24th Sunday in Ordinary Time (B)

PARA SA IMO, SIN-O SI KRISTO?

Sa istorya ni Esopo, isa ka adlaw, may mag-amigohay nga nagpangayam sa tunga sang kagulangan. Sang yara na sila sa tunga-tunga sang kagulangan, may nasumalang sila nga isa ka daku, mabangis kag gutum nga Oso ukon “bear”. Sa kakulba, nagdalagan ang isa kag ginbay-an nya ang iya amigo, kag nagsaka sya sa mataas nga kahoy. Ang nabilin iya, nagakurog sa kakulba kag wala makahulag. Apang natandaan nya ang ginsiling sa iya sang iya nga amay nga kon may mabangis nga oso, magpatumba lang sya kag magpa-ago-ago nga “patay” sya kag indi maghulag, kay ang oso wala nagakaon sang patay. Gani amo ini ang iya nga ginbuhat! Nagpalapit ang oso sa iya nga nagahigda sa duta kag ginsimhut-simhutan sya kag gin-obserbahan kon bala nagahulag pa sya. Apang nagpakuno-kuno sya nga patay na sya. Nakumbinsi ang mabangis nga oso, kag angan-angan naglakat, kag ginbayaan ang abi nya nga patay nga tawo. Sang madula na sa ila panan-awan ang mabangis nga oso, nagpanaug ang nagsaka sa kahoy samtang nagbangon man ang nagpa-patay-patay. Nagpadayon sila sa ila pagpanglakaton, kag samtang nagalakat sila nagpamangkut ang nagsaka sa kahoy: “Pre, sang ginasimhut-simhutan ka kagaina sang oso, daw may ginhutik man sya sa imo dalunggan?”. Ang iya amigo nagsabat: “Huo, pre! Hambal nya nga kon magpanglakaton ako liwat, indi na ako mag-upod sa tawo nga ginabay-an lang ang iya abyan pag-abut sa katalagman kag sa ital-ital nga sitwasyon!”

Sa aton Santos nga Ebanghelyo subong nga Domingo, ang aton Ginuo nagpamangkut sa Iya mga gintutun-an kon sin-o Siya para sa ila. Ini nga pamangkut indi lamang sang isa ka pamangkut nahanungud sa mga huring-huring sang mga tawo, ukon isa ka “background check” sang Iya nga pagkatawo, kundi isa ka pamangkutanon nga natuhoy sa ila “personal” nga pagkilala sa Iya.

Ayhan, malawig-lawig na ang ila nga pag-inupdanay, kag ayhan madamo naman sila sang nahibalu-an nahanungud sa Iya nga pagkatawo, kag gani, kon may makahambal nga may “otoridad” nahanungud sa “character” sang aton Ginuo, ini wala sang liwan kundi ang Iya mismo nga mga sumulunod.

Maayo ang sabat sang mga apostoles sang pamangkut sang aton Ginuo kon sin-o Siya suno sa mga tawo, apang sang ginpatuhoy na sa ila ang pamangkut kon sin-o Siya para sa ila, ayhan na-ukyan sila, kay ang pamangkut sang aton Ginuo wala nagakinahanglan sang sabat nga ginabase sa “tsimis” ukon “sugid-sugid” ukon sa “ideya”, kundi sa ila “personal experience” sang Iya nga presensya sa ila tunga. Si Pedro gid lang ang isganan nga nagtindog kag nagpahayag nga Siya amo ang Kristo! - sabat nga wala ginbase sa iya eksperyensya sa kay Jesus, kundi paagi sa pagtudlo sang Espiritu Santo nga amo ang nagtulod sa iya sa pagpahayag sini nga pagtuo.

Tubtub subong, padayon man kita nga ginapamangkut sang aton Ginuo kon sin-o Siya para sa aton. Indi suno sa aton mga nabasahan, ideya, ukon nabati-an sa mga sermon, kundi kon sin-o Siya sa aton adlaw-adlaw nga pagkabuhi! Ginasiling gani nga “mahapus mangin Kristiyano apang mabudlay ang magpaka-Kristiyano.” Sin-o kag ano si Kristo sa aton?