ANG BALATI-AN : TUMAN NGA PAGPATI NGA KITA LANG ANG MATARONG!
Ang punta sang tinaga, ukon ang “suffix” sang isa ka pulong nga “ITIS” nagahulugan sang kasablagan sa aton nga lawas. Katulad abi sang “gingiv-ITIS”- kasablagan sa aton nga ngislo ukon gums… ”bronch-ITIS”- kasablagan sa aton baga ukon lungs…”arthr-ITIS”- kasablagan sa aton mga tul-an… kag iban pa.
Apang ano naman ang “SIMONITIS”? Ini amo ang kasablagan ni Simon nga Pariseo sa aton Ebanghelyo subong… kag ini nga kasablagan MAKALALATON. Wala naton matalupangdan nga basi kita mismo nalapnan na sang sini nga kasablagan o sakit. Ano ini nga sakit? Ang sakit nga mayad “magkondenar” sa mga makasasala!... Ang sakit nga nagabantay lang sang kasal-anan sang iban apang ang iya kaugalingon nga kapaltahan wala ginamulalungan!.. Ang sakit nga nagasiling nga mas mayad ka iya sang sa iban kay indi ka katulad nila nga mga “makasasala”!... Ang sakit nga NAGAPAKAMATARONG lang sang aton nga kaugali-ngon!
Amo ini ang natabo sa aton Ebanghelyo subong. Si Simon nga Pariseo wala magtalupangud sang iya kasal-anan tungud siya napahamtang sa atubang sang isa ka babayi nga para sa iya mas makasasala pa sang sa iya. Para sa iya, mas menos-menos ya ang iya nga sala sang sa sini nga babayi nga ginakabig nga isa ka “public sinner”.
Apang ang aton Ginuo maabtik nga nagpahanumdum sa kay Simon nga wala kita sang sarang mapabugal sa atubangan sang Diyos tungud kita tanan “nakasala” kag may mga “kapaltahan” man. Ayhan mas daku pa gani ang aton sala sang sa aton ginakondenar, ugaling, wala lang mahibalu-an sang iban!
Sa kultura sang mga Judeo, kon ang isa ka imbitado magsulod sa balay sang manggaranon nga tawo, sya ginaabiabi paagi sa tatlo ka paagi: Una, ang tag-iya sang balay nagatamyaw sa iya paagi sa paghaluk, labi na gid kon sya isa ka “rabbi” ukon manunudlo. Ikaduha, ginahugasan sang tubig ang iya mga tiil pareho sa “foot spa”, para makapahuway ini sa malawig nga linakat. Ikatlo, sya ginapaasohan sang mahumot nga insyenso ukon ginapatuloan ang iya agtang sang agua halin sa mga “rose petals”.
Sa sini nga konteksto, aton maintiendihan kon ngaman ang babaye sa Ebanghelyo nagbubo sang agua sa mga tiil ni Kristo kag wala puway ang paghaluk niya diri. Apang ang “host” nga si Simon, isa ka Pariseo, indi makabaton kon ngaman gintolerar ni Kristo nga himuon sa iya sang babaye ina. Ngaman? Tungod ang babaye isa ka “prostitute”, isa ka makasasala ukon mahigko nga babaye. Kay para sa isa ka Judeo, ang isa ka ginatahud nga “rabbi” ginadumilian, bisan nga magpalapit lang gani sa isa ka makasalala kay basi malapnan sya sing dapaw o kahigku sini. Ano pa ayhan kon magpatandog sya diri?
Gani si Kristo nagpasat-um sa iya “host” nga, sa baylo sang babaye nga ginhukman niya nga mahigku, sya dapat ang naghimo sadtong ginbuhat sang babayi nga amo ang “paghugas sang tiil” sang iya nga bisita, kon siya isa ka matuod nga “host”. Dapat si Simon ang nagtinlo sang tiil sang Ginoo. Paagi sini, ang Ginuo nagatudlo sa aton tanan nga sa iya atubangan, kita tanan mga MAKASASALA kag dapat magpangayo sang iya kapatawaran. Kon kita lamang magpakanubo kag mag-ako sang aton mga kasaypanan sa iya, kita iya gid patawaron kag bendisyonan.
Tanan kita nagakinahanglan sang “PAGPATAWAD” sang aton Diyos, kag tanan kita NAKABATON man sang Iya nga pagpatawad. Kuntani, mangin MAPINATAWARON man kita sa isa kag isa! Aton talupangdon nga sa mga tawo nga aton kon ka-isa ginahusgahan, ginapamatbatan, ukon gina-kondenar, yara man na-kasalaming ang aton pagka-makasasala!
LIGHTER SIDE:
ALWAYS WRONG
A salesman was dismissed because he was rude to a customer. A month later the sales manager spotted him walking about in a police uniform...I see you’ve joined the force, Johnny, said the sales manager...Yes, Sir... This is the job I’ve been looking for all my life. ..Here the customer is always wrong..
No comments:
Post a Comment