1st Sunday of Advent (A)

IYA PRESENSYA YARA SA ATON TUNGA

“May estorya nahanungod kay Colonel Davenport, Speaker sang Connecticut House of Representatives nga natabu sadto anay sang 1789. Isa ka adlaw, samtang naga-session ang mga Kongregista, hinali lang nga nagdulom ang langit kag kahawaan. Ang iban nga mga Congressman naglantaw sa bintana kag nagpanumdom nga katapusan na sang kalibutan. Dayon may yara nga kinagamo sa mga Kongregista nga nagpangayo sang “immediate adjournment”. Apang si Davenport nagtindog kag naghambal: “Mga halangdon nga mga Congressman, ang Adlaw sang Paghukom magaabut subong ukon pwede nga indi man. Kon indi ini ang katapusan, ti, wala kita nagakinahanglan sang “adjournment”. Pero kon amo na gid man ini ang tion, akon ginapili nga makit-an nga nagahimo sang akon obligasyon. Gani, akon ginahinyo nga dalhon diri ang mga kandila.” Gindala ang mga kandila kag ang session nagpadayon.”

Si Kristo nagapanawagan subong sa Ebanghelyo sa Pagbantay kag Paghanda. Ang pagbantay o paghanda wala nagatumod sa kahadluk nga ginatuga sang pagpanumdom nahanungod sa makangilidlis nga mga matabu sa katapusan sang kalibutan. Kundi ini nagakahulogan, kon kay Colonel Davenport pa, sang matutom nga paghimo sang aton mga obligasyon bilang mga Anak sang Dios kag Manunubli sang Langit. Buot silingon, ang matuod nga paghanda o ang indi pagpapirot-pirot sang mata amo ang pagkabuhi sang matutom nga pag-alagad sa Ginuo, nga nagasunod sang Iya mga Kasugoan kag nagapabilin sa Iya Grasya.

Nagasugud naman kita sa isa ka bag-o nga pahina sa aton Kalendaryo Liturhiko sa Simbahan paagi sa aton pagsaulog sang Panahon sang Adbiento. Ang Adbiento naghalin sa tinaga nga “adventus”, buot silingon “ang pag-abut”. Sa pag-abut nga hitabo, duha ka mga bagay ang aton ginatumud. Ang manug-abut, kag ang nagapa-abut.

Sa pagkamatuod, ang manug-abut nga aton ginahulat, naka-abut na kag nagkabuhi na gani upud sa aton, apang Siya magakari liwat kag maga-abut bilang isa ka Hari sa isa ka bag-o nga panahon– ang panahon sang kahimayaan. Apang sa tunga sining duha ka klase nga pag-abut, may yara kita nga dapat talupangdon– Ang Iya nga pag-abut sa aton “adlaw-adlaw” nga pagpangabuhi. Ini nga pag-abut amo ang masami nga wala naton ginatalupangud tungud nawili kita sa madamo nga mga kalingawan sa sining kalibutan. Sa bagay nga masiling naton nga kon nahanungud sa aton ginapa-abut, wala kita sang ‘problema’ tungudSiya sigurado nga naga-abut sa aton tunga. Ang ‘problema’ yara sa bahin sang nagapa-abut– sa ATON!

Sa una nga pag-abut sang aton Ginuo, Siya nagpahayag sang Iya kaugalingon sa isa ka kubos nga bata nga natawo sa pasungan, kag Siya padayon nga nagbantala nga Siya padayon nga magapahayag sang Iya kaugalinon paagi sa mga ginagutum, gina-uhaw, ginpabay-an, kag mga ginbilanggo!- Sa mga PINAKAKUBOS! Gani Siya nagapahanumdum sa aton subong nga “magmanginhanda” kita agud matalupangdan naton Siya! Padayon Siya nga “naga-abut” sa aton tunga paagi sa mga maluya, mga ginasika-sika, mga nawad-an kag mga nakulangan naton nga mga kautoran. Yara Siya sa ila.

Ang aton nga tema subong nga semana nagapahanumdum sa aton nga magmuklat sing maayo sang aton mga mata tungud kay sa masami ang Iya nga pagkari napun-an sang madamo nga mga “disguises”. Ayhan naga-abut Siya paagi sa mga “problema” nga aton ginasumalang, o sa isa ka “solusyon” sa aton mga palaligban… sa isa ka tawo nga mas labi nga nagakinahanglan sang sa aton… sa isa ka hitabo sa diin kita ginahangkat nga magmangin maalwan sa aton pagpaambit sang aton kaugalingon! Yara lang Siya!