30th Sunday in Ordinary Time (C)

ANG MATUOD NGA MAPA-INUBUSON

Ano bala ang matuod nga pagpa-ubos? Amo ini ang ginasabat sang aton Ebanghelyo subong nga Dominggo. Ginasiling nga may yara nga pagpa-ubos nga ginatawag “false humility” ukon pakuno-kuno nga pagpa-ubos, kag pagpaubos nga MINATUOD. Amo ini ang ginpakita sang duha ka tawo nga nagpangamuyo sa templo sang Diyos. Ang isa “fariseo” nga mapa-inubuson apang pakuno-kuno lang ang iya nga pagpa-ubos tungud sa ulihi nagtapos siya sa iya pangamuyo nga ang ginhatagan sang “kadayawan” amo ang iya KAUGALINGON, kag ang isa nga “manugsukut sang buhis” nga minatuod nga mapa-inubuson tungud GINBATON niya ang iya PAGKAMAKASASALA sa atubangan sang Diyos!

Ang aton Ginuo nagsiling sa katapusan, nga ang nakabaton sang pagpatawad sang Diyos amo yadto ang nagbaton sang iya “kagamayon” sa pagbaton sang iya nga kasal-anan!

Ang pagpa-ubos wala nagakahulugan nga “ginapakanubo” mo ang imo kaugalingon sa bagay nga mangin “miserable” ang imo pangabuhi, kundi ang pagpa-ubos nagakahulugan nga ikaw MAKABATON SANG IMO MINATUOD nga estado ukon sitwasyon sa kabuhi!- Ginabaton mo ang minatuod nga lugar sang imo kaugalingon kag ang minatuod nga lugar sang Diyos sa imo kabuhi!

Kon ang imo nawong daw sa “pina-pa’” nga luy-a, apang sagad ka sugid nga ikaw ang pinaka-matahum nga tinuga… kada aga sa imo pagbugtaw, gina-atubang mo ang imo nawong sa salamin kag magsi- ling: “You are the most beautiful creature on earth”, ipa­-”check-up” ang imo mata, basi may diperensya!

Ang minatuod nga nagapa-ubos nakahibalo kon sa diin niya ibutang ang iya nga kaugalingon. Wala siya nagapamilit sa lugar sa diin siya wala sing ikasarang. Nakita niya ang iya limitasyon, ang iya kakulangan, ang iya indi masarangan. Sa bagay nga wala siya nagapadaku-daku sang iya kaugalingon, kundi nagabaton sang iya minatuod nga kahimtangan.

Madamo sa aton ang nangin biktima sining sayup nga pagkilala sang aton kaugalingon. Amo gani nga ginasiling sang isa ka psychologist nga sa aton nga panahon subong, madamo ang nagasuksuk sang ‘maskara’ agud matabunan ang minatuod naton nga pagkatawo. Amo ini kon ngaman lutaw sa aton ang negosyo sang ‘cosmetics’ tungud ang tanan indi kontento sang ila mga nawong. Madamo sa aton subong ang mga ‘beautified’ apang indi sang ‘beautiful.’ Daw sa  ginaling lang nga kon indi ka magsunod sa uso, malaw-ay ka… indi ka “IN’… INDI KA NAGAKABAGAY!

Ang aton Ebanghelyo subong nagapahanumdum sa aton nga sa atubangan sang Mahal nga Diyos, wala kita sang sarang mapabugal, kag kita nangin matahum lamang kon aton atubangon ang aton minatuod nga pagkatawo kay sa pagkamatu-od, ang tanan nga gintuga sang Diyos maayo na, tungud Iya na gintanum sa aton pagkatawo ang marka sang Iya pagka-Dios. Amo gani nga Siya wala nagalantaw sang aton pang-gwa nga pagkatawo, kundi Iya nga ginatulok ang sulod sang aton nga tagipusu-on tungud ang kaalibuturan sang aton tagipusu-on indi makabutig sa aton matuod nga pagkatawo.

Ang mapa-inubuson nga tawo wala nagalantaw sang iya kaugalingon sa iya kaugalingon nga talaksan, kundi sa talaksan sang Diyos. Ginatulok niya ang iya kaugalingon indi sa basehan kon ano ang mahambal ukon malibak sang tawo sa iya, kundi kon ano ang iya nga ‘balor’ sa atubangan sang Diyos. Katulad sang mapa-inubuson nga manugsukot sang buhis subong sa aton Ebanghelyo, siya makapamukpok gid lang sang iya nga dughan, sa pagbaton sang kamatuoran nga siya isa ka makasasala, kag nagakinahanglan siya sang kapatawaran agud siya magpanibag-o!

FOOD FOR THOUGHT

“He who knows others is wise;
He who know himself is enlightened.”

(LaoTzu)