Mary Mother of God (Jan.1- Year A)

KAHIGAYUNAN SA PAGBAG-O

   Nagasugod ang bag-ong tuig sa aton pagpahayag nga si Maria amo ang aton ILOY! Ang iloy nagadala kag nagasagud sang kabuhi sa iya tagu-angkan. Kon ang bata mabun-ag na, padayon pa niya ini nga ginasapupo kag ginabantayan.

  Sa Ebanghelyo makita naton si Maria nga “mahipos” nga nagabantay. Sang mabatian niya ang makatili -ngala nga mga hitabo nga ginapanugid sang mga manugbantay sang karnero “gintipigan niya ini nga mga butang kag ginpamalandungan sa iya kaugali -ngon” (Lk 2:19).

  Si Maria nagahatag sa aton sang pamalandungon nga lain sang sa magahod nga mga pagsinadya nga dala sang Bag-ong Tuig.

  Ang pagkatawo ukon ang bag-o nga kabuhi amo ang labing importante kag makatalanhaga nga bugay. Ini ang ganhaan pakadto sa pagpanglakaton agud pangitaon ang plano sang Diyos para sa aton.

  Ang pinakamaayo nga paagi sa pagselebrar sang kabuhi amo ang pagtipig sini sa aton tagipusuon. Nagakahulugan ini nga kinahanglan naton ang tion agud nga mag-isahanon, magbinag-binag, kag magpangamuyo!- Wala gid sang gindulot nga maayo ang “kinagamo” sa pagsug-alaw sang Bag-ong Tuig!

  Ang malinong kag simple nga pagginawi– suno sa pagginawi ni Maria– nagahatag sa aton sing kusog sa pag-atubang sa mga hangkat sang kabuhi– sa kasadya ukon sa kasakit… sa mga pagtilaw ukon mga kadalag-an nga aton ginasumalang… sa mga sari-sari nga mga kasisit-an ukon kahamungayaan nga aton gina-agihan… sa tanan nga bahin sang aton nga pagkabuhi, ang laragway ni Maria nga aton Iloy, nagahangkat sa aton sa pag-atubang sini nga may pagpahamtang sang aton kaugalingon sa kamut sang Diyos nga nakahibalo kon ano ang pinaka-maayo sa aton.

Sa aton pagsugud sang isa ka bag-o nga tuig, aton ginatulok ang isa ka Iloy nga alagyan sang isa ka bag-o nga kabuhi. Ang isa ka iloy makahandum gid lang sang maayo nga mga butang para sa isa ka lapsag nga iya ginadala sa iya nga tagu-angkan. Ang isa ka iloy maka-”damgo” gid lang para sa kaayohan sang iya nga anak. Kag amo man ini ang ginahandum sang aton mahal nga Iloy sa tagsa-tagsa sa aton– isa ka kabuhi nga na-adornohan sang maayo nga pag-ginawi, paaagi sa aton pagpanibag-o tuhoy sa kaayohan sang aton kaugalingon.

Karon nga adlaw, nagasumalang kita sang isa ka bag-o nga pahina sa kalendaryo sang aton adlaw-adlaw nga pagkabuhi, kag ang mensahe sang pagpanibag-o padayon nga nagapanuktok sa aton tagsa ka tagipusu-on, nga sa aton pagbalay sang kwenta sang aton kabuhi sang nagligad nga tuig, ano bala ang mga bahin sang aton kabuhi nga nagakinahanglan sang pagpanibag-o. Siling gani “there is always a room for improvement”. Wala  sang “ulihi ang tanan” sa isa ka tawo nga nagapanglakaton sa pagpanibag-o. Sa pagkamatuod, ang kabuhi isa ka patag sa diin ang tanan may kahigayunan sa pagpanibag-o… ang tanan may oportunidad sa pag-umpisa liwat sang isa ka tikang tuhoy sa isa ka maayo nga bwasdamlag.

Sa aton pagsaulog subong sang Solemnidad ni Maria nga Iloy sang Diyos, aton ginatugyan sa iya ang aton mga handum sa pagbag-o. Paagi sa iya pag-ampo, ginatib-ong naton ang aton mga pangamuyo nga ini nga tuig mangin mabinungahon para sa tagsa-tagsa sa aton nga padayon nga nagapanglakaton tuhoy sa pagpa-umwad pa gid sang aton pagkabuhi bilang matuod nga mga anak sang Diyos.

Paagi sa pag-ampo ni Santa Maria nga Birhen, aton suguran ang isa ka bag-o nga tuig paagi sa aton bag-o nga pagkabuhi… bilang mag-ululutod nga nagapakigbahin sa kabuhi sang tagsa-tagsa.