TRINITY SUNDAY (B)

WATER IS THICKER THAN BLOOD!

  Ang pagpadala sang aton Ginoong Jesukristo sang Iya mga gintutun-an, indi lamang sa kon pila ka mga katawohan ukon mga rasa, ukon mga duog. Kundi ini nga pagpadala amo ang pagkadto sa BUG-OS nga kalibutan. Siya nagpadala sa ila sa pagbantala sang MAAYONG BALITA sa ngalan sang AMAY, KAG SANG ANAK, KAG SANG ESPIRITU SANTO.

  Ang nahauna nga buluhaton sang mga gintutun-an amo ang PAGBAUTISO sang ila ginabantalaan. Pagbautiso nga nagadala sang “pormula” sang Santisima Trinidad– sa ngalan sang Amay, kag sang Anak, kag sang Espiritu Santo. Indi sa ngalan ni Jesukristo, ukon sa ngalan lang sang Amay, ukon sa ngalan lamang sang Espiritu Santo. Kundi, sa ngalan sang Amay, kag sang Anak, kag sang Espiritu Santo.

  Sa bagay nga sa aton pagbase sa sining Santos nga mga dinalan sa Biblia, aton makita nga ang “balido” lamang nga pagbunyag nasandig kon ini ginabuhat sa ngalan sang Santisima Trinidad.

  Ang Sakramento sang pagbunyag ginakabig nga aton nga ikaduha nga pagkatawo. Sa aton nahauna nga pagkatawo, kita nangin katapo sang panimalay sang aton mga ginikanan. Diri sa aton nahauna nga pagbunyag ginabase ang hulubaton nga: “Blood is thicker than water.” Apang sa aton ikaduha nga pakatawo, kita nahimo nga mga “anak” sang Dios kag nangin bahin sang “daku” nga pamilya sang Dios nga amo ang Simbahan. Diri man, nagbaliskad ang aton tawohanon nga hulubaton. Ini nangin: “Water is thicker than blood.” tungud kita nangin mag-ululutod paagi sa TUBIG kag Espiritu Santo. Ang aton bala pagkabuhi, nagapamatuod nga kita mag-ululutod kag Anak sang isa lamang ka Amay sa langit?  

 Ang Santisima Trinidad isa ka haligi sang aton nga pagtulu-ohan, sa bagay nga kita ginahangkat gid sa pagbuhat sang aton mga katilingban nga naangut sa kabuhi sang Isa ka Dios nga may Tatlo ka mga Personas nga nagakabuhi sa HIMPIT NGA PAGHIGUGMA! Diri naton i-angut ang aton kaangtanan sa isa kag isa, bilang isa ka Lawas sang aton Ginoong Jesus.         

PENTECOST (B)

 ANG MANUGPABAKUD

  Pagkatapos sang singkwenta (50) ka adlaw  nga mapatay ang aton Ginuo sa kahoy sang Krus, kag sa pagligad sang madamo nga mga beses nga Iya ginpamatud-an nga Siya matuod nga NABANHAW, karon Iya na ginahatag ang katumanan sang Iya nga promisa sang Siya magkayab sa paglingkod sa tuo sang Iyang Amay, sang nagligad nga Dominggo, nga Siya magapadala sang isa ka Mananabang nga mangin aton kabulig sa pagpadayon sang Iya ginbilin nga misyon nga amo ang pagbantala sang Maayong Balita sa bug-os nga kalibutan.

  Ining Espiritu Santo Iya nga ginhatag sa Iya mga apostoles paagi sa aksyon sang “huyop” sa ila kaupod ang paghatag sang awtoridad sa pagpatawad sang mga sala. Ang huyop nagapatima-an sang hangin, kag ini nga hangin amo ang nagahatag sa aton sang kabuhi! Ang tawo nga mahubsan sang hangin, madulaan man sang kabuhi. Gani, sa “paghuyop” sang aton Ginuo sa mga apostoles, Iya man ginhatag sa ila ang isa ka “bag-o” nga kabuhi, tungud sugud karon, magasugud man sila sang isa ka bag-o nga pagpanglakaton, kag ini amo ang pagwali sang Maayong Balita sa tanan nga mga kapungsoran.

  Ini nga Espiritu Santo, amo ang nagapabakud sa kabuhi sang Simbahan sa aton nga panahon. Ang promisa sang aton Ginuo nga Siya mangin kaupod naton paagi sa Espiritu Santo nagapabilin nga matuod. Ang presensya sang Espiritu Santo indi lamang sang katumanan sang panaad sang aton Ginoo nga mangin yara pirmi ang Iya nga presensya sa aton, kundi nga ang Iya nga presensya mas madalum pa sang sa aton nga ginapaabut, tungud ini nga presensya amo ang Iya presensya MISMO SA ATON KAUGALINGON… ang presensya nga yara lang Sya sa SULOD sang aton kaugalingon. Siling gani sang isa ka manunulat: “Sang paskwa sang Pagkatawo sang aton Ginoo, aton naangkon ang Dios nga NANGIN KAUPOD NATON– ang EMMANUEL. Apang ang Pentekostes o ang BUGAY  SANG ESPIRITU SANTO indi lamang nga Sya nangin Dios-nga-kaupod-naton, kundi Sya nangin Dios-nga YARI-sa aton!

ANECDOTE

A FILIPINO IN HEAVEN

A Filipino man died and went to heaven. Before he could enter the Pearly Gates, Saint Peter had to ask him three questions.

The first one Saint Peter asked was, "How many days are there in a week?"

The Filipino man answered, "Three. Yesterday, today, and tomorrow."

The second question Peter asked was, "Can you use yellow, pink and green in one sentence?"

The man answered, "Of course... The phone greens, I pink it up and say Yellow!!"

The last question Peter asked the Filipino man what GOD's name was.

He replied, "Howard... as in 'our father howard be thy name...'"

FOOD FOR THOUGHT

 “... without darkness, nothing comes to birth, as without light, nothing flowers.” (May Sarton)

ASCENSION (B)

GAMHANAN NGA MGA TANDA

  Nag-abut na ang tion nga nagabalik na ang aton Ginuo sa ‘pagpungko’ sa Iya trono sa ginharian sang Iya nga Amay sa langit. Nag-abut na ang ti-on nga ang Iya nga ‘presensya’ sa kalibutan magatakup na kag indi na siya makita sang Iya mga gintutun-an suno sa kina-andan nga may ara Siya nga unod kag tul-an.

  Apang sa Iya nga pagkayab pabalik sa Iya ginhari-an, katahum sang mga pulong sang paglugpay kag pagpakig-anut ang Iya nga ginbilin: “Ang mga tumuluo pagahatagan sang mga gahum sa pagtabog sang yawa sa Iya nga ngalan… magahambal sang iban nga mga hambal… mag-uyat sang mga man-ug, kag mag-inum sang hilo nga indi sila mahalitan… kag magatungtong sang ila mga kamot sa mga masakiton kag ini sila magaayo!” Buot silingon nga bisan Siya magabalik sa Iya nga Amay, sa gihapon Siya ‘MAGAPABILIN’ sa ila tunga sa pagpadayon sang misyon sa pagbantala sang Maayong Balita.

  Ini nga presensya sang aton Ginuo amo ang padayon nga nagapanghikot karon sa aton nga Simbahan. Siya padayon nga nagapakig-upod sa Iya nga Simbahan sa  pag-alay-ay sini, ilabi na gid sa iya mga ministeryo sa pagpalapnag sang Maayong Balita sa bug-os nga kalibutan.

  Sa Iya nga pagkayab, kita na amo ang gintugyanan sang mga hilikuton paagi sa aton mga buhat nga amo ang matuod-tuod nga tanda sang Iya ‘nagapabilin’ nga kaangtanan sa aton. Ang Kristo nga nabanhaw kag BUHI amo ang aton ginapahayag sa aton pagkabuhi!

  Sa pagtakup sang aton Ginoo sang Iya nga buluhaton sa sini nga duta, NAGASUGUD man ang aton nga buluhaton sa PAGPALAPNAG sang tanan nga Iya nga ginbilin nga handumanan.

  Sang nagliligad nga Domingo, Iya ginbilin ang buluhaton snag PAGHIGUGMA sa tagsa-tagsa ka sumulunod Niya… ang pinakadaku nga gugma nga mapakita sang isa ka abyan, amo ang PAGHALAD sang Iya kabuhi para sa iya. Isa ini ka daku nga panghangkat sa tagsa-tagsa sa aton subong nga nagapadayon sang pagpalapnag sang maayong balita. Diri kita gina-usisa sang katutum sang aton paghigugma nga ginatan-ay sa aton isig-katawo– paghigugma nga indi sing maiya-iyahon… paghigugma nga handa sa pag-antus para sa iya nga abyan… paghigugma nga wala sing pinili-an...labi sa tanan, ang talaksan sini nga paghigugma amo ang PAGHIGUGMA NGA WALA SING TALAKSAN! -The measure of the love of Jesus is to love without measure!

  Sa aton nga panahon subong padayon kita nga ginapahanumdum sang aton Ebanghelyo nga may yara kita nga mga buluhaton agud sa pagpahay sang buhi nga presensya sang aton Ginoo. Wala naga-untat ang aton pagpasantos sang kalibutan… wala naga-untat ang aton pagpanaksi sa Iya buhi nga presensya… wala naga-untat ang aton pagbuhat sang aton kaugalingon bilang mga bahin sang buhi nga lawas sang aton Ginoo.

  Sa pagkayab sang aton Ginoo mas nangin daku ang aton RESPONSIBILIDAD, tungud kay ang mga ginbuhat Niya sang yari pa Sia upod sa aton, amo na karon ang tulumanon nga aton gid dapat nga paga-buhaton.

  Kon aton gid nga usisaon sing maayo, madamo sa aton ang nagapahag nga kita mga KRISTYANO, apang sa masami, kita kristyano lamang tungud sa bunyag nga aton ginbaton, apang sa aton nga adlaw-adlaw nga pagpangabuhi, hayag man bala si KRISTO nga makita sa aton tunga… maathag bala nga Sia nagapabilin sa aton bisan pa nga nagkayab na Sia kag nagbalik sa Iya trono sa langit? Siling gani sang isa ka manunulat: “Christianity has never failed, it is rather the Christians who failed in their witness to Christ!” Kita bala ang mga sahi sang mga kristyanos ang iya ginatumud?

6th Sundy of Easter (B)

MATUOD NGA PAGHIGUGMA

  Isa ka Griego nga Pilosopo nga si Aristotle nagsulat: “Ang tawo nga halangdon handa sa paghimo sang tanan para sa iya mga abyan… kag kon kinahanglan, sa paghatag sang iya kabuhi para sa ila…”

  Sa aton Ebanghelyo subong, ini nga mga pulong ginpahayag man sang aton Ginuo sa katapusan nga panihapon. Iya ginasiling nga ini nga paghigugma labaw sa tanan nga sahi sang paghigugma: “Ang labing daku nga gugma nga mapakita sang isa ka tawo sa iya mga abyan amo ang paghalad sang iya kabuhi sa ila… subong nga Siya naghigugma sa aton.”

  Si Jesus wala magsiling nga balusan naton ang aton isigkatawo sang pareho kadaku nga paghigugma, kundi nga balusan naton ang Iya nga paghigugma paagi sa ATON PAGHIGUGMAANAY sa madalum nga paagi. Maghigugmaanay kamo subong nga Ako nagahigugma sa inyo.

Ining gugma nga ginatumod sang aton Ginuo indi sang BALATYAGON. Kon makahigugma kita sang tanan nga mga tawo sa aton balatyagon, maayo gid ini. Pero ang balatyagon daw isa lang ka ‘icing on the cake’. Indi ini ang labing importante. Tungud ini nga sahi sang paghigugma isa lamang ka hapaw nga sahi sang pagpakita-kita. Ang balatyagon, naga-abut kag nagahalin sa indi mo gani matalupangdan nga tion. Katulad sang ‘icing’, kon ang aton nga paghigugma ginabase lamang sa balatyagon, ang aton matilawan indi ang matuod nga sabor sang ‘cake’ kundi ang palabor-labor lamang nga masami sarang makatiplang sa aton husto nga panabor.

Diri ginapatuhoy sang aton Ginoo ang Iya mensahe subong– ang paghangup sang matuod-tuod nga kahulugan sang paghigugma… paghigugma nga wala lamang ginahambal sang aton mga baba ukon ginabatyag sang aton balatyagon, kundi isa ka buluhaton sa aton adlaw-adlaw nga pagpangabuhi.

   Ang labing importante amo ang BUHAT. Kag ang paghigugma paagi sa buhat nagakahulugan sini: pagpangamuyo, paghimo sing maayo, pagpatawad, pagbendisyon, dili paghusgar, kag pag-alagad. Ang paghigugma sa sini nga paagi– sa paagi ni Ginoong Jesus– indi sang madali nga buhaton, tungud ini indi sang ‘drama’, kundi isa ka hamtong nga desisyon!

  Sa sining paghigugma, Iya ginpahayag ang kabug-usan sang Iya nga kaangtanan sa aton, nga wala sing lipud-lipod ukon mga tinago nga mga katingalahan. Paagi sa aton Ginuong Jesus, ginpahayag sang Amay ang Iya nga paghigugma sa aton tanan nga wala sang “hawid-hawid”… wala sang “limbong” ukon pagbinutig… wala sing katapusan, bisan ini nagakahulugan sang paghalad sang kabuhi sang Iyang Anak didto sa Krus!

  Amo ini ang KAMATUORAN sang PAGHIGUGMA sang Diyos! Indi lamang sang  “pakita-kita”, kundi ginalikupan sang kamatu-oran! Sa sini nga paagi, ginpahayag sang Diyos ang Iya matuod-tuod nga kaangtanan sa tawo, kag ini amo nga Siya ang Diyos nga NAGAHIGUGMA.

  Amo gani nga si Jesus wala nagkabig sa aton nga mga suluguon kundi mga ABYAN, tungud ginpahayag Niya sa aton tanan ang bug-os nga kamatuoran sang paghigugma sang Diyos. Ang paghigugma indi sang butigon… ang paghigugma TAMPAD, kag indi sang MAIYA-IYAHON! Matuod man bala ang aton paghigugma?