ASCENSION (B)

GAMHANAN NGA MGA TANDA

  Nag-abut na ang tion nga nagabalik na ang aton Ginuo sa ‘pagpungko’ sa Iya trono sa ginharian sang Iya nga Amay sa langit. Nag-abut na ang ti-on nga ang Iya nga ‘presensya’ sa kalibutan magatakup na kag indi na siya makita sang Iya mga gintutun-an suno sa kina-andan nga may ara Siya nga unod kag tul-an.

  Apang sa Iya nga pagkayab pabalik sa Iya ginhari-an, katahum sang mga pulong sang paglugpay kag pagpakig-anut ang Iya nga ginbilin: “Ang mga tumuluo pagahatagan sang mga gahum sa pagtabog sang yawa sa Iya nga ngalan… magahambal sang iban nga mga hambal… mag-uyat sang mga man-ug, kag mag-inum sang hilo nga indi sila mahalitan… kag magatungtong sang ila mga kamot sa mga masakiton kag ini sila magaayo!” Buot silingon nga bisan Siya magabalik sa Iya nga Amay, sa gihapon Siya ‘MAGAPABILIN’ sa ila tunga sa pagpadayon sang misyon sa pagbantala sang Maayong Balita.

  Ini nga presensya sang aton Ginuo amo ang padayon nga nagapanghikot karon sa aton nga Simbahan. Siya padayon nga nagapakig-upod sa Iya nga Simbahan sa  pag-alay-ay sini, ilabi na gid sa iya mga ministeryo sa pagpalapnag sang Maayong Balita sa bug-os nga kalibutan.

  Sa Iya nga pagkayab, kita na amo ang gintugyanan sang mga hilikuton paagi sa aton mga buhat nga amo ang matuod-tuod nga tanda sang Iya ‘nagapabilin’ nga kaangtanan sa aton. Ang Kristo nga nabanhaw kag BUHI amo ang aton ginapahayag sa aton pagkabuhi!

  Sa pagtakup sang aton Ginoo sang Iya nga buluhaton sa sini nga duta, NAGASUGUD man ang aton nga buluhaton sa PAGPALAPNAG sang tanan nga Iya nga ginbilin nga handumanan.

  Sang nagliligad nga Domingo, Iya ginbilin ang buluhaton snag PAGHIGUGMA sa tagsa-tagsa ka sumulunod Niya… ang pinakadaku nga gugma nga mapakita sang isa ka abyan, amo ang PAGHALAD sang Iya kabuhi para sa iya. Isa ini ka daku nga panghangkat sa tagsa-tagsa sa aton subong nga nagapadayon sang pagpalapnag sang maayong balita. Diri kita gina-usisa sang katutum sang aton paghigugma nga ginatan-ay sa aton isig-katawo– paghigugma nga indi sing maiya-iyahon… paghigugma nga handa sa pag-antus para sa iya nga abyan… paghigugma nga wala sing pinili-an...labi sa tanan, ang talaksan sini nga paghigugma amo ang PAGHIGUGMA NGA WALA SING TALAKSAN! -The measure of the love of Jesus is to love without measure!

  Sa aton nga panahon subong padayon kita nga ginapahanumdum sang aton Ebanghelyo nga may yara kita nga mga buluhaton agud sa pagpahay sang buhi nga presensya sang aton Ginoo. Wala naga-untat ang aton pagpasantos sang kalibutan… wala naga-untat ang aton pagpanaksi sa Iya buhi nga presensya… wala naga-untat ang aton pagbuhat sang aton kaugalingon bilang mga bahin sang buhi nga lawas sang aton Ginoo.

  Sa pagkayab sang aton Ginoo mas nangin daku ang aton RESPONSIBILIDAD, tungud kay ang mga ginbuhat Niya sang yari pa Sia upod sa aton, amo na karon ang tulumanon nga aton gid dapat nga paga-buhaton.

  Kon aton gid nga usisaon sing maayo, madamo sa aton ang nagapahag nga kita mga KRISTYANO, apang sa masami, kita kristyano lamang tungud sa bunyag nga aton ginbaton, apang sa aton nga adlaw-adlaw nga pagpangabuhi, hayag man bala si KRISTO nga makita sa aton tunga… maathag bala nga Sia nagapabilin sa aton bisan pa nga nagkayab na Sia kag nagbalik sa Iya trono sa langit? Siling gani sang isa ka manunulat: “Christianity has never failed, it is rather the Christians who failed in their witness to Christ!” Kita bala ang mga sahi sang mga kristyanos ang iya ginatumud?