6th Sundy of Easter (B)

MATUOD NGA PAGHIGUGMA

  Isa ka Griego nga Pilosopo nga si Aristotle nagsulat: “Ang tawo nga halangdon handa sa paghimo sang tanan para sa iya mga abyan… kag kon kinahanglan, sa paghatag sang iya kabuhi para sa ila…”

  Sa aton Ebanghelyo subong, ini nga mga pulong ginpahayag man sang aton Ginuo sa katapusan nga panihapon. Iya ginasiling nga ini nga paghigugma labaw sa tanan nga sahi sang paghigugma: “Ang labing daku nga gugma nga mapakita sang isa ka tawo sa iya mga abyan amo ang paghalad sang iya kabuhi sa ila… subong nga Siya naghigugma sa aton.”

  Si Jesus wala magsiling nga balusan naton ang aton isigkatawo sang pareho kadaku nga paghigugma, kundi nga balusan naton ang Iya nga paghigugma paagi sa ATON PAGHIGUGMAANAY sa madalum nga paagi. Maghigugmaanay kamo subong nga Ako nagahigugma sa inyo.

Ining gugma nga ginatumod sang aton Ginuo indi sang BALATYAGON. Kon makahigugma kita sang tanan nga mga tawo sa aton balatyagon, maayo gid ini. Pero ang balatyagon daw isa lang ka ‘icing on the cake’. Indi ini ang labing importante. Tungud ini nga sahi sang paghigugma isa lamang ka hapaw nga sahi sang pagpakita-kita. Ang balatyagon, naga-abut kag nagahalin sa indi mo gani matalupangdan nga tion. Katulad sang ‘icing’, kon ang aton nga paghigugma ginabase lamang sa balatyagon, ang aton matilawan indi ang matuod nga sabor sang ‘cake’ kundi ang palabor-labor lamang nga masami sarang makatiplang sa aton husto nga panabor.

Diri ginapatuhoy sang aton Ginoo ang Iya mensahe subong– ang paghangup sang matuod-tuod nga kahulugan sang paghigugma… paghigugma nga wala lamang ginahambal sang aton mga baba ukon ginabatyag sang aton balatyagon, kundi isa ka buluhaton sa aton adlaw-adlaw nga pagpangabuhi.

   Ang labing importante amo ang BUHAT. Kag ang paghigugma paagi sa buhat nagakahulugan sini: pagpangamuyo, paghimo sing maayo, pagpatawad, pagbendisyon, dili paghusgar, kag pag-alagad. Ang paghigugma sa sini nga paagi– sa paagi ni Ginoong Jesus– indi sang madali nga buhaton, tungud ini indi sang ‘drama’, kundi isa ka hamtong nga desisyon!

  Sa sining paghigugma, Iya ginpahayag ang kabug-usan sang Iya nga kaangtanan sa aton, nga wala sing lipud-lipod ukon mga tinago nga mga katingalahan. Paagi sa aton Ginuong Jesus, ginpahayag sang Amay ang Iya nga paghigugma sa aton tanan nga wala sang “hawid-hawid”… wala sang “limbong” ukon pagbinutig… wala sing katapusan, bisan ini nagakahulugan sang paghalad sang kabuhi sang Iyang Anak didto sa Krus!

  Amo ini ang KAMATUORAN sang PAGHIGUGMA sang Diyos! Indi lamang sang  “pakita-kita”, kundi ginalikupan sang kamatu-oran! Sa sini nga paagi, ginpahayag sang Diyos ang Iya matuod-tuod nga kaangtanan sa tawo, kag ini amo nga Siya ang Diyos nga NAGAHIGUGMA.

  Amo gani nga si Jesus wala nagkabig sa aton nga mga suluguon kundi mga ABYAN, tungud ginpahayag Niya sa aton tanan ang bug-os nga kamatuoran sang paghigugma sang Diyos. Ang paghigugma indi sang butigon… ang paghigugma TAMPAD, kag indi sang MAIYA-IYAHON! Matuod man bala ang aton paghigugma?