5th Sunday Ord. Time (B)

5^th Sunday in Ord. Time (B) – Feb. 8, 2015

(Mk. 1: 29-39)

“Ginpalapitan sia ni Jesus,  gin-uyatan sa kamot kag ginpabangon. Nag-ayo sia sa gilayon kag nag-amuma sa ila.”

  Indi gid malikawan angpagka-pamoso sang aton Ginoo sang Sia nagalibut sa mga banwa sang Israel.-GINAPANGITA Sia sang halos tanan nga mga tawo tungud sang mga pagpang-ayo nga iya ginahatag sa mga tawo nga may mga kasablagan, bisan pa ang pagtabug sang mga malain nga mga espiritu. Sa pagkadamo gid sang mga katingalahan nga ginbuhat ang aton Ginoo sa bagay nga bisan diin man Sia magkadto, “gina-apungan” Sia sang mga tawo.

Sang panahon sang aton Ginoo, madamo man sang mga manugbulong (mga doktor), katulad man sa aton nga panahon subong. Apang ngaman nga ang mga tawo, imbes nga magkadto sa mga manugbulong, nagakadto sa Iya? Amo ini ang ginapahayag subong sang aton Ebanghelyo. Ginsugiran kita ni San  Markos sa Ebanghelyo nga sang nagkadto si Jesus sa balay ni Pedro, naabtan nila nga may hilanat ang ugangan nga babayi ni Pedro, kag ginpalapitan sia sang aton Ginoo kag GIN-UYATAN sa kamot kag ginpabangon, kag nag-ayo sia sa gilayon kag nag-amuma sa ila! Amo man siguro sini ang ginbuhat sang aton Ginoo sa iban pa nga Iya nga ginpang-ayo, sa tagsa ka mga masakiton nga Iya masumalang. Nagalutaw gid ang elemento sang PAGTANDUG sang aton Ginoo sa tagsa ka tawo nga Iya masumalang. Diri ang kinalain sang mga manugbulong sa pagpang-ayo sang aton nga Ginoo. Ang mga manugbulong, nagabulong sang kasablagan ukon sakit, apang ang aton Ginoo, nagabulong sang BUG-OS NGA TAWO.

  May isa ka pasyente nga nagreklamo sa isa ka doktor, “Doktor, siling niya: Ngaman nga ang inyo pirmi lang nga ginahambal amo ang parti sa akon sakit? Ngaman wala kamo gapamangkut kon nano ang amon BALATYAGON nahanungud sa sakit?”. Ayhan ini nga pamangkut indi lamang para sa mga doktor, kundi para man sa aton tanan. Masami nagabulig kita sa mga nagakinahanglan, sa mga nagamasakit, sa mga ginagutum, sa mga ginhalitan, ukon sa mga wala-wala, apang sa masami aton lamang ginatalupangud ang ila mga kakulangan sa materyal nga mga bagay, apang wala naton ginatalupangud ang kabug-osan sang iya nga pagkatawo.

  Ayhan manami nga dal-on ang mga “street children” sa Island Cove sa Pampangga, sang pag-abut sang Santo Papa, agud nga ‘makatilaw’ man sila sang masulhay nga pangabuhi, nga wala sila sa kalye, apang isa lamang ini ka paghatag sang sayup nga paglaum (false hope) kon pagkatapos sang kasulhay didto sa Island Cove, mabalik man lang sila sa kalye nga padayon nga magapuyo didto… mangalimos, magpang-ukay sang mga basura sa pagpangita sang pagkaon kag pangabuy-anan, magtugyan sang ila mga kaugalingon sa kamut sang mga sindikato, kag iban pa.

  Ang aton Ginoo nagpakita subong kon ano ang matuod nga pag-ayo sa aton. Katulad sang ugangan nga babayi ni Pedro nga Iya gintandug, ini nga aksyon  sang aton Ginoo, amo ang naghatag sa iya sa pagtalupangud sang PAGPAKIGBAHIN KAG PAGHIUSA sang Dios sa iya nga balatyagon, kag nagtulod sa iya sa pagbangon kag sa pag-amuma sa ila. Amo ini ang matuod nga KAHILWAYAN. Sa pag-ayo sang aton mga sakit kag kasablagan, kita dapat may pagtalupangud nga sarang kita makalakat liwat sang isa ka bag-o nga pagpanglakaton tuhoy sa mas maayo nga pagkatawo, kag indi magpabilin sa aton daan nga ‘malaba-ab’ nga pagkabuhi!

  Ginatulok naton subong ang aton Ginoo. Kita ang nagapadayon sang Iya gin-umpisahan. Indi gid ma-question aton pagkamabinuligon, apang sa aton pagbulig, ginahaw-as gid bala naton ang aton ginabuligan sa iya kahimtangan agud makabutwa sia kag makasugod sa isa ka bag-o nga pagkabuhi kag pagpanglakaton? Amo ini ang sahi sang pagtandug nga aton dapat ipalab-ut sa aton mga utod nga nagakinahanglan- may pagpanibag-o.