26th Sunday in Ordinary Time (B)

MAGKALIPAY SA KADALAG-AN SANG IBAN

    Ang mga gintutun-an may pagpati nga sila lang ang makabuhat sang gamhanan nga mga buhat nga ginhimo sang aton Ginuo tungud sila lamang ang mga tawo nga yara sa “circle of friends” sang aton Ginuo. Gani, isa ka daku nga “upset” sa ila sang ila makita nga may isa ka tawo nga nagapang-ayo kag nagabuhat sang mga kaayohan sa ngalan sang aton Ginuo. Naalarma sila kay ang tawo indi kabahin sang ila nga grupo.

  Kon aton gid nga usisa-on sing maayo ining reaksyon sang mga apostoles, ayhan masiling naton nga ini, bunga sang ila nga “kahikaw” ukon “kahisa” sa sining tawo nga nagabuhat man sang ila buluhaton. Sa pagkamatu-od nahadluk sila nga basi labawan sila sang isa ka tawo nga “estranghero” sa ila nga grupo. Nahadluk sila labawan kay nagapati sila nga sila lang ang makabuhat sang ginbuhat sang aton nga Ginuo nga pagpang-ayo!

  Amat-amat man sila nga na-inpluwensya sang painu-ino sang mga Pariseo nga nagapati nga sila lang ang may “kapas” nga maluwas tungud sila ang “nakahangup” sang kasugu-an sang Diyos.

  Natalupangdan ini sang aton nga Ginuo nga painu-ino sang mga apostoles sa bagay nga Iya nga gintawag ang ila nga atensyon nga: “Pabay-i lang ninyo sia kay wala sing may nagahimo sang milagro paagi sa akon ngalan kag makahambal dayon sang malain batok sa akon…!” Buot silingon nga dapat sila MAGKALIPAY tungud nangin madinalag-on ang isa ka tawo sa pagbuhat sang maayo kag ini indi dapat pagkahikawan, kay ang Diyos padayon nga nagabuhat sang kaayohan sang tanan. “We should rejoice with those who rejoice and praise God for the success of others.” Amo kuntani sini ang aton pamatasan. Kon nakita naton nga nangin madinalag-on ang iban, dapat kita MAGMAPINASALAMATON sa Diyos kay Siya maalwan!              

25th Sunday in Ord. Time (B)

DAKU SA PANULUKAN SANG DIOS

Bilang mga tawo, duna nga may ara gid sa sulod naton nga nagaduso sa aton para magpabugal sang aton kadalag-an; magpakitakita sang aton kinaagman; magpalaway-laway sang aton kamanggaran kag naabutan, agud kita dayawon, tahuron kag kilalahon sang tanan. Apang indi ini ang sukatan o pamaagi agud mangin minatuod nga ‘labing daku’ sa mata sang Dios, suno kay Kristo.

Kon gusto naton ‘mangin daku’ nga minatuod, dapat kita mangin gamay pareho sang isa ka bata. Kinahanglan naton nga mangin mapainubuson. Buot silingon, bisan ano pa ka madinalag-on sa aton, dapat naton dumdumon nga ang tanan naton nga kadalag-an, ang tanan naton nga pagkabutang kag ang tanan nga yara sa aton, naghalin tanan sa Dios. Gani Sya gid lamang ang may kinamatarung sa pagdayaw o pagkilala kon sin-o sa aton ang minatuod nga ‘labing daku’, kag indi ang mga tawo nga iya man lang man nga tinuga.

Ginapakita subong sang aton Ebanghelyo ang importansya sang isa ka mapainubuson nga tagipusuon. Sa mata sang mahal nga Dios, wala ni isa sa aton ang makasiling nga ang iya kadaku, tungud lamang ini sa iya kahimo-an. Ang tanan bugay sang Dios sa aton, bisan pa gani ang aton gahum ukon poder, ang aton mga manggad nga dutan-on, kag iban pa nga mga dekorasyon sa aton kalawasan. Ini tanan tungud ang Dios maalwan sa aton nga nagpahulam agud aton gamiton ini sa PAG-ALAGAD sa nagakinahanglan.

Kon luyag kita mangin daku sa panulukan sang Dios, ayhan sarang naton matulok ang aton kaugalingon kag sabton ang pamangkut kon bala kita nangin mapaiunubuson nga alagad sa isa kag isa, ilabi na gid sa aton mga kautoran nga nagakinahanglan.

24th Sunday in Ordinary Time (B)

PARA SA IMO, SIN-O SI KRISTO?

Sa istorya ni Esopo, isa ka adlaw, may mag-amigohay nga nagpangayam sa tunga sang kagulangan. Sang yara na sila sa tunga-tunga sang kagulangan, may nasumalang sila nga isa ka daku, mabangis kag gutum nga Oso ukon “bear”. Sa kakulba, nagdalagan ang isa kag ginbay-an nya ang iya amigo, kag nagsaka sya sa mataas nga kahoy. Ang nabilin iya, nagakurog sa kakulba kag wala makahulag. Apang natandaan nya ang ginsiling sa iya sang iya nga amay nga kon may mabangis nga oso, magpatumba lang sya kag magpa-ago-ago nga “patay” sya kag indi maghulag, kay ang oso wala nagakaon sang patay. Gani amo ini ang iya nga ginbuhat! Nagpalapit ang oso sa iya nga nagahigda sa duta kag ginsimhut-simhutan sya kag gin-obserbahan kon bala nagahulag pa sya. Apang nagpakuno-kuno sya nga patay na sya. Nakumbinsi ang mabangis nga oso, kag angan-angan naglakat, kag ginbayaan ang abi nya nga patay nga tawo. Sang madula na sa ila panan-awan ang mabangis nga oso, nagpanaug ang nagsaka sa kahoy samtang nagbangon man ang nagpa-patay-patay. Nagpadayon sila sa ila pagpanglakaton, kag samtang nagalakat sila nagpamangkut ang nagsaka sa kahoy: “Pre, sang ginasimhut-simhutan ka kagaina sang oso, daw may ginhutik man sya sa imo dalunggan?”. Ang iya amigo nagsabat: “Huo, pre! Hambal nya nga kon magpanglakaton ako liwat, indi na ako mag-upod sa tawo nga ginabay-an lang ang iya abyan pag-abut sa katalagman kag sa ital-ital nga sitwasyon!”

Sa aton Santos nga Ebanghelyo subong nga Domingo, ang aton Ginuo nagpamangkut sa Iya mga gintutun-an kon sin-o Siya para sa ila. Ini nga pamangkut indi lamang sang isa ka pamangkut nahanungud sa mga huring-huring sang mga tawo, ukon isa ka “background check” sang Iya nga pagkatawo, kundi isa ka pamangkutanon nga natuhoy sa ila “personal” nga pagkilala sa Iya.

Ayhan, malawig-lawig na ang ila nga pag-inupdanay, kag ayhan madamo naman sila sang nahibalu-an nahanungud sa Iya nga pagkatawo, kag gani, kon may makahambal nga may “otoridad” nahanungud sa “character” sang aton Ginuo, ini wala sang liwan kundi ang Iya mismo nga mga sumulunod.

Maayo ang sabat sang mga apostoles sang pamangkut sang aton Ginuo kon sin-o Siya suno sa mga tawo, apang sang ginpatuhoy na sa ila ang pamangkut kon sin-o Siya para sa ila, ayhan na-ukyan sila, kay ang pamangkut sang aton Ginuo wala nagakinahanglan sang sabat nga ginabase sa “tsimis” ukon “sugid-sugid” ukon sa “ideya”, kundi sa ila “personal experience” sang Iya nga presensya sa ila tunga. Si Pedro gid lang ang isganan nga nagtindog kag nagpahayag nga Siya amo ang Kristo! - sabat nga wala ginbase sa iya eksperyensya sa kay Jesus, kundi paagi sa pagtudlo sang Espiritu Santo nga amo ang nagtulod sa iya sa pagpahayag sini nga pagtuo.

Tubtub subong, padayon man kita nga ginapamangkut sang aton Ginuo kon sin-o Siya para sa aton. Indi suno sa aton mga nabasahan, ideya, ukon nabati-an sa mga sermon, kundi kon sin-o Siya sa aton adlaw-adlaw nga pagkabuhi! Ginasiling gani nga “mahapus mangin Kristiyano apang mabudlay ang magpaka-Kristiyano.” Sin-o kag ano si Kristo sa aton?

23rd Sunday in Ord. Time (B) 2nd Option

23^rd Sunday in Ordinary time (B)

Sang nagligad nga Domingo, gin-“expose” sang aton Ginuong Jesukristo ang pagpakita-kita sang mga Pariseo- ang ila HYPOCRISY!- Iya pa gani ginsulit ang gintagna ni Propeta Isaias sang ini maghambal nga: “Ini nga mga tawo nagapadungug lamang sa akon sa ila mga bibig, pero ang ila tagipusuon malayo gid sa akon. Wala pulos ang ila pagsimba sa akon…” Ang PAGKA-HIPOKRITO ukon ang PAGPADAYAG-DAYAG nga pagkabuhi isa lamang ka pagpasundayag… isa lamang ka SHOW ukon daw isa lamang ka PALAGAWA-ON  nga pagkabuhi. Para sa aton Ginoo, ining sobra nga pagpakita-kita, NAGATABON sang aton minatuod nga pagkatawo. Amo gani nga  may expression ang mga tigulang nga nagasiling: “Baw, kabuot sa iya tulukon, gali kay sa idalum PURO DUKUT!” Amo ini nga sahi s ang pamatasan  ang wala na-ilaan sang aton Ginoo.

Sa subong nga Domingo, ang kabaliskaran naman sining pagpakita-kita ang iya ginbutang sa hayag… kag ini amo ang PAGPANAGO. Gindala sa Iya ang tawo nga bungol kag halos makahambal… kon sa aton pa PITLA! Nakahibalo kita kon ano ang kahimtangan sining mga sahi sang mga tawo sa aton sosyedad- sila ginapataw-an lamang, ginasika-sika, kag ginahimo nga komedya  sang mga “normal” nga tawo. Ini nga mga tawo, masami manubo ang ila “self-esteem”. Nagapangibabaw sa ila ang “inferiority complex”- para sa ila, makahuluya ang ila nga sitwasyon.

Ang aton Ginoo nakahangup gid sa ginadangatan sini nga tawo, sa bagay, nga agud indi sya “pagpyestahan” sang mga mata sang madamo nga nagatan-aw, gindala sya sang aton Ginoo sa unhan, kag didito ginhimo ang “ritwal” sa pag-ayo sa iya.

May ginhambal ang aton Ginoo sa sini nga tawo agud makabati na sya kag agud makahambal sing maathag. Ang tinaga: EFFATA! Nga kon sayuron, MAGBUKAS KA!... Magbukas ka sa imo ginapanagu-an! Magbukas ka kag mag-gwa sa imo KUTIBA tungud ang Dios naga-uli sang KAAYO nga Iya ginbuhat sang pagtuga sang tanan nga mga butang. Magbukas ka kag indi ka magkahuya, kay ikaw gintuga man suno sa laragway sang Dios.

Mga utod, ayhan madamo man kita sang mga “SIRADO” nga mga bahin sang aton kaugalingon. Ginatabunan naton ini paagi sa pagpakuno-kuno nga daw sa “ok” lang ang tanan. Nangin sirado kita masami tungud nahadluk kita nga basi kon buksan naton ang aton kaugalingon, mangin palataw-an lamang ang aton pagpangabuhi! Masami, nangin sirado man kita tungud indi kita luyag magpakigbahin sa kabuhi sang nagakinahanglan, nano pa, bisan ang aton mga kamut pirmi lang nagakumo kon may yara nga bululigan! Isa ini ka sahi sang pagpakuno-kuno, kay sa pagkamatuod, sarang gid kita makabulig, ugaling ginatago naton ang aton kapasidad sa pagbulig tungud ang aton ginapanumdum amo lang ang aton kaugalingon- our selfishness ang greed- ang aton pagkamaiya-iyahon.

Sa sining Santos nga Misa aton pangamuyu-on ang ginhambal sang aton Ginoo: Effata! Ginoo, buksi ang amon tagipusuon nga mangin tampad sa amon kaugalingon suno sa Imo pagtuga sa amon... Effata! Ginoo, buksi ang amon kaugalinon nga magtalupangud sang kinahanglan sang amon isigkatawo… Effata! Ginoo buksi ang amon kaugalingon nga indi kami magmangin-hipokrito kundi mangin tampad sa amon kaangtanan sa isa kag isa.

23rd Sunday in Ordinary Time (B)

PAG-AMBIT SA BULUHATON SANG DIOS!

Sa aton nga Ebanghelyo karon nga Dominggo, ginsaysay ni San Markos ang hitabo sang pag-ayo sang aton Ginuo sa isa ka tawo nga bungol kag halos makahambal. Pagkatapos nga ang tawo nag-ayo, kag naglapnag ang maayong balita nahanungud sini, ang tanan nga nakabati natingala gid kag naghambal:         “Daw ano kaayo ang Iya paghimo sang tanan nga mga butang!” Ini nga mga pulong, indi lamang sang pagpahayag sang kahangawa ukon katingala, kundi isa ka “expression” sang mga Israelinhon sang PAGKAGAMHANAN sang Diyos. Ini nga ekspresyon, ginbase sa dinalan sang Santos nga Kasulatan sa Libro sang Genesis sang pagtuga sang Diyos sang tawo kag sang tanan nga mga butang sa sining kalibutan: “Ginlantaw sang Diyos ang tanan Niya nga ginhimo kag nanami-an gid Siya!” Buot silingon nga “MAAYO gid ang paghimo Niya sang tanan nga mga butang!”

Sa pag-”quote” sang mga tawo sini nga dinalan sang Pagtuga sang Diyos, ila man ginasiling kag ginapahayag nga ang ginbuhat sang aton Ginuong Jesus, isa ka buluhaton sang Diyos, kag ini nagapatima-an nga sila nagatuo nga ang aton Ginuo nagikan sa Diyos. Ang Iyang mga buhat nagapahayag kag nagapanaksi sang Iya pagka-Diyos, tungud ini nagahalin sa Iya matuod nga Kinatuhay. “Jesus’ actions give witness to the words and Good News He proclaimed!”

Kita, bilang mga sumulunod sang aton Ginuo dapat man magpanaksi sang buluhaton sang Diyos tungud kita mga “anak” Niya. Ang aton bala mga buhat nagapahayag man sang Maayong Balita sang Ginuo?

22nd Sunday in Ordinary time (B)

TAMPAD VS PAKUNO-KUNO

“Paano naton mahibalu-an ang minatuod sa butig? Paano naton makilala ang “tunay” sa “peke”? Ang pang-”gwa” nga pagkatawo sarang makabulag sa aton sa minatu-od nga tinutuyo nga yara nagaluntad sa tagipusu-on sang tawo. Si Propeta Isaias nagpanagna sini sa iya nga libro: “nga ang Ginuo indi maghukum paagi sa Iya makita, ukon paagi sa sugid-sugid lang; Pagahukman Niya ang mga imol sing nagaka-igo kag apinan Niya ang kinamatarong sang mga mapa-inubuson.” Buot silingon nga ang Diyos indi malimbungan tungud sa aton ginapakita nga pamatasan, tungud Siya nagalantaw sa SULUD sang aton nga kasing-kasing! Amo gani nga mabaskug gid nga ginsulit sang aton Ginuo ang mga pulong ni Isaias nga Propeta ang nahanugud sa mga tawo nga ang ila pagkabuhi, indi sang tampad, kundi PAKITA-KITA lamang: “Ang Diyos nagsiling, ginapadunggan ako sining mga tawo sang ila mga BIBIG, pero ang ila tagipusu-on MALAYO gid sa Akon. Wala sing pulos ang ila pagsimba sa akon, kay ginapatuman nila ang mga kasugu-an sang tawo subong mga kasugu-an sang Diyos!” Ini sila gintawag sang aton Ginuo sa mga pulong nga SALIMPAPAW, tungud gani MANABAW ang ila pagkabuhi nga wala mapasad sa kamatuoran kundi sa KABUTIGAN!

Pila ayhan sa aton ang nagapati sa sini nga hulubaton: “Follow what I say, but don’t follow what I do”? Amo ini ang sayup sang mga manunudlo sang kasugu-an kag sang mga Pariseo sang panahon sang aton Ginuo! Kon amo sini ang aton pagkabuhi, masiling naton nga ang aton pagkabuhi isa ka BUTIG! Tampad gid bala kita sa aton pulong paagi sa paghatag katumanan sini sa aton buhat?