1st Sunday of Advent- Year B

1^st Sunday of Advent- Year B (Nov. 30, 2014)

(Mark 13: 33-37)

  Sa ginsulat nga istorya sa “Homer’s Odyssey”, ang hari nga si Ulysses, Hari sang Ithaca, ginsiling nga ‘nagbiya sa iya pamilya kag sa iya nga ginharian agud sa pagpakigsumpong sa ‘Trojan War’. Pagkaligad sang napulo (10) ka malawig nga mga tinuig, wala gid sing may nakabalita kon nano na ang natabo sa iya. Ang Iya nga asawa nga si Penelope, anak ni Telemachus, kaupod ang iya matutum nga ido nga si Argos, yara kada adlaw sa baybayon sang ila duog nga nagalantaw sa malayo, kon bala may makita sila nga sakayan nga nagapakadto sa ila. Apang sa malawig nga mga binulan kag mga tinuig, wala gid sila sing may nakita nga patimaan.

  Nagligad pa gid ang masunod nga napulo ka tuig sa pagbinantay apang wala gid sing may nag-abut. Madamo sang mga sinakpan ni Ulysses ang naghuna-huna kag nagsiling nga patay na si Ulysses kag indi na gid sya magbalik sa ila lugar. Ang mga katawohan nagkabuhi sa patuyang kag pag-inabusar, sa pagpinabu-ang kag paghinubog. Ginpangkawat nila ang mga pagkabutang sang palasyo ni Ulysses, kag madamo ang nagpalapit sa pagpangaluyag sa iya asawa nga si Penelope.

  ‘Dali na, magayon nga Penelope!’ singgit sang mga nagapangaluyag. ‘Tion na nga magpana ikaw liwat, agud may bag-o na nga hari ang Ithaca! Magpili ka na!’ Si Penelope nagsabat sing subong sini: ‘Ihatag naton ang pagbulut-an sa mga dios. Yara ang pana ni Ulysses, nga sia lang ang maka-inat. Pangasaw-on ko lang ang tawo nga may yara nga kusog nga ‘maka-inat’ sang iya nga pana.’ Gani, ang tagsa-tagsa nga nagapangaluyag sa iya nagpaindis-indis sa pag-inat sang pana ni Ulysses, apang tanan sila napaslawan.

  May isa ka manugpakilimos nga nagkaslod sa ila nga ginatipunan, kag ang mga nagapangaluyag nagyaguta sa iya kag ila sya ginhaboy sang mga pagkaon samtang nagasinggitan sila, ‘Palayo tigulang! Kabaho sa imo kag kahigko!’ apang ang isa sa ila nagsiling: ‘Ngaman nga indi naton pagpa-entrahon ining manugpakilimos sa sini nga paindis-indis’, kag ginyaguta nila ang tigulang kag ginkinadlawan. Apang ang tigulang nagpadayon sa pagsaka sa hagdan sa diin nahamtang ang pana ni Ulyssess… ginkuha ang pana kag gin-inat ini nga wala sang kabudlay. Nagsinggit si Penelope: ‘Ulysses! Ulysses!’ ikaw ini! Ang mga nagyaguta naurungan, kag sa ila kakulba, nagdalalagan sila agud magpalagyo sa kay Ulysses, apang naglinupad lang ang pana ni Ulysses, kag wala gid, ni isa sini, nga wala magtupa sa iya puntariya.

  Nagsugod na kita sa panahon sang Adbiento, kag sa masami, nagapainu-ino kita sang palaabuton nga ‘Paskwa sang Pagkatawo sang aton Ginoo’-Christmas na- saulogon ta naman ang piesta sang pagkatawo ni Jesus sa Belen. Apang, sa aton nga balasahon subong, kita ginapahanumdum nga ang Adbiento indi lamang sang paghanda sa pagkatawo sang aton Ginoo, apang ang Simbahan naga-agda sa aton sa pagtulok sang KATUMANAN SANG ATON KALUWASAN sa PAGKARI NI KRISTO SA KATAPUSAN sang panahon. Wala kita makahibalo kon san-o ini mahanabo, apang ang Ebanghelyo subong maathag nga nagapahanumdum sa aton nga “mag bantay… kay wala kita makahibalo kon san-o magaabut ang agalon. Kon mag-abut sia sing hinali, kinahanglan nga indi kamo maabtan nga nagakatulog.”

  Amo ini ang tema sang aton Ebanghelyo subong: Nga kita dapat magmangin handa sa mga tion nga maga-abut sang hinali ang aton nga agalon. Indi lamang sa sining panahon sang Adbiento, kundi sa tagsa ka tinion sang aton kabuhi.

  Ang aton mga Obispo sang Pilipinas, nagdeklarar na subong nga tuig bilang ‘Tuig sang mga Kubos’, kag sa sini nga kaangtanan, aton ginatulok ang presensya sang aton Ginoo sa dagway sang aton mga kautoran nga mga imol, ginasika-sika, ginapatumbayaan, gin-abusaran, ginakangil-aran, ginakabig nga mga mahigko, ginhusgaran nga mga makasasala, ginapakanubo ang dignidad, kag ang mga kasubong sini sa ila! Amo ini ang mga kubos, ang mga BAHIN sang aton Simbahan, kag ayhan, ang tagsa-tagsa sa aton nga yari diri subong- tungud ang tagsa-tagsa sa aton may ginabit-bit man nga pagkakubos sa aton tagipusuon.

  Amo ini ang aton patuhoyan sang aton igtalupangud, kay diri sa sini, naga-abut ang aton Ginoo. Indi lang sa Paskwa sang Iya nga Pagkatawo, kundi sa subong gid nga tinion. Kilalahon naton ang Iya nga presensya paagi sa presensya sang tagsa-tagsa… yara Sia… katupad mo subong! Ano ang imo maamuma sa Iya? Kilalahon naton si Kristo sa aton tunga ilabi na gid sa aton kubos nga kaugalingon!