala sang bag-o nga kabuhi– ang kabuhi sang PAGKABANHAW! Maangkon lamang ini paagi sa pagpas-an sang Krus, pagkalimot sa kaugalingon, kag pagsunud sa Iya!

    Madamo nga mga tawo, sa panahon sang aton Ginoo, ang luyag magsunod sa Iya bilang Iya mga gintutun-an. Ayhan ini tungud kay nakasaksi sila sang mga milagro nga Iya ginpanghimo. Ayhan ang iban luyag magsunod tungud nga nakita nila ang kasulhay sa presensya sang aton Ginoo, nga naghatag sang kalan-on para sa mga ginagutum, pag-ayo sa ila mga kasablagan kag mga ginagamhan sang mga yawa, pagpatawad sa mga makasasala, kag iban pa nga mga kasulhayan nga ila naagihan sa diin ang aton Ginoo amo ang nangin sabat sa ila mga kinahanglan. Ayhan ang iban pa gid luyag magsunod sa Iya tungud sang kabaskug sang Iya mga pulong nga may otoridad, indi katulad sang ila mga pangulo nga mga Judeo.

  Sa pagkadamo sang mga painu-ino ang aton sarang mapatpat, kon ngaman madamo ang interesado sa pagsunod sa Iya. May yara man nga “sinsero” nga luyag mag-upod sa Iya tungud kay para sa ila, ang aton Ginoo amo ang ginhibo nga ginpadala sang Amay para sa kaluwasan sang tanan. Amo ini ang nangin pahayag ni Pedro sa aton Ebanghelyo subong, kag wala ini ginpanghiwala sang aton nga Ginoo.

  Sia gid man ang Manluluwas sa wala sing pagpangduha-duha, apang indi sang mahapos ang pagsunod sa Iya, tungud Sia wala nagasaad sang masulhay ukon matawhay nga kabuhi. Isa lang ang dalan nga Iya ginaagyan– ang DALAN SANG KRUS!

  Ang matuod nga Kristo amo ang Kristo nga may Krus kag sa sini nga dalan kita Niya ginaagda. Siya mismo ang nagsiling nga” “Kon luyag ka nga magsunod sa Akon, dapat kalimtan mo ang imo kaugalingon, magpas-an sang imo nga krus, kag dali, sunod ka sa Akon!”

Ginasunod ta bala si Jesus sa Iya dalan sang Krus? Diri may kadalag-an kita bisan pa sa kamatayon!

LIGHTER SIDE:

NO SWEAT

Boy to mother: “I’ve decided to stop studying”…”How come?”, asked the mother… “I heard that that someone was shot dead, because he knew too much…”

FOOD FOR THOUGHT

-“The father who does not teach his son his duties is equally guilty with the son who neglects them.”

(Confucius)

-“The most important thing a father can do for his

children is to love their mother.”
(Theodore M. Hesburgh)