DOMINGO SANG DIOSNON NGA KALUOY!
Ang Dominggo sa diin “ginapasundayag” si Tomas nga “Nagapangduha-duha” gindeklarar sang aton anay Santo Papa Juan Pablo II, kag karon isa na ka Santo, bilang “Divine Mercy Sunday”. Sang una anay, ini nga Dominggo ginatawag nga “The Doubting Thomas Sunday”, tungud gani ginapakita sa aton istorya sa mga Balasahon sa mga Misa subong, ang pagpangduha-duha ni Tomas, sa mga pahayag nga NABANHAW ang aton Ginuong Jesus– pangduha-duha nga nagtulod sa iya sa paghatag sang iya bug-os nga pagtuo sang ginpahayag na sang aton Ginuo ang iya nabanhaw nga kaugalingon, kag ginpa-agay sa kay Tomas ang Diosnon nga kaluoy sa paghangup sa iya bisan pa nga “nadulman” ang iya nga panghuna-huna sa mga hitabo.
Madamo sa aton ang katulad kay Tomas. Si Tomas ginatawag sa Bibliya sa kumpil nga “Kapid”, apang kon aton usisa-on ang kaundan sang Bibliya, wala kita sang makita nga indibidwal nga makabig nga “kapid nga utod” ni Tomas, kay sa pagkamatuod, si Tomas WALA sang kapid nga natawo nga kadungan niya, kundi ang ginakabig nga mga kapid, amo KITA, nga sa masami may yara nga katulad nga panimu-ot sang “pagka-madinudahon” katulad ni Tomas sa aton Ebanghelyo subong.
Pila ayhan sa aton ang madali madula-an sang paglaum kon halus madulum ang mga “prospectives” sa aton pagpangabuhi? Pila ayhan sa aton ang nagasiling nga halos wala na sang pag-asa ang aton kahimtangan, nga daw sa halos nagsinambod na nga mga “lawa” ang aton gina-agihan? Pila ayhan sa aton ang nagasiling nga “siguro, patay ang Diyos, kay daw wala man Niya ginasabat ang aton mga pangamuyo kag wala ginahatag ang aton ginapangayo!” Indi bala sa sini nga tini-on nangin “Kapid” man kita ni Tomas?
Ang istorya sa aton Ebanghelyo subong nahanu-ngud kay Tomas nga Kapid, isa ka pagpahayag sang “pagpanglakaton sa pagtuo”. Ang aton kabuhi sa pagpabilin nga mabakud sa pagsalig sa pagkabanhaw sang aton Ginoo, isa ka pagtimakas sa paglampuwas sang aton mga pangduha-duha, kon bala matuod gid nga Iya ginapahayag sa aton ang kahulugan sang Iya nga pagkabanhaw… kon bala matuod nga bisan sa mga palaligban sa aton kabuhi, yara sa gihapon Sia nga nagasakdag sa aton agud kita makabutwa sa aton nagakalumos-lumos nga sitwasyon. Ang pagtuo, isa ka tikang sa diin kita nagasiling sa aton kaugalingon: “Bisan ano pa man ang matabo, ginasaligan ko ang imo mga pulong, kag nakahibalo ako nga indi mo ako pagbutigan… tumanon mo ang imo mga saad.”- Isa ini ka bug-os nga pagsalig sa isa ka tawo, isa ka bagay, ukon isa ka hitabo, nga bisan ano pa man, wala sing limbong ang tanan!
Amo gani nga sa aton Ebanghelyo ginhambalan sang aton Ginoo si Tomas: “Nagatuo ka bala tungud nakakita ka? Bulahan ang mga nagatuo bisan wala sila nakakita!” Ang pagpati sa mga “panaksi” sa nagkahanabo nga pagkabanhaw, isa na ka pagpamatuod nga matuod, ang aton Ginoo buhi, kag mandada-ug sang naga-ulipon nga pagpakasala kag kamatayon!
Sa isa ka nagatuo indi pwede ang hulubaton nga nagasiling: “To see is to believe!” Sa pihak nga bahin, ang kabaliskaran amo ang matuod: “Believe… and you will see!” Kinahanglan lang nga ibutang naton ang aton bug-os nga pagsalig sa Iya nga Sya indi gid makabutig sang Iya nga promisa sa aton, sa baylo bisan sa mga pagbinag-o-bag-o sang mga panahon, magapabilin Sya nga matutum sa Iya mga pangako, kag ini amo ang paghatag sa aton sang kahigayunan sang isa ka pagpamanag-banag sang isa ka bag-o nga kabuhi.
Ang aton Ginuo sa Iya di-matungkad nga kaluoy padayon nga nagapahayag sang Iya nga kaugalingon sa aton...BUHI SIYA...YARA SIYA, NAGA-UPOD SA ATON. MAGTUO KITA SA IYA!
No comments:
Post a Comment